كنت شغال ايه قبل كده

[abd_el_7amid]

بجد ربنا يكرم صاحب الموضوع ده

لانه موضوع مميز جدا وتميزه مش بالفكره فقط ولكن تميزه الحقيقى انه فكر الواحد باصعب واحلى وامتع ايام حياته ،
وخلى شريط الذكريات يمر بداخلنا واحنا بنكتب فى هذا الموضوع.

وايضا ان يعلم الجميع ان مع العسر يسرا ان مع العسر يسرا
جزاكم الله خيرا وسدد خطاكم ووفقنا ووفق شباب الامه والمنتدى الى الخير

الله يكرمك ...
وفعلا الانسان يشتاق للحظات الكفاح ... ويحس بوجوده... ويدفعه انه يكمل باقى حياته بعزم مهما واجه من مشاكل

[kamalsalem]

أنا ماشتغلتش قبل الجامعة

وأنا في تانية جامعة فجأة لقيتني بادرس برمجة لطلبة أولى... كنت باخش السكاشن عشان مكانش عندهم حد في الجامعة يقوم بهذه المهمة الجبارة

وأنا في تالتة كنت بعمل نفس الكلام مع أولى وتانية

وأنا في رابعة ماشتغلتش عشان اعرف اركز في المشروع... يوم ما خلصت دراسة واحد صاحبي رشحني وقعدت سنة ونص أدرس في مركز كيت... كنت بادرس برمجة وقواعد بيانات وويب وكل كافة شيء لناس في أضعاف سني... وخطبت بعد التخرج ب 6 شهور لأني مرتبط بمراتي من أيام الجامعة

بعد ما سبت التدريس رحت شركة صغيرة بتاعة واحد لواء متقاعد كنا بنعمل لاسلكي مصري فيه نظام تحديد مواقع وبتاع (أنا أصلاً خريج انظمة اتصالات والكترونيات مش حاسب الى)... ومسكت مشروع مع وزارة الري كانوا على وشك يرفعوا على الشركة قضية قبل ما أجي والحمد لله المشروع اتسلم ووكيل الوزارة اللي سلمته المشورع مات بعدها علاطول ههههههههههههههههههه

بعد كده التحقت بصفوف IBM وعملنا مشروع الجوازات (يعني اللي مش عاجبة الباسبور الجديد يدعي عليا أنا هههههههه ) بعقد مؤقت وبعدين اتثبت ودلوقتي شغال Business Analyst في نفس الشركة

أخوكم كمال سالم 27 سنة - خريج هندسة القاهرة

[elpasha1]

والله انا مش فاكر السنين
ا- اشتغلت فى محل كشرى (سفرة - غسيل اطباق) 2 جنية اليوم
2- ساهمت فى انشاء فندق الفور سيزون اللى فى شارع مراد (صبى بنا) 6 جنية اليوم وكنت باخذ 3 جنية وكان بيحجز 3 جنية ضمان انى اجيلة تانى
3- العمل فى شركة كمبيوتر (مشوارجى) 200 جنية فى الشهر
4- العمل باوبرا عايدة عام 98 لان دى منسهاش ابدا كنت مساعد حداد وكانت ب18.5 اليومية
بعد التخرج
1- العمل مدرس تربية رياضية
2- العمل بديوان عام وزارة التربية والتعليم وحتى الان

[فتح الباب]

كل الاحترام لكم انا اعمل صياد بالبحر الابيض المتوسط فقط للان وغير مؤهل وسعيد جدا وانا اعمل واسعد اكثر وانا بينكم

[MohaMed_Refaat]

اشتغلت موظف استقبال فى فندق فى طنطا مباشرة بعد التخرج كنت باخد 200 جم مرتب
ثم ذهبت الى الاقصر كموظف استقبال على مركب سباحى فى النيل
ثم على مركب اخر فى شركة اميركية
ثم تركت المجال بعد 6 سنين سياحة وعملت فى شركة لخدمات المحمول فى الغردقة
ثم عدت الى الاقصر واعمل فى شركة للمحمول والخطوط خاصة بى وبنسيبى

بجد انا بحسد كل واحد شقى وتعب اكتر منى لان انا يمكن اتبهدلت شوية فى الاول لكن لما شوفت تجارب غيرى عرفت انى ولا حااااااااااااااااااااااجة
بجد مصر شبابها رجالة

[aif]

والله انا كان نفسى اتعرف على حضرتك من زمان

يحصللي الشرف بمعرفتك يا باشا