سكشن فارما كولوجى

[amado ibrahim]

زمان

مش زمان قوى يعنى

ايام الكلية

و العبد لله خريج كلية حية و كاس

كنا عندنا مادة اسمها فارماكولوجى

و هى كأى اولجى فى الدنيا علم ظريف يهتم بالادوية

لكن الجزء العملى منه مش ظريف بالمرة

فانت يعمال تحقن الست ضفدعة فى بطنها بالادوية الظريفة اللى تجيبلها حالات تشنجات مش ظريفة

ياما ماسك الضفدعة من رجليها

و هوب تخبط دماغها فى حرف التربيزة عشان تموتها

او ماسك ابرة طويلة و عمال تلعب فى قفا الضفدعة الغلبانة

وبردة هوب تقوم منخع الضفدعة

ايه ده مش عارف يعنى ايه تنخع

معلش اقولك انا

تجيب الابرة الظريفة سابقة الذكر و تدخلها فى رقبة الضفدعة من وراء مستهدفا النخاع الشوكى اللى فى العمود الفقرى للضفدعة المسكينة وهاتك يا برم و لا انك بتأور باذنجان او كوسة

و غرضك فيما سبق هو غرض نبيل

انك يأخد احدى العضلات من جسم الغلبانة عشان تجرب مفعول الادوية عليها

اتقرفت من الكلام

حقك و الله

امال احنا نعمل ايه


ما علينا

و بالاضافة للست ضفدعة فيه كمان الاستاذ فأر

و هو على عكس الست ضفدعة اللى على نياتها و مش فاهمة حاجة

فالاستاذ فار مش سهل انك تمسكه بغض النظر انك تحقنه بالادوية العجيبة اللى انت بتجربها عليه

اللى فى بعض الحالات بتخليه عامل زى حتة القطنة تقلبه يمين تجيبه شمال و لا هو هنا

لكن فى بعض الحالات الاخرى بتخليه ينط فى قفا اللى قدامك


نرجع لموضوعنا

فى احدى السكاشن المحترمة

و بينما كل مننا ممسك بفأره

متحفزا لحقنه

مستهدفا احشائه
(ايه الكلام الغريب اللى انا بقوله ده)

المهم

بعد مرور فترة لقيت احدى الزميلات بتعيط

خير اللهم اجعله خير

يا ترى ايه اللى حصل

يكونش الفار عضها

لا كانت صرخت مش عيطت

امال ايه يا جدعان

بتقول الفار مبيتحركش

بينه مات ولا ايه

اه

اكيد جرعة زيادة

لكن ده أول فار يموت انهارده

و الادوية بتاعت انهاردة مش مميتة للدرجة دى

جايز الفار عنه هبوط فى الدورة الدموية

يكونش بيستعطى حاجة

رحنا لاستاذ المادة بربطة المعلم

الاستاذ الدكتور : خير يا شباب

احنا : فيه فأر مات
و المفروض ان ادوية انهاردة مش سامة للدرجة دى

الاستاذ: فين الفأر

احنا : اتفضل يا دكتور

الدكتور متفقدا الفقيد

: هو مين الشاب اللى حقنه

احنا : لا يا دكتور دى زميلتنا فلانة

الدكتور : عجيبة جدا

احنا : هو ايه اللى عجيب

الدكتور: الفأر ميت لأن عظام الجمجمة اتهشمت فى ايد اللى كان ماسك الفأر
حتى بصو على العين الجاحظة عاملة ازاى ممتلئة دما
(اللى بيحقن الفار بيمسك و دانه بين السبابة و الابهام و يمسك ديله بالخنصر و ديه الطريقة الوحيدة لتثبيت الفأر)
مش ممكن تكون اللى عمل كده ايد بنت

كلنا مرة و احدة بصينا لزمليتنا

لقيناها بتعيط

مكنش قصدى

و تقول ان كنت خايفة يعضنى

عشان كده مسكته بخوف و اعصاب ايدى مشنجة

و فجاة لقيته مات

بصنيلها كلنا باستغراب

ساعتها عرفت ان الخوف الغير مبرر ممكن يموت

حد فاهم حاجة

[زينة الله]

كلامك صح :::: بس ليه ؟؟

[icehearted girl]

