أنزل مصر ..... ولا أستمر في الغربة ؟؟ ... أشيروا علي.

[otefa]

طيب الواحد ينزل أجازة ولا يخليه وكفى المؤمنون شر القتال ههههههه

[human]

طيب الواحد ينزل أجازة ولا يخليه وكفى المؤمنون شر القتال ههههههه

احنا نجيك لغاية عندك

[3mr Farrag]

خليك في الامارات
ايه اللي عجبك في مصر...الزحمه ولا الشغل ولا قرف الناس
احمد ربنا انك سبت المخروبه ديه

[otefa]

احنا نجيك لغاية عندك

تنور ياطارق تيجي تصيف في 50درجة سونا هههه
يعني ما أنزلش ولا أيه

[misoalex]

ياراجل حرام عليك خليك هناك احسن ولو تعرف تاخد اهلك معاك خدهم

البلد دى خلاص كان فيه امل انها تبقى كويسه لكن للاسف خلاص امل اغتصبوها

[Abdallah]

انت مش اى حد غيرك اللى يقدر يقرر الموضوع دة لأنك انت ادرى واحد بأمكانياتك المادية ومسؤلياتك الاجتماعية والأسرية ولكنى لو كنت مكانك مكنتش هفكر ارجع دلوقتى لأن لسة حال البلد مستقرش وصعب انك تلاقى شغل كويس حاليا

[Ghosts]

أوعى ترجع
البلد بااااااااااظت
وأدامها كتييييييييييير أوى عشان ينصلح حالها ....
حد يبقى فى الأمارات و يفكر يرجع مصر و فى الظروف المهببة دى ؟
دة معظم المصريين دلوقتى نفسهم يطفشوا

[MASERATI]

نصيحة أخوية من واحد رجع وندم ما ترجعش لسه شوية على البلد دي
ارجع لو معاك اللي يسكنك ف ارحاب او التجمع وعندك حاجه تجيبلك دخل ثابت 10 الاف جنيه في الشهر وعندك عربيتك ووظيفه محترمه
غير كده ما ترجعش

السلام عليكم و رحمة الله و بركاته

الكلام ده سليم جدا .

لو أنت تعبان فى الامارات قيراط, فأنت لما ترجع مصر هتتعب هنا 96 قيراط -يعنى 4 فدان- و أنصحك أنك ماترجعش دلوقتى و أنا أتمنى أن الأحوال فى البلد تتظبط فى خلال السنتين التلاتة الجايين, بحيث أنك لما ترجع, تلاقى وضع ممتاز زى اللى أنت كنت عايش فيه هناك فى الامارات.

لأن الأحوال فى مصر لسه ماتظبطتش .

[SaberMan]

مفيش حاجه تتقال بعد التقال .. اصبر حضرتك حتى تستقر الأمور ..


ملحوظه : كلنا مصر وحشانا حتى العايشين فيها نفسهم يشفوها حره مستقره تعيش فى عدل و أمان .

[yousef1978]

يا جماعة والله أنا عايز اشكر كل واحد فيكم بالإسم
يا سلام لو مصر كلها نايل موتورز وكلها ناس جدعان وطيبة ومؤدبة ومثقفة زي أعضاء المنتدى ده
كانت مصر بقت المدينة الفاضلة فعلا

ويا ريت كنا نستغل المنتدى الجميل ده في إننا نعمل مجموعات لمشاريع قومية أو قوية

جزاكم الله كلكم كل خير

الصراحة اللي ما جربش الغربة يقول عدس

عارفين مصر رغم كل بلاوييها لكن فيها روح عن أي بلد تانية
تحس إن الأكل له نفس

والمعاناه ليها نفس

كل شئ له طعم وملمس خاص ما تلاقيهوش في أي بلد تاني

الواحد ساعات بيشتاق للأفراح وللمآتم وللكل شئ في البلد

بيشتاق لرمضان والفوانيس والأشكال اللي معمولة بورق كتب المدارس ولبتاع الكنافة البلدي وللمساجد البسيطة اللي الناس فيها أجمل ما فيها

ما تفهمونيش غلط لو قلتلكم إن الواحد بيشتاق للمستشفيات وزيارة المريض والجلسة الصافية حوله

