دعوه للمصارحه عن الثوره الغير مكتمله

[dr.amr]

بقالي كام يوم كده بفكر مع نفسي

هل احنا فعلا قمنا يثوره ؟؟

هل ثورتنا اكتملت ؟؟

هل احنا بنتغير ؟؟

هل اللي بيحكمنا دلوقتي نظام جديد ؟؟

ايه رأيك انت ؟

للاسف لم اجد اي اجابه الا

لا

للاسف ثوره غير مكتمله وللاسف مضحوك علينا وبنتقرطس

حسني الله ينتقم منه عامل نظام فاسد محكم

هشرح وجهة نظري من الاول الي الان

بدأنا الثوره يوم 25 واستمرينا وحسني فين وفين عقبال ماطلع واتعطف علينا بكلمتين

غيرنا الوزاره وطلع الناس تقولك الاستقرار والامن والامان والبلد هتضيع والكلام الحمضان

بتاع الناس اللي خايفه علي حياتها وثرواتها ومش مهم الناس اللي بتموت من الفقر كل يوم

اكاد اجزم انهم بتوع الاستقرار دلوقتي برضو

فين وفين لما حسني اتعطف علينا وطلع سليمان يقولنا قرر التخلي عن منصبه

وتكليف المجلس الاعلي يعني هو تخلي عن منصبه ومبقاش رئيس

ومعرفش ازاي كلف المجلس وهو مش رئيس سبحانك يا رب

استبشرنا خير والمجلس طلعلنا كام بيان حسينا اننا هنبقي امريكا اخر شهر 5 مثلا

وللاسف انضحك علينا ان الجيش حمي الثوره وانا معترض علي الكلمه ده

لأن الجيش لم يحمي الثوره الجيش مازال يحمي النظام لأنه جزء من النظام

يوم عن يوم وشهر عن شهر البلد تعود الي سابق عهدها من الببطء والتراخي والفساد

والناس تقولك الجيش خط احمر ومش عارف ليه في خلط بين الجيش اللي هو اخويا واخوك

والمجلس العسكري اللي كل اللي فيه معروف تاريخهم

فجاه الناس نسيت ان المجلس من النظام القديم واصبح المشير وعنان رمز الوطنيه والشرف

زي مايكونوا كانوا بيبيعوا سبح وبيعظوا مبارك ان يرجع عن فساده

وسبحان الله وجدنا المجلس فعلا جزء من النظام القديم ونفس طريقة التصرف

ونفس طريقة الثعالب والطرمخه علي الفساد والتستر

فين المحاكمات

فين حسني وفين محاكمته فين صفوت وعزمي وسرور

مش فالحين غير في احكام ب 30 سنه علي غالي ورشيد اللي مش موجودين

واخيرا نظيف اخد سنه هههههههههه ولكن مع ايقاف التنفيذ

مفيش غير العادلي اللي لبس وواضح انهم خايفين منه انه يتكلم واظن مش ناسيين

محاولة اغتياله في التجمع الخامس

مفيش اي تحرك الا بالظغط والزق والتحرك بيبقي زي السلحفاه

لأ واللي زاد وغطي ان شفيق هيرشح نفسه واحتمال يكسب

وعاجبني قوي حملة تلميع سليمان الراجل البركه في الاهرام

فين المحاكمات يا مشير

فين معاشات اسر الشهداء

فين تطهير الداخليه من الفساد

فين تعديل الاجور فين الناس اللي بتاخد مئات الالوف وناس بتاكل زباله

فين وفين وفين ....................

