مواقف مع سواقين التاكسى ادى لحيرة . التاكسى احسن ولا عربيتك

[nicegypt]

السلام عليكم جميعاَ .

كنت نسيت مواقف بعض سائقى التاكسى واللى اغبلها غريبة بعد امتلاكى لسيارتى .. وطبعا رجعت للتاكسى تانى لانى بشد
عربيتى .. السؤال اللى بفكر فية واجابتة تقريبا محيرة .. هل عربيتك احسن من التاكسى ام التاكسى افضل ؟
من ناحية كل شيئ .. السرعة .. الرحمة من القيادة فى غابة فوضاوية .. المصاريف والفلوس اللى كل شوية تطلع ... الخ

اسمحولي اقولكم على مواقف حصلت فى مشوار واحد بس ..
بدءت اليوم بأسم الله .. ونزلت الساعة 8 صباحاَ .. شاورت للاول تاكسى ابيض .. رايح المكان الفلانى .. قال لاء
واحد تانى قالى ماشى .. ركبت .. نزلنى تانى عند اول رصيف :)
بعد مركبت لقيتة بيقولي يا باشا الثورة وبتاع زود خمسة ج كمان ومش هيشغل العداد ! قلت لة لاء شغل عدادك مش راكب زينة هو .. مش عجبك نزلنى .. مكدبش خبر وركن قمت نازل بعد مبعدت عن المحطة ورخامة بقى منى وانا معروف برخمتى سبت لة الباب مفتوح على مصرعية ومشيت نيهاهاهاها :)

رجعت اشاور لتاكسى ابيض باردو .. مهو انا بشاور لتاكسى ابيض عشان العداد عشان اريح دماغي .. قالى لاء
وراة على طول تاكسى ابيض واسود شاهين .. صاحبة لابس النضارة الشمس ومروق نفسة كدة .. وقف بدون مشاور لة
قالى ايوة يا هندسة ؟؟ .. " عرف ازاي هة عرفها ازاي ؟ " ... قلت لة شكراَ يا هندسة . لقيت وش تانى ظهر اول مقلع
النضارة وقالى : يا هندسة الابيض زى الابيض واسود بل احنا ارخص من العداد تعالى بس قلت لة خلاص هدفع كذا
قالى لاء قلت لة شكراَ قالى بس نتفاهم قلت لة شكراَ انا مشورتش ليك اصلا انت اللى وقفت علشان معترض انى بشاور
للتاكسى الجديد اللى كان قدامك .. قالى يعنى مش جاي ؟ قلت لة " لا اله الا الله " رح حضرتة رد بـ " تيت توت "
كلمة مش لطيفة .. طبعا قلة ادب .. انا حر ف التاكسى اللى يعجبنى وقف لية دة ؟ وكمان شتم وجري .. ماشى ما علينا
دة كلة الساعة 8 الصبح فى بداية اليوم .. كدة اليوم بدء من اولة .. يا ستار .

وقف شاب صغير ف السن كدة ودماغة باينة بالعافية من تابلوة الفيرنا .. ركبت معة .. كعادة السواقين بياكلو دماغ الراكب
قعد يرغي وانا متجاهلة تماماَ .. المهم حكي لى على موقف غريب .. قلت لة بأختصار علشان متكلشى دماغي ع الصبح
هات لك سلاح " تحية لشنوري باشا " .. رد عليا وقالى منا معايا سلاح تحت رجلي جامد مبخرجش من غيرة .. قلت لة معاك اية .. تخـيلو ؟ .. طلع لى من تحت الكرسى دراع كوريك هههههههههه

وراح فتح موضوع ان 3 افراد اتلمو علية وثبتو واخدو منة التاكسى ايام الثورة ! .. قلت لة طبعا مش معاك سلاحك الجامد
كان نفسى اخبطة بية مهو لازم العربية تتسرق هههههههه .. رد عليا وقالى لالالا انا نزلت بدراع الكوريك بعد الثورة وبعد المشكلة دى .. قلت لة ربنا يقويك " على فكرة يا جماعة ربنا يسترها معة والعربية دي متتسرقش تانى بطريقتة دى متأكد انها هتتسرق تانى " ..شوية وقالى احنا لما عملنا الثورة مش عارف اية .. واحنا لما عملنا الثورة .. قلت لة انتو مين ؟ قالى احنا .. قلت لة ايوة مين قالى الشعب .. قلت لة انت لوحدك بقيت الشعب ؟ قالى لاء كلنا يعنى .. قلت لة انت اثناء
الثورة كنت فين ؟ " مش زي عادل امام ماشى " قالى كان نايم وامة صحتة وطلبت منة ينزل يجيب " بسبوسة " ! وصلت وخلصت منة ونزلت . بس الحـق يقال .. الواد زى العسل وشاب وزوق مش زى الرخم اللى هقولكم علية .

