رجل .... والرجال قليل ..... الشيخ عبد الحكيم ( تجربة شخصية غير عادية )

[aif]

في شهر فبراير عام 2008 كنت في عمرة .... واثناء تواجدي بالمسجد النبوي وقبل سفري عائدا الي مكة بساعات خطر ببالي ان ابحث عن الشيخ لاشين .... انا لا اعرفه لكنه هو استاذ ومعلم الشيخ ايمن الذي هو شيخي واستاذي
قلت ابحث عنه واسلم عليه واحاول ان اقرأ عليه ما تيسر من القرءان لعلي استفيد من علمه
وعلمت انه يجلس عند خوخة ابي بكر
ذهبت الي هناك ولفت انتباهي رجل كبير يجلس مسندا ظهره للحائط والنور يبدو مشرقا في وجهه البشوش
السلام عليكم
وعليكم السلام يا ابني
حضرتك من اهل المدينة ياشيخ
لأ يا ابني انا مقيم هنا ... خير .... عاوز حاجة يا ابني
انا بادور ع الشيخ سيد لاشين
لأ ده النهاردة عنده درس في مسجد ابي ذر ... تلاقيه هنا بكرة ان شاء الله ... انت تعرفه ؟؟
لأ .... كنت عاوز اسلم عليه بس ... هو شيخ الشيخ بتاعي
شيخ شيخك .... حلوة شيخ شيخة دي ...... ممكن تكتب اسمك وانا ح ابلغه الرسالة ... هو بلدياتي من الجيزة
حضرتك اسمك ايه ؟؟
اسمي عبد الحكيم
شكرا يا شيخ ربنا يبارك فيك
وكتبت رسالة بسيطة وتركتها معه وكان آذان العشاء قد حان ف صليت بالقرب منه
ولاحظت بعد الصلاة ان ناس كتير بيجو يسلمو عليه ويقبلو رأسه وناس تانية بيقرأوا عليه القرءان وهو يصحح لهم .... وشعرت انه شخص غير عادي .... عالم ... والناس بيعاملوه بمنتهى القار والاحترام
ذهبت اليه بعد الصلاة وافتعلت معه حديث عن الرسالة اللي تركتها معاه .. لكي اسأله
هو حضرتك اسمك عبد الحكيم ايه ؟؟
عبد الحكيم عبد السلام
عبد السلام ايه ؟؟
اسمي عبد الحكيم عبد السلام خاطر
عبد الحكيم خاطر ؟؟؟؟؟ ..... هو حضرتك اللي اسمك مكتوب في لجنة مراجعة مصحف المدينة ؟؟؟؟؟
ايوه يا ابني اصلي بأشتغل هنا في مجمع الملك فهد للمصحف الشريف
ده انت رزق العمرة بقى .... انا مش ماشي غير لما أقرأ عليك ما تيسر
يا ابني الناس دي بياخدو مني إجازات وح يطولوا قدامهم اكتر من ساعتين ... وانت بتقول انك مسافر كمان شوية
الاتوبيسات كل ساعة ممكن اتأخر ساعة ولا ساعتين ولا يوم حتى .... لكن انا ح الاقيك تاني فين يا شيخ ... انا مش ماشي ... ح انتظر
طب اقعد جنبي هنا .... واشار الي واحد من تلاميذه جابلي كباية مياة زمزم وكباية فيها تمر
خد كل التمرده
حاضر ياشيخ
واشرب ... ده ماء زمزم
حاضر يا شيخ
واشرب القهوة دي
حاضر يا شيخ ( بصراحة ما اقدرش ارفض شيء من راجل عالم بركة زي ده )
....
وبعد نصف ساعة تقريبا اشار إلي قائلا
تعالى انت يا اللي مسافر عشان ما تتأخرش
نعم يا شيخ
اقرأ
وطبعا صححلي عدة اخطاء
ابقى اكثر من الجلوس الي القراء والعلماء يا ابني ... وادعيلي ... انت مسافر ودعاء المسافر مستجاب ان شاء الله
و سلمت عليه وقبلت رأسه وانصرفت الي مكة
....
...
وعدت الي المدينة في يناير 2011 في عمرة منذ شهور قليلة
وسألت عليه وعرفت انه بخير ويجلس في نفس مكانة بعد العشاء
وذهبت وانتظرت حتى جاء وجلس في مكانه
السلام عليكم يا شيخ
عليكم السلام يا ابني
انا كنت قابلتك من 3 سنين كنت باسألك عن الشيخ لاشين
ايوه يا ابني انا فاكرك ( عمره فوق السبعين بسم الله ما شاء الله )
ممكن اقعد معاك يا شيخ
اتفضل يا ابني
وما حدث منذ 3 سنوات تكرر مرة اخرى ....وبعد ما انصرف التلاميذ
اتفضل معايا يا ابني تتعشى عندي
الله يكرمك يا شيخ انا بس كنت عاوز اقرأ عليك ولو الفاتحة
اقرأ
وبعد القراءة
ممكن طلب كمان يا شيخ
ايه تاني ؟؟
ممكن اتصور معاك ؟؟
وايه لزومه يا ابني ؟؟
بصراحة .... اصلي عاوز لما اروح مصر اتفشخر على ولادي واصحابي بأني متصور معاك
هاهاهاها عاوز تتفشخر بيه ؟؟...... اتفشخر يا سيدي
ابقى ادعيلي يا ابني انت على سفر ودعائك مستجاب ان شاء الله
.....
وطبعا كنت مجهز الموبايل واتصورت معاة كام صورة كدة بسرعة ..
..



