يا جماعه...راس البر بتضيع

[mokhtar]

طبعا كلكم او معظمكم سمع او قرأ عن موضوع مصنع السماد اليوريا والامونيا فى دمياط بالضبط فى جزيره راس البر بجوار الممر الملاحى لميناء دمياط ...الموضوع ان المصنع ده بيطلع بلاوى بتجيب اللهم احفظنا امراض خبيثه يعنى الجو عندنا هييضيع وراس البر السياحه فيها هتضرب ..ده غير الامراض اللى هتصيب ابناء دمياط وراس البر ..لان المسافه بين المصنع واقرب منطقه سكنيه 3 كم...تخيلوا ..انا دايما كنت بعدى جنب مصنع سماد طلخا وانا رايح المنصوره او القاهره وبشوف البلاوى اللى بتحصل هناك السما مغيمه فى عز الحر والارض الزراعيه ضايعه والترعه اللى جنب المصنع بتدخن.. ايوه والله بتدخن بتطلع بخار من النشادر اللى فيها والناس هناك كلها مصابه بامراض خطيره ... والاخوه اللى من المنصوره ياكوا الكلام ده..يعنى كل ده هيحصل عندنا فى دمياط ..
ده غير ان مخلفات المصنع هتتصرف فى البحر المتوسط على مسافه 3كم من راس البر يعنى المصيف باظ ....والمصيبه الكبرى ..انه على مسافه حوالى 6 كم من مدينه عزبه البرج ..اللى فيها اكبر اسطول صيد فى مصر حوالى 60 % من اسطول الصيد المصرى ..يعنى كمان ضربولنا الاقتصاد ناقص ايه تانى...
كل البرامج الحواريه...العاشره مساءا..القاهره اليوم ..90دقيقه ..اتكلموا عن الموضوع ده ..بس الحكومه ....لسان حالها بيقول ..طززززز
طلع السيد المتحدث باسم مجلس الوزراء يؤكد ويجزم ان المشروع مفيهوش اى اضرار وبيقول ان المشروع ده لو وقف الدوله هتتغرم مبالغ ضخمه
......فانا بقى باقول ..تتحرق دمياط ..وراس البر ..والسياحه ..والاقتصاد ..والناس بيوتها تتخرب...وكل حاجه فى دمياط ...تضرب بالقديمه ..والناس تموت ..يلا مش مشكله ..اهو يخفوا الزحمه...اذا كا نده يرضى الحكومه ..والحكومه فى الاخر هتعمل اللى هى عايزاه
احنا عندنا فى دمياط فى اعتراضات جامده جدا والناس ماوراهاش غير الموضوع ده ...واليومين دول هيمشوا مظاهرات
بس برضه اللى الحكومه عايزاه هو اللى هيمشى
يعنى نسيبلهم البلد ولا ايه يا جماعه...

..mokhtar..

تم النقل للاجتماعى
الادارة 1

[mokhtar]

اسف يا جماعه انا غلطت وحطيت الموضوع فى العام بدل الاجتماعى ..رجاء من الاداره نقل الموضوع للاجتماعى

..mokhtar..

[casperinoo]

rbna m3akoooo

[osamaesm]

فعلا ربنا معاكم
بس ايه الحل
يعني كلامك ده صح واكيد ولا ايه
ولو صح ليه ميعملهوش في الصحرا وما اكترها

وعل كل اكيد الحكومه عارفه مصلحتنا كويس وعمرها ماهتعمل حاجه تضرنا
وتحيا مصر والحكومه
ويمكن كلامه صح وده اكيد والحكومه برده يتفكر في مصلحه الشعب وعايزه تحدد النسل


وتحيا مصر والحكومه ومش مهم الشعب

[Karim_Monir]

انا في رايي ان البلد كلها تقف وقفة رجل واحد ويقطعو الطريق عن راس البر لغاية ما الحكومة تتصرف
في اماكن كتير قوي ممكن يتعمل فيها المشروع ويبقي قريب من التصدير غير راس البر
قلب الدلتا في مصر
دمياط مدينة اقتصادية من الدرجة الاولى والكلام هايعمل هزة جامدة قوي في اقتصاد مصر
غير طبعا الالاف الناس اللي هاتضر

[amr mokhtar]

طلع السيد المتحدث باسم مجلس الوزراء يؤكد ويجزم ان المشروع مفيهوش اى اضرار وبيقول ان المشروع ده لو وقف الدوله هتتغرم مبالغ ضخمه
......فانا بقى باقول ..تتحرق دمياط ..وراس البر ..والسياحه ..والاقتصاد ..والناس بيوتها تتخرب...وكل حاجه فى دمياط ...تضرب بالقديمه ..والناس تموت ..يلا مش مشكله ..اهو يخفوا الزحمه...اذا كا نده يرضى الحكومه ..والحكومه فى الاخر هتعمل اللى هى عايزاه
..mokhtar..

