استفسار بخصوص افريكانو بارك

[MOUSTAFA_SAAD]

السلام عليكم

الموضوع عن افريكانو بارك اللى بعد بوابة اسكندريه وانت متجه للقاهره بعد قرية الاسد تقريبا مش عارف انا كاتب اسمها صح ولا لا

المهم تقريبا تذكرة الدخول 250 للعربيه بالافراد اللى فيها زائد مصاريف العربيه حوالى 100 جنيه بنزين وكارتات يبقى 350 جنيه غير الاكل والشرب هناك ومش عارف الاسعار ايه بالظبط هناك
عاوز اعرف فيه حد راح المكان ده قريب لان كان فيه موضوع هنا فى المنتدى عنه بس من فتره وكنت سمعت انه مفيش حيوانات كتير فيه زى الاول وانه اصبح ممل وطبعا المشوار مرهق خصوصا فى الحر ده ومكلف ايضا فمش عارف يستاهل المشوار ولا لا
واسعار الاكل والشرب هناك ايه
ممكن اخد اكل معايا ولا ممنوع
انا بصراحه مش متحمس ليها فى الجو الحر ده وكان نفسى اروحها فى شهر 3 او 4 او شهر 9 او 10 الاوقات اللى الجو فيها حلو
بس اختى نفسها تروح وعماله تزن عليا ومعنديش استعداد بعد المشوار ده والمصاريف الاقى نفسى بتفرج على شوية حمير وخلاص
يعنى حتبقى مليانه اسود ونمور وفيله وغزلان وباقى الحيوانات ولافضيت خلاص
والمكان فيه اماكن ضل ولا الشمس ضاربه فيه من كل ناحيه وحاتشوى هناك

اصل انا بتعب جدا فى الجو ده وفى نفس الوقت عاوز اوديهم يتفسحوا

[adel1414]

كان ليها موضوع هنا يادرش ححاول الاقيهولك

[MOUSTAFA_SAAD]

مانا عارف ياباشا
بس الموضوع قديم وسمعت انها بقت مش كويسه زى الاول والحيوانات اللى فيها قلت جامد
مش عارف الكلام ده صح ولا لا

[MOUSTAFA_SAAD]

مفيش جديد ياجماعه

[Salamonti]

أنا كنت هناك قبل الثورة

ماتحاولش تروح في الحر ده لأنك فعلا هاتتشوي غير ان الجو هناك صحراوي صحراوي !!

التذكرة فعلا بقت 250 جنيه للعربية الملاكي (يكشي تكونوا راكبين فيها 10 أنفار فوق بعض)
مكتوب في الموضوع بتاعها هنا ان التذكرة 200 جنيه لكن غليت مؤخراً لأن الموضوع قديم شوية..

بالنسبة للمتعة فانتوا فعلا هاتنبسطوا أوي بإذن الله المكان ممتع فوق الوصف

أما عن الحيوانات فماتتوقعش تشوف الفيل والزرافة والكلام اللي انت قلته ده ههههههه
لو عاوز تشوف الحجات دي يبقا عليك وعلى جنينة الحيوانات
أما الحيوانات اللي في أفريكانوا بارك كلها من الأنواع اللي صعب استئناسها وهاتشوف حيوانات غريبة ومبهرة وفي نفس الوقت مستأنسة وسايبه وهاتنزل تتصور جنبها وتأكلها وتقف معاها عادي جدا

هاتشوف الأسد والضبع و3 أنواع من فصائل القرود وبغبغانات وغزلان وكنجر وحجات تانية كتير..

فيه مطاعم هناك بس معرفش أسعارها إيه وللعلم انك مش هاتوصل عند منطقة المطاعم غير في نهاية الرحلة خالص وانت عند بوابة الخروج

خد معاك أكلك وشربك عادي جدا وخد كل اللي نفسك فيه يكشي تاخد معاك حلل محشي محدش هايقول لك حاجة ولا ممنوع ولا حد هايعترض وأصلا محدش بيقوللك وريني معاك ايه ولا افتح شنطة العربية

بس عشان تبقا عارف برضه ممنوع تطلع أكل قدام الحيوانات بأي شكل م الأشكال..
حتى لما تيجي تأكلها هما هناك بيدولك أكل مخصوص ليهم حسب نوع الحيوان..
وبرضه مش هاتاكلوا غير لما توصلوا آخر مرحلة قبل بوابات الخروج مباشرة.