وسلمت عليه وقبلت رأسه وانصرفت
وآديني باتفشخر أهو

الواحد لو اسمه اتكتب في مجلة ميكي بيبقى فرحان بنفسه أوي
الراجل ده اسمه في عشرات ملايين النسخ من مصحف المدينة المنورة
اسمه ضمن لجنة مراجعة المصحف الشريف منذ سنوات وسنوات
ويقول بكل تواضع ... اصل انا باشتغل هنا في مجمع المصحف
رجل من القلة التي قلما تجدها في زماننا هذا .... ولا نزكي على الله احد

عن عمر بن الخطاب أنه خرج يوما إلى مسجد رسول الله صلى الله عليه وسلم فوجد معاذ بن جبل قاعدا عند قبر الرسول صلى الله عليه وسلم يبكي

فقال ما يبكيك قال يبكيني شيء سمعته من رسول الله صلى الله عليه وسلم .

سمعت رسول الله صلى الله عليه وسلم يقول إن الله يحب الأبرار الأتقياء الأخفياء الذين إذا غابوا لم يفتقدوا وإن حضروا لم يدعوا ولم يعرفوا قلوبهم مصابيح الهدى يخرجون من كل غبراء مظلمة .

[تامر.محمد]

تجربة غير عادية فعلا
:)

[أبومعاذ]

ما شاء الله ربنا يجعلنا من أهل القرآن الذين هم أهله و خاصته

[MohssenRashed]

ربنا يباركلو و يباركلك يا استاذ احمد

[m3_dolphen]

ماشاء الله ... يابختك ... ربنا يبارك فى الشيخ عبد الحكيم

[abogogo]

بس الله مشاء الله اللهم اوعدنا ... اللهم بارك في علماء الامة وأكثر منهم

[aif]

على فكرة
معظم شيوخ وعلماء القراءات واعضاء لجنة المراجعة بالمدينة المنورة من المصريين
بسم الله ماشاء الله
والله الواحد بيكون فخور بأنه مصري لما بيشوف الناس المحترمة دي


..
..
عن أنس رضي الله عنه قال: قال رسول الله صلى الله عليه وسلم (إن لله تعالى أهلين من الناس. قالوا: يا رسول الله من هم؟ قال: هم أهل القرآن أهل الله وخاصته). (صحيح الجامع2165)
..
تخيلوا مدى الشرف والرضا من الله ان يقول عن بشر مثلنا .... انهم اهله وخاصته ... اللهم اجعلنا منهم يارب العالمين

[memo_p910]

ربنا يبارك فيه ويكتبلنا عمره قريبه

[HOSSAM99]

السلام عليكم
رحله جميله و ربنا يكتب لك و لنا لقاء الشيخ ثانية ... و ربنا يبارك في كل متواضع

[kar!m]

السلام عليكم يا شيخ
عليكم السلام يا ابني
انا كنت قابلتك من 3 سنين كنت باسألك عن الشيخ لاشين
ايوه يا ابني انا فاكرك ( عمره فوق السبعين بسم الله ما شاء الله )

تعليق بسيط على الحتة دى .. هقول معلومة يمكن يكون حد مش عارفها .. فى حديث ان أهل القران بيتمتعوا بالذاكرة ما شاء الله الى اخر العمر.

