دعوة لإنقاذ اللغة العربية

[tutankhamoun]

السلام عليكم و رحمة الله و بركاته

شكر جزيل لكل من شارك بالموضوع و أبدى رأيه الكريم
و تعليقا مجمل على كافة التعليقات
أنا لم أقول عدم استخدام لغات أجنبية
فاللغات الأجنبية مفيدة في تعلم علوم الآخرين
و لكن
أيه اللي جاب العلوم
لواحده بتقولك ميرسي قوي ..... و ثانك يو ..... الكينج .... نو واي ..... كيتشن ..... إلخ

أين كرامتنا و نحن نستخدم لغة غير لغتنا

-----------------------------------

أنا مرة كنت ماشي في باريس مع واحد صاحبي ( فرنسي ) المهم واحد وقفنا علشان يسأل على اتجاهات
و كان الأخ ده مش فرنسي و لا بيعرف يتكلم فرنساوي
المهم صاحبي الفرنساوي ده بص للراجل بصة !!!!! و كأنه سرق حاجة من بيتهم
فأنا أستغربت
فبقوله .... أنت ليه مجاوبتش على سؤاله ؟؟
فقالي علشان سألني بالإنجليزي .... ( مع أنه بيتكلم انجليزي كويس )
فبيقولي
المفروض يشتري كتاب فيه المصطلحات الأساسية بتاعة اللغة و يسألني و بعدين يفهمني أنه مش كويس قوي في الفرنساوي و ساعتها كنت ممكن ارد عليه بالانجليزي !!!!

كل العالم مُعتز بلغته جدا ............... إلا أحنا العرب

بتوع منظرة و بس .......... و جود باي :D :D بقى علشان أنا زهقت من الشكوى :o
شوية من السواقين المصريين
و شوية من العرب و كلامهم الملخبط
و شوية من حال الشارع

سلام .... باب الماتركس بيقفل ..... هالحق أخش ؟؟؟
دخلت الحمد لله .... أشوفكم من داخل الماتركس :D

[TaoTao]

طيب و الله البنات اللي بتقول كدا قدامي بتنقطتني موت
يعني تلاقي البنت من دي مبتعرفش تتكلم لغة أجنبية أساسا و لكن بقى المنظرة
ميرسي قوي .... بحبك فيري ماتش ( مش ماتش كورة :D )
امبوسيبول .....
نو واي .... عربيتي مش مدببة :D :D ..... حادثة الأستاذ شريف

الكيتشن .......... اليونت ...........

يا شيخة دي بقيت حاجة تقرف بجد

أكتر كلمة كانت تنقطني لما حد يقوللي "ميرسي Merci" وخصوصاً لما يقولها شاب، وقلت لما اجرب حاجة اللي يقوللي ميرسي اقوله "دو ريان De Rien" واخنف في النون الأخرانية قال يعني واد فرنساوي. اللي قدامي وشه يضرب ألوان ويقوللي "يعني ايه؟" اضحك واقول "معلش علموهالنا كدة في ثانوي" :D

المهم في الموضوع إن زمان لما يكون فيه غلطة نحوية أو إملائية في الأهرام، يبعتوا على طول للجريدة بالبريد وكنت باقرا رسايل في بريد الأهرام إن المقالة الفلانية في اليوم الفلاني كان فيها غلطة كذا وإن الصح كذا، دلوقتي المقالات -فضلاً عن الأخطاء النحوية والإملائية الفادحة- غابت عنها الحرفية في الكتابة، الواحد يقرا المقال ولا افهم منه اي حاجة !!
لما يوصل الحال كدة في صحيفة قومية، يبقى فعلاً ياللا السلامة

[mbluethunder]

أنا شايف من وجهة نظري إن الموضوع ممكن يتلخص في كلمتين

"" عقدة الخواجه ""

لو الشعب العربي عنده الثقه الكامله ومقتنع تماما بذاته وبإمكانياته.. كان حاله هايبقى مختلف تماما في الزمن ده

وللأسف الشديد .. الفئه القليله جدا اللي مقتنعه بذاتها ومؤمنه إيمان شديد بموهبتها وبإمكانيتها .. أجبرته الظروف للهجره حتى يستطيع ان يجد من يقدر موهبته وإمكانياته

التطلع للأجنبي في الزمن ده بقى شيء مؤسف للغايه

هانقول معندناش علوم بالغات العربيه .. طب ليه .. أيه السبب... ما في علماء كتير عرب .. فينهم من موضوع اللغه ديه

تفتكر لو كانت روسيا ولا اليابان كانوا قوه عظمى بدل أمريكا.. كان حال اللغه هايختلف .. وهانلاقي كل اللغات بالروسي أو بالياباني

المشكله إن في المدارس والأهالي دلوقتي .. أهم حاجه عندهم .. إن الواد ولا البنت يعرفوا يتكلموا عنجليزي وهما لسه في اللفه

