الشرطه والثوره

[alynubira]

انا شايف ان اغلب ضباط الشرطه متضايقن جدا من الثوره وده ليه اسباب كتييير وانا شايف ان ده السبب الرئيسى لعدم شغلهم بما يرضى الله بصراحه بدأت اتضايق من ضباط الشرطه حد عنده رأى تانى

[mrwho1982]

مش كلهم مش بدافع عنهم بس في منهم ناس مكسورة بجد

وفي ناس عايزة الحرق بجاز

وفي منهم فئة ولاد ناس اويييييييي

[zoom2zoom]

الشرطه خايفه جدااااا من الشعب وهيحترموه غصب عنهم بس للاسف شعبنا زياط اوي يعني هتلاقي ناس ماشيه عكس ومخالفه ولو الظابط جه فتح بقه ياخد علي دماغه عشان بقت سايبه

[kamalsalem]

أسيادي الأفاضل دعونا نفصل الموضوع عشان محدش يزعل:
1- مصر بقالها أكتر من 20 سنة تقريباً السبب الوحيد انه أي واحد يبقول أخش شرطة عشان الهيبة بتاعة البدلة مش عشان هو حابب شغل الشرطة.. وتلاقيهم بيتنططوا على خلق الله ومع ذلك قرفانين من الشغل ونفسهم ميشتغلوش
2- الشرطة وظيفة زي أي وظيفة والكلام ده قلته أكتر من مرة لظباط شرطة في وشهم اخرهم النجم بتاع الجوازات في المطار وانا راجع من أسبوع... اللي عاجبة الشغل يشتغل واللي مش عاجبة مايشتغلش
3- الضرايب اللي بدفعها من لحمي الحي هي اللي بتدفع مرتباتهم.. ف في الحقيقة هما اللي شغالين عندنا... أي اتفاق غير كده مرفوض
4- زعلانين انه احترامهم راح من عند الناس؟ ماهو من أعمالهم سلط عليهم... يعني لما اقابل واحد ويقولي انا فلان ظابط المفروض اترعش في هدومي؟ فاكس.. بطلنا نعمل كده... يوم 25 يناير بالظبط واحد قافل عليا الركنة ف بقوله مش معقول انه عشان ياكل ولا يشرب انا استنى ساعة في الحر.. بيقولي انا النقيب احمد معرفش ايه... امن دولة... قلتله وانا المهندس كمال سالم... Ibm.. وبعدين؟ ف اندهش كده... قلتله على فكرة شهادتي أعلى ماتتخضش... قاللي نمرة تليفونك قلتله اتفضل كده كده البلد بتولع وانت مش هتفضالي... قاللي لأ باتعرف بس.. قلتله من الاخر كلها كام يوم وهتبطل تتكلم باللغة دي مع الناس.. كل واحد فينا له شغله يعمله.. غير كده في الشارع كلنا واحد.. شيل عربيتك... ف شال عربيته بعد ما داس على حجر ودهول بطنها وكسر نصها...
5- كلية الشرطة بقت بؤرة لتعليم قلة الادب.. ماشي في أشكال مينفعش معاها غير كده... بس نتعلم نتكلم مع الناس.. ولا هو الشغل من غير قلة ادب ماينفعش
6- الناس اللي ماتت زودت الطين بلة... أنا مش اسف لأي ظابط شرطة رفع سلاح أو حتى سماعة تليفون عشان يأذي واحد بيدور يجيب حق الظابط ده نفسه من النظام الفاسد.. وعشان كده نحتسبهم عند الله شهداء
7- أظن الفضايح بتاعة الداخلية عمالة تبان... السيئة مش بتعم؟ ماهي بتعم على دماغنا بقالها 30 سنة في حين انه اي حد معلق دبورة بيعتبر نفسه فوق القانون وفوق الدين وبلاش ازود عن كده عشان الناس متزعلش
8- الكلام موجه كمان لظباط الجيش اللي بدأوا يمشوا يناكفوا في خلق الله وشالوا النمر من على عربياتهم... الدايرة بتلف والشعب كلمته بتمشي... نتلم أحسن

واسف على الاطالة وكل احترامي لأشخاص الجميع بغض النظر عن وظايفهم

[m3_dolphen]

الشرطه خايفه جدااااا من الشعب وهيحترموه غصب عنهم بس للاسف شعبنا زياط اوي يعني هتلاقي ناس ماشيه عكس ومخالفه ولو الظابط جه فتح بقه ياخد علي دماغه عشان بقت سايبه

فعلا هى دى المشكلة يا اتش

[فتح الباب]

يسرى فوده كان بيتكلم عن الموضوع ده الليله وكان مستضيف بتوع الطب الشرعى ايضا وللاسف مش لاقى اى ايجابيات عن الشرطه يتكلم عنها . كلها سلبيات للان