خبطت عربية واحد امبارح

[smsm_cato]

امبارح كان شم النسيم خدت المدام والاولاد والاسرة وروحنا شاطئ القوات المسلحة بالاسماعلية كما تعودنا واليوم كان جميل وكنت راكن العربية فى مكان كويس لقيتة بالعافية فى الشارع اللى قدام باب الشاطئ المهم بعد ما اتغدينا فاجأة لقيت المدام داخت جدا وقعدت تقولى انا دايخة ومش قادرة اخد نفسى وحاسسة ان روحى بتتسحب منى الفسحة بعد ما كانت جميلة وماشية كويس قلبت مرة واحدة فقلت يمكن يكون من الشمس فقلتها كلى حاجة حادقة مفيش فايدة ولقيتها بتشتكى ان فى مغص فى بطنها وقعدت تعيط قلت مبدهاش روحت واخدها فى العربية وروحنا المستشفى بعد ما رجعنا خاولت الاقى مكان تانى اركن فيه الشارع صغير والعربيات راكنة على اليمين والشمال ومفيش الا مساحة تاخد عربية المهم لقيت مكان بالعافية لقطتة وانا ماشى فحبيت ارجع علشان اركن فيه طبعا عمال ابص فى المرايتين اليمين والشمال علشان اتفادى الصفين عدو واحد ومراتة من الجنب اليمين للعربية حجبوا الرؤية عن المراية اليمين وكانت غلطتى انى كملت رجوع وستنتش لحد ما يعدوا والرؤية تتضح مرة ثانية وهوووب سمعت خبطة وقفت علطول وبصيت لقيت الشنطة من ناحية اليمين ريحت على الرفرف اللى قدام شمال من ناحية الباب لعربية شاهين وكانت النتيجة تطبيقة فى الصاج بحجم الكف المهم زعلت جدا على عربية الراجل ملوش ذنب تلاقية قاعد مبسوط مع عيلتة جوة واول ما يطلع يشوف العربية هيزعل جدا المهم خدت نمرة العربية ودخلت مباشرة على الشاطئ وتوجهت للدى جى بتاع الشاطئ وطلبت منه ينادى على صاحب العربية واديتة الرقم نادى وانتظرت جنبة شوية ولم ياتى احد فكرت انى الجأ لطريقة ثانية طلعت على بوابة الشاطئ وطلبت ورقة وقلم من الامن وكتبت عليها اعتذار ليه وفهمتة ان الموضوع كان بدون قصد وكتبت نمرتى وقلتله يتصل بيا وانا تحت امرة فى اى شئ ودخلت تانى ومرديتش انزل المياة تانى ولا اروح فى اى حتة وقعدت منتظر المكالمة وكل شوية اطلع ابص على العربية اشوفها فى مكانها ولا مشيت وانتظرت فى الشاطئ حتى السابعة مساءاً ولم تتحرك العربية تحركنا لاستكمال اليوم وبعد ذلك العودة وقبل ما امشى روحت مرة ثانية للعربية علشان اتاكد ان الورقة لسه موجودة ولقيتها مشيت وكملنا اليوم وبعد كده روحنا دخلت البيت خدت الدش التمام وطلعت علشان اصلى العشاء كانت الساعة 1 صباحا وانا بصلى التليفون رن توقعت انه يكون هو المهم خلصت صلاة ورن مرة ثانية رديت عليه قالى انا اللى خبطت عربيتة قلتله اهلا بيك يا فندم قالى اولا انا يكفينى ادب وزوق حضرتك انك اهتميت وسيبت رقم تيلفونك قولتلة ده اللى كان لازم يحصل لان ربنا مطلع عليا قالى فى ناس كتير بتخبط عربيات وبيمشوا صح قلتلة اه بس ده غلط لازم اللى ارتكب خطأ يعترف بيه قالى وانا هقولهالك مرة ثانية يكفينى زوق حضرتك وانا مسامح من كل قلبى قولتلة انت كده احرجتنى بذوق وانا تحت امرك فى حاجة قالى خلاص متحطش فى دماغك وانا سعيد بمعرفتك والحمد لله اطمأنيت قبل ما انام لانى مكنتش هعرف انام قبل ما اعرف صاحب الرعبية عمل ايه المهم انا عايز اطلع من الموضوع ده بنصيحة لكل الاعضاء اللى وجعت دماغهم بقراية الموضوع ده لو كل واحد فينا اخطأ واعترف بخطأة وبادر بالاعتذار هتتحل مشاكل كتير وعلى الاقل هتمتص غضب اللى قدام ودى اهم وصية اوصانا بيها النبى صلى الله عليه وسلم قال اقربقم منى مكانا احسنكم اخلاقا قالها لانه يعلم ان حسن الخلق يكسب الانسان مودة وحب واحترام من حولة ويذلل صعاب الامور فارجو منكم من يتعرض لموقف مماثل ان يفعل نفس الشئ ولو حتى الطرفين موجودين اثناء الحادثة ووجدت نفسك مخطئ بادر بالاعتذار والكلام باسلوب متحضر حتى تصل معه الا اتفاق مرضى بدون الخروج عن الادب فى النقاش او الضرب فى بعض الاحيان وصدقونى ان الكلمة الطيبة احيانا تجعل الطرف الاخر يتنازل عن حقة لاعترافك بخطأك والاعتذار

