فى حد زيي ولا كدا انا مش طايق نفسي

[wa7d]

اتخنقت من لعب العيال فى الشارع ليل نهار , انا شقة دور اول علوي فى منطقة شعبية , طول النهار عيال وشباب وادامي محل بلاستيشن وكمان حاطط ادامه طرابيزة بنج بونج وطول النهار صريخ وشتيمه وصداع

الناس اللي فوقي على طول عندهم بت شقيه طول النهار بتهبد علي السقف عندي وصداع , دماغي ورمت منها , البت نازله هبد ورزع فى علي السقف

جيراني اللي جنبي ميعرفوش يتكلموا الا لما يصرخوا , دا غير بقي اللي طالع واللى نازل على السلم والاطفال

الباعة الجائلين وما ادراك ما البائع الجائلين , مره بتاع روبابيكيا ومره بتاع بطيخ ومره بتاع عيش بايت ومره بتاع خضار لما خلالالالالالالالالالالالالالالالالالالالاص

وغيره وغيره وغيره كتير


انا عايز اعرف بقي يا تري فى حد بيعاني زيي ولا انا لوحدي فى الحوار دا ؟

[Ahmed_lol2007]

والله انا عندى نفس المشكلة ادامنا ارض فاضية والعيال مقضياها لعب كورة وطبعا أنا بمتحن غير بنت عمى الصغيرة ساكنة فوقينا ونازلة تنطيط ولعب وقرف
المهم أنا زعقت للى ف الشارع ودلقت عليهم ماية وخليتهم مشيو وبقالهم بتاع 4 ايام مش بييجو والحمد لله غيرو نشاطهم من كرة قدم للعب البلى بس بعيد عنى
وخليت بابا يكلم عمى على بنته دى خلاها هديت شوية بس بفكر أعمل أى حوار عشان اخليها تسكت خالص

[Ralliart]

دي مشكلة كل المصريين عدم احترام الناس ولا حقهم في الهدوء

[زينة الله]

أجر الشقة و اتأجر فى مكان تانى اريح هههههه :) بس ما تبعهاش إلا اذا كنت هتكمل و تشترى واحدة تانية

[wa7d]

المشكلة انا اساسا شارعنا كان شارع هادئ جدا , كان يعتبر اهدى شارع فى المنطقة كلها , بس حالة اتقلب مره واحده , انا فعلا ناوي اعزل لان بجد اعصابي تعبت جدا ومش عايز اعمل مشاكل لاني عصبي وممكن اعمل مصيبة

البنت اللي فوقي كلمت امها مره وبعدين يومين ورجعت البت تتنطط تاني خايف اكلم امها تاني ولا ابوها يضربوها ودي فى النهاية طفله وبصراحة ضميري حيوجعني لما اكون سبب فى ضربها ومخلهاش تعلب براحتها , بس انا كمان تعبان

المشكلة مش بس فى الطفلة اللي فوق المشكلة بجد فى الشارع ككل والمنطقة , انا فعلا محتاج اعزل , بس انا مش عايز اعزل فى منطقة شعبية يبقي معملتش حاجة والفلوس اللي معايا حاليا متجبش شقه فى حته هادية

شكلي كدا حروح اقعد فى العباسية ولا مستشفي المعمورة اريح اعصابي هناك

[Ralliart]

أجر الشقة و اتأجر فى مكان تانى اريح هههههه :) بس ما تبعهاش إلا اذا كنت هتكمل و تشترى واحدة تانية

+1
ده حل سليم جداً أجر شقتك وخد الايجار كمل عليه واجر شقة في حتة اهدى وتبقى دخلت دي في دي ولا كأنك دفعت حاجة
انا عارف ناس كتير عاملين كدة

[wa7d]

موضوع اني انقل اجر شقتي دي وانقل فى شقة تانية , مينفعش اولا الشقة بتاعتي ايجار قديم يعني مينفعش اجرها , تاني حاجة حتي لو تمليك انا شقتي متوضبه كويس ولو اجرتها حتتبهدل .

انا فعلا ناوي انقل بس الفلوس معجزاني دلوقت , بس انا كنت بسأل بس , انا كدا طبيعي فى خنقتي دي ولا انا خلقي ومش طايق دبان وشي


احلا حاجة وانا بكتب الرد دا تحت دلوقت بياع بصل وماسك المكرفون وبيلحن

[تامر.محمد]

لا خنقتك في محلها

انا ساكن في تالت دور و مش طايق نفسي من الزيطة ليل و نهار
:(

[زينة الله]

بياع البصل بيلحن هههههههههههه عادى عادى :) take it easy

أنا مرة كنت باتكلم فى الموبيل فى شغل مع مسئول من الشركات اللى بنتعامل معاها

و بعدين عربية كرو عدت فى الشارع و الحمار كان متنرفز على الآخر و نهيق فظيع فظيع :) مش عارفة كان شايف مارد جبار والا إيه !!!

لدرجة إن المسئول اللى على التليفون سمعه و بيقولى أنت فى الشغل والا إيه ؟؟ هههههههههههههه

كنت عايزة أقوله طبعا فى الشغل مش سامع رئيس مجلس الادارة هههههههههه :)

هدى بالك :: الجيرة دى أصلها أرزاق :) طيب أنا ساكنه فى مكان هادى و الحمد لله :) لكن يجى الليل تلاقى الناس نزلوا قعدوا فى الجنينة تحت الشباك

و هاتك يا حواديت للساعة 1 أو 2 قبل الفجر والعيال تلعب و تهيص لما يبقى الواحد هيجن ساعات :) لأنى متعودة أصحى من الفجر !!! :)

[AmAhmed]

عندي مشكلة مماثلة لاني بنزعج من الدوشة قوي - بعد دردشة مع اكثر من شخص طلعت انا غلطان لاني مش مركب الومنيوم بزجاج مزدوج لمنع الصوت

و ده تعبير عن طريقة المصريين في التعامل مع المشاكل عن طريق تفاديها و الالتفاف حولها و محاولة التعايش و التعامل معها

[calipha3]

طيب هو مفيش حلول عمليه لعمل عوازل للصوت؟

[زينة الله]

مش حكاية التفاف حول المشاكل والا حاجة يا عم احمد :)

لكن دول جيراننا كلمنهم بالحسنى مفيش فايدة :) اتخانقنا مفيش فايدة :) نعمل محضر فى القسم بقى !!! صدقنى يومين و هيرجعوا تانى

و ممكن الموضوع يقلب بقضايا !!! و أساسا مفيش احترام للقانون فى البلد و الاستثناءات و الرشوة سيدة الموقف :)

[wa7d]

طيب الحمد لله يعني مش لوحدي يا جماعة اللي مخنوق من الدوشة , الكل بيعاني , طب ايه الحل من وجهه نظركم للمشكلة العامة دي

[wa7d]

طيب هو مفيش حلول عمليه لعمل عوازل للصوت؟

لو علي كدا الواحد يعمله صندوق زجاجي يمشي بيه يكون عازل للصوت ويمشي وسط الناس براحته بقي

هي وصلت اني حقفل عليا شقتي واخنق نفسي والمزعجين ينعموا بازعاجهم

[wa7d]

كنت عايزة أقوله طبعا فى الشغل مش سامع رئيس مجلس الادارة هههههههههه :)

جامده دي , طب خلي بالك ليكون رئيس مجلس الادارة مشترك معانا فى المنتدي