حل لشخصيتي؟

[hpxp]

يا جماعه انا هنا كلم مع اخواتي الكبار فلا حرج من اي نوع اولا انا في ثانويه عامه ملاحظ اني بقيت قفل السنه دي قفل في التعامل وليس المذاكرة لحد السنه الي فاتت كنت اجتماعي واعرف اهزر واضحك دلوقتي لو فتحت بوقي بفصل الي قدامي وانا ملاحظ اني برجع لشخصيتي القديمه بتاعه اعدادي
التعامل بقي مع البنات والغرض ليس صياعه
مبعرفش اكلم بنت الا لما يبقي وشي في الارض وماسك العضله بتاعه ايدي فعصها لدرجه والله بيتحكوا عليا وبيتقصدوني في الدرس
غير كده لما حد بيكلمني كنت بعرف ارد عليه لكن دلوقتي بسكت الحقوني بقي لاني اتشليت
الملخص بقي
1- مش عارف اجتمع مع الناس
2- مش عنت بعرف اقاوح مع حد
3- عرة الرجاله في التعامل مع البنات وارجوكم محدش يضحك
4- عصبي حبتين ودا الي كنت فيه في اعدادي وجيت ظبط نفسي في ثانوي بس مش عارف راجع بفرمل ليه تاني
5- بعامل البنت علي انها حاجه مقدسه-اي حاجه كبيييييييييييييرة ولله سواء وحشه حلوة
6 انا بتهايئلي دا اثار الثانويه العامه

[hpxp]

+ بقيت بحاول ابقي منعزل عن الناااااااااااااااااااس

[3ateef]

هتخلص ثانوية عامة,,هتلاقى حياتك رجعت للطبيعى بأذن الله...

كل واحد فينا الثانويه العايمة ليها تأثير عليه,,,انا كان اكتئاب وسرقة العربية وكلام مع بنات وسجاير...

طلعت الجامعة قعدت سنتين زى الاهطل وبعدين ربنا هدانى واتعدلت...

دونت ورى,,خير ان شاء الله,,,وحاول تغير جو كل شوية...

[Eng.Geo]

بطل كلام علي النت وشات

[MISS_MONA]

كل اللى انت بتتكلم فيه ده بسبب الضغط العصبى والنفسى بتاع الثانويه العامه
استعين بالله واقرا قران كتير وربنا حيفرجها عليك ان شاء الله

[shaddadfalcon1]

مش دي برده فترة المراهقه وتغيير في الشخصيه والجسم وكل حاجه برده ولا انا غلطان
يعني اللي بيصحلك ده شيء طبيعي علي مااعتقد بس بذياده حبتين

وياسيدي انت مش محتاج تكلم بنات خالص ولو علي الناس لو شايف نفسك هتلبخط اسكت واوزن الكلام وبعدين قوله

[AkramArafa]

فيه كتاب اسمه قوه عقلك الباطن لازم لازم تقراه بجد ممكن الكتاب ده يغير حياتك للاحسن ان شاء الله

[mohamedbook]

هو الحياء دلوقتي بقي عيب
والادب بقي ضعف وانطواء
اظن الي انت فيه ده حاجة كويسة مش وحشة
عموما انت لسة صغير في السن ولسة هتاخد علي الناس اكتر

[modo88]

بطل كلام علي النت وشات

بصراحه بأيد الرأي دا لان الكلام علي النت كتير والشات وكدا بيخلق بني ادم منطوي وبيبقا بني ادم اليكتروني اكتر من هوا بني ادم اجتماعي لانه بيتعود علي نمط معين في التعامل مع الناس ومش بيقدر يغيره وللعلم مش كلام وخلاص لا دا كلام علمي لان محسوبك اخصائي اجتماعي وعلي فكره انت اصل شخصيتك انطوائيه والتغيير اللي اتغيرته في ثانوي زي مابتقول كان تغيير مؤقت بس حاول تخرج وتتكلم وتتعامل مع الناس اكتر لان لو فضلت كدا لازم تتعالج عن دكتور نفسي علشان يغير نمط تعاملك مع الناس :d

[ahmdmagdy]

فيه كتاب اسمه قوه عقلك الباطن لازم لازم تقراه بجد ممكن الكتاب ده يغير حياتك للاحسن ان شاء الله

