أول مرة

[OlaOsman]

كل واحد فينا اكيد له ذكريات مع اول مرة.... اول يوم.... اول اي حاجة مرينا بيها و مهما بتعدي السنين مش بينسى اليوم او اللحظة دي.

اللي عنده ذكريات عن اول مرة يا ريت يحكيهالنا... اول يوم شغل... مدرسة... جامعة... اول مرة يجرب شعور الأبوة او تجرب احساس الأمومة.. أول يوم في الغربة.. في الشغل.. الخ الخ الخ

أنا أول يوم شغل لية كان من 10 سنين و كنت مدرسة كي جي في مدرسة لغات في وسط البلد رحت أول يوم.. أخدتني المشرفة على اللغة الانجليزية بالمدرسة و عرفتني بمدير الكي جي اللي رحب بية و أخدني للفصل و سابني مع الأطفال.. حوالي 30 طفل في الفصل.. كلهم في سن 3 سنين و نص و 4 سنين.. كلهم تقريبا بيعيطوا و عايزين ماماااااااااااااااااا أختكوا بأه أول مرة تدخل فصل.. أول مرة اتعامل مع أطفال.. آخري كان ابن اختي اللي ايامها كان عنده سنتين و اول ما يعيط أخلي مسئوليتي منه تماما

انما طبعا الواحد لما يتحط في التجربة بيبقى واحد تاني خالص غير اللي هو عارفه. الصراحة انا مش فاكرة عملت ايه في اليوم ده و لا سكتت العيال ازاي و لا شغلتهم في ايه و لا اليوم ده عدى ازاي.. انا كل اللي فاكراه اني روحت اليوم ده ما نطقتش في البيت بولا كلمة.. اتغديت في صمت و دخلت انام شوية.. فاكرة كويس اني كنت بحاول انام انما دماغي فيها دوشة و عيال و عياط و ماماااااااااااااااا و هانروح امتى يا ميس؟ طبعا ما عرفتش انام خالص و قمت و دماغي فيها فكرة واحدة بس أو جملة واحدة بس بتتردد فيها بزن مش طبيعي: انا مش رايحة المكان ده تاني.. انا مش هاروح الشغل بكرة.. انا مش رايحة تاني.. مش هاروح تاني.. مش هاروح تاني..

بس انتوا أكيد عارفين ايه اللي حصل تاني يوم.. طبعا رحت الشغل تاني و الحمد لله أقدر أقول اني نجحت في إني اكون مدرسة كويسة و أخلي الأطفال دول يحبوا يروحوا المدرسة و يتكلموا بعض الكلمات بالانجليزي.. بس بعد ما كنت حاسة اني بحارب :o

[Hassan Khalil]

عايز اعرف انتي بتجيبي المواضيع ديه منين !!!!!!!!!!
.........
ححاول ارصد ( الاوائل ) في حياتي و اكتبها ان شاء الله

[Hossam_Hassan]

النهاردة أول مرة اخاف على هوية المنتدى :D

[Nile_Storm]

اه ماشاء الله بتجيبي مواضيع تحفففففففففففه

[OlaOsman]

جزاكم الله خيرا على اهتمامكوا بالرد :)

بس فين أول مرة بتاع كل واحد فيكوا؟

[محمد عز]

الحمد لله على نعمة النسيان
الحمد لله انى نسيت اول مرة من كل حاجة فى حياتى
لو عاوزة تسالي ، اسالى عن اخر مرة
ممكن افتكر

[TAG_Turbo0]

موضوع جميل شكرا ليكي على الفكرة دى

أول مره
أول مره أروح فيها الكلية فاكرها كويس جدا زي ما تكون امبارح
واحد داخل مبنى كلية فنون جميلة ومكتوب يافطه يشوفها الاعمى ان دى فنون جميلة بس برده انا مقتنعتش باليافطة وألت يمكن تمويه :D
دخلت على الحرس بتوع الكلية وسألتهم هى دى الكلية قالولى ايوه
سبتهم ودخلت وطبعا انا ماشى تاية فى الممر لأيت باب كبير بيطلع على الجنينة أخدت أول شمال ودخلت الجنينة وبرده لسه تايه وعمال ابص فوق وتحت وشمال ويمين وبقول فى بالى - مين الناس دول وايه الى جابنى هنا انا ارجع بلدنا وادخل علوم أحسن- وبعدين لمحت واحد قاعد على جنب وماسك اجندة وعمال يبص حولية زى
ألت بس ده اكيد برده لسه اعدادى
ودخلت عليه
التله السلام عليكم ... وعليكم السلام ... انت اعدادى؟ ... ايوه وانت؟ ... اعدادى برده ... انا محمد عادل ... وانا محمد اسماعيل ....
وبعيدين سكتنا شوية بتاع عشر دقائق
وبعدها سالته عمارة ولا فنون؟... عمارة ... وانا كمان بس ده مش مبنى عمارة ... والله اما احنا قاعدين هنا ليه؟ ... مش عارف أعمل ايه ... طيب تعالى نشوف فين شؤون الطلبه ... يلا بينا
بس وأعدنا طول اليوم نلف وخلصنا الورق ورجعنا الجنينة تانى وروحنا على الساعه 6 تأريباً
بس وخلص أول يوم