انا على فكره دايما باحسب أموري بالورقة والقلم وبالإيجابيات والسلبيات زي ما أخي العزيز ( Honda4ever ) بأشوف ايه اللي أنا محتاجه

المفروض في رأيي إن الواحد يحط سقف لإحتياجاته من كل حاجة وخصوصا الماديات ويحرص إن سقف متطلباته ما يرتفعش كل شوية وإلا هيضيع عمره في جمع المال قبل ما يقدر يتنعم بيها
وكمان يحط هدف للغربة وكمان سقف ليها

سيدنا علي كرم الله وجهه له مقولة جميله ( اطلب الخير من بطون شبعت ثم جاعت فإن الخير فيها باق ولا تطلب الخير من بطون جاعت ثم شبعت فإن الشح فيها باق ) يمكن أنا الحمد لله مش بخيل لا على نفسي ولا على غيري
لكن الظاهر إن الأنظمة من كثرة ممارستها لتفقير المصريين أصبح الواحد مننا ( الخوف فيه باق )
حتى لو أصبح غني لكن الخوف من المستقبل يتملكه وبواقي الخوف من الماضي يعتصره
وهي دي مشكلتنا على ما اعتقد

سيدنا رسول الله صلى الله عليه وسلم بيقول ( من بات آمنا في سربه معافا في بدنه يملك قوت يومه فد حيزت له الدنيا بحذافيرها ) صدق رسول الله
والأمم المتحدة رفعت نفس الكلمات دي شعارا لها
والدول الأوروبية عملت مثلث - وخصوصا فرنسا - وسمته مثلث التنمية
الأمن - السكن - الصحة والغذاء
واعتبروا إن الإنسان المواطن لازم تتوفرله الحاجات دي كأساسيات للحياة علشان ينتطلق في حياته من غير خوف
ويشتغل الشغنه اللي يحبها ويتعلم التخصص اللي يهواه علشان يبدع فيه مش يختار الكلية اللي هيتعين بيها

وأنا أعترفلكم بكل صراحة إن الخوف جوايا لم أستطيع أن أهزمه نهائيا وإن استطعت أن أكسره والحمد لله

وزي ما كان بيقول صلاح جاهين في رباعياته

سهيير ليالي وياما لفيت وطفت
وف ليلة راجع في الظلام قمت شفت
الخوف كأنه كلب سد الطريق
وكنت ناوي أقتله بس خفت

وأعتقد إن حرية الإنسان في استغنائه وليست في رخائه

وأنا الحمد لله حاولت إني أوفر لعيالي ما يخليهم ما يخافوش من المستقبل قوي - طبعا أهم شئ الإيمان بالله وبأن المستقبل بإيده وحده لكن فيه صفات الواحد مش بيقدر يتخلى عنها بسهولة وخصوصا لما تكون مترسبه جواه من الصغر - والحمد لله وفرتلهم ما يكفيهم إن كل واحد فيهم يشق الطريق اللي يحبه ونفسي إن إبني يطلع حاجة زي الدكتور محمد عمارة أو زي الشيخ حسن البنا وانا أعيش ما تبقى من حياتي علشان أوفرله عيشه كريمه وهو يخليه في مجاله - لكن طبعا كل واحد حر في إختياراته


الشئ التاني اللي مخوفني بكل صراحة هو الوضع الأمني
انا عانيت من أمن الدولة والكثير من أهلي
وأنا حاسس إن البلطجية دلوقتي بيقوموا بدور أمن الدولة في تركيع الناس من جديد
والواحد في الغربة مش بيبقى عايش الحدث لكن بيبقى سامع عنه بس
خطف وإغتصاب وسرقة وقتل وتقطيع جثث وحرق بيوت وإنتقام وووو

مش عارف ليه مش بيجيبوا حاجة مفرحة خالص في القنوات بتاعتنا - ربنا يهديهم


الصراحة أنا نفسي أنزل وأرجع أعيش زي زمان وأفرح بكيس البرتقال لما أشتريه وبجنيه العيش لما احصل عليه - مش لازم يكون بمعاناه لكن يكون له طعم

وكمان عندي أفكار حاسس إنها ممكن تكون مؤثرة وتفيد مجتمعنا اللي بأحلم إنه يبقى أحسن من مجتمعات الغرب والخليج كمان

