من المستفيد من ثورة 25 يناير

[م.احمد زكريا]

اليوم 4/4/2011 اي بعد مرور 70 يوم من اندلاع الثورة



من الذي استفاد حتى الان فعلا من الثورة ....... من الذي اثرت الثورة على حياته بإيجابية



طبعا أنا مش بأتكلم من وجهة نظر معنوية ( نسيم الحرية والكرامة و الإحساس بالديمقراطية وووو )
أنا بأتكلم من الناحية
المادية

المستفيدين:

1- تجار الأعلام : ودول عملوا فلوس أكتر من الفلوس الكانوا بيعملوها أيام كاس أفريقيا وبدأت أرباحهم من يوم 25 يناير ولازاتلت سلعتهم رائجة وبالذات يوم الجمعة.

2- تجار السلاح: سواء حي أو صوت أو سلاح ابيض قانوني وغير قانوني ..... وطبعا مكاسبهم مش عايز اقولك شوف مسدس الصوت كان بكام وبقى بكام ... والناس واقفة طوابير على محلات السلاح ... وطبعا بدأوا من يوم 29 يناير ولازالت البضاعة رائجة.

3- المستوردين من الصين: بالذات مستوردي الصواعق الكهربية والسلفات واسعار زادت 5 اضعاف على الاقل والبضاعة ماشية جدا جدا ومكاسب ماكانوش يحلموا بيها

4- الباعة الجائلين: طبعا في ايام الثورة في التحرير كانوا حاضرين بقوة في المشهد التحريري وبعدين اصبحوا في كل مكان في وسط البلد والميادين العامة وعلى الارصفة والشوارع لدرجة فكهاني في مدينة نصر كان دايما بيطاردوه بتوع الحي دلوقتي ماشاء الله واخد الرصيف ونازل في الشارع وموصل كهرباء من عمود النور ومعدي الكابل الشارع كمان وحاجة اخر حلاوه

5- سائقوا التوكتوك والميكروباص : طبعا التوتوك خرج من الجحور إلى النور وبينافس التاكسي، والميكروباص اصبح رئيس جمهورية الشارع والمش عاجبة السلاح موجود وماتسالش عن قوانين المرور

6- الإعلاميين: سواء برامج تليفزيونية وصحف ومجلات وجرايد ما شاء الله حركة البيع للصحف مش عايز اقولك كله بيكتب اي تهجيص ويقول اي كلام والناس عايشة في بلبلة وعايزة تعرف الحقيقة و كله بيملا الورق وخلاص وبيعد ساعات وكله بتمنه.

7- المساجين: مش السياسيين فقط ولكن والجنائيين وغيرهم ... المهربش .... اتخفف عنهم العقوبة .. والرجع سلم نفسه خد افراج .... ده غير الإفراج المشروط ... حاجة حلوة خالص.

8- اللصوص وقطاع الطرق: وطبعا لغياب الامن .... وان كنت متاكد ان الشرطة كدة كدة كانت في البطيخ بس كان ليها هيبة وخلاص .... دلوقي بطيخ ومافيش هيبة كمان ... يعني مولد وصاحبه غايب

9- اصحاب المطالب الفئوية: 80 % منهم مش اصحاب حق واخدوا حقوق ليست لهم بلي الذراع سواء للحكومة او للشركات عشان نلم الموضوع ونجنب البلد التعطيل والفوضى .... التعين اتعين - والإتثبت اتثبت - والزاد مرتبه زاد ... بس تأثير ده هايبان في الموازنة الجديدة ان شاء الله.


