ادي ابني الجنسيه المصريه ولا لا؟؟

[araberphilosoph]

يا جماعه كيف الاحوال
انا عايز رايكم
تفتكرو ا ادي لابني الجنسيه المصريه ولا لا!!!؟؟
بعيد عن شعارات الحماس ومصر هي امي والكلام ده بالعقل والمنطق هيكسب ايه لو اخد الجنسيه المصريه وهيخسر ايه لو مخدهاش!!!!
اي اجنبي في مصر له حقوق اكتر من المصري وكمان فرصه في العمل والاستثمار اعلي!!
واحسن له عشان مفيش لا شرطه ترخم عليه ولا جيش يصطاده
يعني يبقي معاه الجنسيه الالمانيه بس!!!
رايكم ايه؟ وبكرر بعيد عن كلام الحماس والشعور الوطني
اه ليه ولا ليه؟ مستني ردودكم

[Hossam_Hassan]

طب سؤال، هو مش هياخد جنسية والدته تلقائيا و لا لازم يتنازل عن الجنسية المصرية علشان ياخد الألمانية، لو الوضع زى امريكا، يبقى تسيب الأمور تمشى بطبيعتها، يعنى يبقى مزدوج الجنسية، مصرى المانى أو المانى مصرى زى ما تحب تكتبها.

[araberphilosoph]

هو عادي هياخد الجنسيتين وعند سن 18 بيختار بس برده ايه الفايده من اتلجنسيه المصريه ولا اقصد حضرتك يعني اهو اوبشن موجود ولا ايه؟؟

[د-احمد عبد اللطيف]

شوف يا أخي انا عندي 3 اولاد مولودين وحاصلين على الجنسيه الامريكيه

وبدون تصريحات عنتريه و لا ايدولوجيات ما لهاش لازمه
كلهم معاهم شهادات ميلاد مصريه

اقل حاجه يعرفوا يدخلوا الجامعات المصريه ببلاش

[أبومعاذ]

يا أخي هو مش ابنك ضناك ده؟ تعمل فيه كدا ليه
رأيي يفضل بالجنسية الألمانية لأن الجنسية المصرية دي ملهاش اي لازمة

[محمد عز]

انا اللى اعرفه ان مصر من البلاد اللى بتسمح لمواطنيها بحمل جنسيه اخرى غير الجنسيه المصريه
وعلى ما اعتقد علشان يبقى معاك الجنسيه الالمانيه لازم تتخلى عن اى جنسية تانيه (بس مش متاكد من الكلام ده

طبعا من الافضل انه يبقى معاه جنسيه تانيه بجانب الجنسية المصريه
علشان يقدر يسافر براحته ولا فيزا ولا وجع قلب
ومحدش يقدر يكلمه
ولا شرطة ترخم عليه ، وتبقى حقوقه متحافظ عليها سواء بر مصر او جو مصر
وما يمنعش انه يكون معاه الجنسيه المصرى
يمكن والله اعلم يستفاد منها فى المستفبل ، مع انى استطيع ان ابصم بالعشره انه لن يستفيد منه فى شىء، لكن زيادة الخير خيرين
اعمله الجنسية المصرى بجانب الالمانى

[3mr Farrag]

انا اللي اعرفه علشان ياخد الجنسيه الالمانيه لازم يسيب المصريه....
بلا مصريه بلا قرف....توكل علي الله مش شايف ميزه في المصري
حتا في مصر نفسها.....ولا علشان يعمل بطاقه تموين!!!!!!
اما بخصوص التعليم في الجامعات المصريه....فيبقي حرام عليك والله انك تخليه يدخل جامعه هنا في مصر
هناك الجامعات في المانيا احسن 100 مره و في نفس الوقت مش غاليه
انا والله بحاول اسافر دلوقتي المانيا ادخل كليه هناك....

[aliabutaleb]

لو فقد الجنسية المصرية بأسهل ما يمكن ترجع له تاني
إنما هل لو فقد الألمانية سهل ترجع له؟
ده مش تفضيل جنسية على التانية
بس حضرتك الوحيد اللي ممكن تحدد وتختار
صعب حد يساعدك في اتخاذ قرار زي ده

عن نفسي لو مكانك قد أميل للاحتفاظ بالألمانية ولكن في نفس الوقت هايكون من الصعب عليا جداً إني أتخلى عن المصرية
متصور اني ساعتها هاكون زي اللي بينسلخ من جلده

ربنا يكون في عونك ويلهمك الاختيار الصح

[wawoo]

رايكم ايه؟ وبكرر بعيد عن كلام الحماس والشعور الوطني

هوة كلام الحماس و الشعور الوطنى , ملوش اى قيمة عندك و لا اية , هوة لازم ياخد الجنسية عشان حستفيد او حيخسر , يعنى الموضوع مادى بحت بالنسبة ليك , لو انت بتفكر كدة بالنسبة لابنك انصحك تصرف نظر عن الجنسبة المصرية لابنك .
اصل الموضع مش مجرد مكسب و خسارة , الموضع اكبر من كدة بكتير .
فى حاجة اسمها انتماء , يعنى ابنك ينتمى لوطن معين , انا لو الموضوع بالنسبة ليك اللى حيستفيد اكتر , يبقى القضية محسومة بغض النظر عن اى مكسب او خسارة .

[حاتم سليم]

تفتكرو ا ادي لابني الجنسيه المصريه ولا لا!!!؟؟

أكبر ميزة للجنسية المصرية

ان ابنك يستطيع الترشح لرئاسة الجمهورية

فاذا كنت تخطط لابنك ان يترشح للرئاسة يوماً

فالجنسية المصرية ضرورية.