أنا بأستخير ربنا كتير

لكن صدقوني يا جماعة القرار في الوقت ده مش سهل

الواحد كل ما ينزل بعد سنة واتنين غربة بيلاقي الناس نسيته والصغير كبر والكبير اتجوز وخلف وكل ما أسأل عن واحد ألاقيه مات واللي هاجر واللي راح السعودية

بأحس إن فعلا ( هذي بلادي لم تعد كبلادي )

الغربة مش سفرية اسبوع وترجع تلاقي أمك وأبوك وأخواتك زي ما سبتهم
دا انت بترجع لتلاقيهم لا ما تلاقيهمش

اعذروني على الإطالة

وبأكرر شكري للجميع

وبردو منتظر آرائكم




تحياتي

[Ralliart]

بص انا كنت عايش في الكويت طول عمري وانا صغير متعود على مستوى معين وعايشين عيشة سوبر
فجأه ابويا جاله نفس الفكرة اللي عند حضرتك وقرر يستقيل وينزل
طبعاً هو ممكن يرضى بأي حاجة لان ده قراره وهو كان فاكر انه مستريح على كدة ومرتبه هنا 1\20 من مرتبه هناك بس معلش يعني عيالك دول مش كلاب وليهم متطلبات ومستواهم اتعودو عليه هتظلمهم لو نزلتهم فيه وطبعاً في الاول بتبقى نازل معاك قرشين وعايش حياتك وعمال تصرف وبعد كدة خلاص بح مفيش فلوس والمرتب بيتصرف من نص الشهر وهتتمنى ترجع زي ما الحج هنا مبقاش طايق البلد دي وطبعاً فرق كبير بين اللي كنت فيه واللي بقيت فيه والمدرسة الانترناشونال بقت مدرسة حكومة مليانة عيال سبرسجية والتعليم النضيف بقى دروس وضرب وتعليم بالكوم وطبعاً حضرتك اتعلمت كدة ومش شايف فيها مشكلة لكن هل ده الأفضل؟؟
طبعاً ممكن تعيشهم في نفس المستوى بشرط ان يكون عندك مصدر دخل ثابت هنا يعوض شوية من اللي راح ودا اللي انقذنا وطبعاً في الوقت الحالي مفيش فرصة لحاجة من دي يبقى مش من الحكمة انك تغامر بمستقبلك ومستقبل ولادك
انما تعيشهم في الشارع الزبالة والترعة اللي مش عارف ايه وتجبرهم على كدة علشان حنين للماضي يبقى للاسف حضرتك ضيعت سنين الغربة ومستقبل عيلتك

لو تقدر تعيش في حتة محترمة ونضيفة ويكون عندك مصدر دخل محترم وتعلم اولادك تعليم محترم يبقى تعالى غير كدة يبقى هتندم أشد الندم
عايز اقول لحضرتك رغم اني كنت متفوق في الكويت وصلت لاعلى درجات الانحطاط العلمي من ساعة ما جيت البلد دي وعرفت طريق الدروس والحفظ ولم المادة قبلها بيومين ولغيت تفكيري نهائياً وفي نفس الوقت زمايلي اللي كانو معايا زمان كلهم دخلو جامعات في كندا وبقو حاجة تانية خالص

[ahmedbatoos]

وجة نظر شخصية . .

لا انصحك بلنزول سواء كان هذا قبل الثورة او بعد الثورة وعلي الاقل 5 سنين قدام

الا اذا : : :


1-تضمن وظيفة مهندس هنا راتبها معقول ميعشكش ملك بس يخليك تعرف تاكل نفسك اكل كويس واطفالك يتعلموا ومتحتاجش لحد


2-يكون معاك رأس مال لعمل شئ خاص . . وطبعا دية محتاجة دراسة علي الاقل سنة قبل ما تنويها عشان تحضر الفلوس وتظبط الظروف الي تكون فيها اخدت بكل الاسباب وصفاء نيتك ان ربنا يوفقك باذن الله . . مثلا بعد الثورة حاجات كتير سوقها وقع وخسرت وحاجات عليييييييييت زي الاكل بكل انواعة . . الطلب ذاد فجأة وبكمية كبيرة وعلي المواد الاولية . . فا في وسط الثورة بقت ناس حالها واقف وناس ربنا فتحلها باب رزق واسع

الاستيراد للمواد الغذائية الاولية الي مصر مبتنتجهاش الخ الخ الخ . . في مجالات كتير لما تستثمر فيها هنا حتي لو بتجارة متوسطة او تبتدي بشئ متوسط هتفيد بلدك وربنا يوفقك في عيشتك


غير كدة منصحكش بلنزول للاسباب الاتية


1-انت مفتوحلك باب رزق جيد . . متجيش تقفلة بايدك ونازل علي احتمالات او لسة هتدور وتشوف !!