الرحلة جوة البارك هاتستغرق في حدود ساعتين
فانت ساعتين رايح وساعتين جوة البارك عقبال ما توصل للمرحلة الأخيرة بيبقا يدوب هو ده التوقيت المناسب للأكل وتبقوا يدوب ابتديتوا تجوعوا وتقعدوا تاكلوا عشان تكملوا ساعتين تاني في رحلة العودة..

أظرف حاجة عجبتني جوة البارك انك مش هاتصرف جنيه واحد إجباري لا إكراميات ولا بقشيش ولا حجات من دي..
العمال تقريبا بيقبضوا مرتبات كويسة أو الإدارة مشددة عليهم بهذا الخصوص
وفعلا محدش بيطلب حاجة خالص وحتى لو انت عرضت تديهم بقشيش أو خلافه بيرفضوا بشدة واذا أخد حاجة بياخدها على استحياء شديد جدا..

عند كل حيوان هاتقابله بتلاقي المدرب بتاعه واقف معاه وبياخد منك الكاميرا بتاعتك يفضل يصورك بيها مع الحيوان في لقطات مختلفة وهاتلاقيه مهتم بيك بشكل ظريف وبيديلك أكل عشان تأكل الحيوان ولو عاوز تعرف أي معلومات عن الحيوان ده بتسأله وهو يقول لك كل حاجة..
الكلام ده كله مجانا..

في آخر مرحلة خالص هاتوصل مكان مفتوح تقدروا تقعدوا تاكلوا فيه براحتكم (فيه أماكن قعدة مجانية مش هاتقعدوا عالأرض)
وفيه مطعم لو حبيتوا تدخلوه وفيه كافتريا برضه فيها قعدة ظريفة بس طبعا لازم تطلبوا حجات (ماعرفش الأسعار إيه)
الأهم من ده ان فيه رحلة مجانية بتركبوا فيها مركب بيلف بيكم لفة حلوة حوالين مجموعة جزر صناعية كده فيها حيوانات وهاتعجبكوا أوي أوي أوي..

مواعيد العمل من 9 الصبح لـ 3 العصر
بعد اربعة مابيدخلوش عربيات عشان اللي دخل 3 يدوب يخرج على 5 قبل ما الدنيا تليل


الخلاصة.. ان شاء الله تنبسطوا ولو مجبر تروح الأيام دي تابع نشرات الأرصاد الجوية وتابع درجات الحرارة والرطوبة بتاعة اسكندرية مش القاهرة واختار يوم ماتكونش فيه الحرارة مرتفعة أوي
وياحبذا لو تروح بدري عشان تخلص بدري قبل ما الشمس تشد عليكم وتلسعكم

بالإضافة بقا انك تعمل حسابك في حاجة تانية ان 100 جنيه بنزين مش هاتكفيك..
زود 50 جنيه تاني هاتحرق بيها صفيحة بنزين جوة البارك لأنك هاتفضل ساعتين ماشي بالعربية دايرة والتكييف شغال.. عشان مش هاتستحمل الحر والكتمة في ركوب العربية جوة بدون تكييف خصوصا انك بتبقا ماشي في طرق ترابية ومعفرة وهاتتخنق م التراب

واي استفسار تاني أنا تحت أمرك

[MOUSTAFA_SAAD]

الف شكر ياباشا تقرير وافى وشافى

[ashraf122]

[QUOTE=Salamonti;3873578411]أنا كنت هناك قبل الثورة


طيب ممكن اسال حضرتك لو حبيت اروح يوم الجمعة على الساعة 10 ممكن الواحد يخلص لف جوة على الصلاة
ولا الساعة 10 يوم الجمعة حتكون الحيوانات نايمة

و هل مكانها واضح ام لا يعنى انا لو جاى من اسكندرية حلاقيها على الكيلو كام ، او اية العلامة المميزة فى الطريق

[MOUSTAFA_SAAD]

هى مكانها واضح طبعا بس مش عارف عند الكيلو كام بالظبط
حتلاقى يفط كبيره وكتيره متعلقه عندها لان مساحتها كبيره