فينك يا شرف يا بتاع المنصه يا بتاع التابعي فين تغيير

فين الحريه

فين العداله الاجتماعيه

حد يفهمني يمكن انا مش فاهم

وللعلم المجلس العسكري لن يترك الحكم قريبا وان تركه فسيكون لشخص من النظام السابق

والشعب لن يرضي

وابشركم انها ان لم تنتهي بتزوير الانتخابات

ستنتهي بانقلاب عسكري علي المجلس وهيبقي فيها دم كتير قوي

الواحد حاسس انه في دوامه لا نهايه لها

الله يلعنك يا حسني بدعي عليك من اللي عملته فينا وفي البلد

وياريت محدش يقولي استقرار لأننا مكناش عايشين زي الناس ولسه مش عايشين

ومحدش يقولي امان لأنها كانت بلطجه مش امان

ياتري شايفها هتنتهي ازاي ؟؟

نفس الكلام بيتكرر تاني تغيير الوزاره

ويقولك استقرار

والجيش خط بمبي

بس المره دي غيروا بدل مصطفي محمود خلوها روكسي

وعاجبني اللواء اللي بيطلع يهزأ المذيعين ع الهواء

تمثيليه حلوه بجد

[wesam_salom]

اللهم اغزيك يا شوشو

[misoalex]

اؤيدك فى كل كلمه انت قولتها بجد

نفس التفكير

والمشكله اننا مش عارفين احنا رايحين فين

والله اعلم حترسى على ايه

والناس بتوع الاستقرار بيعشموك بالطير اللى على الشجره ويقوك الامل فى مجلس ورئيس منتخب

اه ولو طلع المجلس والرئيس مش منتخب ولا حاجه ايه العمل

ولو الناس عملت ثوره وقالت لا واحنا ميضحكش علينا

الرد بتا بتوع الاستقرار جاهز حيقولك انت كده مش عجباك الديمقراطه وب مش عارف ايه على رأى الشعب ورأى الاغلبيه

وعليه العوض فيكى يا بلد

وشكلها هى حتبقى كده فعلا
مجلس ملعوب فيه ورئيس مش منتخب (او منتخب بنسبه 78% واخد بالك )

مهو محدش يقنعنى ان صاحبك حيغير فكره وحيسلم رقبته هو واللى معاه لحد مدنى

[misoalex]

اللهم اغزيك يا شوشو

شوشو اتجوزت

خلى شوشو على جنب بقى وقول رأيك ايه بجد

[Qmax]

والله إنت قولت كل إللي جوايا يا دكتور عمرو
نفسي ربنا يكملها من عنده هو قادر على كل شيئ ويهدي بتوع الإستقرار وشفيق وموسى بتوع نسيبه يكمل الستة شهور

[misoalex]

والله إنت قولت كل إللي جوايا يا دكتور عمرو
نفسي ربنا يكملها من عنده هو قادر على كل شيئ ويهدي بتوع الإستقرار وشفيق وموسى بتوع نسيبه يكمل الستة شهور

وهما نفسهم بتوع عمرو سليمان
ده غير بتوع كام شخصيه تانيه ظهرو جديد مكانوش يقدرو يفتحو بقهم ايام المخلوع دلوقتى عاوين ياكلو التورته وبيتكلمو دلوقتى بأسم الاستقرار وبنحبك يا مجلس ياللى حميت الثوره وحتأكلنا من التورته

وعاوزينا نسكت ونقف نتفرج بأسم الاستقرار ونبنى مصر وكلام الشعارات اللى وراه اهداف تانيه

[Everlasting]

متفق مع حضرتك تماماً.
النظام لم يسقط بعد.

[tarekzein]

النظام الفاسد نبته تم غرسها فى رحم مصر منذ أكثر من ثلاثون عاما

تم رعايتها بمنتهى العنايه

جذورها ضاربه فى عمق التربه

فروعها عانقت عنان السماء

ليس من السهل أبدا التخلص منها

أو التصور بالقضاء علي أى أثر لها بهذه السرعه

[yahyanaabil]

كلام زى الفل الواحد اتنفخ من الخط الأحمر ده كوم والانيل بقى ام عجله الانتاج اللى نفخونا بيها محسسنى ان احنا كنا بنصدر صواريخ لالمانيا وعندنا مستعمره على سطح القمر
لما بعد 6 شهور او سنه نلاقى البلد حكمها نظام انيل من مبارك متبقوش تزعلو على عجله الانتاج لأنها حتتحول لعجله السرقه
(مايعملوها تيوبلس وريحوا نفسهم)

[M7amD_7amDy]

والنعمة انت بتقول كلام زى الفل وصح الصح

معلللم يادكتور :)