هل تغيرت مصر؟

[human]

انا هنشر مشهدين
مشهد مكتوب و مشهد هو صوره
و اطرح سؤال --- هل تغيرت مصر؟؟؟!!!!!!!!!!!!!


المشهد الاول

يوم الجمعة مسائا كنت معدى على الكورنيش و معايا 3 اصحابى فى العربية و عند مدخل المعادى شوفت تجمع لناس كتير عند الاشارة و شوفت 2 لابسين ملكى بيتكلموا مع بعض فكنت هقف اسأل فى ايه ففوجئت بأن واحد منهم جاى عليا و بيقولى رخصك بمنتهى الادب سألتة مين حضرتك فرد ظابط مباحث يا استاذ و ادى الطبنجة بتاعتى روحت مطلع الرخص و ماسكهم فى يدى و أولتلة ادى الرخص بتاعتى ممكن اشوف الكارنية بتاع حضرتك فبدأ يعلى صوتة و ينادى على كل الى واقفين كأنى شتمتة و فجأة كل امناء الشرطة و افراد المباحث الى فى الكمين اتلمو على العربية و فتحوا كل الأبواب و هاتك يا تنفيض فى العربية و انا ماحاولتش اعترضهم بصراحة بدأت اتوتر و مش فاهم اية اللى بيحصل المهم طبعا قالولى اركن على جنب فركنت و نزلت بعد ما اخدوا منى الرخص طبعا شوفت ظابط اخيرا لابس ميرى ف روحت اتكلم معاة افهم اية اللى بيحصل معبرنيش لأيت ظابط الجيش جاى يتكلم معايا فقلت اخيرا حد عائل اتكلم معاة سمع الحكاية كلها متكلمش و مشى روحت للعربية تانى لأيت المخبرين بيفتشوها و طلعوا كل حاجة فيها فقلتلهم عايز تفتش اكون واقف معاك علشان ما فيش حاجة تضيع قالى ما انت بتتكلم مع الباشا مش هنعد نضيع وقتنا و بعدين احنا مش حرميا جالى ظابط المباحث اللى وقفنى فى الأول بعد ما كانوا قلبوا العربية و ما لقوش حاجة و قالى اركب و اطلع على قسم المعادى فركبت و ركب هو معايا و معانا فرد مباحث و عند ميدان القسم قالى صعبان عليا احبسك انت عارف انا ممكن اعمل فيك اية انا كنت هعملك محضر تعدى على ظابط شرطة و ابيتك فى الحجز و بكرة على النيابة قلتلة بس انا معملتلكش حاجة ولا قربت منك خالص قالى ماهى كلمتى قصاد كلمتك و نشوف هيصدقوا مين بئة قلتلة و لية دة كلة انا بس سألتك على كارنيهك قالى ما هو مش معقولة انا واقف و كل شوية حد يسألنى على الكارنية مش هخلص رجعنى تانى للكمين على الكورنيش فلئيت ظابط كبير فى السن حاطط نسر و نجمتين بيقولى عرفت كان هيحصل فيك اية مش نبقى حبايب احسن مرديتش علية و اخدت رخصى و بطاقتى و مشيت بس طبعا انا مش عارف احكى بكل التفاصيل بس اقدر اقولكم حاجة كمان ان الموضوع ابتدى الساعة حوالى 12:00 مسائا و الساعة كانت حوالى 2:00 صباحا على ما سابونى اروح

المشهد التانى

صورة حية من أمام القضاء العسكرى لأحد المواطنين يشكو لأحد الظباط
الحكم العسكرى الصادر بحق إبنه ذى السبعة عشر عاماً والذى يمنعه من أداء إمتحانات الثانوية العامة الشهر المقبل

تصوير : جيجي إبراهيم

[Everlasting]

لا

...............................

[medododo]

مصر لا تعليق

[wesam_salom]

ايوه طبعا اتغيرت

كان عندنا الشرطه

بقى عندنا الشرطه والجيش

[human]

ايوه طبعا اتغيرت

كان عندنا الشرطه

بقى عندنا الشرطه والجيش

+++++++++1

و كان عندنا رئيس حكيم

بقى عندنا مجلس رئاسى حكيم

[MohssenRashed]

البلد اتغيرت اه لكن الشعب لأ

[ahmed2y]

كلمة قالها الاستاذ محمد حسنين هيكل فى حديث لية قال اية

قالك كل شعب بيجيلة حاكم على قدة والشعب البيختار الحاكم فدة قدنا مش اكتر ولا لا

ومع احترامى لصاحب القصة الاول يا ترى هل كان بيقول للظابط كارنيهك ازاى بطريقة ظريفة للاطلاع والتاكد انة شرطة بما انة مش لابس الزى الرسمى مثلا ولا بطريقة ورينى كارنيهك لو سمحت على خلفية بعد الثورة وكسرة النفس الى فيها ظباط الشرطة ومخلية الى يسوى ولا ميسواش يبقى عاوز يعمل دكر على اى ظابط شرطة