وتلاقي الأهالي حريصين كل الحرص إنهم يتكلموا عنجليزي مع بعضيهم في البيت علشان الواد يطلع فرويد في اللغه

والمصيبه الكبرى .. إنك ممكن تلاقي في أي تجمع يحتوي على فئه من البشر صنفوا على إنهم من الفئات ذوي الحالات الإجتماعيه المرموقه ( ده بالعربي بدل ما أكتب هاي كلاس ياجماعه :)) .. تجدهم يتفاخرون بأولادهم اللي عارفين يجي 12 لغه حيه وكام لغه لم تخترع بعد .. على شوية تحابيش في السكه .. الواد عرفهم وهو بيلعب مع صاحبه ET :D

ده العرب غيروا العربي بالعنجليزي المتعقرب .... وبيشتكوا من إن اللغه العربيه هاتختفي ... ما هيه هاتختفي هاتختفي سواء كان قريب ولا بعيد.. وكل ده بسبب العرب نفسهم

ليه الأفندي مننا لما يسافر إلى أي دوله أجنبيه .. بيقعد يدور ويبحث في كيفية التعامل مع أهل هذه الدوله .. وتلاقي ساعات ناس بتسعى إنها تتعلم اللغه علشان يقدر يتفهام معاهم

الأجنبي اللي قاعد ومقيم وبيتعامل في شركتي وشركتك وشركات مصر كلها ... ليه الأفندي ده مايتعلمشي عربي ويتعامل مع خلق ربنا اللي موجودين معاه في الشركه باللغه الأم بتاعة البلد .. ليييييييييييه.. هو كان ناقص لسان ولا ناقص مخ علشان يتعلم.....مع إني أعرف واحد إيطالي عندنا .. بيتكلم عربي أحسن من أي حد تاني

المشكله بقى .. إن بعض الأخوه المصريين .. بيبقوا في قمة سعادتهم لما مديره يبقى أفندي أجنبى.. يااااااه ...تلاقيه فرحان قوي وطاير وبيتكلم على الموضوع ده في كل مكان يروحوه ... قال آيه علشان يتعلم اللغه صح منه .. ويتقوى في النحوي بتاعة لغة الأفندي المدير ...يا فرحتي

اللغه العربيه هي هوية الشعب العربي ...ولو إستمر الحال على ما هو عليه .. ستختفى هوية الشعب العربي تماما

واللي بيقول إن لغة القرآن الكريم هي اللي هاتحافظ على اللغه .. ممكن تقولي كام واحد من الأطفال البريئه اللي أهاليهم بيدخلوهم .. (International school) من صغرهم بيعرفوا يقرأو قرآن " صح".. أعتقد إن الموضوع ده بقى قليل قوي في الزمن ده ...

في المقام الأول والأخير... الموضوع ده بيبقى مسؤلية الأهالي فقط لا غير وده من وجهة نظري

وعلى فكره .. إنتم لازم تعذروا الأخوه اللي مابتعرفشي تكتب عربي صح أو بتكتبوا ملخبط .. علشان ببساطه شديده .. معظم الناس مابتكتبشي عربي في يومها العادي.. الناس بتتكلمه بس.. يعني لو كل واحد بيتكلم عربي 6 أيام في الأسبوع وبيكتب مره واحده بس ... هتلاقي كتابته ضايعه .. لأنه بيكتب من واقع دماغه ونطقه للكلمات.. غير إن ناس كتير بتكتب إنجليزي علطول.. ف إزاي بقى بتضايق من شخص متعلم مش عارف يكتب اللغه العربيه صح

كتابة أي لغه أصعب ملييييييون مره من التحدث بيها أو الإستماع إليها

[ahmedateya]

good post... realy it is

بس المشكلة انك فى منتدى عربيات... يعنى فيه مصطلحات كتير اوى ميكانيكية و اسماء قطع و اجزاء فى العربية لازم تتقال اما حسب الاسم الدارج و الا محدش حيفهمها او باسمها الانجليزى لان ترجمتها الحرفية مش مضبوطة

تخيل واحد راح فى محطة بنزين و قالهم عايز اغسل المشع... هو قصدة الرادياتير بس مين يعرف ان اسمة المشع؟؟

دا حتى فى كتالوج الدايو لقيتهم كاتبين على الدينامو "البدال" عشان اسمة بالانجليزى alternator و هو حتى مسموش دينامو بالانجليزى و لا بالعربى

انا برضة لقيت كلام كتير غلط مكتوب و بتدايق ان ناس متعلمة و بيكتبوا عربى غلط... خصوصا ان ربع الكلام فصحى و التلات ارباع عام على شوية عك و خلافة فا عمر ما حتلاقى موضوع مكتوب صح

انا بحاول دايما اكتب بالعامية لانها الطريقة الاسهل لايصال المعلومة و لما بتزنق فى حاجة بكتب اسمها بالانجليزى

MMamdouh

لسة قاريها في المانيوان بتاع الانوس امبارح و انا اقول ايه البدال المنيل ده؟؟
و قلت اكيد لو فيها"بدال" يبقى اكيد فيها "جادون":D
و صباح القشطة