[ahmedhossam86]

بارك الله فيك و يكتر من امثالك

[Khaled Seif]

جزاك الله خيرا

وبارك لك في سيارتك

نفس الموقف تماما حدث معي وأنا باركن وحكيت في عربيه راكنة وتركت له رقم التليفون واتصل بي بعد 3 أيام , نفس قصة

حضرتك بالضبط

[MohssenRashed]

ربنا يباركلك انت راجل زوق

[al_manara]

ربنا يجازيك خير علي فعلك النبيل .
سريعا كدة . مرة حصلي موقف شبة دة شوية
انا وواحد صاحبي كنا مروحين فقابلنا لجنة ووقفنا الامين وقالة هات رخصك .قالة اتفضل . قالة كمان رخصة العربية منتهية . صاحبي قالة لسة من شهر وهاجددها . فالامين قالة طيب صباح الفل ( عاوز فلوس ) فصاحبي قالة طيب ثواني نركن علي جنب واما وقفنا قالي معاك فلوس قلتلة اة قالي طيب اديلة 20 جنية قلتلة لا انا مش هدي رشوة عاوز الفلوس خدها واديهالة انت فقالي لا ولا انا .خلاص تعالي ناخد وصل بالرخصة .
واحنا رايحين نقولة هات الوصل واسحب الرخصة كان في عقيد واقف بعيد شافنا رايحيين للامين فندهلة ورحنالة كلنا . قالة في اية . الامين قالة الرخصة منتهية وهاديهم وصل . المهم العقيد بصلنا وقالنا شكلكم ناس محترمة اوعدوني انكم تجددوا الرخصة . قلنالة حاضر . قالنا خدو الرخصة . خدناها وشكرناة ومشينا ( ودي اخرة الي مايديش رشوة ) (يعدي منها علي خير )

[smsm_cato]

ربنا يجازيك خير علي فعلك النبيل .
سريعا كدة . مرة حصلي موقف شبة دة شوية
انا وواحد صاحبي كنا مروحين فقابلنا لجنة ووقفنا الامين وقالة هات رخصك .قالة اتفضل . قالة كمان رخصة العربية منتهية . صاحبي قالة لسة من شهر وهاجددها . فالامين قالة طيب صباح الفل ( عاوز فلوس ) فصاحبي قالة طيب ثواني نركن علي جنب واما وقفنا قالي معاك فلوس قلتلة اة قالي طيب اديلة 20 جنية قلتلة لا انا مش هدي رشوة عاوز الفلوس خدها واديهالة انت فقالي لا ولا انا .خلاص تعالي ناخد وصل بالرخصة .
واحنا رايحين نقولة هات الوصل واسحب الرخصة كان في عقيد واقف بعيد شافنا رايحيين للامين فندهلة ورحنالة كلنا . قالة في اية . الامين قالة الرخصة منتهية وهاديهم وصل . المهم العقيد بصلنا وقالنا شكلكم ناس محترمة اوعدوني انكم تجددوا الرخصة . قلنالة حاضر . قالنا خدو الرخصة . خدناها وشكرناة ومشينا ( ودي اخرة الي مايديش رشوة ) (يعدي منها علي خير )

