إضراب أطباء مصر 10 مايو

[د.أحمد السعيد]

السلام عليكم ورحمة الله وبركاته

الموضوع منقول ....


إضراب أطباء مصر 10 مايو
يا مريض وقفتنا ليك .. وقفتنا لا يمكن تأذيك

1- الاضراب مش هيعرض حياتك للخطر .. كل الاجزاء الحيوية اللي ممكن العيان يتأثر و لو بشكل بسيط فيها شغالة 24 ساعة .. زي الاستقبال و الطوارئ في كل التخصصات و الحوادث و العناية المركزة و الغسيل الكلوي ... لكن الاضراب في العيادات؛ اللي هي حاجات اختيارية و ممكن تتأجل يوم؛ زي واحد عايز يكشف جلدية أو واحد عنده فتق بقاله ميت سنة و قرر اخيرا يكشف عليه أو واحدة جاية تتطمن علي البيبي اللي هيشرف كمان 5 شهور



2- احنا موصلناش للاضراب كده فجأة .. احنا بقالنا 3 سنين بننادي بعلو صوتنا و ياما عملنا وقفات و احتجاجات بس محدش كان معبرنا .. حتي حكومة شرف مرضيتش تسمعنا اصلا مع انهم سمعوا طوب الارض .. و بعد محايلة و خناق ادونا نص ساعة نتكلم و قالولنا طب خلاص .. فوت علينا بكره .. قمة الاستهتار و عدم الاحترام لينا .. مع اننا مطلبناش غير انهم يحطونا في الاعتبار وقت ما ربنا يفرجها .. معملناش زي الشرطة و البنوك و قلنا عايزين فلوسنا دلوقتي
الاضراب ضد التجاهل و عدم الاحترام .. مش علشان الفلوس




3- أول اهداف الاضراب هو تأمين المستشفيات : مش معقولة يأمنوا ماتش الكورة و يسيبوا الناس تنضرب و تنقتل قدامنا في المستشفي زي ما حصل في المطرية و غيرها كتير .. و علي فكرة الداخلية و الجيش واصل لهم الطلب ده من زمان و محدش اتحرك برده



4- تاني الاهداف هو زيادة ميزانية الصحة في الموازنة الجاية : عشان متجيش بتنزف في الاستقبال و أقولك روح هات حقنة أو قطن من بره. الصحة في مصر بتاخد 3% من الموازنة و في أي دولة متخلفة مفيهاش وزارة صحة اصلا بتلاقي الصحة واخدة 7% علي الأقل




5- ثالث اهداف الاضراب : اقالة وزير الصحة و شلة الحرامية اللي ماسكين الوزارة من سنين .. معرفش ليه مصممين يجيبوا وزير تبع الحزب الوطني .. يعني شالوا الجبلي و جابوا سامح فريد اللي بعت عربيات الاسعاف تموت الناس .. قولنا مش عايزينه جابوا اشرف حاتم اللي كان مطلع العربيات بنفسه و اللي كان خارب القصر العيني و مطلع عين الدكاترة فيه
... هو الموضوع عند و لا وزارة الصحة ملهاش علاقة بالثورة!!!!



6- رابع مطلب هو اعادة هيكلة اجور الاطباء .. و تحديدا شباب الاطباء (( و دول غير الناس اللي حضرتك بتروح تدفع لهم 150 جنيه في الكشف )) ... دول الناس اللي لسه متخرجين من الكلية و مكتوب عليهم يقعدوا 8 سنين علي الأقل شايلين كل الشغل في المستشفيات و اجمالي اللي بيقبضوه من مرتب وحوافز وبدلات و نبطشيات من 350 لــ 700 جنيه ... و مينفعش يفتحوا عيادة لانهم لسه مخلصوش ماجيستير ... و مينفعش يزوغوا لانهم قاعدين مكان الدكاترة الكبار اللي حضرتك بتروحلهم العيادة تدفع 150 جنيه في حاجة متستاهلش .. لان الراجل الخريج ده محدش مديله فرصة يتعلم و يعالجك ببلاش في المستشفي



7- زيادة الأجور دي مش مطلب محدد القيمة أو الوقت .. يعني احنا بنقول حطونا في مكاننا الصح في أقرب تعديل .. لو الشريحة الاولي هتاخد 500 جنيه بس و من اول 2013 لان ظروف البلد متسمحش غير بكده .. احنا اول ناس موافقين و احنا اصلا قدمنا دراسة اقتصادية لاعادة توزيع مرتبات الاطباء في وزارة الصحة بالقيمة الحالية في الميزانية .. يعني تخلينا منحتاجش مليم زيادة من ميزانية الدولة .. بس الناس الكبيرة مش هتسيبنا ناخد منهم الملايين اللي بيلهفوها كل شهر