وأحيانا الحذر الشديد بتكون تفكير وبلا مبرر يضر صاحبه

بس فيران يع يعععععععع

مالها الفارما بتاعتنا...مكنش بيحلالي النوم غير ف سكشن الفارما ف عز الحر عشان التكييف

[تامر.محمد]

في الجون يا ريس

لك وحشة و الله :)

[OgsMc]

انا السكشن ده بكرهوا موووت
الفران بتصعب عليا لما احقنها بريتونيال.... بس بغباء الابره تخش تطلع من النحيه التانيه
ولا الفار لما يهرب وتطلع تجرى وراه وتدور عليه تحت البنش
او الضفدعه الى معملتش اى ذنب فى حياتها وبتعملها بيثنج غلط تخليلها تكره العيشه
او يعينى تحقنها ستريكنين يجيلها صرع
قمه التوحش

[Dr_Mido]

ياراجل فكرتنا لييييييييييييييييييييه حرام عليك مصدقنا نسينا


مصير الشاب الطويل العريض دة او الانسه اللى على وش بكالريوس ممكن يتاجل ترم بسبب فار او ضفدعه طب دى هينه انا فاكر موقف عسل اول سكشن فارما فى الكليه الضفدعه بتبقى جايه مفرفرة من الحر ومن الصندوق اللى هى فيه قوم ايه بقى واحدة من اللى بيبقو قرفانين من نفسيهم دول تعمل ايه غسلت الضفدعه وهى لابسه الجوانتى تخيلو بقى المسرحيه اللى حصلت فى السكن بعد مغسلت الضفدعه


تفاكر انت بقى التجربه المهببه بتاعه امعاء الضفدعه و بكرة الهباب الاسود و تثبيت الهباب الاسود دة وتقعد تشد فى الحبل وتحط صلصال وتشيل صلصال كان سكشن عاوز حاوى والله

[devilishtigers]

ايه القرف دا. لا يعم مالها تجارة زي الفل هههههههههههههههههه
وفعلا عندك حق الخوف غير المبرر ممكن يموت

[Scuderia.M]

الحمد لله على نعمة هندسة! معندناش حاجات بتعض ولا حاجات بتموت

[lena jo]

[LU reminded me of a horrible action that we had to do but was cancelled afterwards. What u did is pithing where u destroy the spinal chord. A long time ago there was an experiment where we had to prove that the centre of sense wasn t the brain but the spinal Cord. It was called Decapitation where we remove part of the poooor frog s head by getting the scissors at part of her mouth and cutting the upper part of the head and preparing different concentrations of Hcl then watching the frog s reaction when u immerse her leg in each concentration. It hurt her so she removed her leg as a reaction. I felt like a monster and still feel guilty for torturing the poor frog .Thank God Decapitation was cancelled. I hated that section EFT]

[/LEFT]

[shadygalal669]

الحمد لله على نعمة هندسة! معندناش حاجات بتعض ولا حاجات بتموت

+ ملياااااااااااااااااااااااااااااااااااااااار

[Dr_Mido]

+ ملياااااااااااااااااااااااااااااااااااااااار

بس عندكو حاجات بتكهرب وحاجات بتشك وحاجات بتقع تعور وكدة يعنى كلنا معذبين فى التعليم اى كان اللى بنتعلمه

[amado ibrahim]

في الجون يا ريس

لك وحشة و الله :)

ربنا يكرمك و يعزك

و اسف على التأخير فى الرد

يا ريت تقولنا فهمت ايه

عشان باين الشباب مش واخدين بالهم


تقبل تحياتى

[MohssenRashed]

مالها التجاره كلو ورق و بس ده احنا حتى مكناش بنروح هههههههههههه تقولي فار و ضفدعه

[shaddadfalcon1]

من الحاجات اللي كانت معقداني من الطب والصيدله هي موضوع التشريح ده

الحمد لله ان الواحد مش بيتعامل غير مع الكمبيوتر والبرامج بس برده ساعات بتبقي مميته ومكلفه

[amado ibrahim]

كلامك صح :::: بس ليه ؟؟

عندما يخاف الانسان خوف غير مبرر

فانه يتصرف تصرفات تتسم بعدم العقلانية

حينها يلغى العقل الواعى و يسود ما يسمى رد الفعل المنعكس

يعنى بيبقى شغال بالجهاز العصبى الا ارادى

مما يدفعه لاغرب التصرفات و اكثرها جنوحا