نداء الى الثوار و مؤيديهم على المنتدى : ماذا تريدون من حزب الكنبة , خارج المنتدى ؟

[A.Saad]

ارحمنا يا احمد باشا بقى

على فكره يا جماعة احمد من اطيب واجدع الناس اللي ممكن تقابلهم واللي حضر مقابلات المنتدى عارفه بس هو اللي على المنتدى بيبقى واحد تاني

بيبقى شرير ههههههههههه
لو مضايقين منى
عادى اعمل استفتاء وممكن مشاركش فى اى موضوع
سواء ده او غيره
بس ليه الكل مش طايقنى هنا ؟؟؟؟
على العموم هاسيب الموضوع تحتفلوا فيه
اشوفكم فى موضوع تانى

[kh_talaat]

بيبقى شرير
لو مضايقين منى
عادى اعمل استفتاء وممكن مشاركش فى اى موضوع
سواء ده او غيره

بس ليه الكل مش طايقنى هنا

لا ابوحميد بالعكس ... دة احنا بنعمل المواضيع مخصوص عشانك

[A.Saad]

لا ابوحميد بالعكس ... دة احنا بنعمل المواضيع مخصوص عشانك

منا قلت لك خلاص مش هاشارك

[CryptonX]

نفسي نجيب كنب اريح شوية .. علشان الكنب بقى مش مريح .. فبقوا يقوموا و ليهم صوت علشان مش مرتاحين من قعدة الكنبة .. !

وعلشان اكون صادق تماما .. انا اوقات صغيرة ببقى في الحزب ده ... اوقات اكبر ببقى في الثورة ... و اوقات قليلة جدا حصلت بصراحة قبل مافهم الوضع كنت ضد الثوار ...

بس الان ارى الصورة كاملة (ان دق التعبير) و ارى على الاقل "الجانب" الذي اريد ان اكون فيه.

وياريت تمييز الناس في الشارع و تصنفيهم و معرفتهم تبقى سهلة زي مواضيع المنتدى و مشاركيه .. كانت الثورة نجحت من زمان !

[تامر.محمد]

لو حضرتك اضايقت اعرف انه مش مقصود
لان بينا كل احترام مع اختلافنا الشديد فى الاراء
لكن ايه غرض الموضوع ؟؟؟؟؟؟؟
لانى شايف الموضوع مجرد سخرية من الاخرين
تقبل تحياتى

انا اللي ضايقني اني مش فاتح الموضوع للهجوم زي ما تخيلت , ولا عشان نغلط في بعض
و عشان كده تعمدت وضع عبارة (خارج المنتدى) , عشان اي كلام يبقى مش بيمس حد ولا مقصود بيه حد , ولا يتفهم انه رمي كلام على حد , و مش خوفا من الايقاف, كان ممكن ببساطة احذف عبارة خارج المنتدى و كنت هابقى في امان من الايقاف لأني ما ذكرتش شخص بعينه خالص , ده غير ان انا اصلا ما قلتش رأيي الشخصي

بالنسبة للسخرية , على رأي ماجد الكدواني , ما تيجي نشوف
هانلاحظ وجود نبرة غضب , معلش نتجاهلها مؤقتا لأن ليها وقت الكلام عنها

بدل ما حزب الكنبه قاعد يقول خربتو البلد يا ريت يقول افكاره الجباره فى تصليح البلد وتنميه عجله الانتاج وتحويلها لطياره الانتاج

ادي مشاركة ايجابية , انا عايز العب فيها شوية و اقول , يا اخواننا , ايا كانوا مين بقى , بدل ما بتقولوا للي في التحرير ارجعوا بيوتكم و نقعد كلنا في البيت بقى و خلاص و البلد تخرب بجد , حاولوا تعملوا حاجة ,

مطلوب
-ينزلوا التحرير يوم الجمعه بالليل
-يشغلوا مخهم شويه ويعرفوا امتى مطالب الثوره بتتحقق
-يسيبوهم من اعاده الكلام اللى كان بيتقال قبل خلع حسنى من عجله انتاج والبلد رايحه فى داهيه
- يتقوا الله بجد حرام اللى الواحد بيتعرض له منهم ده انا طلعت اسرائيلى فى ردود مصراوى ومطلوب ايقافى هنا

الراجل بيقول لهم تعالوا انضموا , مش مقتنعين , طيب ماشي , طب ممكن تبصوا شوية في المطالب بتتحقق امتى و تاخدوا بالكم الدنيا ماشية ازاي ؟, و المطلب التالت ده معاهدة سلام