وانا راجع بقى سواق ارخم خلق الله .. كنت فاكر انى ارخم واحد.. راكب اسبرانزا متروقة كدة ومنكلة .. راجل كبير ف السن جداَ .. المكان الفلانى يا سطى قالى ماشى .. معايا شنطة اول مشفها راح فاتح شنطة عربيتة من جوة وقالى بكل قرف " حط اللى معاك فى شنطة العربية " يا فتاح ياعليم .. قلت لة دول فانوسين عربية خلفي مش محتاجة .. قالى يا بية لازم يتحطو ف الشنطة يخربتك على بيت الشنطة انت فرحان بالشنطة ؟ انت الوحيد يعنى اللى عربيتك فيها اوبشن الشنطة ؟ مكل العربيات فيها شنطة .. طيب عديت اليوم وحطيت اللى معايا ف الشنطة .. اول مطب راح واكلة دب

قلت لة يعم والنبي الفوانيس هتتكسر مش طالبة 600 ج تانى رد بغباء وقالى يعنى شيفهم ف ايدي علشان اكسرهم وهما قشر بيض يعنى .. قلت لة " مش عارف من ساعة مركبت معاك وانت قرفان منى يا حج لو زعلان نزلنى " قالى هو انا اعرفك علشان اقرف منك يادي النيلة الراجل مش عايز يعدي يومة .. يا جماعة دة راجل كبير ف السن لو نفخت فية هقـلبة مصفى
المهم سكت .. وبعد ما اخد اليوتيرن بكل هدوء وبطء راح طالع كوبري 15 مايو يعم متاخد كوبري اكتوبر وانزل الدقي خلينا نخلص قالى لا دي زي الفل ودايما رايقة نزلنا الكوبري لقينا الطريق كلة واقف وطبعا مصلحة لية علشان العداد بيعد والزبون يدفع ! المهم الطريق مشى شوية والاشارة فتحت الاخ ماشى لي وبدون مبالغة والله يا جماعة على 40 ومصورها بالموبايل
قلت لة يعم امشى شوية عايز الحق السمكري خلينا نخلص يقولي انا حاضر وعنيا ومفيش اي تغيير قولت لة انى ف الزحمة ببقى ماشى 80 وعرز وانت ماشى 40 لية الطريق فاضى راكبين بسكلتة ولا اسبرانزا ؟ يقولي اصل انا عندى القلب والسكر .. وشوية وهيشحت مال القلب والسكر بالكيلو متر حد يفهمنى والنبي ؟ ولا القلب والسكر مربوطين بواير مع الكيلومتر
يمكن دة اوبشن جديد فى الاسبرانزا وانا معرفش !! طبعا دفعت فى نفس المشوار زيادة 6 ج بسبب دلعة وانة اخد طريق طويل
غير الوقت اللى ضاع ! لو انت مكانى هتعمل اية علما انة اخد الكوبري صاروخ وبعد مطلعنا الكوبري الاوبشن الجديد اشتغل بتاع الاسبرانزا وبدء نظام القلب والسكر وحاجة لله يا ولاد الحلال ! يارب تخلص عربيتى علشان تعبت من الناس دى .

[MohssenRashed]

بحس ان سواقين التاكسيات و الميكروباصات دول كائنات غريبة غير البني ادمين

[elrasy]

مرة كنت نازل اجازة وقلت اقضيها تاكسيات بدل ما ااجر عربية , اهو اريح نفسى من السواقة و اوفر شوية...
هما يومين واجرت عربية احسن من وجع الدماغ وتحكم السواقين فيا.

