وقفت عربية بدون لوحات معدنية

[shooter123]

النهاردة وانا ماشي في شارع البحر وهو الشارع الرئيسي لمدينة طنطا لقيت واحد راكب عربية لوجان بدون نمر جريت وراه وحصلت ووقفته وقلتله انت ماشي من غير نمر ليه قالي وانت مين اصلا قلتله خلاص احنا نكلم الجيش يجي بقي يشوف انا مين وانت ماشي بدون نمر ليه لقيته بيقولي انا ظابط جيش وبيطلعلي الطبنجة من درج التابلوه ونازلي من العربية قلتله حلو اوي اللي انت بتعمله ده كدا انت اثبتلي انك مستحيل تكون ظابط جيش وانا بقي عايز الجيش يجي هنا حالا
طبعا كل ده والشارع وااااااااااااااقف وكان معايا واحد صاحبي نزل وحاول يهدي الجو وفعلا هدي الجو ومشينا وفؤجئت بصاحبي بيقولي انا كنت فاكرك بتوقفه لانك عارفه لقيت مكبر الموضوع اوي


يا جماعه انا كدا غلطان؟؟؟؟؟؟؟؟
المفروض كلنا لما نشوف حاجة غلط منسكتش عليها تاني
اه انا مليش صلاحية اني اوقفه بس ممكن اجيبله الجيش

هل انا غلطان؟؟؟؟؟؟؟؟؟؟؟؟؟؟؟؟؟؟

[aly_hosny]

انت صح طبعا
بس للاسف لو كلمت الجيش قولتلهم واحد ماشي من غير نمر مش هيعبروك
والداخلية هتخاف

[A.Saad]

مش عايز احبطك
بس متحطش امل كبير ان الشعب يتغير

[Nistelrooy]

حقيقي .. طب والله كويس ان فية ناس زيك في البلد لسة ..

والي زي الي انتا وقفتوا ده هما الي مبوظيين البلد وفاكريين نفسة حاجة وهما عندهم نقص في كل حاجة

[abdoelshazly]

أنت صح ..

بس والله احنا ما عارفين العيب فينا ولا ف الناس اللى بتعمل الغلط

احكيلك انا كمان موقف حصلى كنت انا وصاحبى ماشين ف الشارع لقينا واحده طالعه من بيتها وبترمى الزباله ف نص الشراع مع العلم ان صندوق الزباله بعديها بخطوتين والله العظيم

استفزتنى اووووووووووووووى روحت قولتلها ليه كدا يا حاجه حرام عليكى والله لو كنتى اديتهولى والله كنت هوديهولك ارميه ف الصندوق انما كدا حرام ... لقيتها اديتنى ضهرها ههههههههه ولا اكنها سمعت حاجه والله والغريبه ان صحبى سيابنى وطلع مشى قدامى ههههههههههههه عيل تيت وابن تيت هههههههههه

[shooter123]

اشكركم جميعا لسرعه ردودكم واللي حسستني ان لسه في امل
علي فكرة من كام يوم مجموعه شباب صغير وقفت بوكس شرطة هنا برده في طنطا لما لقت اللي راكبين البوكس اولاد البيه الظابط وطبعا السواق ومردوش يمشوا البوكس الا اذا حضر الجيش والسواق اتصل بسيادة الظابط اللي جه جري واعتذر للشباب دول ووعد بعدم تكرار توصيل اولاده بعربيه الحكومة

بالمناسبة كذا مرة ااقف بعربيتي عشان ارمي منها اي حاجة في السلة اللي بتبقي متعلقه في اي عمود وللاسف بلاقي حاجة من اتنين يا اما السلة مفتوحة من تحت يا اما اسمع كمية تريقة كبيرة
عشان مصر تتغير لازم تبدأ بنفسك

[kono]

والله انت من الناس القليلة اللى عندها دم وبتغير على البلد ...المشكلة ان غالبا محدش هيستجيب
انا من يومين خبطت موتوسيكل مشاى مخالف ووقعته على الأرض ونزلت هزأته وبرضه كمل مخالف عادى :(

[osama.m]

بعد اللي الواحد بقى بيشوفو فا بأختصار كدا .. الامل في الاجيال القادمة .. مهما تغير هتفضل ثقافة الشعب زي ما هيا .. يارب نلحق نعدل العيال الصغيرة

[mahamedaraby]

انا متفق معاك فى الموقف لكن فى المبدا لا
ليه علشان مش كل واحد هيشوف حاجه غلط هيغيرها بايده بمعنى اوضح المفروض فيه شرطه هو ده دورها تحاسب وتحقق فى المواضيع دى

