شاهد عيان على احدى حركات الثورة المضادة

[hossaam]

من يوم 25 يناير والى اليوم...باسمع عن الثورات المضادة...ومحاولات فلول النظام واذنابه تدمير الثورة...

وكان كل معلوماتي عبارة عن قصص من هنا وهناك باسمعها غير مؤكده...



لحد ما جه يوم السبت الماضي...

اولا انا شغلي في احد مواقع الانشاءات لمشروع محطة كهرباء كبيرة ومهمة (قومية)

اللي حصل اني وانا داخل شغلي الصبح ... خير الله ما اجعله خير ...لقيت تجمع كبير لعمال الشركة (شركة مقاول الباطن بتاعنا)...

معظمهم عمال انشاءات حديدية وميكانيكية... كتير منهم متعلمين بس طيبين...يعني كلمة تجيبهم
وكلمه توديهم...

ما علينا...المهم..لقيتهم متجمهرين...حوالي 300 بني آدم...ورافضين ينزلوا الشغل..!!

ايه يا جدعان ...خير بس فيه ايه؟؟؟

لقيت واحد شباب كده...فرحان بنفسه... وشكله متزعم الليلة..قايم وقالي يا بشمهندس...مفيش شغل..الا لما تتحقق مطالبنا واحناكتبنا المطالب وقدمناها للادارة...وقاعدين اهه للصبح ماعندناش مشكلة...بس شغل... انسوااااا

آآآآآآه...في بالي...شغل المطالب الفئوية...ممممم ...اخيرا وصل للشغل عندي...طيب..

سيبتهم ودخلت مكتبي عادي... هنا بس فيه معلومة صغيرة..

هي الشركة دي مقاول باطن
من شركتي اللي انا باشتغل فيها...يعني هما واخدين الشغل مقاولة واحنا استشاري عليهم..
وللامانة شركتهم شركة محترمة في السوق...وعملت شغل متميز مش بس في مصر لا ده حتى في اوروبا نفسها
يعني بتصنع الحديد والتركيبات الميكانيكية وتصدرها وتركبها بره...زي اجزاء محطات الكهرباء والكباري وابراج طاقة الرياح..ووو يعني شغل متميز ....وفخر لمصر

نرجع تاني للاضراب...

خلاص وانا في مكتبي مقضيها سوليتير...على اساس ان الشغل واقف بقه...

دخل عليا نفس الشخص اللي كان متزعم الاضراب...وقالي :انتم وضعكم ايه يا هندسة في الموضوع ده؟؟!!

قلتله مش فاهم؟؟؟!!

قاللي يعني..انتم مالكمش دعوة بمرتباتنا؟؟!!.. مش انتم الاستشاري علينا

قلتله: طبعا مالناش فيها...بس قوللي هي ايه مطالبكم من شركتكم بالضبط..

راح مطلعلي ورقة من جيبه ...قريتها لقيت الاتي:

1- رحيل مديرهم الاجنبي (مدير الموقع)!!...(مش عارف ليه مع انه فعلا راجل مؤدب وخبرة ومهم وفاهم شغله)
2- الغاء الضرائب !!!!!!!!!!!!!!!!!!!!!
3- يوم الخميس 4 ساعات شغل بس ومش بس كده...لا يتحسب يوم كامل كمرتب!!!!!!!!!!
4- زيادة المرتبات وبأثر رجعي...(مش مكتوب زيادة كام بالضبط)؟؟؟

وحاجات تانية كده عبيطة في رأيي وغير محددة برضه....تحس فيها التعجيز وبس

طبعا انا قريت الكلام ده وقلتله...انتم بتهرجوا...طبعا قلبلي وشه..وقالي ازاي

قلتله يابني ماله بس مدير الموقع...ده راجل سكرة...قاللي مفتري...
قلتله ازاي يعني...قاللي لو جينا متاخرين نص ساعة الصبح بيخصم علينا نص يوم
ولو نزلنا بدري نص ساعة في الانصراف..برضه يخصملنا...!!! حراااام والله

قلتله..طيب ما الراجل ما غلطش...المفروض الكل ييجي في معاده ويروح في معاده بالثانية..
هو ده الشغل الصح...حقي وحقك..وانت في قطاع خاص مش تكيه هيه!!!!

وبعدين ضرايب ايه اللي تتلغي؟!!!...مفيش حاجة كده...دي بتروح للحكومة مش للشركة...

طبعا كلامي ما عجبوش...وقام سابني وقال...عموما...اللي هايقف في وشنا...مش هيحصلله طيب
وهنكسر الدنيا ووووو...قلتله....انتوا ناويين على تخريب بقه...وصوتي علي...قام محور في الكلام وخرج..

