المشورة فى التعامل مع شخص سئ

[nevozaky]

أنا بدور على حلول قانونية قبل الغير قانونية
محدش خد باله إن المحل مش مترخص وبدون عداد ماء وإن اللى شغال فيه موظف؟

بص حضرتك لفت نظرى للنقطة دى فعلا .الجزء بتاع عداد المياه ده مش مهم اوى لانه ممكن يعمل عداد مياه وخلاص .لكن النقطة الاهم عدم وجود ترخيص ودى اهم وتقدر تضايقه من الناحية دى .
وطبعا كونه موظف المفروض عدم الجمع بين وظيفتين بس فى موظفين كتير بيشتغلوا اكتر من وظيفة على اساس صعوبة المعيشة .ممكن بردو تضايقوا بيها .
بس بما اننا بنتكلم فى حل سريع يبقى جزء عدم وجود ترخيص ده اللى يقفل له المحل ويعمل له مشاكل كتير .
تانى حاجة ممكن تهدده انك تبلغ عنه الضرائب وهما ما هيصدقوا وهوه اصلا ممعندوش ترخيص يبقى متهرب من كل حاجة والضرائب متعرفش عنه حاجة .وطبعا ده على حسب نشاط المحل عنده .
المهم الضرائب فعلا هما اللى هيتعيوه جامد .
يا رب تخرج من الموضوع على خير ان شاء الله تقيل تحياتى

[زينة الله]

السلام عليكم يا دكتور

ربنا يخلصك منه على خير و تكون حريص بعد كدا على أختيار المستأجرين وخصوصا إنهم فى عمارتكم ومع أهلك

فى حل عندى يمكن حضرتك تشوفه غريب شويتين لكن مش هيخسر ،، فكر فيه

شوف سمسار يدور له على محل تانى و أتفاهم مع الناس اللى هو بيوسطهم إنه ينقل فيه و تلغوا العقد اللى بينكم بالتراضى

معلش تعبك فى ايجاد محل أخر له أحسن من القضايا و البلطجة وقلة القيمة صدقنى وخصوصا إنك مسافر وعايز تكون مطمئن على أهلك

حبال النيابة والمحاكم طويلة جدا والمحامين بيشعللوها عشان يستنزفوا الناس وأقسام الشرطة حالتها يرثى لها

كدا حتوفر على نفسك التعب النفسى و مخاطر البلطجية والخسارة المادية حتى لو دفعت للسمسار أجرته لأن العقد لسه سارى المدة

و ربنا يفرج كربك

[nevozaky]

أنا بدور على حلول قانونية قبل الغير قانونية
محدش خد باله إن المحل مش مترخص وبدون عداد ماء وإن اللى شغال فيه موظف؟

بس انا خدت بالى يا دكتور ان العقد باسم زوجته .يبقى مفيش مشكلة عنده .هوه كده ماْمن نفسه كويس
يبقى زى ما قلت لحضرتك فى المشاركة السابقة ان يبقى عنده مشكلة الترخيص اللى بيها ممكن تقفل له المحل .
وانك تبلغ عنه الضرائب زى ما قلت لحضرتك او تهدده بالتبليغ .والافضل انك تبلغ عنه فعلا .

[SHNORY]

بس انا خدت بالى يا دكتور ان العقد باسم زوجته .يبقى مفيش مشكلة عنده .هوه كده ماْمن نفسه كويس
يبقى زى ما قلت لحضرتك فى المشاركة السابقة ان يبقى عنده مشكلة الترخيص اللى بيها ممكن تقفل له المحل .
وانك تبلغ عنه الضرائب زى ما قلت لحضرتك او تهدده بالتبليغ .والافضل انك تبلغ عنه فعلا .

هو لسه بقاله 4 شهور بس
فبيتهيالي ان تبليغ الضرايب حيكون حل غير مؤثر
لان المشاريع دي تقريبا ليها اعفاء ضريبي لمده 5 سنين
كمان حيتهرب من ايه في 4 شهور ؟
واصلا الاقرار بيتقدم بعد سنه
فالتهديد مش حيكون في صالح دكتور احمد في الحاله دي وحتبقي خطوه او كارت محروق وحينم عن ان الدكتور مش عارف يتصرف مع الراجل تصرف حازم

[nevozaky]

هو لسه بقاله 4 شهور بس
فبيتهيالي ان تبليغ الضرايب حيكون حل غير مؤثر
لان المشاريع دي تقريبا ليها اعفاء ضريبي لمده 5 سنين
كمان حيتهرب من ايه في 4 شهور ؟
واصلا الاقرار بيتقدم بعد سنه
فالتهديد مش حيكون في صالح دكتور احمد في الحاله دي وحتبقي خطوه او كارت محروق وحينم عن ان الدكتور مش عارف يتصرف مع الراجل تصرف حازم