شوف ده كمان , ده طلب من الناس دي برده بالكف عن الهجوم , مع شيء من النقد انا شخصيا معاه, الراجل عايز يقول , يا جماعة لو مش معانا ما تبقوش علينا

انا مش عايز منهم غير حاجة واحدة بس
وهي انهم يخلوهم على الكنبة ويتابعوا في صمت
بدام ارتضوا لنفسهم السلبية تجاه بلدهم في احرج فتره تاريخة للبلد يبقى اقل واسهل حاجه هو الصمممممممممممممممت
قال رسول الله (
من كان يؤمن بالله واليوم الآخر فليقل خيرا أو ليصمت )
صدق رسول الله عليه الصلاة والسلام

بصراحة رأي الراجل ده اكبر من اني اعلق عليه

انا نفسى انهم يدوا حلول قابله للتطبيق
اللى معترض على حاجه يقول ايه وجه الاعتراض بأدب وايه الطريقه الافضل
مش تسمع سواق ميكروبظ بيقول اللى فى التحريرخربوا البلد
يعنى البلد كانت فله شمعه منوره
انا مش عاوز حد يقولى اسكت عن الغلط علشان اسلوبك غلط
طب قولى ايه الصح مش مجرد انك بتتكلم لانك اضعف من انك تطلب حقك
او لمجرد انك بتسمع كلام حد بطاعه عمياء بدون ان تفهم او تناقش

و عايز كمان اذكر الثقة الزايدة في طرف (بدون اسماء المجلس العسكري) , و انعدام الثقة الكامل في طرف

برده رأي موجز جدا و في الصميم

عايز حاجة واحدة
حاجة واحدة بس
فليسلم القول ان لم يسلم العمل
تقبل تحياتى

و ادي رأي فيه شيء من النقد , البناء في رأيي الخاص, مع نوع من انواع توجيه النظر

يدعوا للثوار بالهدى وصلاح الحال ويستغفروا الله لهم ( طالما هما شايفين نفسهم مهديين)
وربنا يستجيب إن شاء الله
وكمان يباركوا للضباط ( المتهمين بقتل ودهس الثوار ) اللى اترقوا فى الحركة الأخيرة
ويسلموا لنا على الريس كتير عشان وحشنا ومفيش أخبار عنه من زمان

مش هاعلق

عايزهم يعرفوا إن فيه حياة أفضل ممكن تتحقق
بس لازم تتعب و تسيب الكنبة شوية عشان تتحقق

نفسى يحسوا بينا ......
ان الخير لما حييجى بسبب الثورة دى ....... حيبقى للكل
مش يفرحوا للأنجازات اللى بتعملها الثورة ...... و بعد كده يشتموا فى الثوار !!!!!

انتقاد برده بناء , و طلب , يحسوا بينا, و طالما فرحوا للي بيحصل , يبقوا عارفين بييجي ازاي, و يشوفوا الصورة كلها مش حتة اه و حتة لأ




شفت بقى يا استاذ احمد ؟ ايجابية ولا لأ ؟

[A.Saad]

على فكرة مش معنى الاعتراض على تصرفات التحرير ان ده دعوة للسكوت ونقول امين
الدعوة بتكون لعدم التخريب والطلبات الغريبة زى غلق القناة والمجلس الرئاسى وغلق المجمع
لكن انا نفسى مضايق من تباطؤ المجلس وصمته فى اغلب الاحيان
لكن مش هعبر عن ضقى او وجود مطلب بانى انزل التحرير اقفل المجمع او اهدد بقفل المترو
مع انى شخصيا
معايا سيارتى
وشغلى خارج القاهرة اصلا
ومش بعدى على وسط البلد
يعنى حاجة زى قفل المترو مش هتفرق معايا خالص ولا مع اسرتى كمان
لكن النظر بيكون للمجتمع ككل

[تامر.محمد]

على فكرة مش معنى الاعتراض على تصرفات التحرير ان ده دعوة للسكوت ونقول امين
الدعوة بتكون لعدم التخريب والطلبات الغريبة زى غلق القناة والمجلس الرئاسى وغلق المجمع
لكن انا نفسى مضايق من تباطؤ المجلس وصمته فى اغلب الاحيان
لكن مش هعبر عن ضقى او وجود مطلب بانى انزل التحرير اقفل المجمع او اهدد بقفل المترو
مع انى شخصيا
معايا سيارتى
وشغلى خارج القاهرة اصلا
ومش بعدى على وسط البلد
يعنى حاجة زى قفل المترو مش هتفرق معايا خالص ولا مع اسرتى كمان
لكن النظر بيكون للمجتمع ككل