أول لوحه أرسمها فى الكلية
أول لوحة ارسمها فى الكلية كانت لوحه حاجه اسمها تهشير شويه خطوط جنب بعضها
المهم دخل المعيد وشرحلنا هنعمل ايه وكان كالتالى (هجيبوا لو حة 50*70 سم وتعملو فريم 2سم وتقسموا باقى اللوحة 6 مربعات ) لحد كده كويس
وبعدين تهشروا مربع بالطول والتانى بالعرض والتالت على 45 والرابع عكسه والخامس مربعات والسادس مربعات على 45) وهب كانت المصيبة الكبيرة التهشير كل 2 مم
هو قال كده والدنيا قامت ومأعدتش والناس تعترض وناس مبلمه وانا فتحت باى
قام فتح الباب قال كل واحد على الاتيلية بتاعه التسليم الساعه7 مفيش نقاش
المهم الدفعه قامت تشتغل وكل واحد منهمك وطلعان عنية فى اللوحة لحد ما جت الساعه الموعوده
جه وأت التسليم دخل المعيد ومسك قلم أحمر يوكن
أول واحد (صفر)
تانى واحد (صفر)
تات واحد (صفر)
رابع واحد (-1)
انا ألت الناس دي شكلها كده مبتفهمش حاجه هم دخلوا هنا غلط :p
وهكذا لحد ما وصل ليا وأخدت الصفر المتين والحمد لله :D
وبعد ما خلص ناس عيطت وناس قالت مش جاية المخروبة دى تانى وواحد صاجبي اتصل بممامتة والها انا جى البيت النهارده ومش راجع تانى
وناس تسب وتلعن
كان يوم تاريخى
بس الحمد لله انا مسكت نفسى وروحت على البيت ونمت من غير أكل
وكده خلص أول لوحة وأسوء يوم فى تاريخ البشرية

مش فاكر حاجه تانى بصراحه لو أفتكرت هألكوا على طول

[Chicco]

موضوع متميز كالعادة ..بس خلي بالك يا علا الموضوع الجاي لازم يكون عن العربيات عشان خاطر سيادة اللواء و كل اللي خايفين على هوية المنتدى ..:D

في حياتي مريت باول مرة ديه كتير
- بمناسبة تجربتك.... في حضانة KG1 و لسة فاكر إليوم ده .....أهلي وصوني أبقى هادي و ما أعيطش و كنت بسمع الكلام ....كل حاجة فضلت هادية لحد ما دخلنا الفصل و هوب واحدة بنوتة ابتدت تعيط .....بعدها اتنين تلاتة كمان عيطوا معاها.... مفيش دقايق و أوركسترا العياط اشتغلت و أنا معاهم طبعا :o

- سنة أولي طب و أول يوم في المشرحة .....نقدم رجل و ناخر رجل و نحاول نحط إبتسامة شجاعة على وشوشنا بس التوتر سيد الموقف ....إلسكشين اتجمع و الباب لسة مقفول و أخ زميل أغمى عليه و كانت نكتة لأن البنات شكلهم ماسكين نفسهم عن الولاد و واقفين في الأول .....و اتفتح الباب على منظر شبه أفلام الرعب و اللي ركبه سابت و اللي رجع و اللي راح الحمام جري ....أول واحدة دخلت كانت بنت ....برضه !!
فضلنا جوا بتاع نص ساعة و المعيدين مش موجودين و ما حدش راضي يقرب جنب إلتربيزات ولا يرفع الغطا .....مع ريحة فورمالين قوية ألهبت عيون و جابت حساسية و ربو لناس تانية لحد ما واحد (ولد المرة ديه ) رفع الغطا .......ساعتها المعيدين ظهروا
فضلت كذا شهر بأخش المشرحة ذي ما بطلع مش راضي حتي المس أي حاجة ....و فضلت سنة بعد ما خلصنا دراسة التشريح أشم ريحة الفورمالين في كل حتة أروحها:(

