مشاهد لا تُنسى

[OlaOsman]

كل واحد فينا أكيد عدى عليه مشهد من مشاهد الحياة المختلفة.. يمكن حصلت من سنين.. انما صعب تتنسي بسهولة.. يمكن مشهد انت طرف فيه او لأ.. دورك كان مش اكتر من مشاهد عادي.. او حد معدي.. انما المنظر ده أثر فيك و بتفتكره من وقت للتاني.. ممكن برضه يكون مشهد ضحكك اوي أو أسعدك و كل ما تفتكره تبتسم :)

لما كنت في أولى ثانوي في بيتنا القديم كنا ساكنين في أول دور.. باستعد عشان أنزل المدرسة الساعة 7 الصبح لقينا حد بيضرب جرس الباب.. ماما قالت لي افتحي يا علا ده أكيد الزبال..بافتح الباب ما لقتش حد.. لسه هاقفل سمعت صوت طفل بيبكي.. بابص قدام شوية لقيت طفل عمره مش اكتر من يومين.. ملفوف في لفته و محطوط على الأرض جنب باسكت الزبالة.. مش قادرة أنسى منظره لحد دلوقتي :(

ندهت ماما بسرعة.. ماما أخدته و دخلت و احنا اتلفينا حواليها و كلنا مذهولين.. ماما لقيته يا روحي جسمه أزرق من البرد فدفته و حاولت تأكله مش فاكرة ازاي.. انما احترنا نعمل ايه و سألنا الناس قالوا لنا سلموه لقسم البوليس.. و فعلا سلمناه و اتصلوا همه بدار رعاية أيتام جم خدوه و لما سألت ماما سموه ايه؟ قالت لي هايسموه حسام :(

[محمد ابراهيم 1]

أنا بقى منساش عمرى مشهد حريقه فى بيت ملاصق لبيتنا القديم والنار ماسكه البيت كله بس الحمد لله مفيش إصابات
ومنساش عمرى مشهد أنبوبه بوتاجاز كادت تنفجر فى بيتنا لولا ربنا ستر
ومنساش عمرى أول جثه آدميه شفتها
ومنساش عمرى يوم لما عربيتى ال 128 لفت حولين نفسها عده مرات واتجهت بقوه لمجرى مائى ووقفت على حرفه و هى تتأرجح ونزلت منها قبل ما تقع فى الميه العميقه (بس موقعتش الحمد لله ) فى مشهد يشبه الأفلام الأجنبى
ومنساش عمرى طفله رضيعه مسكينه رمتها أمها فى مدخل بيت السكرتير بتاعى وجابها وجالى الساعه 2 صباحا ورحنا وديناها لدار رعايه الأيتام وكان الوقت داخل على الفجر

[thegoodhacker]

فيه يوم مش قادر انساه لغاية دلوقتي من اكتر من خمس سنين كان برضه في يوم شم النسيم زي النهارده وانا كنت راجع من مرسي مطروح بالاتوبيس انا و اهلي و كان الطريق مزدحم جدا خصوصا عند الصحراوي خصوصا عند منطقة اسمها (مرغم ) ما لا يقل عن سبع او تمن حوادث سيارات مناظر تقطع القلب من ضمنهم حوالي 4 عربيات وقعوا في مياه الملاحة في اماكن مختلفة وكان من ضمنهم عربية بيجو استيشن كان ماشي بغباء وعمال يغرز بين العربيات ومش عاجبه الزحمة بعد ما عدا الاتوبيس بتاعنا ونسيناه خلاص بعدها بخمس دقايق بالضبط لقيناه واقع في الملاحة وكان معاه ركاب كمان........ ده غير العربيات اللي لابسة في بعضيها ...... وفي نفس اليوم برضه عيل رمي طوبة علي الاتوبيس جت في مراية السواق و زجاج المراية اتكسر و اترمي بقوة جنب رجلي علي بعد لا يزيد عن 30 سنتيمتر ...... يوم ما يتنسيش الصراحة

[solycar]

هى الناس مالها بترمى عيلها كدة لية
لا حول ولا قوة الا بالله

[aif]

هى الناس مالها بترمى عيلها كدة لية
لا حول ولا قوة الا بالله

نظرية المنفعة الحدية يا عزيزي

[OlaOsman]

نظرية المنفعة الحدية يا عزيزي

يعني ايه؟

[aif]

يعني ايه؟

يعني ببساطة الحاجة لما بتزيد ... قيمتها بتقل
ولما بتقل قيمتها بتزيد
لو المياة قلت في العالم ح تبقي اغلي من الدهب ....
لو كان الناس دول جربو انهم يتحرمو من الانجاب كام سنة .... كانوعرفو قيمة ضنا ...


