اسعار الرخام

[new]

عندى شقة بالتجمع عايز اعملها رخام بس ماعنديش اى فكرة عن اسعارة او انواعة او مكان بيعة

ولو فى نوع سعرة معقول
ياريت النصيحة

[zeyad1810]

ارخص حاجة الجلالة وسعرة فى حدود 50 جنية للمتر وفى فلتو ودة اشيك واحسن بحوالى 130
بص عموما هى بتبتدى من 50 لحد 800 واكتر لو عايز لان فى منة انواع كتير

وخلى باللك انت ممكن تعمل مثلا كذا لون ونوع مع بعض يعنى مثلا يكون الاساسى نوع رخيص وتعمل فية شكل بنوع تانى غالى ولون مختلف بتدى شكل حلو

انت عاوز تعمل كام متر ؟؟

[new]

شكرا على الرد
المساحة حوالى 70 متر
انا سمعت ان فى نوع اسمة ترستا وناس بتشكر فية وبيقولوا ان سعرة مش غالى بس مش عارف بكام

يا ريت لو عندك معلومات تفيدنى

[hn_kamal]

اسمه تريستا والنوع ده وحش جدا لانه بيفضل مدة طويلة بينتر ملح على الرخام وبالتالى بيبقى شكله وحش

[محمد المشد]

عندى شقة بالتجمع عايز اعملها رخام بس ماعنديش اى فكرة عن اسعارة او انواعة او مكان بيعة

ولو فى نوع سعرة معقول
ياريت النصيحة

شوف امس كنت مع احد تجار الرخام فى مصر وكنت استشيرة لخبرتة فى هذا المجال لكى اقوم بعمل شقتى رخام 000 فيكل الصدق قال لى الرجل انه لم يقم بعمل شقتة بالرخام وفضل عليه البولسرين لان الرخام الموجود فى مصر، وهذا حسب كلامة غير جيد ولا ينصحنى بتركيب رخام والسوق مليان بأنواع ومسميات كثيرة غير جيدة وقال ان الرخام يحتاج لجلى كل فترة قصيرة لكى يلمع ، ولذلك فقد قررت الا اقوم بتركيب الرخام عملاً بنصيحته لانه ادرى منى بهذا الامر
نقلت لك بكل الصدق ماقالة وراى وان كان هناك من له خبرة اكثر منا فى هذا الامر فعلية النصيحة وشكرا

[zeyad1810]

التريستا بحوالى 90 جنية بس مش متاكد قوى بس هو فى الحدود دى بردة
هو بصراحة الموضوع دة ازواق انت ممكن تنزل السيدة عيشة عند الجامع وهتلاقى هناك معارض رخام كتير روح اتفرج على الاشكال بنفسك واعرف الاسعار ع الطبيعة هما بيكون عندهم عينات متشطبة يعنى هتشوف الرخام وهو متلمع و متفنش وهو بصراحة بيكون شكلة حلو بس للامانة هو فعلا لازم يتجلى كل فترة علشان اللمعة بتروح مع الوقت والغسيل بس كل ما يتجلى بيرجع كانة لسة راكب جديد

[Sherif Khalifa]

طيب رخام المطابخ نظامة و اسعارة اية ؟

[zeyad1810]

الرخام بيركب فى اى مكان الارض و الحائط و المطابخ انت بس بتشوف انت عايز اى نوع ودة حسب السعر اللى فى دماغك يعنى مفيش انواع محددة لكل حاجة دى ازواق

بص طبعا يفضل استخدام الانواع النضيفة فى المطابخ وفى نوع اسمة اخضر هندى سعرة حوالى 300 او 350 المتر ودة لان لية لون جميل جدا وكمان قوى جدا فى التحما ومابيظهرش فية اى تشققات نظرا لمتانة وقوة الخامة وعموما المطابخ مابتخدش رخام كتير

[Sherif Khalifa]

هوا بيتحسب متر طولى و لا ازاى ؟
انا عندى المطبخ 3 * 2 و عرض الخشب 60 سم

فا دا كدة كام متر
و النجار بيقول ان الرخامة هتبئى فى حدود 500 جم
انا معرفش دا فى دماغة اية

معلش اصل انا ابيض فى الموضوع دا خالص

[zeyad1810]

هو بيتحسب بالمتر المربع متر*متر احسبها نت بقى هى كدة حوالى من 4 : 5 متر تقريبا دة لوانت هتعمل المطبخ كلة لف بدون فوارق فى النص زى مثلا البوتجاز انما لو فية فوارق طبعا هيقل فانت قيس مكان الرخام فى المطبخ الخشب هتعرف انت عاوز اد اية ؟؟ او اشأل النجار هيقولك ع المساحة دة شغلة

ويا ريت تعرف منة نوع الرخام اللى هيركبهولك وان السمك لا يقل عن 2 سم " خلى بالك دى مهمة قوى علشان ما يكونش ضعيف وينكسر بسهولة واسألة لو هيركبلك اخضر هندى هيتكلف كام لان يا ريت تركب نوع قوى علشان ماينكسرش بسهولة
وممكن تركب جرانيت قوى جدا

[Sherif Khalifa]

معلس هتقل عليك

متعرفش متوسط اسعار الرخام و الجرانيت
و ال 500 دول ممكن يمكونو لأى نوع
لاحسن انا حاسس ان النجار بيظبتنى :)

[zeyad1810]

هو المفروض ب 500 جنية يركبلك حاجة حلوة انت بس ابقى اسألة هيركب رخام اسمة اية ؟؟؟ وهيكون كام متر ؟؟ وممكن تنزل بنفسك بردة تسأل فى السيدة عائشة ند الجامع هتشوف هناك معارض حاطة عينات تنقى النوع اللى يعجبك ويكون ماشى مع لون المطبخ

بس قبل ما تروح خلى النحار يقلك المطبح هيحتاج كام متر ودة افضل انك تنقى حاجتك بنفسك وتشوف النوع اللى النجار عاوز يركبهوللك بيتباع بكام علشان تعرف هو عامل عليك مصلحة اد اية وممكن ساعتها تخلية يركب الخشب بس وتشترى انت الرخام وصانيعى من المعرض ييجى يركبهولك

[Sherif Khalifa]

الف شكر على المعلومات دى
انا اول مرة اعرف موضوع السيدة عائشة