طبعا انا الدنيا اسودت في عينيا...حرام يا ناس ...دي مطالب يعقلها عاقل؟!!!

المهم...اليوم خلص وهما قاعدين يلعبوا سيجا ويتكلموا والشغل في المحطة واقف...والاجانب
اللي معايا مش فاهمين حاجة...بيقولوا طبعا الاضراب حقهم بس المطالب كارثية...

انا والله لم اسكت...طلعت للناس مع اني لا علاقة لي بشركتهم...

وقعدت كل شوية اخد 2 او تلاته على جنب واحاول اشرحلهم..ان ده مش صح...على الاقل المطالب المفروض تكون قابلة للتنفيذ..
وبعدين مرتبات معظم اللي واقفين مش وحشة ابدا...يعني من 2800 جنيه وانت طالع...
والمحطة كده هتخرب...ويمكن الاجانب دول يمشوا ويعلقوا الشغل في المشروع الى اجل غير مسمى..
وكلنا هانخسر والبلد كمان.....ووووو...طبعا للاسف تقريبا كان فيه كام واحد ومنهم الواد اياه ده اكلوا دماغهم...ومش متقبلين اي كلام....

طيب خلص اليوم على كده...والناس مشيت على اساس يرجعوا بكرة يكملوا اضراب وقعده...

وللقصة بقية...

[M.Mosaad]

اعلان صغير في الجرنان ان الشركه دي طالبه ناس تشتغل بمرتبات 2000 جنيه و حوافز مجزيه و يجيبوا اضعاف اضعاف الناس دي و بسعر ارخص و هما اللي هيقدموا اعتذار رسمي للشركه علشان يقعدوا

لما ناس تكون طالبه مطالب معقوله و ممكن تطبيقها ممكن تناقش لكن الدلع و الاستهتار في الشغل لازم يتقابل بمنتهي الحزم

[Ahmed.Ali]

تقربا شبه الي حصل عندنا في الشركه subcontractors طالبين يتعينوا عندنا طيب و احنا مالنا!!! و شايلين يفط ان الشركه بتكسب بالهبل و بتاكل حق الموظفين و علي حظهم الاسود اساسا شركتنا خسرانه السنه دي و احنا مالناش اي علاقه قانونيه بيهم كمان

[hobiko]

دي فين محطة الكهربا دي ؟؟؟؟

[م. عمرو شرف]

[QUOTE=hossaam;3873407956]
لحد ما جه يوم السبت الماضي...

اولا انا شغلي في احد مواقع الانشاءات لمشروع محطة كهرباء كبيرة ومهمة (قومية)

اللي حصل اني وانا داخل شغلي الصبح ... خير الله ما اجعله خير ...لقيت تجمع كبير لعمال الشركة (شركة مقاول الباطن بتاعنا)...

معظمهم عمال انشاءات حديدية وميكانيكية... كتير منهم متعلمين بس طيبين...يعني كلمة تجيبهم
وكلمه توديهم...

ما علينا...المهم..لقيتهم متجمهرين...حوالي 300 بني آدم...ورافضين ينزلوا الشغل..!!

ايه يا جدعان ...خير بس فيه ايه؟؟؟

هنا بس فيه معلومة صغيرة..

هي الشركة دي مقاول باطن
من شركتي اللي انا باشتغل فيها...يعني هما واخدين الشغل مقاولة واحنا استشاري عليهم..
وللامانة شركتهم شركة محترمة في السوق...وعملت شغل متميز مش بس في مصر لا ده حتى في اوروبا نفسها
[QUOTE]
يعنى أنت المقاول العام
طب فين صاحب الشركه اللى بتقول أنها متميزه وليها شغل بره مصر , أيه دوره
العمال هما اللى متجمهرين
أبعت جواب أنذار لمقاول الباطن ( القانون كده ) بأنه متوقف عن العمل
أمنع دخول العمال للموقع , يعنى خليهم يتظاهروا بره
وأطلع بهدوء قلهم أنك بعت أنذار لشركتهم ( اللى هى مقاول باطن ) وأنك هتتعاقد مع شركه تانيه ( والقانون بيديك الحق فى كده ) وأنهم يتصرفوا مع صاحب شركتهم ويطلبوا منهم اللى هما عايزينه وأرجع مكتبك كمل لعب سوليتير وبعد ساعه هتلاقيهم جوه الموقع بيشتغلوا

لو مقاول الباطن ده قطاع خاص ( وأعتقد كده من كلامك ) فهو وعماله عارفين أنك تقدر تطردهم بكل سهوله بعد تسليمه الأنذار , والعمال عارفين أنهم هيرجعوا بيوتهم يعملوا سلطة للأكل