طب ليه يا استاذ احمد مش بتنتقد و تهاجم غير الثوار بس و في المقابل بتدافع عن قرارات الحكومة و المجلس كلها ؟

[A.Saad]

طب ليه يا استاذ احمد مش بتنتقد و تهاجم غير الثوار بس و في المقابل بتدافع عن قرارات الحكومة و المجلس كلها ؟

لان فيه حاجات مش بتكون قرار للمجلس
بطء المحاكمات مثلا مش قرار من المجلس
واستقلال القضاء مهم
لان لو اليوم اتدخلنا فيه لصالح البلد
لو جه واحد فاسد هيدخل فيه لصالحه
ولان انا ضد العنف فى الراى
لو التحرير هيميل للعنف
بكرة واحد فى باب الشعرية
بعده فى الجيزة
وبعده بين حركات التحرير
ومش هتخلص من العنف

الشهداء ومحاكمة القتلة
انت عارف رايى فيه
نحاكم اللى قتل متظاهر بجد
مش بلطجى وقف يخرب واتقتل يبقى شهيد

المجلس الرئاسى
مرفوض وانت متفق معايا فيه

الحد الادنى للاجور
اوضحته قبل كدة

ضرب الشرطة كل شويه واقتحام الداخلية
ده ضرره للكل ، لكن انا مع محاسبة المخطيء فيهم

مهاجمة الثورة
لان البعض استغلها للانتقام وتصفيه حسابات قديمة والبعض بيستغلها للوصول للحكم وبس
وغير كدة
كلنا عايشين فى الماضى
مش فيه نظرة للامام
ومن الاول
من يناير
كان راى بناء انى ابص للى بعد الجاى مش دلوقت وبس
مثال
موضوع الدستور كان فيه رايين
الغاء ولا تصليح
راى كان تصليح علشان نقدر نعمل الانتخابات عليه
المجلس عمل الغاء ليه فى انتصار للراى الاخر
الموقف الحالى
جدال فى الشارع
الدستور ولا الانتخابات
ولو اتعمل الدستور الاول
ازاى ومين وهيكتب فيه ايه
ولو الانتخابات الاول
مين هينجح ومين هيسقط

امبارح قابلت واحد
قاللى ما الانتخابات الجاية هتكون مزورة
طب ارد اقول ايه ؟؟؟؟؟؟؟؟؟

[kh_talaat]

في نقطة مهمة نفسي اتكلم فيها بعد اذن صاحب الموضوع

وهي المجلس الرئاسي

بعض الناس في الشارع ومنهم طبعا بعض الأعضاء هنا يشطاط غضبا عندما يسمع كلمة مجلس رئاسي وكأن الذين يطالبون بالمجلس الرئاسي يطالبون بالتدخل الأجنبي مثلا او خضوعنا لحكم اسرائيل .... !!!!!

الموضوع ببساطه يا جماعة ان الطبيعي في اي ثورة ان الذين قاموا بالثورة هم الأقدر على ادارة شئون البلاد كفترة انتقالية قبل الأنتخابات

والمجلس العسكري كلنا نعرف انه كان له دور في انهاء حكم مبارك لكنه ليس الأقدر مهنيا وسياسيا على ادارة البلد والـ5 شهور السابقين خير دليل

لابد من توضيح نقطة مهمة وهو ان الذين يطالبون بمجلس مدني لا يطالبون بحل المجلس العسكري او تفتيت قوة الجيش بالعكس فهم يطالبون ان يكون احد اعضاء المجلس الرئاسي من الجيش وان يتولى الجيش ادارة البلاد امنيا فقط وليس سياسيا

ولدينا مثال واضح على ذلك وهي الثورة في تونس فالجيش هناك اتخذ نفس موقف الجيش المصري وانهى حكم الرئيس بن علي واستلم شئون البلاد امنيا فقط وسلم البلد للمدنيين كفتره انتقالية

على العموم اعتقد انتهى الجدال في هذه النقطة

وبصراحه اسلم حل في الفتره الحالية ولتجنب الخلاف في الرأي هو الضغط المستمر على هذا المجلس العسكري حتى ننتزع منه كافة صلاحياته ويكون مجلس شرفي وان يتولى عصام شرف ادارة شئون البلاد خلال الشهور المتبقية على الأنتخابات