النظرية دي اقتصادية بحته
لكن عيشنا وشوفناها بتتطبق علي البشر

[Noha.M]

منساش ياعلا و انا بذاكر انا و اخويا للامتحلن الساعة 6 الصبح و فاضل ساعتين على امتحانا .. الاقى جارتنا عندها 75 سنة بترزع علينا الباب و مامتى ناية و انا و خاويا بنذاكر طبعا اتفزعنااااا و جرينا عالباب لقناها مفزووووعة و بتقووول الحقووووونىىىىى الحقووونىىىىى فتحى ( جوزها ) واقع فى الحمااام .. جوزها اصلا راجل مريض عنده 80 سنة ... المهم جرينا على شقتهاا و هى يا عيني مكانتش عارفة تشيله ... المهم رحنا انا و اخويا و مامتى و حاولنا نشيله و هو رايح خااااااااااالص عن الوعى و شلناااه انا و اخوييا و حطيناااه فى السريييير ... و هي اغم عليهاا و مامتى عمالة تعيط .. قمنا كلمنا الاسعاف و لما جم قالولنا الراجل مات من ساعتين اصلا ... بجد اتفزعت .... و كانت اول مرة اشوف حد مات و انا فكراه اغم عليه بس ...

طبعا بعدها لا ذاكرت ولا راجعت و جالى حالة ذهول مع خوف من الموت مع رعب من الموقف ... مع نظرة احتقار للدنيا و انها متستاهلش و امتحان ايه و قرف ايه و مذاكرة ايه ... طبعا شلت المادة ..

[aif]

امتحان ايه و قرف ايه و مذاكرة ايه ... طبعا شلت المادة ..

مادة اية يا نهى دانتي شيلتي الجثة

[Karim_Monir]

مادة اية يا نهى دانتي شيلتي الجثة

:D:D:D:D:D:D:D:D
:p:p:p:p:p:p:p:p:p:p
اصلها كانت فاكرة نفسها في طب ودخلة مادة التشريح
معلش يا علا بس القافية حكمت

[Noha.M]

مادة اية يا نهى دانتي شيلتي الجثة

اه و الله العظيم يا ابراهيم تخيل !!!!!!!!!!!!!!!

انا قلبى كان فى رجلية من الموقف دة و لحد دلوقتلى لما بفتكره بترعب بمعني بترعب بجد !

:D:D:D:D:D:D:D:D
:p:p:p:p:p:p:p:p:p:p
اصلها كانت فاكرة نفسها في طب ودخلة مادة التشريح
معلش يا علا بس القافية حكمت

انت بتتريق يا منييييير ؟؟ :D

ماشي يا باشاااا :p براحتك لولا بس انى عارفة انك عامل دماغ رنجة مكونتش سيبتك فى حاااالك :p

[محمد المشد]

والله يا اخى احمد ( متنساش العزومة ) موقفك وموقف والدة الاخت الفاضلة علا يدل على احساس طيب ومشاعر نبيلة وجزاكم الله كل خير لرعايتكم لهؤلاء الاطفال مجهولى النسب ! اما الاخت نهى فأعتقد ان موقف عائلتها كان تصديق وصية الرسول بمساعدة الجار واسعافة عند الحاجة ، وتذكرك يا نهى موقف الموت مع انه صعب إلا ان به رحمه بأن جعلك الله من الذاكرين له ولكل انسان موقف يجعلة دائم التعلق بفعل الخير ليوم لاينفع فيه مالاً ولا بنون
ونشكر لكم ذكرياتكم الطيبة 000