فعلا بتوع المرور ماخدوش على موضوع الفلوس ده الا لما الناس بقيت علطول تديهم وساعات ناس كمان بتديهم من غير ما يطلبوا علشان يسلكله امورة لو كل الناس قالت لأ للرشوة هنقطع العادة السيئة دى خالص

[د.أحمد السعيد]

ربنا يبارك فيك و فعلا هذه أخلاق المسلمين و ربنا يحفظك من كل سوء

[أبو صلاح]

انت راجل محترم
والراجل التاني محترم

ياريت نكون كلنا كده

[azmeralda]

حصل خير انا مرة حصل لى زى كده بس طبعا مقالش شكرا الا بعد ما صلحتها على حسابى ورجعت زى الأول : )

[kar!m]

ده صحيح فعلا .. أنا مرة كنت طالع بالعربية من شارع و مش واخد بالى خالص من اللى جاى و مبصتش الناحية التانية .. لقيت تاكسى جاى بسرعة و ام مزمر تييييييييييت و خد شمالة عشان يفادينى و هدى مستنينى اجى عشان يدينى الكلمتين اللى هما.

جيت جنبة و قلت له أنا اسف جدا .. أول ما قلت له كده .. أكنى امتصيت غضبة .. قالى طيب حصل خير و مشى.

[azmeralda]

طب ايه رأيك بقى انى مرة ركنت عند مترو - هم بالضبط 5 دقايق ويمكن اقل والعربية كان بوزها طالع شوية فواحد معرفش يعدى وانا خارجة فى نفس اللحظة الى بيبعت فيها البواب يدور دى عربية مين
بدل بقى ما اطنش واروح على عربيتى زى مالناس بتعمل معايا كنت ذوق ورحت لغاية عنده وقلت انا اسفة مخدتش بالى وكده وده راح نازل فيا زعيق قدام الناس بصوت عالى كأن بقالى ساعة مثلا ولولا انه بتاع 50 سنة فما فوق مشيت من سكات

[mrwho1982]

انت محترم ود مش جديدة عالمصريين

[dramir1]

ربنا يجازيك خير

[Ralliart]

حصلت معايا مرتين مررة امي كانت لسة مطلعة رخصة حكت حكة بسيطة في الاكصدام تروح ببوليش في عربية هوندا سيفيك متخبطه ومتجرحه من كل مكان بتاعت الجيران ورغم ان مكانش في اي حد شاهد على الواقعة قلنالهم لازم نصلحها وراحت من البجاحة صاحبة العربية مزعقة وعايزة ترش العربية بالكامل على حسابنا!!!!

والمررة التانية امي برضو خبطت عربية وهي طالعة من الجراج وسابتله ورقه على المساحة فيها رقم التليفون والراجل كان زوق وكان مصر ان كفاية الاعتذار واعتزال أمي للسواقة

بالمناسبة المرتين دول مكانوش في مصر وصاحبة العربية الاولى مكانتش مصرية وصاحب العربية التانية كان مصري

[smsm_cato]

طب ايه رأيك بقى انى مرة ركنت عند مترو - هم بالضبط 5 دقايق ويمكن اقل والعربية كان بوزها طالع شوية فواحد معرفش يعدى وانا خارجة فى نفس اللحظة الى بيبعت فيها البواب يدور دى عربية مين
بدل بقى ما اطنش واروح على عربيتى زى مالناس بتعمل معايا كنت ذوق ورحت لغاية عنده وقلت انا اسفة مخدتش بالى وكده وده راح نازل فيا زعيق قدام الناس بصوت عالى كأن بقالى ساعة مثلا ولولا انه بتاع 50 سنة فما فوق مشيت من سكات

معاكى حق فى ناس بتقابل حسن الاخلاق والادب بالاسلوب بتاع الزعيق ده بردة وبيحسبوا ان اعتذارك ده ضعف منك لكن دى فئة تتعد على الصوابع وده راجع للتربية فى الاول والاخر