شكر خاص للعقيد خالد, الراجل ده ملاك !!

[ahmed88hassan]

الموضوع ممكن يطول فـ استحملوني:
العربية(الميجان) كانت عايزة حبة شغل في العفشة قدام
و مكنتش لسه استقريت علي مكان اعمل فيه الشغل ده
و بالصدفة كنت راجع امبارح(الأربعاء) من جسر السويس
و قولت اخش الحرفيين اشوف ايه النظام
و بعدين دخلت و قفت افكر
لقيت اني اول مرة اروح الحرفيين ومعرفش اي حد فيها
طب اعمل ايه؟؟
كان معايا رقم المهندس العقيد خالد
كلمته و قولتله علي الحوار كله
جالي علي طول
وداني لعفشجي وعرفني عليه,
وبعدين روحنا لبتاع قطع الغيار
اشتريت قطع الغيار و هوه معايا في ده كله مش بيسبني و بيفاصللي كمان.
اليوم ده بدأ من 5 مساءا تقريبا و انتهي 10:30 مساءا.

و اتقفنا هنبدأ الشغل انهارده (الخميس) 11 صباحا
وصلت للعفشجي
بدأ شغل
و كان الأستاذ خالد قالي لما توصل ابقي كلمني
و نا مردتش اكلمه عشان معطلوش معايا زي اليوم اللي قبله وقولت لما اخلص ابقي اعدي عليه اشكره
و لقيته هوه اللي جالي لوحده !!

فضل معايا لغاية م العربية خلصت,
طلعت اجرب..
العفشة تمام بس كانت العربية بتكتب
!!!check gearbox
رجعت للعفشجي
و المهم المشكلة دي فضلنا ورااها لغاية ما اتحلت 11:15 مساءا تقريبا
و كل ده و الأستاذ خالد معايا مغابش عني
لدرجة انه لما قفل ورشتة رجع كمل معايا عشان يطُمن ع العربية !!

-----------
طبعا كلمة شكرا قليلة علي كل الكلام ده و علي كل اللي الراجل ده عمله معايا وهوه ميعرفنيش اساسا
ده غير ان والدي (اللي كان معايا في كل الكلام ده و شاف بعينه الواجب اللي تم معانا) اصر و اكد عليا اني اعمله موضوع شكر خاص و برده مش كفاية بس ده اقل تقدير

[tito_1980]

ربنا يديم المعروف بين اعضاء المنتدي بس ايه علاقه العفشه بالجير بوكس ؟ كل يوم بتأكد ان العربيه دي عايزه طيار عشان يعرف يتعامل معاها

[AhMeD EzZ]

مش غريبة علي شخص باحترام و جدعنة سيادة العقيد

[r0xer]

الراجل دا أنا شهادتي فيه مجروحة...شخصية محترمة و مؤدبة ولبقة و تعرف كيف يكون التعامل الراقي مع الناس فعلاً و بيعامل ضميره في كل حاجة من واقع زيارتي له مرتين.

هو يمكن بس غالي حبتين في الشغل اللي بيعمله الصنايعية عنده ولكن دا لان شغلهم بأمانة الله مظبوط ورائع.

انصح أي حد يتعامل معاه في اي حاجة..ويديله مفتاح عربيته ويطمن لانه راجل مؤتمن فعلاً و ما احوجنا لناس زيه الايام دي.

شهادة حق اقولها والعقيد خالد اصلا ميعرفش المعرّف بتاعي دا ولكن الحق يقال.