[Salamonti]

لو طالع من اسكندرية هاتمشي أقل من 30 كيلومتر
بعد ما تمشي 20 كيلو ابتدي امسك يمينك وهدي السرعة شوية
ماتدورش على يافطة لأنها صغيرة ومش ملفتة على الإطلاق ورؤيتها صعبة جدا !!
انت هاتدور على تماثيل حيوانات هاتبقا على الجانب الأيمن من الطريق (هاحطلك صورة ليها)
أول تمثال حمار وحشي وبعده تمثال فيل وبعدهم شلال صناعي كده جنبه على طول باب الدخول
التماثيل دي كبيرة أوي وواضحة جدا وملفتة لأنها بأضعاف أضعاف الحجم الطبيعي وأقل تمثال فيهم ارتفاعه 3 متر !!
حتى فيه تمثال زرافة متهيألي ممكن تشوفه من وانت في اسكندرية قبل ما تطلع هههههههههه

أسيبك بقا مع شوية صور..

[MOUSTAFA_SAAD]

الف شكر ياباشا على الصور الجميله دية
انت شجعتنى اروحها فعلا
بس القرود دية تلاقيها بهدلت العربيه
قرد الرباح ده مفترس اصلا ويعتبر اكل لحوم انت مخوفتش منه يعضك
ده الاسد ارحم منه لانه نايم طول النهار

[ashraf122]

متشكر جدا على الصور جميلة جدا

بس يوم الجمعة الساعة 10 دة ميعاد مناسب ولا الحيوانات حتكون نايمة

[party_0000]

خلي بالك انا رحت هناك وعربيتي اتجرحت من الشجر اللي طالع في الممرات ورجعت متكن قوي
وخلي بالك من موضوع طلوع القرود على العربيه ه علشان بردوا طلعوا على العربيه وكان فيها شويه خرابيش
اي نعم كل الخرابيش دي راحت بالتلميع لانها مش جامه بس بتبان في الشمس
وهي رحله لطيفه وبالتوفيق

[Salamonti]

متشكر جدا على الصور جميلة جدا

بس يوم الجمعة الساعة 10 دة ميعاد مناسب ولا الحيوانات حتكون نايمة

حضرتك اتصل بيهم اسألهم على مواعيد يوم الجمعة لأن ربما تكون مواعيده مختلفة عشان الصلاة وكده

[Salamonti]

الف شكر ياباشا على الصور الجميله دية
انت شجعتنى اروحها فعلا
بس القرود دية تلاقيها بهدلت العربيه
قرد الرباح ده مفترس اصلا ويعتبر اكل لحوم انت مخوفتش منه يعضك
ده الاسد ارحم منه لانه نايم طول النهار

غالبا هاتلاقي الأسود مفرهطة م الحر وقاعدة في حتة ضل مش راضية تتحرك من مكانها
وخلال رحلتك هاتقابل اربع أو خمس أنواع مختلفة من فصائل القرود
كلهم بلا استثناء عفاريت ولاد عفاريت
فيه قرد خد نضارة من على تابلوه العربية ولبسها ومشي بيها جابهالي الحارس بعد ما قعد يسايس القرد نص ساعة
ونصيحة لو عندك أي حاجة على جسم العربية من برة قابلة للفك والتركيب أو سهلة الكسر يبقا فكها انت بنفسك قبل ما تروح بدل ما يفكوهالك هما هناك بمعرفتهم ههههههههه

ولاد المجنونة مابيسيبوش حاجة في حالها
اللي يقفل ويفتح في المرايا
واللي بيلعب في الإيريال
واللي يرفع وينزل في المساحة لحد ما يطلعها في إيده
العربية بالنسبالهم لعبة جديدة بيحاولوا يفرحوا بيها على قد ما يقدروا قبل ما تمشي منهم
حتى انا لما مشيت من عند القرود فيه واحد منهم فضل قاعد عالكبوت مارضيش ينزل وقعد يلعب في المساحات وانا ماشي بيه أكتر من 5 دقايق وهو ولا همه حاجة
قلت اشغل المساحات وارش مية يمكن يخاف لقيت إعجابه بيزيد بالعربية
فضلت ماشي لحد ما نزل لوحده

[heshamzaky]

شكلها حلو فعلا بجد