مش عارف أقول إيه غير حسبى الله و نعم الوكيل و ربنا المنتقم

خلاص انا تعبت و الله انا مش لاقى حاجة واحدة تخلينى أحب البلد دى ولا انى ممكن فى يوم ادافع عنها حتى لو دخلها الإحتلال
سبحان الله انا مش عارف إزاى الناس دى بتنام بالليل و بتبقى مستمتعة بفلوس جاية من خراب بيوت ناس غلابة

و مش لاقى تعليق أكتر واقعية من حضرتك كتبته فوق

[أبو عبدالله]

انا مش قادر اعبر عن ما بداخلي للمهازل اللي بتحصل دي والله

انا من زوار راس البر دائما
والبلد بقت تحفه وبقت خطيرة جدا ماشاء الله

انا مش عارف هيا الدولة دي عاوزه ايه من الشعب

مرضوش يعملوه في الصحراء الغربيه علشان خاطر مارينا
واعذروني
فده حال دائما المسئولين هداهم الله
بيحسسوني ان مارينا دي الشعب المصري كله بيروح هناك
فطبعا راس البر دي بتاعت الغلابه والشحاتين المهمشين في الحياه
فمش مهم انه يموتوا وخلاص

زي الأعلام تلاقيه بيتكلم بلسان فئة ليس لها وزن في مصر ومع ذلك يتكلموا يحسسوك انهم بيتكلموا بلسان الشعب المصري كله

حاجه تقرف والله

انا شايف ان الدمياطه لازم يقفوا واقفه جامده في الموضوع ده
ويوقفوا المشروع ده اسمه تهريج
انا مش عارف هما مستنيين ان استثماراتهم في راس البر والصيد تقف ولا ايه

[SEATLOVER]

يا جماعة كل الاختبارات و الابحاث العلمية المعملية بتقول مفيش اى ضرر من مليوت و ثلاث مائة الف متر مكعب هايضخوا فى البحر كل يوم ..
الموضوع مدروس و آمنننننننننننن جداااااااااااااااااااا

[mokhtar]

يا جماعه والله الموضوع خطير جدا وكبير اوى ... هم اختاروا المكان ده ليه مش عارف....مع ان البدائل كتير زى شمال الدلتا المنطقه اللى بعد راس البر بحوالى 45 كم المنطقه دى اسمها البرلس وكلها احراش ومستنقعات ومش مستفاد منها ...او الساحل الشمالى ..والساحل مش كله مارينا عشان الكبار مايزعلوش ممكن ساحل شمال سيناء ..البحر الاحمر فى منطقه الزعفرانه وغارب ودى كلها مناطق بترول ...انما ييجوا على بلد زى دمياط وااله حرام
يا جماعه دمياط بلد اقتصاديه من الدرجه الاولى زى ماقال كريم فيها استثمارات بالملايين
اكبر مصنع اثاث فلى الشرق الاوسط ....اكبر اسطول صيد فى مصر
راس البر استثماراتها فى 3 شهور بتوع الصيف فوق ال10 مليار ويمكن اكتر واستثمارات المشروع السماد 1.4مليار دولار فلى السنه وده مبلغ بسيط جنب استثمارات دمياط كلها
كل ده الاضرار الاقتصاديه بس ...حاجه بسيطه
ده غير العالم اللى هتمرض وربنا يعفينا بيوصل للسرطان .. حيث كده انا بقترح انهم يفتحوا فرع لمستشفى 57357 فى دمياط.....ويبدؤا يلموا تبرعات
راس البر زى ما ابو عبدالله قال بقت حاجه تانيه بقيت مصيف بجد ..روعه
كل ده هيقى للاشباح بعد ما يخربوها
الموضوع ده بيهدد 1.5مليون دمياطى ..فى صحتهم وفى رزقهم
بس دى مش مشكله لان المصرى ماعدش ليه تمن ..وبقى غريب فى بلده

..mokhtar..