قال ابن عباس -رضي الله عنه-:
"من قرأ القرآن - يعني حفظه - لم يرد إلى أرذل العمر..." [رواه الحاكم وصححه الألباني].

قال ابن تيمية -رحمه الله-: هذا مخصوص بقارئ القرآن

وقال محمد بن كعب: من قرأ القرآن مُتِّع بعقله وإن بلغ من العمر مائتي سنة (200 سنة)

وقال عبد الملك بن عمير: إن أبقى الناس عقولاً هم قراء القرآن.

اللهم اجعلنا منهم.

[aif]

تعليق بسيط على الحتة دى .. هقول معلومة يمكن يكون حد مش عارفها .. فى حديث ان أهل القران بيتمتعوا بالذاكرة ما شاء الله الى اخر العمر.

قال ابن عباس -رضي الله عنه-:
"من قرأ القرآن - يعني حفظه - لم يرد إلى أرذل العمر..." [رواه الحاكم وصححه الألباني].

قال ابن تيمية -رحمه الله-: هذا مخصوص بقارئ القرآن

وقال محمد بن كعب: من قرأ القرآن مُتِّع بعقله وإن بلغ من العمر مائتي سنة (200 سنة)

وقال عبد الملك بن عمير: إن أبقى الناس عقولاً هم قراء القرآن.

اللهم اجعلنا منهم.

كلامك صحيح تماما
اذا كان ربنا انعم عليه بحفظ القرءان بعدة روايات بالكلمة والحرف والحركة والغنة والمد .......
انا فكرت في كدة بالضبط لما لقيته فاكرني برغم كبر سنه وبرغم اني قابلته مقابلة عابرة وهو بيمر عليه مئات البشر يوميا
حديث ابن عباس ده جديد بالنسبة لي ... اول مرة اقرأة .... جزاك الله خير

[Khaled Seif]

بسم الله ما شاء الله لاقوة إلا بالله

الله عليك ياشيخ / أحمد

عندنا في حدائق حلوان كان يوجد اثنين من العلماء من أعضاء لجنة مراجعة المصحف

- الشيخ المرصفي ( يرحمه الله ) صاحب كتاب هداية القاري لتجويد كلام الباري

وهو من أكبر وأهم كتب التجويد في رواية حفص

- الشيخ فرغل سيد فرج ( يرحمه الله ) , وشرفني الله بأنني أسكن في نفس الشارع الذي يسكن فيه

الشيخ فرغل ورأيته رأي العين رحمه الله وصليت خلفه

- وأيضا عندنا في حدائق حلوان الشيخ / محمد الشافعي ,

أسأل الله أن يبارك في عمره ( 90 عاما )

وهو حاصل على جائزة الملك فهد ( أعلى جائزة في السعودية ) وهو شيخ الشيخ عبد الباري

الثبيتي الإمام بالحرم المدني , وكان الشيخ الشافعي لمدة 15 عاما المسؤل الأول عن حلقات

التعليم بالمسجد الحرام

ووعدني أن أختم عليه القرءان ولكن نظرا لظروفه الصحية يتم التأجيل كل مرة

وتشرفت بأن قرأت عليه بعض الآيات , وفاجئني بأن صليت به إماما

- وبالمسجد النبوي على شمال الروضة بأمتار ( تحت خامس عمود للداخل من باب السلام ) تحت

الساعة يجلس شيخ شيخي الشيخ محمد أبو رواش مدير إدارة مراقبة النص القرآني بمجمع الملك

فهد وزميل الشيخ عبد الحكيم خاطر , ويقرأ عليه الإخوة للإجازة , ويختموا القرءان في خمسة

عشر يوما ويعطيهم شهادة مختومة بختم المسجد النبوي

وإن أردت أن تقرأ عليه يخرج لك أحد تلامذته ورقة بها عشرات الأسماء لتكتب اسمك في ذيل

القائمة حتى يأتي دورك

ولو وجدك غير متقن للحفظ يردك لآخر الدور مرة أخرى , وحدث مثل هذه الواقعة أمام شيخي

- وعندنا في حدائق حلوان أيضا شيخي الشيخ سيد بعبولة , المصحح بالحرم المكي سابقا وتلميذ

شيخ القراء بمصر الشيخ الهمداني

وصاحب كتاب البيان في قراءة حفص بن سليمان

وقرأت عليه سورة البقرة كاملة

أسأل الله أن يبارك في علمائنا وأن يجعلنا من أهل القرءان

وصل اللهم وسلم على الحبيب محمد

[ahmedbatoos]