8- ليه الشريحة الأولي ؟؟؟ مش هقولك علشان احنا اشطر ناس و لا علشان احنا صفوة المجتمع و لا الكلام ده ... لان اول مرتب انا هقبضه هيكون عمري 26 سنة .. يعني زميلي اللي دخل اي مجال تاني مخلص دراسة و شغال بقاله 5 سنين .. فلازم يبقي فيه مقابل للعمر اللي ضاع مني ده



و الموضوع ده مش بدعة .. الجيش بيعمل كده معانا .. انا لما اقدم اكاديمية و اتطوع في الجيش بيساويني في الرتبة و المرتب بزميلي اللي في سني .. يعني أول شغلي تقريبا بأكون نقيب لان اللي عنده 26 سنة بيكون وصل للرتبة دي



غير ان انا باشتغل 60 ساعة في الاسبوع علي الأقل .. و انا باتكلم علي الممارس العام و الطبيب المقيم اللي بيشيل الشغل كله و مينفعش يفتح عيادة اصلا .. معظم الناس بتشتغل من 35 لــ 45 ساعة بس و بيأجزوا في العيد و انا بسيب اهلي و اروح اقعد في المستشفي علشان لو حد اتعور اخيطه .. و لا اركب له محلول و معاه حقنتين يلحقوه




دا غير فيروس سي و الامراض التانية اللي لازم و حتما و لابد هتلقط منها حاجة .. احنا بناخد بدل عدوي 19 جنيه و فيه ناس تانية ملهاش علاقة بالمرضي نهائي و شغلها في المكاتب و بتاخد 450 جنيه



و حاجة تانية مهمة .. كل دول العالم المتقدمة بتحط الطبيب في اول شريحة لان حياة الناس امن قومي و لازم المسئول عنها يبقي مستعد يحافظ عليها بشكل فعال .. مش بيتنطط طول الاسبوع في المستوصفات علشان يقسم الــ 50 جنيه ايراد اليوم مع صاحب المستوصف



9- الناس اللي بتقول الدكاترة اللي في مصر اي كلام اصلا و ميستحقوش الزيادة ... أنا موافق علي كلامك ومش هناقشك فيه .. عارف ليه ؟؟؟



لان الدكاترة الشاطرة اللي بتفهم مبيعرفوش يعيشوا بالمرتبات اللي هنا دي .. فبيسيبوا البلد و يطفشوا علشان يدورا علي مكان يحافظ علي كرامتهم و يديهم فرصة يستمروا في تعليمهم علشان يطوروا نفسهم لان الكلام ده مكلف جدا ..


الدكتور المصري بره بيفضل يذاكر و يمتحن لغاية ما يموت .. احنا المهنة الوحيدة اللي بتعمل مؤتمرات علمية طول السنة و ناس كتير بتحضرها



اكيد محدش عايز يبقي وحش و فاشل بمزاجه .. بس لما تلاقي نفسك مستلف من ابوك تمن البنطلون اللي اشتريته من التوحيد و النور مش هتفكر تشتري مرجع بــ 300 جنيه أو تحضر مؤتمر يومين في القاهرة بــ 500 جنيه



متعة رسالة انك تساعد الناس ملهاش تمن .. بس متجبروش الدكاترة انهم يتنازلوا عنها علشان يقدروا يعيشوا حياة كريمة

[megamoudy]

حضرتك يا دكتور مشارك ف الاضراب ؟؟؟؟؟؟؟؟؟؟؟؟؟


بالنسبة لطلبة ستة ينفع نضرب عن الراوندات هههههههههه


يارب ناخد حقوقنا يارب

[megamoudy]

يارب الناس تقدر بس الكلام اللي مكتوب ............. انا كمان اختي لسه متعينة ف وحدة صحية تكليف السنة دي ......... بدل العدوى كمان 2 جنيه

دول ميركبوش تاكسي

[د.أحمد السعيد]

حضرتك يا دكتور مشارك ف الاضراب ؟؟؟؟؟؟؟؟؟؟؟؟؟


بالنسبة لطلبة ستة ينفع نضرب عن الراوندات هههههههههه


يارب ناخد حقوقنا يارب

ربنا يوفقك و تخلص على خير

على فكرة طبيب الامتياز السعودى بياخد اكتر من 20 الف ريال

[megamoudy]

ماشاء الله .............. ده احنا غلاااااااابااااااااااااااااااااا موت على كده

وراضيين بالشغل البلوشي وحجتنا عشان نتعلم اي حاجة

[zakiali]

الإضراب هو الحل الوحيد يا دكاتره .. أدمن صفحة مطالب أطباء مصر

[mahmoud_magdy]