[تامر.محمد]

لان فيه حاجات مش بتكون قرار للمجلس
بطء المحاكمات مثلا مش قرار من المجلس

(مصدق الكلام ده ازاي ؟ احنا في مصر اللي ما اتغيرتش يا باشا , نجيب لك عبد السلام جمعة يقنعك ؟ )

واستقلال القضاء مهم
لان لو اليوم اتدخلنا فيه لصالح البلد
لو جه واحد فاسد هيدخل فيه لصالحه
(ده اللي حاصل اصلا)


ولان انا ضد العنف فى الراى
لو التحرير هيميل للعنف
بكرة واحد فى باب الشعرية
بعده فى الجيزة
وبعده بين حركات التحرير
ومش هتخلص من العنف
(كلنا قلنا ان اللجوء للعنف - قفل المجمع و غيره - مش عاجبنا ,بس ما ننساش نقطتين , فيه لجوء للعنف كدفاع عن النفس زي ما حصل يوم 28 , النقطة التانية ان الموضوع بقى فيه اهالي , الاول كانت ناس نازلين عشان اهداف سياسية اصلاحية , دلوقت فيه اهالي نازلين عشان التار كمان , و دي مشكلة كبيرة)

الشهداء ومحاكمة القتلة
انت عارف رايى فيه
نحاكم اللى قتل متظاهر بجد
مش بلطجى وقف يخرب واتقتل يبقى شهيد
(و مش كل من اتقتل قدام قسم هو بلطجي , زي ما مش كله شهيد , و للعلم , انا عندي كلام منقول عن ظباط شرطة انهم كانوا بيضربوا بالآلي عشوائي في يوم 28 يناير , حتى لو دفاعا عن النفس , ده قتل عمد برده)

المجلس الرئاسى
مرفوض وانت متفق معايا فيه
(تمام و انا لحد دلوقت ما شفتش الطلب ده في الميدان)

الحد الادنى للاجور
اوضحته قبل كدة
(مازال نقطة خلافية طالما مافيش خطوات و جدول لتطبيقه)

ضرب الشرطة كل شويه واقتحام الداخلية
ده ضرره للكل ، لكن انا مع محاسبة المخطيء فيهم
(الواقع ان حمايتهم هي السبب , لو الناس (الاهالي أكرر) شافوا العدالة بتتحقق كان كل واحد اتطمن)

مهاجمة الثورة
لان البعض استغلها للانتقام وتصفيه حسابات قديمة والبعض بيستغلها للوصول للحكم وبس
وغير كدة
كلنا عايشين فى الماضى
مش فيه نظرة للامام
ومن الاول
من يناير
كان راى بناء انى ابص للى بعد الجاى مش دلوقت وبس
(انا كنت حاطط ده في اعتباراتي , بس بعد الاحداث اللي حصلت ثبت ان مافيش حاجة هاتنفع طول ما النظام القديم صاحي و بقوته)


مثال
موضوع الدستور كان فيه رايين
الغاء ولا تصليح
راى كان تصليح علشان نقدر نعمل الانتخابات عليه
المجلس عمل الغاء ليه فى انتصار للراى الاخر
الموقف الحالى
جدال فى الشارع
الدستور ولا الانتخابات
ولو اتعمل الدستور الاول
ازاى ومين وهيكتب فيه ايه
ولو الانتخابات الاول
مين هينجح ومين هيسقط
(مش فارقة معايا دي خالص دلوقت, لما نبقى نطمئن لأن الحكم ديمقراطي نبقى نفكر في تفاصيل الديمقراطية)

امبارح قابلت واحد
قاللى ما الانتخابات الجاية هتكون مزورة
طب ارد اقول ايه ؟؟؟؟؟؟؟؟؟
(ده باختصار ماعندوش ثقة فيمن بيده الأمر , انا شخصيا ماعنديش برده اي ثقة فيهم , لكن في المقابل , انا مش عارف هاتتزور الانتخابات فعلا ولا لأ)

في نقطة مهمة نفسي اتكلم فيها بعد اذن صاحب الموضوع

وهي المجلس الرئاسي

بعض الناس في الشارع ومنهم طبعا بعض الأعضاء هنا يشطاط غضبا عندما يسمع كلمة مجلس رئاسي وكأن الذين يطالبون بالمجلس الرئاسي يطالبون بالتدخل الأجنبي مثلا او خضوعنا لحكم اسرائيل .... !!!!!