في حد تاني استفاد من الثورة أنا مش فاكره ؟؟؟؟


يا ريت الردود تكون بهدوء ... أنا ماجبتش سيرة الإنضروا [overline]ماديا [/overline]منها

وماحدش يقولي بكره احلى من النهاردة أنا باتكلم عن انهاردة لأان بكره ده في علم الغيب

[hobiko]

مش فاهم ...... ايه المطلوب ؟؟؟؟

[MohssenRashed]

انا شايف كفاية اني كسبت نفسي و بقى ليل صوت و كرامة و كفاية ان دلوقتي سواء جيش او حكومة عاملين للشعب 100 حساب. بالنسبة ليل ده كافي اوي

[human]

انا مستفيد طبعا

عارف ان ولادى مش هيحكمهم حاكم ظالم

[magid1010]

والله معاك حق فى كل اللى قلته احنا مش ضد الثوره بالعكس انا معاها جدا بش محسيتش على المستوى الشخصى باى تغير سواء انى مش حاسس باى امان و خصوصا هنا فى العريش حاسس انى فى بلد تانيه غير مصر كل واحد شايل رشاش فى رفح و الشيخ زويد الحمد لله طردوا العاملين فى المدارس و مسمينهم ابناء وادى النيل وحاجه تانيه الثوره جابتها السلفين صوتهم بقى عالى اوى لدرجه انهم طالبو وده خبر فى مصراوى بعمل فرع للشرطه للامر بالمعروف و النهى عن المنكر

[م.احمد زكريا]

مش فاهم ...... ايه المطلوب ؟؟؟؟

اعتبره رصد

انا شايف كفاية اني كسبت نفسي و بقى ليل صوت و كرامة و كفاية ان دلوقتي سواء جيش او حكومة عاملين للشعب 100 حساب. بالنسبة ليل ده كافي اوي

انا مستفيد طبعا

عارف ان ولادى مش هيحكمهم حاكم ظالم

جميل جدا ومتفق معاكم 100 % .... بس أنا اقصد ماديا على المدى القصير

[hobiko]

اللى حضرتك بتحاول ترصده و هو التأثير المادى على المدى القصير ...... لازم حيكون بالسلب طبعا

من وجهة نظرى المتواضعة جدا ...... ده طبعا مش معيار كافى او عادل لقياس تأثير الثورة

اللى أعرفه وأرجو ان حد يصححلى لو انا غلط ...... ان مافيش ثورة فى العالم على المدى القصير كان ليها تأثير مادى ايجابى على الشعب

لازم فترة معاناة ...... و اللى جاى أفضل ان شاء الله ...... ماديا (لو ده اللى حضرتك تقصده)

فيه تقارير عالمية كتير بتكلم ان الأقتصاد المصرى حينطلق بقوة على المدى البعيد

بس نعدى من الأزمة الحالية

[تامر.محمد]

يا باشا انت لو عملت عملية جراحية مش لازم تستفيد منها الا بعدها بكام شهر على الأقل
قياسا على المنطق اللي بتقول عليه بقى ليه بهدلنا مصر كلها حرب مع اسرائيل عشان خاطر سينا ؟ , و سينا اصلا ما أفادتناش غير بعد سنين و سنين و ما تزال الاستفادة منها غير كاملة لحد دلوقت ؟
:)

الاستفادة من الثورة مش هاتبقى في وسطها كده

ايوة احنا لسه في وسطها , عارف ليه ؟
طول ما رؤوس الفساد لسه طلقاء يبقى الثورة ما خلصتش و يبقى ماحدش فينا هايستفيد اي حاجة

اتفق معايا او عارضني , انا مش هاقدر اثبتها لك , بس ده اللي انا شايفه و متوقع ان الأيام هاتثبته ان شاء الله

[aly_hosny]

انا استفدت
غيرت 2 دكاترة مكنوش بيشرحو و كانو بيعملو حاجات سواء في المحاضرة او امتحانات العملي تخلي اي حد "@#%3" بلاش نغلط

خلينا الكتاب مش اجباري و سعره ميبقاش مبالغ فيه

بقيت اكلم اي دكتور او عميد بحرية طالما مبغلطش و مبسيئش لحد

من الاخر بقيت حر

[م/مصطفى محمود]

يا ريت الردود تكون بهدوء ... أنا ماجبتش سيرة الإنضروا ماديا منها

وماحدش يقولي بكره احلى من النهاردة أنا باتكلم عن انهاردة لأان بكره ده في علم الغيب

