عملية تصحيح الابصار ( الليزك)

[nonetta]

السلام عليكم ورحمة الله

عاوزة اسأل السادة اطباء العيون في المنتدى
والسادة الاعضاء المحترمين

عملية تصحيح الابصار
ما مدى نفعها
واضرارها
مدة صلاحيتها
اعراضها الجانبية
نسب نجاحها او فشلها
هل فعلا بتسبب جحوظ العين؟

ارجو من اي حد عمل العملية دي يفيدني
الاماكن اللي ترشحوهالي اني اعملها فيها
وشكرا

[dr.hazem]

السلام عليكم ورحمة الله

عاوزة اسأل السادة اطباء العيون في المنتدى
والسادة الاعضاء المحترمين

عملية تصحيح الابصار
ما مدى نفعها
واضرارها
مدة صلاحيتها
اعراضها الجانبية
نسب نجاحها او فشلها
هل فعلا بتسبب جحوظ العين؟

ارجو من اي حد عمل العملية دي يفيدني
الاماكن اللي ترشحوهالي اني اعملها فيها
وشكرا

مدى نفعها فوق الخيال

اضرار لا تذكر اصلا ونادره جدا جدا

طالما ان العين استقرت على قياس نظاره لفتره تتعدى السنه ونص يبقى صلاحيتها ملهاش حدود

اعراضها شوية جفاف في العين بعد العمليه وبتبقى معاكي قطره هتستخدميها علطول لمدة 6 شهور وبس

نسبة نجاحها تتعدى ال 90%

مفيش اي معلومه واحده ليها علاقه بجحوظ العين


انا عملت العمليه من 54 سنين
زوجتي عاملاها من 3 سنين

اتنين اخواني عاملينها وزوجة اخي عاملاها من اكتر من 8 سنين ومحدش اشتكى ولله الحمد


مكان ارشحهولك
في دكتور في برج ساريدار في الدقي اسمه احمد خليل وهو رجل ممتاز جدا ممكن تدوري عالموقع بتاعه عالنت وهتلاقيه شارح العمليه وارقام تلفوناتهم وكل حاجه عنهم


تحياتي

[nonetta]

شكرا لاهتمام حضرتك وردك
انا بافكر فيها بقالي مدة بس خايفة عشان دي عيني مش اي حتة تانية في جسمي
بس حضرتك ما رديتش على سؤال هل بتسبب جحوظ في العين ؟

[MOUSTAFA_SAAD]

انا اختى عملتها من 3 سنين فى اسكندريه وماشاء الله مفيش اى مشكله ولاجحوظ ولا حاجه وربنا يسهل واعملها كمان لانى زهقت من النضاره والعدسات اللاصقه بالبسها جديد من اسبوعين بس مدوخانى بصراح وكل شويه عينى تحمر

[sherif_84]

طيب أقدر اعرف تكلفة العملية بتبقى فى حدود كام ؟ وهل فعلا بتمضى على اقرار قبل العملية انك مسئول عن اى خطأ يحصل ؟

[JapRuleZ]

كل دكاترة الرمد لابسين نضارات و مبيعملوهاش
الحدق يفهم...............

[MOUSTAFA_SAAD]

طيب أقدر اعرف تكلفة العملية بتبقى فى حدود كام ؟ وهل فعلا بتمضى على اقرار قبل العملية انك مسئول عن اى خطأ يحصل ؟

من 3500 الى 5500 على حسب المركز وشهرته وطبعا اوعى تستخصر فى عينيك وحكاية الاقرار دية مستحيله طبعا انا مش حاعملها فى مركز تحت بير السلم

[aly_hosny]

كل دكاترة الرمد لابسين نضارات و مبيعملوهاش
الحدق يفهم...............

+1

رغم ان 3 صحابي عاملينها و مشتكوش منها نهائي
واحد منهم عاملها بقالو فوق ال 5 سنين

[sherif_84]

من 3500 الى 5500 على حسب المركز وشهرته وطبعا اوعى تستخصر فى عينيك وحكاية الاقرار دية مستحيله طبعا انا مش حاعملها فى مركز تحت بير السلم

يا أستاذ مصطفى سعد ماهو طبعا مش مركز فى بير السلم الكلام ده انا مش بقوله كده و خلاص لان فعلا فى مستشفى المغربى للعيون بيمضوك على الاقرار ده و اعتقد المغربى للعيون مش فى بير السلم !!

[MOUSTAFA_SAAD]

يا أستاذ مصطفى سعد ماهو طبعا مش مركز فى بير السلم الكلام ده انا مش بقوله كده و خلاص لان فعلا فى مستشفى المغربى للعيون بيمضوك على الاقرار ده و اعتقد المغربى للعيون مش فى بير السلم !!