فعلا ده كتاب ممتاز و ده الرابط بتاعه لو حبيت تقراه قوه عقلك الباطن

[keko]

هو الموضع ده كان بيحصل معايا من ضغوط نفسية قوية

[a7madramadan]

خلاصة الموضوع ده ..... انت لسه صغير .... بما تحمله الكلمه من معاني كويسه عشان ماتفهمنيش غلط ... يعني لسه ماخطيتش خطوة كبيرة في حياتك ومراحل التغيير هتعدي عليك كتير زي ما بتعدي عليا زي ما بتعدي على كل إخواتك هنا فالمنتدى ... لسه بدري قوي على مرحله انك تقيم نفسك و تقارن نفسك كتير بالي حواليك مقارنات شكلية ...

خليك طبيعي مع نفسك ماتحسسش نفسك انك عندك مشكلة من الأصل لإن كل ما هتقول لنفسك في مشكله هتزودها حاول ماتعيش نفسك في جو العالم الإفتراضي بتاع المنتديات و الشات و الألعاب الأونلاين

موضوع التعامل مع البنات ماتديلهوش أكبر من حجمه قوي يعني ...و هتتغير كتييير مع تغيير نوعيه البنات الي هتتعامل معاها سواء في كلية كطلبه أصدقاء .. أو معيدات في الكلية ... أو مجموعة عمل بحث ... وصولا للشغل ... وصولا للرابطة العاطفية الي هتكمل بيها حياتك .... و الرابطة دي مابتجيش غير زي مابيقولوا بالقسمة والنصيب و أنا عارف ان الي بتتكلم عليه مش في مرحلة الرابطة العاطفية الجدية المسؤولة انت بتتكلم عن مجرد التواصل فيه مشكلة خفيفة .... و دي بتحصل لناس كتير

وماتقلقش خــــالص .. المرحلة دي على طووووول فيها تقلبات في التفكير و في العواطف وكل الي حواليك من أصحابك بيكون عنده نوع من التغيير بيبان بشكل او بآخر وممكن ما يبانش .... والمرحلة دي بتتغير شوية شوية ... لحد ما هتوصل في اوائل العشرينات زي ماتقول كده الفورمة شبة النهائية لشخصيتك وطباعك ... ومش كل صوابعك زي بعض ... كل انسان بيختلف عن الآخر

كل الي تاخده بعد كل كلامي ده ... انك ما تعملش حاجة :) ... كبر دماغك ...

وعلى ذكر سيرة الكتب أنصحك بقرائة كتب الفضفة العامة مش الكتب المتعلقة بعلم النفس و التنمية البشرية .....

في أنواع كتير من الكتب مابيكونش فيها غير طرح لوجهات نظر عن حاجات عامة فالحياة بس بأساليب قوية جدا حقيقي مثرية للثقافة و التفكير .... أنا بانصحك تقرأ ..... : كتاب مالوش إسم لــ أحمد العسيلي .... هتلاقيه كتاب مكتوب بالعامية و لغته بسيطة و هيضحكك قوي قوي قوي من الجلدة للجلدة بس هيفتح مخك على حاجات مقفولة .... أنا شخصيا قرأته و استفدت منه جدا و أكيد ضحكني جدا

لو مش موجود في مكتبة البيت عندك او حواليك نزله من هنا ظƒطھط§ط¨ ظ…ط§ظ„ظˆط´ ط§ط³ظ… - ط£طظ…ط¯ ط§ظ„ط¹ط³ظٹظ„ظٹ - 4shared.com - online file sharing and storage - download

و ربنا يوفقك فالثانوية العامة ان شاء الله و تدخل أحسن كلية تتمناها :)

[saadelden]

ابعد عن النت شويه و هتلاقي الدنيا اتظبطت

[zago]

بطل كلام علي النت وشات

+1

[Esam Mosaad]

بكره تتدردح وتبقى ميه ميه بس سيب الوقت ده يجى يعنى عيش سنك وحياتك الطبيعيه متحولش
تسبق سنك او تفكر ان فى حاجه عمرك مهتوصلها

بكره يجى اليوم الى تبقى دنجوان وتقول انا مكنتش كدا