طرق مختلفة لشرح الامثال الشعبية

[MMamdouh]

س1: بما تصف العلاقات المصرية الاسرائيلية؟
ج1: يا بخت من بات مظلوم و مبتش ظالم

س2: بما تفسر الموقف العربى أمام الأوضاع فى غزة؟
ج2: إذا كان الكلام من فضة فالسكوت من ذهب

س3: بما تصف العلاقات المصرية الأمريكية؟
ج3: اللى أكله ما هو من فأسه ... رأيه ما هو من رأسه

س4: بما تصف سياسة مصر الخارجية؟
ج4: دسنا الأرض اللى ما تنداس و بوسنا اليد اللى ما تتباس لا نابنا لا ذهب و لا نحاس

س5: ما هى سياسة مصر الداخليه؟
ج5: أضرب المربوط يخاف السايب

س6: ما هو نظام الحكم فى مصر؟
ج6: سمك لبن تمر هندى

س7: ما هو موقف الأخوان المسلمين من الحكم؟
ج7: عينى فيه و أقول أخيه

س8: بما تفسر الأداء الحكومى المصرى؟
ج8: إن كان هذا يكيدك أنا أزيدك

س9: بما تصف التصريحات الحكوميه؟
ج9: أسمع كلامك أصدقك أشوف أمورك أستعجب

س10: بما تصف زيادة معدل النمو فى مصر؟
ج10: إن كان الكذب حجة فالصدق أنجى

س11: بما تفسر التغيير الوزارى؟
ج11: ايه يعمل الترقيع فى الثوب البالى

س12: بما تصف الأخبار فى الصحافة الحكومية؟
ج12: قالوا الجمل طلع النخلة أدى الجمل و أدى النخله

س13: بما تفسر ميزانية برنامج البيت بيتك؟
ج13: اللى يعوزه البيت يحرم على الجامع

س14: بما تفسر تضخم ثروة أحمد عز؟
ج14: سبحان العاطى الوهاب من بعد الشبشب و القبقاب

س15: ما هو الفرق بين حزب الوفد و حزب الجبهة الديمقراطية؟
ج15: لا تعايرنى ولا أعايرك دا الهم طايلنى و طايلك

و فى النهاية أعزائى بعد ما شفنا قدرة المثل الشعبى المصرى على تلخيص الكثير من القضايا أحب أنهى حديثى بمثل شعبى أيضا لكنه فى تقديرى كان سبب من أسباب تعاسة الشعب المصرى ألا و هو:

' اللى تعرفه أحسن من اللى ماتعرفوش'

و طبعا هذا المثل إجابه لسؤال معروف أتركه لذكاء حضراتكوا اعمالا بالمثل الشعبى الذى يقول

'من خاف سلم

MMamdouh

[mohamed_88sk]

هههههههههههههههههه
رائعه بجد

[PRO-DRIVE]

hehehehehe

حلووووه
بس اللي متعرفوش ايا كان احسن برضه :@

[TaoTao]

جميلة جداً جداً :)
وملعوبة كمان :)
دي بجد ابتسامة قبل النوم :)
تصبحوا على خير

[m_aash]

و فى النهاية أعزائى بعد ما شفنا قدرة المثل الشعبى المصرى على تلخيص الكثير من القضايا أحب أنهى حديثى بمثل شعبى أيضا لكنه فى تقديرى كان سبب من أسباب تعاسة الشعب المصرى ألا و هو:

' اللى تعرفه أحسن من اللى ماتعرفوش'

و طبعا هذا المثل إجابه لسؤال معروف أتركه لذكاء حضراتكوا اعمالا بالمثل الشعبى الذى يقول

'من خاف سلم

MMamdouh

بيتهيألى إنت قصدك على أى واحد بيسأل عن عربية لسه نازلة السوق جديد و ما حدش جربها قبل كده :) :) :) :)
مش كده برضه؟

[محمد المشد]

على رايك 0000 من خاف سلم
عموما جميلة بس مفيش حاجة عن ساويرس ولا هو مدارى فى الدرة

[eng_mkhalaf]

حلوة وملعوبة :)

[sss]

حلوة بجد و ياريت ولو فيه امثال اكتر بس تبقى تبع مبدأ"من خاف سلم":d:d:d

[gade2]

وعلى راى المثل كلامك حكم