انا مش طبيب
ويهمني ان الاطباء يعيشو عيشه كريمه
زي اي مواطن بيمتهن اي مهنه في الوطن
كل واحد في مهنته مؤثر
ولذلك متضامن معاكم

[human]

يعنى الدكتور اللى واخد منى 150 جنيه عشان كشف 5 دقايق هيشارك فى الوقفه؟
و الدكتور اللى نضفلى التهاب حول كيس دهنى و شاط فى حوالى 700 جنيه فى 15 دقيقه هيشارك؟
و الدكتور اللى كشف على لوز ابنى ب 120 جنيه فى 7 دقايق و تحاليل بحوالى 350 جنيه و رحع شافها فى 6 دقايق هيشارك برضه؟

طيب الاستاذ الدكتور استشارى العظام اللى كشف على رجلى من سنه او ازيد و اخد 100 جنيه و ماقعدتش عنده خمس دقايق على بعض و مابصش حتى فى وشى اكنى مش موجود هيشارك برضه؟

طيب الاستاذ الدكتور الشهير اللى اخد فى متابعه الولاده المرتين ب 180 و المرتين لا يتعدوا على بعض عشر دقايق المتابعه بتخش فى الف و شويه على بعضها- و مارضتش اولد عنده عشان كان هيضيعنا لما الميه نشفت و هو بيقول استنى يومين و اعملى تحليل زلال لولا دكتوره فى مستشفى فقير نعرفها قلنا تبص عليها و الميه كانت ناشفه و كان لازم قيصرى و ربنا الحمد لله نجانا منه
اختى ولدت عنده و اخد 5 الاف جنيه فى ايده بس
الدكتور ده هيشارك؟؟

طيب كم نسبه ممن سيشارك الان سيصبح مثل هؤلاء؟؟
سؤال بسيط

[megamoudy]

ده كله شغل خاااااااص ......... والكلام اكتره للناس الشباب اللي بيتقطعو .......... ووعموما الاجهزة الطبية غالية والكتب غالية والدراسات غالية

انا مش بكلم ف مئات انا بكلم ف الافات ............... غير اننا بنتخرج سننا كبير انا على سن خمسة وعشرين سنة ولسه معملتش حاجة ويا سلام لو فيه جيش ادخل ظابط تلات سنين ........... احسنلي اروح الترب احسن ادفن


موضوع المية زادت او نشفت ........... متزعلش مني ............ في اخطاء طبية كتير .......... وفي حاجات

idiopathic

غير معروفة السبب ............ واهو لما حضرتك الدنيا تتعدل مين هيفكر يعمل الاسعار الفلكية دي ف الكشف

[human]

ده كله شغل خاااااااص ......... والكلام اكتره للناس الشباب اللي بيتقطعو .......... ووعموما الاجهزة الطبية غالية والكتب غالية والدراسات غالية

انا مش بكلم ف مئات انا بكلم ف الافات ............... غير اننا بنتخرج سننا كبير انا على سن خمسة وعشرين سنة ولسه معملتش حاجة ويا سلام لو فيه جيش ادخل ظابط تلات سنين ........... احسنلي اروح الترب احسن ادفن


موضوع المية زادت او نشفت ........... متزعلش مني ............ في اخطاء طبية كتير .......... وفي حاجات

idiopathic

غير معروفة السبب ............ واهو لما حضرتك الدنيا تتعدل مين هيفكر يعمل الاسعار الفلكية دي ف الكشف

على فكره
انا 100% مع تعديل كادر الاطباء طبعا
و عارف ان اللى بيتكلم بيتكلم على شغله اللى فى مستشفى عام

بس حضرتك اللى فى المستشفى العام لما بياخد دكتوراه و يبقى استشارى كتير منهم بيحولوا المرضى على العيادات الخاصه بتاعتهم و الموضوع بيبقى بيزنس بحت لناس كتير و يتفق معاه فى العياده على الفلوس اللى هياخدها منه فى المستشفى :) و ممكن يشده لمستشفى قطاع خاص بيعمل فيها العمليات
يعنى الصبح مستشفى قطاع عام حتى يقابل المرضى
المرضى يزورونه فى العيداه فى وقت من الى
و بيعمل العمليات فى مستشفى اخرى مساءا او صباحه يومين فى الاسبوع

النمط ده مكرر بنسبه كام 100% ؟؟؟

طبعا له حق فى عيشه كريمه و ده الجميع يؤيده بس المريض له الحق برضه فى طريقه احسن من كده و اسلوب تعامل معاه احسن من كدهو مافيش حد بيحمى المريض منه فى الاخر

و اى دكتور ممكن مع مفرمه الزمن و الحاجه انه يتحول لواحد بيعامل الناس انهم بيزنس ماشى على الارض

انا نفسى فى اى اليه تحكم برضه للمرضى و تحد من خراف الاسعار و التعامل

[alaa_dash]

انا نفسى فى اى اليه تحكم برضه للمرضى و تحد من خراف الاسعار و التعامل

مفيش حل غير تعديل رواتب الاطباء و تأمين صحي شامل للكل ....