[M_ashraf]

كالعادة موضوع متميز من احد اكثر الاعضاء تميزا
يااه يا شيكو فكرتني باول مره كنت داخل المشرحة في كلية الطب
بصراحة انا مكنتش خايف خالص
بس المشكلة كانت في الريحة وكان عندي حساسية انف والدموع ابتدت من عيني
وحرقان رهيب فكنت بكلم الدكتور بقله يابيه اليحة صعبة اوي
قاللي بكرة تتعود
وحياتك على اخر سنه اولى كنت بقضي يومي في الكلية
في المشرحة والمتحف الصبح ارح اجيب الشاي والبسكوت
و افطر هناك
وهكذا تمر الايام

[talent]

شكرا على الموضوع
بصراحه فى حاجه لاول مره كنت بشوفها فى حياتى
لحد الان مش ناسيها و لما افتكرها اشوفها قدامى
الصراحه كانت حاثه بس غريبه
واحده شابه ماتت بس مش عارف ازاى انا ماشى مع صاحبى
لقيت فجاه ناس بتجرى قدامنا وواحد جايب جرايد
ال ضايقنى ان الناس ال راحه و ال جايه تيجى تكشف الجرايد و تشبه على المتوفيه
وتمشى و ناس قامت من على القهوه تشوف المتوفاه وترجع تكمل كلام و لعب و شرب
يومها حسيت ان الناس اتغيرت
انا خفت حتى ابص على المتوفاه مع انها كانت قدامى
معلش نكدت عليكوا بس دى كانت اول حاجه
يا ريت تفهمونى

[Nile_Storm]

موضوع متميز كالعادة ..بس خلي بالك يا علا الموضوع الجاي لازم يكون عن العربيات عشان خاطر سيادة اللواء و كل اللي خايفين على هوية المنتدى ..:D

في حياتي مريت باول مرة ديه كتير
- بمناسبة تجربتك.... في حضانة KG1 و لسة فاكر إليوم ده .....أهلي وصوني أبقى هادي و ما أعيطش و كنت بسمع الكلام ....كل حاجة فضلت هادية لحد ما دخلنا الفصل و هوب واحدة بنوتة ابتدت تعيط .....بعدها اتنين تلاتة كمان عيطوا معاها.... مفيش دقايق و أوركسترا العياط اشتغلت و أنا معاهم طبعا :o

- سنة أولي طب و أول يوم في المشرحة .....نقدم رجل و ناخر رجل و نحاول نحط إبتسامة شجاعة على وشوشنا بس التوتر سيد الموقف ....إلسكشين اتجمع و الباب لسة مقفول و أخ زميل أغمى عليه و كانت نكتة لأن البنات شكلهم ماسكين نفسهم عن الولاد و واقفين في الأول .....و اتفتح الباب على منظر شبه أفلام الرعب و اللي ركبه سابت و اللي رجع و اللي راح الحمام جري ....أول واحدة دخلت كانت بنت ....برضه !!
فضلنا جوا بتاع نص ساعة و المعيدين مش موجودين و ما حدش راضي يقرب جنب إلتربيزات ولا يرفع الغطا .....مع ريحة فورمالين قوية ألهبت عيون و جابت حساسية و ربو لناس تانية لحد ما واحد (ولد المرة ديه ) رفع الغطا .......ساعتها المعيدين ظهروا
فضلت كذا شهر بأخش المشرحة ذي ما بطلع مش راضي حتي المس أي حاجة ....و فضلت سنة بعد ما خلصنا دراسة التشريح أشم ريحة الفورمالين في كل حتة أروحها:(

بس ياشيكو بلاش فضايح هتفرح كريم منير فينا و في الفورمالين
ماله الفورمالين :) جميل جدا:D:D:D

[OlaOsman]

طيب.. حفاظا على هوية المنتدى الموضوع القادم ان شاء الله هايكون عن ذكرياتنا مع أول عربية ركبناها.. أول مرة سوقنا فيها.. أول حادثة.. أول مرة نروح للميكانيكي.. و هلم جرا :p

[aif]

انا اول مرة اشوف توقيع بالشكل ده يا علا .... مين اللي في الصورة دي .... مش قصدي البنت ... أقصد المعزة ..... دي الصورة دي من ايام سيدنا كانتاولبه...
عموما مقبول منك يا علا :D