بسم الله ما شاء الله . . انا عملت عمرة وانا في ثناوية عامة من سنين وقابلت صدفة الشيخ صفوت حجازي للأسف لم اقابل احد اخر. . ربنا يكتبها ليا قريب ونري شيوخ المسلمين من كل الجنسيات في المدن المباركة مكة والمدينة ويارب يكتبها لينا في بيت المقدس

[aif]

بسم الله ما شاء الله لاقوة إلا بالله

الله عليك ياشيخ / أحمد

عندنا في حدائق حلوان كان يوجد اثنين من العلماء من أعضاء لجنة مراجعة المصحف

- الشيخ الرصفي ( يرحمه الله ) صاحب كتاب هداية القاري لتجويد كلام الباري

وهو من أكبر وأهم كتب التجويد في رواية حفص

- الشيخ فرغل سيد فرج ( يرحمه الله ) , وشرفني الله بأنني أسكن في نفس الشارع الذي يسكن فيه

الشيخ فرغل ورأيته رأي العين رحمه الله وصليت خلفه

- وأيضا عندنا في حدائق حلوان الشيخ / محمد الشافعي ,

أسأل الله أن يبارك في عمره ( 90 عاما )

وهو حاصل على جائزة الملك فهد ( أعلى جائزة في السعودية ) وهو شيخ الشيخ عبد الباري

الثبيتي الإمام بالحرم المدني , وكان الشيخ الشافعي لمدة 15 عاما المسؤل الأول عن حلقات

التعليم بالمسجد الحرام

ووعدني أن أختم عليه القرءان ولكن نظرا لظروفه الصحية يتم التأجيل كل مرة

وتشرفت بأن قرأت عليه بعض الآيات , وفاجئني بأن صليت به إماما

- وبالمسجد النبوي على شمال الروضة بأمتار ( تحت خامس عمود للداخل من باب السلام ) تحت

الساعة يجلس شيخ شيخي الشيخ محمد أبو رواش مدير إدارة مراقبة النص القرآني بمجمع الملك

فهد وزميل الشيخ عبد الحكيم خاطر , ويقرأ عليه الإخوة للإجازة , ويختموا القرءان في خمسة

عشر يوما ويعطيهم شهادة مختومة بختم المسجد النبوي

وإن أردت أن تقرأ عليه يخرج لك أحد تلامذته ورقة بها عشرات الأسماء لتكتب اسمك في ذيل

القائمة حتى يأتي دورك

ولو وجدك غير متقن للحفظ يردك لآخر الدور مرة أخرى , وحدث مثل هذه الواقعة أمام شيخي

- وعندنا في حدائق حلوان أيضا شيخي الشيخ سيد بعبولة , المصحح بالحرم المكي سابقا وتلميذ

شيخ القراء بمصر الشيخ الهمداني

وصاحب كتاب البيان في قراءة حفص بن سليمان

وقرأت عليه سورة البقرة كاملة

أسأل الله أن يبارك في علمائنا وأن يجعلنا من أهل القرءان

وصل اللهم وسلم على الحبيب محمد

ربنا يبارك فيك ويزيدك يا شيخ خالد
في العمرة الاخيرة اكرمني الله وقرأت على الشيخ ابو رواش وكذلك الدكتور عبد الله
فعلا زي ما حضرتك وصفت .... بيقعدو عند العامود اللي عليه الساعة وهو آخر عامود من حدود المسجد الاصلية ( اللي عليهم اخضر من فوق ) دلني عليهم شاب سعودي لما سألته عن الشيخ عبد الحكيم وقال دول اقران الشيخ عبد الحكيم ممكن تقرأ عليهم .... واخدني بنفسه وعرفتي بهم لما عرف اني زائر ومش من اهل المدينة
وكان لي الشرف ان قرأت عليهم وتناولت معهم بعض التمر حيث كان يوم اثنين وكنا بعد المغرب
ناس في منتهى التواضع والكرم والعلم
ربنا يبارك فيك يا شيخ خالد فكرتني بالحلم الحميل اللي عشته في المدينة ومكة ....... يارب العودة

[alaa99991111]

بسم الله ما شاء الله

بارك الله فيه وفيك

اللهم ارزقنا حسن الخلق والعلم النافع وصحبة الابرار الاخيار