بص يا استاذ محمد .اولا انا مش عارفة النشاط بتاع الراجل ايه
ثانيا مين قال انه فى اعفاءات .مفيش الا اعفاءات لو هتعمل مشروع فى مدينة من المدن الجديدة لتشجيع الناس على اقامة المشاريع والعمران فى هذه المدن .
حتى القانون الجديد للضرائب لم يشير الى هذا الموضوع عن اى اعفاءات غير اللى قلت لحضرتك عليها .
ثانيا عند بداية اى نشاط تجارى لازم يروح ويفتح ملف ضريبى حتى فى الاول انا مش باقول على الاقرار
انا باقول على الملف الضريبى لبداية مزاولة النشاط علشان كده ممكن يهدده من الناحية دى .فمش هتفرق العقد بقى له 4 شهور ولا شهر واحد
وبما انه معهوش ترخيص يبقى اكيد لم يقم بفتح اى ملف ضريبى .
وصدقنى والله اول ما هيجيب له سيرة الضرائب هيقلق .وكمان علشان هوه ماشى غلط هيقلق اكتر
وربنا يسهل وتجيب نتيجة

[megamoudy]

عندى محلين فى البيت منهم محل بجوار الجراج الذى أركن به وهو محل منحوس تماما فكل مستأجر يستأجره يكون أسوأ من سابقه فى المعاملة والأخلاق وانتظام الدفع
ثلاثة مستأجرين تعبونى تماما
الرابع هو الأسوأ وهو الذى اطلب المشورة فى التعامل معه


المستأجر يعمل فى وظيفة حكومية والعقد بإسم زوجته
المحل له عداد نور بإسم المرحوم والدى وليس له عداد ماء
اشترطت عليهم الدفع أول يوم فى الشهر ولا توجد أعذار وأعلنوا أنهم سيدفعو قبل بداية الشهر
تركت لهم أول نصف شهر هدية وأعطيتهم لافته خشبية كبيرة ليستخدموها فى إعلان المحل ووصلت لهم الماء مؤقتا من عداد الجراج حتى يوصلوها بأنفسهم وتوصيلات السباكة وباب المحل الخشبى هو ملك المستأجر السابق وليس ملكهم

الآن حدثت مشكلة
الآن الشهر الرابع وتأخر الإيجار 4 أيام فقمت بقطع المياه ليسرعوا (فعلت ذلك أول شهر أيضا ودفعوا تانى يوم ووعدوا بعدم التكرار)
لم يسرعوا بالدفع هذه المرة بل تعرض لى المحترم الحلاق بالسوء أثناء وجودى فى الجراج وعلا صوته وقل أدبه ووحاول أن يمد يده إلا أنى منعته بالقوة وحدثت مشادة انتهت بقرارى أنى أرفض وجوده فى المحل لعدم أمانته ولسوء أدبه خاصة إنى سأسافر للخارج ولا أريده أن يظل فى العمارة معرضا أهلى للتعامل معه

حضرت زوجته للعيادة لتحاول إقناعى فرفضت فذهبت لأمى طالبة وساطتها لكنى أعلمتها وأصررت على عدم إعادة المياه خاصة أنه لم يرخص المحل ولا ينوى توصيل مياه ولا ينوى دفع ثمن الباب والسباكة ولم يدفع فواتير مياه الأربع شهور الماضية ولا رسوم نظافة المحل

اتصالات هاتفية من ناس أعرفهم سطحيا أو لا أعرفهم للوساطة ولم أقبل وعرضت انصرافه واستلامه كامل التأمين... حتى حدث أن اتصلت اخته بأمى وهددتها بسفك الدماء وتكسير الأملاك والتعرض لى فى عياداتى بالسوء واصطناع الفضائح .......... مفهوم


بعد هذه المكالمة (أمس) قمت بعمل محضر تهديد ومازالت النيابة لم تحقق فيه

اليوم وضع قالب طوب رصيف أمام جراجى

ما هى نصيحتكم فى التعامل مع هذا الشخص وكيف أطرده من المحل؟

هو ده جزاء الاحسان ؟

اتصدق يا دكتور ....... ناس كتير متغيرتش بعد الثورة والنفسيات الكثير منها قذر وخبيث وحسبي الله ونعم الوكيل

وربنا ينصرك

[زهير فكري]