إجحاف شديد فى حق الثورة لما نطلب نتائجها دلوقتي ، مفيش ثورة بتجيب نتائجها بين يوم وليلة ، محدش فعلا ضامن بكرة ، بس ده مش معناه إني معملش لبكرة ، حضرتك لما بتخطط لحياتك بتخطط للمستقبل ، لما بتعمل حاجه بتبص للمستقبل ، فمينفعشي أبدا نيجي فى حاجه زي كده ونبص تحت رجلينا

مع كامل إحترامي لحضرتك ، إنتظرنا 30 سنة على أمل إن الوضع ممكن يتحسن ، مش قادرين تصبروا سنتين

ومكاسب مادية أية بس يا هندسة مينفعشي والله الكلمة دي خالص، ياراجل يعني ثورة ووضع بلد بيتغير وحياة سياسية مُختلفة ، ونظام كامل إتشال ودستور البلد كلة إتشال ، وعايزنا نتكلم فى الفلوس ، فده مكنشي هدف الثورة الأساسي ، هدف الثورة إننا نرجع مصر تاني لمكانتها ، إن بلدنا ترجع قوية مرة أخرى ، إحنا مش أقل من ماليزيا وتركيا

من الذي استفاد حتى الان فعلا من الثورة ....... من الذي اثرت الثورة على حياته بإيجابية

أما بخصوص المكاسب فتعالا حضرتك نعدها

1 - أدخل حضرتك موضوع أخونا العضو أبو رقية الخاص بالجنسية ، وشوف كل الناس اللى كانت مُستعدة تتنازل عن جنسيتها رجعوا قالوا أية = عودة الإنتماء للشعب

2 - شوف حضرتك حجم المشاركة فى الإستفتاء ، مشاركة كبيرة ، لأول مرة بجد مطلبشي من حد أنه ينزل يصوت ولا أدعوا الناس ، الناس كانت مش محتاجه حد يوعيها بدورها = إرجاع الشعب مرة أخرى للمشاركة السياسية

3 - حضرتك أمشي فى الشارع هتلاقي الناس كلها بتتكلم فى السياسة ، مين عمل أية ومين قال أية ، حزب أية طلع بيان بيقول أية ، والأخوان صرحوا بأية ، أنا مع الأخوان ، أنا ضد الإخوان ، علمانية ولا مدنية ولا دينية ولا ديمقراطية ولا ولا ولا ، بقى عندك حوار فى المجتمع ، لو كنت إتكلمت مع حد الكلام ده من 4 شهور محدش كان هيكلمك

4 - المنتخب خسر ومحدش إلتفت للموضوع زي زمان ، وعي الناس زاد ، فكرهم إرتقى وصدقوا إن فى حاجات أهم من الكورة

5 - زمايلي لما بقولهم أنا نفسي أعيش فى مصر ومبفكرشي أبدا إني أسيبها محدش بيتريق عليا ، والله العظيم كنت بحس بحزن شديد أياميها ، مش علشان بيتريقوا طبعا ، بس كنت بجد بحزن جدا جدا إني أشوف زمايلي شباب زي الفل والله ونفسهم فى الخير للبلد ، بس مش قادرين يعيشوا فى مصر العيشة اللى بيحلموا بيها ، شوف حضرتك المواضيع بتاعة الهجرة والسفر زمان فى المنتدى ، ثق إن أغلبهم غير رأية ، بجد دي لوحدها عندي كفاية جدا جدا

6 - شوف حجم الأنشطة التطوعية بعد الثورة حصل فية إية (والله العظيم أنا لامس الموضوع ده جدا جدا وفعلا نشاط عشرات الأضعاف)


لكن لو حضرتك مصمم نتكلم فى الفلوس فأنا أعتذر ، إحنا بنفكر أبعد من الفلوس

[م.احمد زكريا]

اللى حضرتك بتحاول ترصده و هو التأثير المادى على المدى القصير ...... لازم حيكون بالسلب طبعا