انا مقولتش انك رايح تعملها تحت بير السلم انا بتكلم عموما على المكان اللى ممكن يطلب الكلام ده :
ازاى الكلام ده انا لو رايح مستشفى كبير ومشهور علشان اعمل عمليه ويمضونى اقرار انهم مش مسئولين عنها ده انا لو حاخد حقنه وكتبونى اقرار مش حارضى اخدها
يااستاذ شريف انا عملتها لاختى عند مركز دكتوراسامه ابراهيم فى ابراج سيدى جابر فى اسكندريه واحنا اللى خليناهم كتبولنا اقرار بانهم عملوا كذا بتاريخ كذا وان العمليه تمت بدون اى مشاكل لان انا ووالدى كنا مرعوبين لانها حاجه فى العين مش فى اى حته والناس لم يعترضوا على اى شىء وكتبوا كل اللى احنا عاوزينه تيجى تقولى المغربى طالب يكتبك اقرار بان انت المسئول طيب مين يجيله قلب بعد كده يعمل حاجه وخصوصا انك تعتبر رايح تعمل عملية تجميل ونزاهه يعنى مش حاجه ضروريه او حياة او موت دية حاجه علشان تريح نفسك وتحسن مظهرك مش اكتر يبقى ليه الرعب ده

[dr.hazem]

شكرا لاهتمام حضرتك وردك
انا بافكر فيها بقالي مدة بس خايفة عشان دي عيني مش اي حتة تانية في جسمي
بس حضرتك ما رديتش على سؤال هل بتسبب جحوظ في العين ؟

لا انا قلت ملوش اي علاقه ولا حتى حاجه علميه تربط بين الليزك والجحوظ
الحقيقه اول مره اسمع حاجه تربط الاتنين ببعض
واصلا لو كانت بتعمل جحوظ فالجحوظ في حد ذاته بيعدم الابصار بسبب الشد على العصب البصري فازاي تكون بتعمل جحوظ وهيا المفروض بتعالج الابصار؟؟؟
وحاجه كمان العمليه كلها موجهة الى القرنيه وهي طبقه خارجيه
بينما الجحوظ لازم يكون حاجه خلف العين او حواليها وبالتالي طبعا كلام اشاعات او ناس مش فاهمه حاجه

طيب أقدر اعرف تكلفة العملية بتبقى فى حدود كام ؟ وهل فعلا بتمضى على اقرار قبل العملية انك مسئول عن اى خطأ يحصل ؟

انا عملتها ب 4200 من اربع سنين
طبعا هتمضي الاقرار زي اقرار اي عمليه في الحياة

كل دكاترة الرمد لابسين نضارات و مبيعملوهاش
الحدق يفهم...............

ياعزيزي
واضح انك مش في المجال الطبي
العين كده كده على سن ال 40 بتفقد قدرتها على التأقلم مع الاجسام القريبه منها
وبالتالي اغلب الناس ابتداءا من سن ال 40 بتلبس نضارة قرايه
انما اي حاجه في الافق معندوش فيها مشاكل
نرجع للنقطه
اغلب دكاترة الرمد اللي حاليا بيعملو الليزك هتلاقي عمره لا يقل عن 35
فهل من المنطقي انه يعمل العمليه وبعد خمس سنين يرجع يلبس نضارة قرايه؟؟

ولو حضرتك تعرف فالعمليه غير منصوح بيها لمن هم فوق ال 45 لنفس السبب
انها مش هتبقى جايبه همها وكده كده مش هتعالج مشكلة القرايه والاجسام القريبه وبالتالي محدش بيعملها للناس من الفئه العمريه دي...


ومن ثم هل من المنطقي ان دكتور العيون
يجيب جهاز بالملايين
ويسدد اقساطه قد كده ومن ثم يروح يعمل العمليه عند حد ويدفعله فلوس؟؟؟
اعتقد جميع المبادئ تعترض مع الحكايه دي

تحياتي

[Ghosts]

أى حد يا جماعة عايز يعمل عملية من أى نوع ......
لازم يسئل كويس أوى أوى على الدكتور قبل ما يعملها .....
ودة لأن الدكاترة فى بلدنا فعلآ ممتازيييين ( سامحنى يارب ) .......

[elpasha1]

واحد صاحبى عاملها بـ 2000 جنية من 3 شهور
فى مستشفى فى اكتوبر

[MOUSTAFA_SAAD]

واحد صاحبى عاملها بـ 2000 جنية من 3 شهور
فى مستشفى فى اكتوبر

اسمها ايه المستشفى دية وياريت رقم التليفون
وياترى عنده اى مشاكل منها

[SHNORY]

راجعوا الموضوع ده وحطوا اسالتكم فيه

http://www.nilemotors.net/Nile/55299-a.html