ربنا يقويك يا دكتور , نصيحه اخويه اياك ثم اياك النزول لمستوي البلطجه و و قله الأدب لانك انت اللي هتبقي خسران و هو مش هيخسر حاجه , لانه هيجرجرك لملعبه و انت مش هتعرف تتصرف , الحل من وجهه نظري مع الأشكال اللي زي دي , انك تشتغله قانوني و بحزم تروح القسم وتعمل ليه محضر تعدي و عدم التعرض ليك و عائلتك و اهم حاجه الشهود ثم الشهود , عشان ما تدخلش في حته انك بترمي بلاك عليه , النقطه التانيه تحاول تدور وراه زي حته انه موظف حكومه وحته انه فاتح محل حلاقه ممكن بدون اشتراطات صحيه معينه وبدون مياه ودي نقطه مهمه او بدون سجل تجاري ....الخ يعني بالبلدي تلوي دراعه , بس اهم حاجه ما تسحقوش يعني لما تعمل اللي قلتهولك وان شاء الله يجيب نتيجه , ويجي يمشي تعطي له التأمين و لو زياده شويه مفيش مشاكل حمايه ليك و لأسرتك من اي فعل خسيس , وربنا يوفقك

[nevozaky]

طيب انا كده خدت بالى انه حلاق يبقى مفيش اى اعفاء من الضرايب ولازم يفتح ملف ضريبى لمزاولة النشاط .
يبقى هدده بالنقطة دى

[م. حاتم السباعي]

السلام عليكم
اري ان اسلوب البلطجية له ناسه
و اسلوب البلاغات و الضرر ايضا له ناسه
و حضرتك اتصرفت معه اولا بالاحسان ثم بعد ذلك بالضغط حتي لا يقرر التأخير في دفع الايجار و هذا حقك لانك غير ملزم بأمداده بالمياه الا اذا كان بينكم اتفاق
و اخيرا انصح بالدعوة الي الله بالليل و بأذن الله الصبح يرجع زي القطة الاليفة
او يخلصك الله منه علي خير و صدقني طريقة متجربة
لان هذه هي القوة الحقيقية الالتجاء الي الله

م.حاتم السباعي

[zago]

طيب الحمد لله اني مش دكتور
بصراحه انا لو مكانك اجيب 6 مواسير 60 سنتي واجيب الخمسه صحابي وحنشوف مين فينا اللي بلطجيه
وعايز الفت نظر حضرتك انه بمجرد تقديمك تنازل زي التامين ولا اي حاجه ده بيعرفه ان حضرتك مش بتاع مشاكل
يعني بتقويه عليك زياده

[Dr Ahmed]

بخصوص الضرايب: استفسرت من مكتب الضرايب وعرفت ان زوجته ليها ملف بالفعل وهم لم يبلغوا بالعقد الجديد فبلغت به إخلاا لمسئوليتى بصفتى صاحب المحل وتم إضافة النشاط .. لكن يبدو أن هذا التبليغ لا يعنى أنه متهرب لأن بداية العقد شهر فبراير من هذا العام

[Dr Ahmed]

ا
لان هذه هي القوة الحقيقية الالتجاء الي الله

عندك حق والله يا أخى وشكرا على التذكرة الطيبة

طيب الحمد لله اني مش دكتور
بصراحه انا لو مكانك اجيب 6 مواسير 60 سنتي واجيب الخمسه صحابي وحنشوف مين فينا اللي بلطجيه
وعايز الفت نظر حضرتك انه بمجرد تقديمك تنازل زي التامين ولا اي حاجه ده بيعرفه ان حضرتك مش بتاع مشاكل
يعني بتقويه عليك زياده

ساعات كتير بحس انى متكتف للسبب ده
بس من الناحية التاية والحمد لله لما رحت القسم ولنفس السبب بدخل أى مكتب وبتعامل باحترام بدون وسايط لمجرد معرفة المهنة

[zago]

ساعات كتير بحس انى متكتف للسبب ده
بس من الناحية التاية والحمد لله لما رحت القسم ولنفس السبب بدخل أى مكتب وبتعامل باحترام بدون وسايط لمجرد معرفة المهنة

ايوه انا مش بقول ان دكتور دي حاجه وحشه ... حد يطول
لكن اقصد في المواقف دي حاول تنسى انك دكتور
( ان لم تكن ذئبا أكلتك الذئاب )
يعني حاول تدي الاشكال دي وش تاني
ربنا معاك
ولو احتجت اي حاجه ... شنوري موجود

[nevozaky]

بخصوص الضرايب: استفسرت من مكتب الضرايب وعرفت ان زوجته ليها ملف بالفعل وهم لم يبلغوا بالعقد الجديد فبلغت به إخلاا لمسئوليتى بصفتى صاحب المحل وتم إضافة النشاط .. لكن يبدو أن هذا التبليغ لا يعنى أنه متهرب لأن بداية العقد شهر فبراير من هذا العام

طيب يا دكتور بالنسبة لعدم وجود ترخبص ما هى دى مشكلة تانية ليه ممكن تساعدك
وربنا يجيب اللى فيه الخير

[maka]

مش مفروض محل الحلاق ليه تراخيص صحية من وزارة البيئة ؟؟

سوال بسيط : تغذية المحل الكهربائية من الكوفرية على طول ولا مثلا بتعدى من جوه البيت او من الجراج ؟؟

و غالبا انت هتحتاج محامى شاطر علشان يلعبه بطريقته