يا باشا انت لو عملت عملية جراحية مش لازم تستفيد منها الا بعدها بكام شهر على الأقل
00000000000000000000000000000000000000000000000000 000000
اتفق معايا او عارضني , انا مش هاقدر اثبتها لك , بس ده اللي انا شايفه و متوقع ان الأيام هاتثبته ان شاء الله

على فكرة انا ماجبتش سيرة السلبيات والخسائر المادية لأنها واضحة وضوح الشمس للجميع لأن أكيد أغلبنا تأثر بيها سواء بطريق مباشر أو غير مباشر
( وإن كنت ولله الحمد لم أتأثر بها عشان محدش يقول اني متضايق فبأقول كده)

طبعا معاكوا ان التقارير والمؤشرات بتقول ان الخير قادم ..... وده شيئ طبيعى بيتناسب طرديا مع الإستقرار السياسي والأمني لأي دولة وخصوصا لما تكون دولة بأهمية مصر

الموضوع فعلا ممكن تعتبروه موضوع ساخر عن اوائل المستفيدين من الثورة

زي أغنياء الحرب كدة

[م/مصطفى محمود]

أعذرني يا هندسة لو ردي كان تقيل ، كنت فاكرك بتحاول تهاجم الثورة بس بطريقة شيك :d

مشوفتش ردك اللى فوق ، بس برضوا بصراحة مينفعشي نتكلم فى الفلوس :d

[م.احمد زكريا]

طبعا أنا مش بأتكلم من وجهة نظر معنوية ( نسيم الحرية والكرامة و الإحساس بالديمقراطية وووو )
أنا بأتكلم من الناحية
المادية

00000000000000000000000000000000000000000000000000 0000000000000000000000

يا ريت الردود تكون بهدوء ... أنا ماجبتش سيرة الإنضروا [overline]ماديا [/overline]منها

من الاخر بقيت حر

ومكاسب مادية أية بس يا هندسة مينفعشي والله الكلمة دي خالص، ياراجل يعني ثورة ووضع بلد بيتغير وحياة سياسية مُختلفة ، ونظام كامل إتشال ودستور البلد كلة إتشال ، وعايزنا نتكلم فى الفلوس ، فده مكنشي هدف الثورة الأساسي ، هدف الثورة إننا نرجع مصر تاني لمكانتها ، إن بلدنا ترجع قوية مرة أخرى ، إحنا مش أقل من ماليزيا وتركيا

لكن لو حضرتك مصمم نتكلم فى الفلوس فأنا أعتذر ، إحنا بنفكر أبعد من الفلوس

والله العظيم انا معاكم في كل ده وانا حاسس بيه كفاية ان المسجد مفتوح طوال اليوم وده ابسط ابسط ابسط حق كنا مش واخدينه

انا محدد من الاول انها مادية وعلى المدى القصير

ومعلش الحالة المادية لو سيئة على مستوى الطبقة المتوسطة فاشوف الحالة هاتبقى عاملة ازياى للطبقات الدنيا البتمثل السواد الاعظم من الشعب الهايدلي بصوته في انتخابات الشعب والشورى والرئاسية

فاطعم الفم يستحي الصوت

اتمنى تكون وجهة نظري وضحت

[م.احمد زكريا]

أعذرني يا هندسة لو ردي كان تقيل ، كنت فاكرك بتحاول تهاجم الثورة بس بطريقة شيك :d

مشوفتش ردك اللى فوق ، بس برضوا بصراحة مينفعشي نتكلم فى الفلوس :d

ولا يهمك يا غالي

[jisso82]

أجمل تعليق سمعته فعلا العضو اللى اتكلم على العملية الجراحية لأن فعلا لو الواحد فكر المريض بيطلع قد إيه تعبان من العملية الجراحية و بيعانى إزاى و لمدة طويلة رغم إنه ما يكونش بتألم بالشكل ده قبل العملية لكن أكيد بعد مدة بيحس بقيمتهاو براحة ما حسهاش قبلها و بينسى كل تعبها يعنى من الآخر تعب ساعة مهما كانت قاسية و لا تعب كل ساعة مهما كانت هينة و تافهة