2-الامارات محتجاك d: عن مصر يعني انا قرأت ان الغرب بيحاول يقلب الامارات من سنين زي سنغافورا . . سنغافورا كانت بلد مسلمة . . حتي ستينيات القرن الماضي الاحتلال الانجليزي قعد يتوغل فيها وينقل الصينين غير المسلمين ليها ليصبح المسلمين اصحاب البلد قلة ثم تم عمل تحديد مصير تابع للامم المتحدة !!! واختارت سنغافورة الانفصال عن اندونيسيا علي ما اتذكر قريت من مدة وقريت ان الغرب محتل الامارات خصوصا دبي الي اهلها بقوا فية قلة القلة وهناك عمليات تنصير و و و الخ الخ فا وجودك كا عربي مسلم . . اظن ايضا مفيد لو احسنت استغلالة


3-بنسبة للعيشة حضرتك بتقول مملة ورتابة في الحياة وكدة دة بيكون مش حقيقي في الاغلب

انا ليا صديقين هحكي لحضرتك عليهم في السعودية

واحد ملهوش اي اصدقاء في السعودية سوي عدد قليل من المصرين دة بقة كارة السعودية واليوم الاسود الي سافر فية ( ( هو مهندس ورجع مصر سنتين وندم وسافر تاني ) وحتي الان ما زال نفس الشئ


التاني لية اصدقاء كثر سعودين وغير سعودين عايش زي مصر بيتفسح بيخرج مع صحابة بيطلع البر كتير . . بيحب الاكل البلدي السعودي بيروح الاستراحات كل اسبوع
دة اول سنة سافر كان زي حضرتك بيقول اية دة انا بتعذب في السعودية ومليت و و و والحياة ومش الحياة

دلوقتي بقالة 4 سنين جة بعد الثورة مباشرة اجازة . . بقا بنتحايل علية يطول الاجازة وهو لااااااااااا القعدة هناك احسن وارتاح هناك d: رغم ان وظيفتة مش كبيرة هو رئيس قسم المخبوزات والحلوليات بمول اسمة بندا . .

ولما بيجي مصر صحابة البنجلاديشين والسعودين والفلبينين والمغاربة كل شوية اتصلات فا بقة قاعد هناك كئنة قاعد في مصر . . لحد ما اتعود علي هناك اكتر من هنا

فا انصحك بمحاولة التعرف علي مصرين هناك . . التعرف علي امراتين . . محاولة الاندماج مع الثقفات المحلية . . الخ الخ

ودة طبعا لاي حد مغترب سواء في الخليج او غيرة . . .

[Nistelrooy]

الناس هناك بتشتريك وانتا عايز ترجع .. الناس هنا بتذل بعضها ؟..

خليك في الامارات ولو عايز تنزل انزل اجازات .. فقط ..

مش شايف سبب واحد انك ترجع مصر الصراحة ..

[AboELsoud]

حضرتك في اختيار سهل جداا
حضرتك ممكن تأخذ اجازه صغيره يعني اسبوع او شهر بالكتير
و تشوف احوال البلد في الفتره اللي هتنزلها دي
استريحت : كان بها هاتنزل و انت مقتنع
مش استريحت : تقدر ترجع و متدندمش على حاجه و تكمل هناك فتره و تيجي على خير بعد فتره تكون الدنيا استقرت شويه

[ahmedfoud]

بصراحه الشباب مخلوش حاجه الواحد يقولها و انا كمان بمر بنفس ظروفك تقريبا بس القرار الي خدته بالظبط زي ما انت قولت
طول ما في باب رزق محترم مفتوح سيبه يتقفل لوحده بلاش تقفله انت بأيدك و خاصتا لو مفيش بديل قوي في ظل الظروف الجميله الي بتعيشها البلد حاااااااليا
ربنا يهون غربتنا كلنا و يرجعنا لبلدنا و اهلنا سالمين غانمين يا رب