[saadelden]

نفس المشكله عندي
العربيه بقالها اسبوع عند الميكانيكي و بركب مواصلات و لو متأخر باخد تاكسي

راكب تاكسي ف بيسألني انت قولت نعم ولا لا ف الاستفتاء .؟
قولتله لا
قاليه ليييييييييييه ؟! هو انتو مش عاجبكو العجب و عايزين البلد تفضل بايظه و خلاص !
و فتح بقى موضوع انشا و احنا هنتبهدل لو النتيجه طلعت ب لا و البلد كانت هتروح ف شربه ميه !!!

ف يوم تاني سواق كل ما يشوف ظابط مرور ولا عسكري حتى ماشي ف الشارع يقعد يسب و يلعن و هم الي خربو البلد و عايزين ضرب النار و الاسطوانه المشروخه تشتغل !!

سواقين المكروباص ميزتهم هتوصل ف اسرع وقت و مابيفتحوش مواضيع كتير و غالبا بيبقى راكب جنبه واحد صاحبه و بيحكو سوا d:

[FunnyMickey]

عشان كده عمري ما ركبت تاكسي في حياتي غير 3 4 مرات وبيبقي معايا بضاعه مش اكتر
حتي لما كنت مصاحب كنت بركبها ميكروباص
:)

[Car's Sniper]

ههههههههههههههههههههههههههه دم حضرتك زى العسل والله
الميكروباص بزحمته افضل ميت مرة من التاكسى اللى السواق بيستفرد بيك فيه ويجيبلك تاريخ حياته السودا لغاية ماتعيط جمبه....ومع ذلك بافضل التاكسيات عن الميكروباصات
العربية نعممممة

[tito_1980]

فتحتوا الموضوع ده ليه ؟ خدوا بقه عندكوا الحكايات دي

ركبت تاكسي اكسنت و السواق راجل في منتصف الاربعينات بس راجل استغفر الله العظيم بيئه بجد و قاعد يحكيلي عن مغامره نسائيه مع واحده شبه دنيا سمير غانم و حاجه تقرف و كلام ميتحكيش و اذا بوليتم فاستتروا يا عم الحاج .

ركبت تاكسي تاني نوعه فيفا و شاب بيئه كالعاده هو اللي سايق و اخدله بشله في وشه و طريقه كلامه كنت هرجع بسببها و طبعا بقه التهور في السواقه و اخد الغرز و الشتايم في خلق الله و حاجه استغفر الله العظيم ( الموضوع اتكرر يجي 1000 مره ) .

شاورت لتاكسي تالت و شاب بيئه كالعاده " رايح فين يا برنس ؟ " علي اساس اني بعد معاه في الغرزه و بشد معاه حجرين واقوله رايح فين يقولي " لا و الله رايح كذا " و الكذا ده غالبا بتبقي منطقه زي الباطنيه كده ناسها متتشافش و ربنا يتوب عليا .

ركبت مع تاكسي رابع نوعه بيجو و السواق راجل كبير بيمشي علي سرعه 38 كيلو في الاسبوع ده غير الفرامل اللي بتهرب و نظره القرف في عينيه ليا و لكل الناس مش عارف ليه ؟

ركبت مع تاكسي خامس نوعه فيرنا و السواق شاب بيئه بس مش اوي و يكون خاطب و يعد يرغي مع الزفته اللي خاطبها قدامي و كلام يخجل له الجبين و الله مش عارف الناس دي مبتتكسفش .

ركبت مع تاكسي سادس نوعه فيفا برضه و السواق راجل في التلاتينات كده و هب طلعنا في الرصيف عشان شارب بانجو باين و لا ضارب ايه علي الصبح مش عارف ؟

و حمارتك العرجه تغنيك عن سؤال اللئيم

[ahmed1981]

هو حضرتك بتشد العربية تاني ؟

أنا لما بحتاج أركب تاكسي بدعي ربنا يرزقني بالصالحين من عباده

[nicegypt]

هو حضرتك بتشد العربية تاني ؟

أنا لما بحتاج أركب تاكسي بدعي ربنا يرزقني بالصالحين من عباده

ايوة يا بشمهندس .. المرة دى دوكو وسمكرة وسروجى
المرة اللى فاتت كانت عمرة + عفشة + كهربا