فى حاجة عاوز اقولها فى ناس مكتسبات الثورة بالنسبالها

الاعتداء على هيبة الشرطة والدولة

البناء على الاراضى الزراعية فى الهوجة وضدد القانون

المشى عكس الاتجاة وعدم احترام القانون

طبعا اعظم مكتسبات الثورة تركيب فامية لزجاج السيارة وطبعا مش عاوز اى ظابط يتكلم معاة

والمشهد التانى يا ترى حد عارف ابن الراجل دة الى عندة 17 سنة يا ترى اتحكم عالية لية يا ترى كان مثلا راجع من المكتبة الى بيقضى فيها كل وقتة للاطلاع او مثلا جاى من النادى البيمارس فية نشاط رياضى فخدوة بالعافية ولا مثلا راجع من شغلة وخدوة كدة وخلاص ولا مثلا كان قاعد على قهوة مع اصحابة بيقضو وقت لطيف فخدوة وخلاص ما تلاقية كان فى خناقة ولا متاخد بلطجة ولا اى نيلة

معلش دة رايى مش معنى كدة انى مع تجاوزات الشرطة ولا الجيش ابدا والله وعارف ان فيهم ناس عاوز ضرب النار بس الواحد بشوف بعنية حجات يعنى تجنن زى الصورة الى فى المشهد التانى ظابط راكب عربية وراجل شكلة غلبان طبعا هيتعاطفو مع الراجل الغلبان

واسف على الراى الحاد ولو قولت حاجة غلط يا يرت حد يصحح ليا

[ahmed2y]

اة فى حاجة نسيتها بالنسبة لعنوان الموضوع هل تغيرت مصر ؟

هى تغيرت فى حبس الحرامية وتقريبا نزيف الاموال العامة الى كان موجود لكن التغير الى بناملة كلنا مش هيجى غير لما الناس تتغير ابسط حاجة نظافة الشوارع م هتحصل ولا تدوم الا لما الناس تبطل ترمى زبالة فى الشارع زى الشباب الى جم فترة وبقو ينظفو الشوارع ويعملو الرصيف ابيض واسود وبعد اسبوع رجعت كل تعبهم راح لان مفيش حد حافظ على الهمو عملوة
ازمات المرور مش هتتغير غير لما نبطل نركن صف تانى وتالت وسواقين الميكروباص يركنو فى نص الشارع ويعملو مواقف بمزاجهم وقيس على كدة حاجات كتير

[diablo1231]

في سلبيات كتير اوي بس انا بقيت مقتنع اني مينفعش اطلب من الناس دي كلها انها تتغير وانا نفسي متغيرتش , يمكن لو كل واحد بدأ بنفسه هيبقي الموضوع احسن ؟!

[zkralla]

الصورة من زاوية اخرى
امبارح فى ميدان رمسيس شايف واحد راكب عربية ومفيم والرائد ماسك رخصة وصاحب العربية واقف معاه جمب العربية
صاحب العربية عمال يزعق ويتكلم بطريقة مستفذه جدا لو كلم اى حد بيها هيقلع ... ويديله بيها على دماغه

السلبيات هتفضل موجوده
الشخصيات الغيرمحترمه هتفضل موجوده
المدينة الفاضلة حلم جميل مستحيل تحقيقه

[waelfarid]

حلاوتها في طعامتها
طبعا المحترم حيفضل محترم
واللي مش حيفضل مش
اللي بيحترم بيحترم نفسه

[otefa]

الكمال لله وحده
وأحنا مش شعب ملائكي يعني
جهل وفقر وفتايين.............دي فئة مش قليلة في مصر لما ده كله يتعدل يبقى البلد تتعدل
ننوي كلنا وندعي أن الكلام ده يحصل في القريب العاجل بعد أنتخاب من يراعي الله فينا ويهتم بالتعليم والخدمات وأساسيات المعيشة الكريمة للمواطن

[alaasaid]

لو مصر اتغيرت بنسبة 20 % بعد الثورة دى تبقى معجزة , بعد 30 سنة جمود ان يحصل تغيير اعتقد ان دة حاجة كويسة , كفاية ان التعذيب و أمن الدولة وقفوا و كفاية ان السرقة و النهب وقفوا و ان شاء الله مع الوقت الامور هتتحسن و الاحوال تنصلح ان شاء الله المهم يبقى عندنا أمل

[تامر.محمد]

اتغيرت
لأ

في امكانية للتغيير
ان شاء الله ايوة

[kok3]

مفيش فايده الشعب دا مغضوب عليه من فوق م الكبير خالص