...................................
انا اول مرة ابقي أب عمري ما ح انساها .... كنت في غرفة العمليات في مستشفي الكاتب بالدقي ....
والدكتور كان صاحبي .. وانا قلبي جامد ... عملولي تعقيم ولبست المريلة الخضرا والماسك ... ودخلت ماهمنيش..كانت الولادة قيصريه وكانت هي واخدة بنج نصفي .. والظريف اني باقول لزوجتي إنتي عارفاني ( كنت لابس الماسك ومش باين غير عيني) ... قالتلي بمنتهي الثقة ... ايوه .. انت دكتور البنج ........ وقعدت اقرأ قرآن وانا ماسك ايدها ... وهما عمالين يقطعو .. زي ما يكونو بيعملو بفتيك .... وانا شويه مركز معاهم ... وشوية اركز مع زوجتي ... مش مصدق انها لسة صاحيه بعد التقطيع ده كله
وكنت انا اول واحد شفت محمود ابني اول ما شدوه من بطن امه ...... شعور غريب ولا يوصف خاصة انه وصل بالسلامة بعد ما قعدنا ننتظره 6سنين تقريبا
14 يناير 2002 الساعة 7 ونص مساءا كانت الدنيا برد تلج

[TaoTao]

أول يوم في الحضانة (ماكانش لسة اسمها KG) كانت المحصلة 2 جرحى وأسير أثناء محاولة إقناعي بالقعاد في الحضانة (أنا مش بتاع عياط :)) الحكاية: كنت في حضانة قبلها اسمها "محلة الرواد" في القللي، وبعدين انقطعت فترة ودخلت حضانة جنب البيت، قالولي الحضانة دي حلوة وجميلة وعمرو ابن خالك هايكون هناك، رحت لقيت الحضانة ضيقة ومن غير جنينة .... وكمان مافيش عمرو !! مابدهاش، فتحت الجاعورة وافلفص واجري وارفس اللي يقربلي، لغاية ما جت دادة عطيات، كتفتني التكتيفة التمام (دادة عطيات كانت معانا مرة في رحلة لحديقة الأسماك ودخلنا المغارة وهي كانت شايلة فوق راسها كرتونة المهم كلنا عدينا من المغارة ماعدا دادة عطيات اتحشرت في السقف، أنا باقول كدة عشان اديكم فكرة عن أبعادها :))، وبابا كان رجع الحضانة وإداني الزغرة التمام وقعدت.

أول يوم في إعدادي هندزة: ماشي ولا فاهم أي حاجة أعمل ايه يا جدعان؟؟ روح جيب الجدول، رحت اجيب الجدول ألاقيه حاجة كدة هندزة بصحيح، ولا فاهم أي حاجة !!!
يانهار لطيف، لما الواحد مش فاهم جدول المحاضرات هافهم المحاضرات ازاي ؟!! أخدت بعضي ودخلت أي مدرج (كانت محاضرت فيزياء)، وبعديه رحت أي سكشن (طلع سكشن فيزياء برضه لمعيدة اسمها م/عزة) كتبت كدة ع السبورة "م/عزة" أنا بقى قعدت اسأل يعني ايه "م/"؟ يعني مدام مثلا؟ فين وفييييييين لحد اما استنتجت إن "م/" دي يعني باشمهندسة :D !

أول يوم عمل حكيت عنه قبل كدة عن الويندوز الناقص والنسخة البايظة، الحكاية إن أول مهمة كانت تحميل جهاز بالويندوز XP لأحد المديرين، وانا استهيفت الموضوع بس قمت بيه على أحسن وجه، بس جت شكوى إني نزلت نسخة ناقصة وكلام كدة وسمعتي بقت زفت "المهندس الجديد مش عارف ينزل ويندوز"، وفي الآخر أروح للمدير المبجل اقوله ايه اللي مضايق حضرتك يقوم يقوللي "الFree Cell" فين؟!

[دموع الثلج]

يا علا بصى دائما فى كل موضوع ليك باحس انك مهتمه اوى بالذكريات و بتحبى تفتكرى الاطلال وكنت بفتكرك والله عندى 40 سنه ودائما بتتكلمى عن الذكريات وخصوصا موضوع مواليد السبعينات


بالنسبه لموضوع اول مره انا فاكره جدا اول مره فى حياتى اجيب فى امتحان صفر

تخيلى بئه تطلع النتيجه وتلاقى نفسك جايبه صفر بحاله يعنى كمان مش صفرين لا صفر واحد حاجه تكسف بس عادى
انا اول مره اجيب درجه سيئه فى حياتى جبتها فى اول جامعه الدكتور كان بيحبنى جدا راح هبدنى صفر فى ماده الشريعه الاسلاميه مع انى والله حليت الامتحان ......
بس كانت اخر مره مجبتش اصفار تانى بعدها