اما اذا لم يكن هناك تخطيط لهذا

فالألمانية تكفى...

[Nile_Storm]

بعيدا عن الحماس
مادام ميننفعش الجنسيتين مع بعض
يبقي
اذا حضرتك مش حابب ان ابنك ينتمي لمصر خلاص براحتك
يبقي الموضوع محسوم في دماغك و مش محتاج راينا ولا ايه ؟
انت بس محتاج حد يشجعك و يقولك ايوه
خلاص ياعم الناس قالتلك اهه
بس في يوم من الايام افكر انه ابنك ده ممكن بشكل ما يقتل اخوك ولا اختك المصريين لو حصل في مصر زي العراق وحلف الناتو يشرف هنا لاقدر الله لما يبقي الماني

معلش انا اسف ممكن يكون اسلوبي جارح لكنه يمثل الراي الاخر " الي انت سخرت منه في كلامك " بتاع مصر هي امي

و اخيرا مصر فيها 80 مليون مش هتحتاج واحد كمان يعني :)

[tutankhamoun]

أوعى تتنازل عن الجنسية المصرية لإبنك .......... أوعى
الجنسية الألمانية حلوة و لها مميزات
و لكن الجنسية المصرية مهمة جدا
أولا لازم ابنك يطلع عنده إنتماء لبلده حتى لو كانت جمهورية المهلبية
و لازم يعرف أنه مصري ( بالورق كمان )
و خلى بالك لو سافرت خارج مصر لازم تخليه يتربى في مصر علشان البلاوي اللي الواحد بيشوفها من التربية الغربية و خصوصا إنه بيكون صعب التحكم في الأولاد و هم في سن المراهقة
و برضه حضرتك لن يكون لك عليه سلطة ............ و أيضا سيكون محمي حماية كاملة من الحكومة الألمانية
و برضه أنت لا تضمن بقاء علاقتك مع زوجتك ( ربنا يباركلك و يبارك في زوجتك و يبارك في ابنك )
و لكن أنا بتكلم عن الإحتمالات ............. و ربنا ما يجيب شر
لازم الولد يكون له الجنسية المصرية ..........
و ده رأيي الشخصي ......................................... يجب أن يكون له إنتماء لمصر ......... لازم ...... لازم ........ لازم ........ لازم

و شكرا

[Nile_Storm]

أوعى تتنازل عن الجنسية المصرية لإبنك .......... أوعى
الجنسية الألمانية حلوة و لها مميزات
و لكن الجنسية المصرية مهمة جدا
أولا لازم ابنك يطلع عنده إنتماء لبلده حتى لو كانت جمهورية المهلبية
و لازم يعرف أنه مصري ( بالورق كمان )
و خلى بالك لو سافرت خارج مصر لازم تخليه يتربى في مصر علشان البلاوي اللي الواحد بيشوفها من التربية الغربية و خصوصا إنه بيكون صعب التحكم في الأولاد و هم في سن المراهقة
و برضه حضرتك لن يكون لك عليه سلطة ............ و أيضا سيكون محمي حماية كاملة من الحكومة الألمانية
و برضه أنت لا تضمن بقاء علاقتك مع زوجتك ( ربنا يباركلك و يبارك في زوجتك و يبارك في ابنك )
و لكن أنا بتكلم عن الإحتمالات ............. و ربنا ما يجيب شر
لازم الولد يكون له الجنسية المصرية ..........
و ده رأيي الشخصي ......................................... يجب أن يكون له إنتماء لمصر ......... لازم ...... لازم ........ لازم ........ لازم

و شكرا

بجد احييك ياتوت
تصدق اني فكرت انك هتكون اول واحد تقوله ايوه
لانك بتعز بلدنا اوي :D:D
بس بجد احييك بشده

[PRO-DRIVE]

الانتماء للاسلام اكـبــر من الانتماء لــمـصر

[tutankhamoun]

الانتماء للاسلام اكـبــر من الانتماء لــمـصر

الإنتماء للإسلام يا برو باشا ناتج عن الإنتماء لمجتمع مُعين و طبعا لازم يكون مجتمع إسلامي علشان تكون التربية صح
و أنا عارف إن بلدنا في انحدار أخلاقي و لكن مهما يكون في الأخر بتلاقي الناس بتقول عيب و حرام
عكس خارج مصر ......... لا فيه عيب .......... و لا فيه حرام

يعني برضه علشان تنتمي للإسلام كويس لازم تنتمي لمجتمع إسلامي الأول و إلا شربت و تشبعت بقيم المجتمع الغربي الذي تعيش فيه

و أنا بتكلم عن تجربة لشباب مُسلم في بلاد الغرب و هم من وُلدوا هنُاك
أي أنهم مواظنون مُسلمون غربيون الولادة و لكن إسلامهم إسماًً فقط

عرفت أنا بقول لازم يأخذ الجنسية المصرية ليه
يعني الموضوع مش علشان مصر بالذات و لكن علشان خاطر الولد لما يكبر

بجد احييك ياتوت
تصدق اني فكرت انك هتكون اول واحد تقوله ايوه
لانك بتعز بلدنا اوي :D:D
بس بجد احييك بشده

يا حبيب قلبي دي مصر في عيني ......
أنا على فكرة بحب مصر جدا
و لكني ......................................... لا أطيق سلوك المصريين السئ الغير مُنظم
و هذا كل ما في الموضوع
و شكرا على كلامك اللطيف يا عسل