اخبار الثانوية العامة معاكم ايه

[نور القمر]

امبارح كنت بجيب نتايج الثانوية العامة من النت لمجموعة كبيرة من الاقارب والمعارف في البلد
طبعا فيهم اللي ماشاء الله نوابغ وفيهم اللي بذل جهد على اد مايقدر ونصيبه مكنش على مايرام وفيهم اللي مكبر ومنفض للثانوية وسنينها
اكتر واحد فرحني ونفسي اشوف ولادي زيه يارب ماشاء الله عليه بالمستوى الرفيع تخطى ال 100% وهو ابن خالتي وفوق كدة الولد حافظ القرآن الكريم ماشاء الله وبالتجويد طبعا واخلاق ممتازة ومواظبة على الصلاة في المسجد وملتحي
كنت بكلم خالتي ابارك لها مش عارفة تتكلم ولا تاخد نفسها الفرحة
بس الفرحة ما تكملش شاب تاني شغال طول السنتين شغل نار لكن امكانياته لحد كدة ونصيبه كدة وجاب 83 بس بالمستوى
وبنت تانية جابت 97.5 نص
وفيه اقل فأقل لحـــــــــــــــــــــــــــــــــــــد 60%
ها انتم اخبار الدنيا والثانوية معاكم ايه

[hemalotfy]

الطالب الشاطر بيفرح اهله وربنا يبارك فيهم
بنت اختي جابت 97 ناويه على صيدله

[ahmed_mido1889]

اختي تانيه ثانوي جابت 93.4%

بس سؤال يطرح نفسه المجاميع العاليه دي فعلا وممكن كانت تبقي من زمان والا دي ارقام وهميه؟؟

يعني 75% من مصر فوق ال90%

[ABDULLAH AHMED]

اخويا بالمستوى الرفيع 98%
والسنتين على بعض 94.3% الحمدلله
الف مبرووك للكل
- وما شاء الله مصر كلها جايبة مجاميع فوق ال 90% اللهم زد وبارك :)

[nonetta]

بنت اختي 95.3 علمي بالمستوى الرفيع
ربنا يفرحكوا كلكوا

[dr.amr]

افضل شيء للابن والابنه

حفظ القرأن وهو صغير

سبحانك يارب

اخلاق وتفوق غير طبيعيين

وتوفيق ربنا ملازم لهم

انا كان نفسي اكمل القران وانا صغير بس للاسف

يادوب النصف فقط

بس لما بيكون القران كامل ماشاء الله

معرفش مفعوله غير طبيعي

ربنا يبارك
والف مبروك للجميع

[icehearted girl]

نور..ارحميني بقي واصحي بدري شوية..كل يوم اقعد اتصل بيكي الصبح محدش بيرررررررررد

احم احم....هوحنا كنا بنقول ايه


اه

عندنا اتنين..بنت خالتي علمي علوم جابت 96 ونص وعاملة مناحة


والتانية طلعت التانية علجمهورية ادبي

[MASERATI]

السلام عليكم و رحمة الله و بركاته

ليا خال, كان لوا جيش عالمعاش, ابنه مادخلش بعض المواد , طبعا, أنتوا عارفين النتيجة هيكون شكلها ايه .

و خال تانى, ليه ابن لعبى أوى -لأن أبوه غنى أوى- جاب 60% تقريبا و أبوه طاير من الفرحة و عمال يشرب الناس بيبسى.

و خالتى, ليها ابن, جاب 100% بالمستوى فى سنة تالتة و ناقص فى العربى درجتين بس و أبوه -لأنه مدرس عربى ثانوى- هيعلقه من رجليه, بس الواد زوغ و راح يتفرج على ماتش الأهلى و الوداد المغربى, هوا فريق الوداد المغربى ده, حريم و لا رجالة ؟؟؟؟؟؟؟؟؟؟؟

[zago]

كانت ايام مطينه الله لا يرجعها الحمد لله عدت على خير
ربنا يخليلنا البلاي ستيشن وكاونتر ودرايفر وسبيس تون

طبعا مش لازم اقولكم انا كنت جايب كام

ههههههههههههههه

[ahmedamr]

انا اختى جابت 90 ونص ادبي

[Most_H]

الحمد لله بنت خالتى ادبى مرحلة تانية وجابت برضة 95%

[أبو إياد]

العائله كلها مخلصه هانبداء من الاول خالص اياد باشا اللى لسه بيلبس بامبرز لغايه دلوقتى

[khaled_sabry]

والدى شاف نتيجه الخويا اصغير ( ثانيه ثانوى - علمى / اسيوط ) على النت و طلع واخد 99.5% .. طبعا طار من الفرح و اتصل بيا و بلغ الاهل كلهم
تانى يوم راح يشوف النتيجه فوجئ بيها 87.8% و انه حصل خطاء فى رفع الدرجات على النت و الموظف المختص اتحول للتحقيق
طبعا مفاجئه قاسيه جدااااااا على والدى خاصه انه عنده دخول هندسه دى حياه او موت
و هو دلوقتى متنرفز منى و اتصل بمراتى و قالها ماتخليهوش يتصل بيا تانى (مش عارف انا ايه دخلى بالموضوع )

[نور القمر]

نور..ارحميني بقي واصحي بدري شوية..كل يوم اقعد اتصل بيكي الصبح محدش بيرررررررررد

احم احم....هوحنا كنا بنقول ايه


اه

عندنا اتنين..بنت خالتي علمي علوم جابت 96 ونص وعاملة مناحة


والتانية طلعت التانية علجمهورية ادبي

صح النوم يا انسة انا كنت في البلد ولسه وراجعة يوم الجمعة ده المنتدى كله عارف وحضرتك لأ
وكنت بصحى من الساعة 6ونص يا اوختشي
واتصلت بيكي وانتي كالعادة مش لاقية زرار الرد عل الموبايل
اه بالمناسبة ماسمعتش التليفون رن من يوم ما رجعت
مبرك لقرايبك ومبروك للجميع طالعينك نوابغ