[modux]

انا يا جماعة من دمياط و احب اؤكد الكلام اللب يتقال ده كلو

لازم وقفة راجل واحد

كل واحد يعرف الناس بالموضوع
لو كل واحد قال ل 4-5 صحابه الموضوع ينتشر زي الاضراب كده

يا جماعة راس البر دي اعجوبة بجد و مذكورة في القران فيها يتلاقي البحر و النيل

[hazem_khidr]

لازم الدمايطه يعملو زي المحله ما عملت كده
اضراب و لازم صوتهم يوصل من خلال النواب و المجالس المحليه
لانها بصراحه مهزله.
محلات قماش و محلات اثا و حلويات و صيد كل دا حيقف و الناس حتشحت

[mokhtar]

يا حازم النواب والمجالس المحليه دول لامؤاخذه ...شويه قراطيس ...مالهمش لزمه
صحيح هو عندنا الراجل النائب عضو مجلس الشعب عن دمياط مستقل وواقف وقفه كويسه للموضوع ده وقدم طلب احاطه من كام يوم
بس المجالس المحليه كلهم شويه ..منافقين..وكدابين زفه...سمعا وطاعه للى فوق
ربنا يستر علينا

..mokhtar..

[FLYINGPEUGEOT]

***********************************

[sss]

انا شايف ان مجرد الكلام هيؤدي لنفس النتايج زي كل الموضوعات اللي فاتت و اللي هي ان الامور بتمشي و المشروعات بتكمل و الناس بستمر في الشكوى و المعاناة الى ما لا نهاية و عشان كدة انا رايي ان الدمايطة لازم يتحركوا لكن مش زي المحلاوية و انما يتحركوا بعقلانية مش لانها هتوصلهم لاي نتيجة لكن لان دة السلوك اللي لازم نمشي بيه كلنا يمكن يجي في يوم الجيل المسلم اللي يقدر يوصل لحقوقه و يصلح في الارض و يعمرها مش يخربها "زي اللي فينا بيحترم قواعد المرور و كل الناس بتخالفها عشان هو دة الصح " وانا شايف ان في كذا خطوةممكن اجرائها في السياق دة:
-ان الدمياطة بشكل عام و اصحاب المصالح بشكل خاص يجمعوا مبلغ لاجراء دراسات بواسطة مؤسسة محترمة- حتى لو عالمية- لاثبات الضرر المترتب على اقامة المشروع من كل الجوانب الاقتصادية و البيئية و الصحية و حتى الاجتماعية والنتايج تتنشر في كل وسائل الاعلام ودة هيكون ورقة ضغط كبيرة حتى على الشركة نفسها.
-محاولة توفير قطعة ارض بديلة ليها نفس المميزات النوعية للقطعة الموجودة حاليا داخل المحافظة و قريبة من الميناء لان طبعا دي استثمارات بمليارات الدولارات يعني لا يمكن هتتوقف.
-تعاون الاهالي مع نوابهم في المجالس التشريعية لاقتراح مميزات للشركة اذا غيرت موقعها طواعية و ليكن تخفيضات ضريبية " ولو ان دة هيبقى صعب لان الضرايب اهم حاجة عند الحكومة"
وانا واثق ان في الاف الاقتراحات والحلول لكن لازم نمشي صح و نتبع اصول التحضر اللي بناخدها من دينا الحنيف مش من حضارة الغرب المقيتة "مش هما نفسهم اللي جايبن لنا الموت و جايين بدعوى انهم بيعمروا بلادنا"
نفسي نبطل نشغل نفسنا بالحكومة لان دة مجرد زيادة في الاحباط اللي جوانا و مش هيؤدي لشئ , لازم نبص لديننا و نشوف نقدر نتحرك بيه ازاي ولو مجبناش نتيجة المرة دي المرة الجاية ربنا هيعينا و نبقى اقوى لحد ما ربنا يرضى عنا و يصلح لنا امورنا.

[alaa_dash]

اهالي الواحات لما حبوا يغيروا تبعيتهم من محافظة لاخرى قطعوا طريق الجيزة الواحات ..الحكومة عملت اللي هما عايزينوا...
اهالي البرلس تقريبا لما حبوا يشربوا مية ..قطعوا الطريق الدولي ...الميه رجعتلهم .
في مطبات جديدة على الطريق السريع تحت الكوبري في طنطا ...لما سألت ..عرفت
ان الاهالي قلبوا الدنيا و قطعوا الطريق لما عربية خبطت حد و الناس طالبوا بمطبات...اتعملت....
انا فاكر ان الطريق الدولي بيمر بدمياط ...لو الطريق اتقطع كام ساعة ..
مش هيوقفوا المشؤروع طبعا .. :)بس الكذا خطوة اللي قال عليهم الاخ تريبل اس هيتنفذوا...