العربية كلها اتغيرت تقريباَ .. جبت لها المرة دى رفرفين + 2 باب زجاج كهربا علشان يظبطو عليها الشغل بجملة المصاريف وكارتيرات طبعا وشوية كماليات
زى 2 زجاج كهربا - ساعة ديجتال - حساسات منهم حساس مطر ..الخ .. اما الشدة الاولي كان من ضمنها اضواء شبورة امامية وخلفية + سنتر لوك بريموت + انذار ومش فاكر اية تانى وهلم جرا .. صرفت عليها قد تمن عربية تانية بس هى مطلبتش بصراحة .. انا علشان كان معايا زيرو واول مرة اركب
مستعمل فبصرف عليها بطريقة غريبة شوية مش بحب يكون فية اي غلطة فيها سواء ف الشكل او ف الاداء . لا تنسونى من دعائكم

[zago]

انا بركب ميكروباصات علشان سواقينها محترفين
من الهرم للمعادي بالمبكروباص 14 دقيقه على الدائري

[kar!m]

أنا برضه بركب ميكروباصات على طول .. مش عشان حاجه أكتر من انى بكون عارف هدفع كام بالضبط.

و لما بركب تاكسى قبل ماركب أقول له هتاخد كام؟ يقعد يقول لى مش هنختلف أقول له لأ قول .. يقول لى طب انت بتدفع كام؟ أقول له يا عم انت السواق لحد ما يعترف

[mailo]

انا بركب ميكروباصات علشان سواقينها محترفين
من الهرم للمعادي بالمبكروباص 14 دقيقه على الدائري

أهلا تعرف مين عالخط lol
كنت زبون أنا على الخط ده من زمان وكان كل كام يوم حادثة وعربية تتفرتك وزبون أعد قدام يموت
بس بجد فالجري اغبيا وعرفت سككهم فـباشيد معاهم دايما وبقرفهم lol

و لما بركب تاكسى قبل ماركب أقول له هتاخد كام؟ يقعد يقول لى مش هنختلف أقول له لأ قول .. يقول لى طب انت بتدفع كام؟ أقول له يا عم انت السواق لحد ما يعترف

أنا بقى لما باجي رايح مشوار أنا عارفه بأسأل رايح المكان الفلاني
-"تعالي . هتدفع كام؟"
-"مابتفقش قبل مركب "
-إزاي يعني
-يعني أنا هاركب ولما آجي أنزل هادفعلك أجرتك بس أنا مابتفقش قبل مركب

وساعات بقى يجيب من الآخر ويقول أنا هاخد كذا
بقوم منفدله وموقف اللي وراه على طول

المصيبة بقى إنلو المشوار طول قوي في زحمة أو كده أنا هابقى ازودلو أجرته إنما لما يقولي أنا هاخد x واللهِ لو وصل السنة الجاية مهديله مليم زيادة
وبصراحة مبحبش استغلال السواقين ده وتناحتهم

آه بالمناسبة أنا لسة النهارده متخانق مع سواء تاكسي فيرنا عشان جرحتله عربيته عشان اعلموا ميحدفش قدام الناس ويقطع الطريق

[ahmed1981]

ايوة يا بشمهندس .. المرة دى دوكو وسمكرة وسروجى
المرة اللى فاتت كانت عمرة + عفشة + كهربا

العربية كلها اتغيرت تقريباَ .. جبت لها المرة دى رفرفين + 2 باب زجاج كهربا علشان يظبطو عليها الشغل بجملة المصاريف وكارتيرات طبعا وشوية كماليات
زى 2 زجاج كهربا - ساعة ديجتال - حساسات منهم حساس مطر ..الخ .. اما الشدة الاولي كان من ضمنها اضواء شبورة امامية وخلفية + سنتر لوك بريموت + انذار ومش فاكر اية تانى وهلم جرا .. صرفت عليها قد تمن عربية تانية بس هى مطلبتش بصراحة .. انا علشان كان معايا زيرو واول مرة اركب
مستعمل فبصرف عليها بطريقة غريبة شوية مش بحب يكون فية اي غلطة فيها سواء ف الشكل او ف الاداء . لا تنسونى من دعائكم

ربنا يباركلك فيها وتطلع أحسن من الزيرو

[sara2001]

ربنا يكون في عون حضرتك وفي عوني

[gade2]

انا مبحبش التاكسيات اصل انت مستنى ايه من واحد شغلته فى الشارع ولازم تبقى قليل الادب