[megamoudy]

فعلا ............... تعديل الرواتب ........ ورقابه تامه محدش هيعك

[zakiali]

أنا واحد من الأطباء أول تعيين ليه كان في أسوان سنه 2004 وانا من القاهره ... سفر 12 ساعه بالقطر أيام ما كانت التذكره ب 100 جنيه رايح بس مش عارف بقت بكام دلوقتي .. ومرتبي كان 230 في الشهر .. والأكل والشرب واللبس والمواصلات عليك .. كنت بصرف حوالي 1500 جنيه ده مع ربط الحزام طبعا .. وحسبي الله ونعم الوكيل في وزارة الصحة .. احنا بنكلم في قطاع عريض من الأطباء حديثي التخرج .. ماهو كل مهنه ليها حيتانها .. المدرسين .. المحامين .. المهندسين .. أما السواد الأعظم تحت خط الفقر .. المشكله ان الناس فاكرانا نايمين علي كنوز ... لما تروح لميكانيكي لو عرف انك دكتور الحاجه ام 10 يقولك ب 100 ولما تيجي تتقدم لبنت الشبكه اللي ب 20 تبقي ب 50 الف .. ميعرفوش ان الواحد بيشتغل ليل مع نهار عشان يدوب يعرف يعيش بس .. مع العلم ان الدكتور ملزم انه يحضر ماجستير .. أنا عن نفسي فضلت 6 سنين في الماجستير بس ويدوب لسه مخلصه .. ذل حقيقي .. ده غير سنوات الدراسه في الكلية .. 7 سنين ده غير جيش 3 سنين .. غير تكليف سنتين في مناطق نائية .. يعني الطبيب لما يفوق من كل ده يبقي عنده 32 - 33 سنه نص عمره راح وشبابه راح ,,, وصاحبنا اللي خريج تجاره انجلش اتعين في بنك أو شركة بترول أول مرتبه 5000 - 8000 ده غير المميزات التانيه -- مصايف رحلات - عيديات - تقسيط بدون فوايد ... ولا عزاء للأطباء

[zakiali]

ملخص سريع لحال وزارة الصحة والأطباء ... والإضراب القادم

[youtube]http://www.youtube.com/watch?v=b6kPAqRdlwg&feature=player_embedded[/youtube]

[tamatemo]

يعني الطبيب لما يفوق من كل ده يبقي عنده 32 - 33 سنه نص عمره راح وشبابه راح ,,, وصاحبنا اللي خريج تجاره انجلش اتعين في بنك أو شركة بترول أول مرتبه 5000 - 8000 ده غير المميزات التانيه -- مصايف رحلات - عيديات - تقسيط بدون فوايد ... ولا عزاء للأطباء

اهو النقطة دي بالذات هيا اللي بتشيل الناس منكم

اولا انا مع اي حد في انه يعدل اوضاعه مدام بيعمل في الحكومة

طب لو برة الحكومة في القطاع الخاص ؟؟؟

يبقي القصة عرض وطلب و بتاع تجارة انجليش اللي حضرتك بتتكلم عليه نسبته قد ايه من دفعته ؟

وفي قطاع خاص ش في حكومة

طب لو في حكومة يبقي مرتبه كام؟


حضرتك تقارن بنفس الظروف والكيفية

هوا واحد مجموعه كان علي قده ودخل تجارة كلية 4 سنين بس

الطبيب حد مجتهد كليته 7 سنين "مش عارف ليه سبع سنين وهل برة برضو سبع سنين" وجيش ممكن سنة وممكن تلاتة

بس بعد 20 سنة

الطبيب حالته ايه؟
والمحاسب حالته ايه؟

والاتنين اتعينوا في الحكومة؟؟؟؟؟!!!!


ولعلمك دي النقطة اللي بتناقش فيها مع الداكاترة اصحابي اللي من دفعتي
مينفعش تقارن نفسك في ظروفك بواحد في ظروف تانية خالص

ما تبقاش مقارنة


اما احنا معاكم في انكم تاخدو حقك وانكم يبقي سهل انكم تحضروا الماجيستر مش لازم كام امتحان وفيرست وسكيند

ودور اول ودور تاني وشفوي


المهم ان يبقي فيه كفائة فعلية وتحسين من كل النواحي "مستشفيات وادوات وحاجات تانية كتير " مش تحسين مادي فقط