لكن انا معاك فى الموقف اللى انت عملته واويدك فيه وكان ممكن تقوله بطريقه مثلا يتكسف بيها وانت بنتصحه تقوله مش كده غلط انك تمشى من غير نمر المفروض اننا اتغيرنا بعد الثوره للاحسن افرض مثلا حتى ضايق او خبط حد من عائلتك وهو من غير نمر هتعمل ايه او هتبقى مبسوط كده كلام من ده يكون ودى وفى النفس تحاول تغير فيه ؟
وانا معاك فى الموقف 100%

[dode2002]

بص ياباشا
بس متزعلش
انت غلطان مش علشان وقفته لا علشان الطريقه الي كلمته بيها
كان المفروض توقفه وتقوله السلام عليكم انا اسف بس ياريت حضرتك تشوف موضوع النمر دي علشان كده غلط وحضرتك باين عليك انك انسان محترم وابن ناس وميطلعش منك غلط
وشوف بقي هو رد فعله ايه
فاكر لما كانوا قافلين شارع النادي وكان شارع نادي المعلمين اتجاهين
لما فتحوا شارع النادي لقيت ناس برده مصره تمشي عكسي في شارع نادي المعلمين
وقفت واحد كان جاي في وشي وابتسمت له وقلتله مساء الخير يافندم ممكن بعد اذن سيدتك متمشيش عكسي تاني قالي انا اسف ومش هكررها
جرب الطريقه دي مش هتخسر حاجه

[م/مصطفى محمود]

أحييك جدا على موقفك ، وفعلا لازم إحنا نساعد الشرطة لحد ما ترجع ، وأنا مش هسمح أبدا أن حد يقول إن هي دي نتائج الثورة

كنت مع والدي من كام يوم فى شارع 6 أكتوبر العمودي على جسر السويس ، وفى حتة الميكروباصات بيمشوا فيها عكس ، فأنا وقفت فى وشهم وصممت إنهم يرجعوا ، وفعلا بدأوا يرجعوا وبعد ما حوالي 4 رجعوا كان فى ناس نزلوا وفضلوا يتكلموا مع والدي وعمالين يقولولة معلش بقى وعديهم والطريق واقف ويعني هم هيعملوا أية والكلام اللى ملهوش لازمة ده، لقيتة والدي بيقولي عديهم ، بجد كنت مخنوق جدا جدا إني مش هعرف أكسر كلمتة وفى نفس الوقت حرام عليا أسيب المُتخلفين دول

والنهردة والله شوفت ملاكي عكس فى جسر السويس ولسة بقولة سيبت أية للميكروباصات لقيتة ظابط (رائد) وللأسف كنت سايب الموبايل فى العربية

وفى النهاية الفئة دي قلة بجد ، ولازم نعرف كده كويس ، دول مش الشعب المصري ، مش ال 5 أو 6 اللى دخلوا عكس دول اللى يمثلونا ، دول شوية همج ، وبإذن الله الأوضاع تتحسن بمساعدتنا وهم يرجعوا يتلموا تاني بإذن الله

[dr-mohamed]

عندك جق طبعا
من اسبوع تقريبا داخل جامعة القاهرة من باب دار علوم اللى هو اول باب من ناحية فيصل وجدت واحد خارج بسيارته وعايز يمشي لشارع فيصل مباشرة عكسي يعني وقفت عربيتي في وش عربيته وشاورت له يمشي صح ومايمشيش عكسي حاول يرجع ويعدي من جنبي جيت مكمل بعربيتي وقافل عليه الطريق تانى وشاورت له يرجع ويمشي صح في الاخر رجع ومشي صح ولو كنا بيتنا في الشارع مكنتش هاخليه يمشي عكسي

[dr-mohamed]

أ
وفى النهاية الفئة دي قلة بجد ، ولازم نعرف كده كويس ، دول مش الشعب المصري ، مش ال 5 أو 6 اللى دخلوا عكس دول اللى يمثلونا ، دول شوية همج ، وبإذن الله الأوضاع تتحسن بمساعدتنا وهم يرجعوا يتلموا تاني بإذن الله

++++++++++++++1

[shooter123]

كان المفروض توقفه وتقوله السلام عليكم انا اسف بس ياريت حضرتك تشوف موضوع النمر دي علشان كده غلط وحضرتك باين عليك انك انسان محترم وابن ناس وميطلعش منك غلط
وشوف بقي هو رد فعله ايه

;gامك صح جدا ومنطقي اوي

[casperinoo]

في المترو واحد رمي علبة عصير علي الارض ...وطيت جانبه ورحت رميتها في الزباله ...راح جي وقيالي شيلتها ليه
فقلت بضحك : علشان اخلي شكلك وحش :))...
قالي: الصراحه اه كان احسنلي تديني علي قفايه وتقولي ارميها في الزباله
العنف مع المصريين مينفعش بيقلب بقلة ادب اكتر وببجاحه وعند
محتاجين قوانين وتوعيه اعلاميه ودينيه