الموضوع ببساطه يا جماعة ان الطبيعي في اي ثورة ان الذين قاموا بالثورة هم الأقدر على ادارة شئون البلاد كفترة انتقالية قبل الأنتخابات

والمجلس العسكري كلنا نعرف انه كان له دور في انهاء حكم مبارك لكنه ليس الأقدر مهنيا وسياسيا على ادارة البلد والـ5 شهور السابقين خير دليل

لابد من توضيح نقطة مهمة وهو ان الذين يطالبون بمجلس مدني لا يطالبون بحل المجلس العسكري او تفتيت قوة الجيش بالعكس فهم يطالبون ان يكون احد اعضاء المجلس الرئاسي من الجيش وان يتولى الجيش ادارة البلاد امنيا فقط وليس سياسيا

ولدينا مثال واضح على ذلك وهي الثورة في تونس فالجيش هناك اتخذ نفس موقف الجيش المصري وانهى حكم الرئيس بن علي واستلم شئون البلاد امنيا فقط وسلم البلد للمدنيين كفتره انتقالية

على العموم اعتقد انتهى الجدال في هذه النقطة

وبصراحه اسلم حل في الفتره الحالية ولتجنب الخلاف في الرأي هو الضغط المستمر على هذا المجلس العسكري حتى ننتزع منه كافة صلاحياته ويكون مجلس شرفي وان يتولى عصام شرف ادارة شئون البلاد خلال الشهور المتبقية على الأنتخابات

رأيي ان الموضوع ده اوانه فات , سواء نافع بقى او مش نافع
و معاك جدا في اخر سطرين

[waleedraafat]

هما الناس اتقسموا لفريقين فقط من وجه نظر الثوار

ثوار ------- وحزب الكنبة
ايجابية ------ وسلبية
احرار -------- وعبيد

طيب ما ممكن يتقسموا بطريقة تانية

ناس كبار وعاقلين --------- شباب طايش
محب للاستقرار ----------- مخربين
عاملين ومنتجين --------- عواطلية وفاضيين
اغلبية --------------------- قلة

انا لا اقصد استفزاز احد ، وبعد اذن صاحب الموضوع الذي طلب اراء المؤيد فقط للثورة بكل ما تحمله من اعتصمات وخلافه

انا مع الثورة وشاركت فيها علي استحياء (مش من المرابطين فيها) ، وانا مع لوي الدراع بحرفنة لنيل المطالب (عجلة الثورة لو توقفت سقطت)

ولكني ارفض النظرة الاستعلائية لباقي الشعب المسالم المطحون الجائع الجاهل تعليما والغير مثقف علما (حقيقة نعلمها جميعا)

مش كل الناس عندها كمبيوتر ونت وقاعدة ترغي وتتكلم في مستقبل مصر زينا كده ( في ناس اخر احلامها تعيش مستورة وتموت مستورة) ، احلامهم بسيطة ومطالبهم متواضعة ومش ثورجية وناس كتير طلعت منهم في الثورة لما شافت ان فيه شباب بتموت علشانهم وعلشان الحرية

فبلاش نقسم الناس بطريقة بوش الابن ( من ليس معنا فهو ضدنا)

تقبلوا تحيايتي واحترامي للجميع وعاشت مصر لشعبها حرة

[kh_talaat]

ولكني ارفض النظرة الاستعلائية لباقي الشعب المسالم المطحون الجائع الجاهل تعليما والغير مثقف علما (حقيقة نعلمها جميعا)

لا يا فندم بالعكس مفيش نظره استعلائية بدليل ان اكتر ناس شاركت في الثورة وحميتها من الفوضى هم من ابناء الطبقى المتوسطة وفوق المتوسطة يعني اقل ناس تعبانة في البلد دي

الثورة زي ما قامت ضد الفقر والغلاء ... قامت كمان وبشكل كبير ضد العبودية واهانة المواطن المصري داخل وخارج بلده

انا مثلا اكتر حاجه كانت جرحاني في البلد وجعلتني انزل يوم 25 يناير اني اشوف ضابط شرطة بيهين اي حد ملوش ضهر لمجرد انه شخص غلبان بل ويحمي الضابط قانون الطوارئ ... على الرغم اني والحمد لله لم اتعرض يوما في حياتي من اهانه من اي ضابط شرطة