[OlaOsman]

طيب طالما ضحكنا بأه في موقف تحفة كل ما افتكره أقعد أضحك. من كام سنة كان فيه كسوف كلي للشمس و قالوا لنا اوعوا تبصوا في الشمس مباشرة، انما ممكن تتفرجوا على الكسوف من ورا فيلم ديسك كمبيوتر، يعني تبوظوا دسك و تطلعوا المادة الفيلمية اللي فيه و تبصوا للشمس من خلالها.. احنا في الشغل قررنا نجرب و بوظنا كام دسك انا و زمايلي و نزلنا الشارع و معانا زميلتنا الإسكتلندية نازلة هي كمان تجرب.. كلنا مسكنا أفلام الديسكات و في نصها كده في الدايرة المعدن دي اللي نصها فاضي و حواليها الفيلم.. طبعا كلنا حاطين المادة الفيلمية قدام عينينا و بنبص ع الشمس و منبهرين بأه و واااااااو و حاجات من دي.. أبص على زميلتي دي ألاقيها باصة لنا باستغرب.. انتوا بتقولوا واو على ايه و منبهرين بإيه اوي كده؟ قلت لها بشكل الشمس.. هو انتي مش بتبصي ليه؟ قالت لي بابص و مش شايفة اي حاجة غير طبيعية يعني.. قلت لها بتبصي ازاي طيب؟ و هي ورتني بتبص ازاي و انا فطست على نفسي من الضحك.. كانت بتبص من الخرم اللي جوه الدايرة المعدن اللي في نص الفيلم.. طبعا انا أول ما قلت لها المفروض تبص ازاي و فهمت هي كانت بتعمل ايه لقيناها قعدت على الرصيف من الضحك.. الناس في الشارع سابت الشمس و الكسوف و قعدوا يتفرجوا علينا.. انما مش قادرة أنسى منظرها و هي بتبص جوه الدايرة يعني ع الشمس مباشرة و تبص لنا و تستغرب و تبص للبتاع اللي في إيدها و بتقول في نفسها ايه المجانين دول؟ منبهرين اوي كده بإيه؟ :D

[hazem_khidr]

يوم كنت بذاكر عند واحد صاحبي ليله امتحان و احنا في تانيه كليه و كانت ليله 27 رمضان
المهم خرجت من عنده متاخر و الجو كان برد اوي
فبقول في سري يا ربي ما الاقيش حد من صحابي يوصلني البيت بدل ما اقف استني تاكسي
و فجأه ببص ورايا لقيت عربيه بولونيز جنبي و فيها احمد عتمان اعز اصدقائي و وقف :)
لقيته بيقولي انت ابن حلال انا كنت لسه جايلك البيت حالا
قولتله ليه ؟
قالي كنت بذاكر مع ناس و لقيتهم بيقولو ان الامتحان بتاعكم اتسرب و اخدته منهم و الامتحان اهو.
طبعا ما بقتش مصدق نفسي قولت سبحان الله يعني اتمنيت حد يوصلني الاقيه و كمان الامتحان في ايدي:).
المهم روحت انا و هو اتسحرنا و صلينا لفجر و روحنا
و طبعا مش حاطط امل في الامتحان قولت ممكن تكون اشتغاله و لا حاجه بس حليته برضه و نمت.
و هوووب روحت اللجنه الصبح الاقي الاسئله بالنص
حليته في ساعه و نص و خرجت علي طول :p.
.................................................. .....
موقف تاني:
قبل ما اسافر دبي كنت بشتغل في شركه ادويه و سيبتها و سافرت
المهم كنت رايح لواحد صاحبي معايا في الشركه عند بيت والده اخده و نتفسح
المهم كلمته و قولتله انا حستناك علي القهوه اللي تحت بيتك(قهوه مصري بجد مافيهاش كلمه)
المهم يدوب لسه داخل و لقيت اللي بيبص عليا
ف افتكرته علي طول
كان واحد معايا في الشركه و كان مراجع و سابها و سافر برضه و هو ما يعرفش اني هناك و الصدفه اللي جمعتنا .
سبحان الله
رب صدفه خير من الف ميعاد.