الا بالمناسبة....هوة دينامو الانوس بيطللع كام امبير؟ 75امبير ولا اكتر ولا ايه؟؟

[sab3aawy]

انا شايف ان الكلام نصف منطقى، يعنى اللغة العربية لن يكون مصيرها هو مصير اللغة الديموطيقية (اللغة المصرية فى عصر الدولة الفرعونية الحديثة) او اللغة السنسكريتية مثلا ، فهذة اللغات انقرضت تماما ولم يبق لها سوى بعض الثار اللفظية فى لهجات احفاد المتكلمين بتلك اللغات ، هذا لن يكون مصير اللغة العربية، لكن اللغة العربية من السهل جدا-وهذا هو السيناريو الأقرب لتصورى- ان تلقى مصير اللغة اللاتينية ، بمعنى ان تتحول الى لغة أم باقية وموجودة وقابلة للتكلم بها وكتابتها وتعلمها والتعلم بها، لكنها غير مستعملة فى الشارع فى اى مكان على ظهر الكرة الأرضية، ولو تأملنا ما حدث بالأمس للاتينية نجده هو بالنص ما يحدث الآن للعربية

كانت اللغة اللاتينية فى الامس البعيد هى لغة اعظم دولة فى العالم(روما) وكانت العربية فى الأمس القريب هى لغة اغظم دولة فى العالم(الأموية والعباسية)

اللغة الاتينية هى اللغة التى حصلت على اول ترجمة للنصوص المقدسة المسيحية واليهودية من الأرامية القديمة ويقيت اللاتينية هى المصدر الأساسى لمعظم النصوص المقدسة لهذة الاديان السماوية، وكانت اللغة العربية هى الوعاء الذى حفظ القرآن والسنه وظل وسيظل المصدر الأول لكل المعلومات والدراسات والترجمات عن كل ما يخص الإسلام

كانت اللغة اللايتينية بالأمس البعيد هى اللغة التى حملت كل علم فلاسفة وعلماء الرومان وترجمة الفلسفات الإغريقية وكانت اللغة العربية بالأمس القريب هى لغة علم وفلسفة ابن سينا وابن الهيثم وابن رشد وابن فرناس وابن المقفع وغيرهم من جهابذة العصر الأموى والعباسى

اللغة اللاتينية بالأمس القريب كانت هى لغة الصفوة والعلماء والأطباء والقساوسة فى العالم الغربى ، حتى ان نيوتن كتب بها نظرياته حتى لا يطلع عليها سوى الخاصة برغم انه نشأ فى مجتمع يتحدث بلغة احدث هى الإنجليزية فى القرن الثامن عشر، وحذا حذوه كثير من العلماء، واليوم نجد الفصحى لغة الصفوة فى مجتمع الشرق الأوسط العربى والتى يحرص على ان يتوغل فى مصلحاتها من يكتب ليقرأ له الصفوة فقط وهو ما مارسه فطاحل مثل عباس العقاد فى عصرنا الحالى حتى يبعد انصاف المتعلمين عن مناقشة ما كتب

بالأمس انفصلت لهجات محلية عن اللغة اللاتينية مثل اللهجة المحلية الرومية التى صارت الإيطالية لاحقا، واللهجة الجالية التى صارت فرنسية فيما بعد واللهجة التى اختلطت بلسان العرب وصارت اسبانية واللهجة التى اختلطت بالجرمانية وصارت انجليزية ، واليوم انفصلت بشكل واضح لهجات يمكن تصنيفها تحت مجموعات اساسية عن اللغة العربية وهى بطريقها-شئنا ام ابينا-لتكون لغات مستقلة ، وهى مجموعات اللهجات الخليجية (المتأثرة بالفارسية والهندية والإنجليزية) والشامية(المتأثرة بالتركية والفرنسية) والمصرية(المتأثرة بالقبطية والتركية والإيطالية والفرنسية) والمغاربية(ومتأثرة بلغات البربر والفرنسية)

وهكذا نرى ان اللغة العربية تسير باصرار غريب فى نفس المنحنى الذى سارت فيه اللاتينية قديما دون حيود-متأخرة خمسمائة عام عنها- وهكذا وبمد الخطوط على استقامتها نجد ان اللغة العربية وفى خلال فترةر تتراوح بين القرن والقرنين ستئول الى ما آلت اليه اللاتينية، لغة أم تحمل الكثير من الكنوز، سواء المقدسة او العلمية او الفلسفية، تحمل فى طياتها اصول معظم الفاظ اللغات المحلية لاحفاد المتحدثين بها، كما انها متاحة للتعلم والنطق لكن لا يتكلم بها احد

بالمناسبة ، المسلمون عددهم حاليا اكثر من مليار انسان، المتحدثون منهم باللهجات المنحدرة من العربية لا يتعدون 150 مليون انسان-يعنى 15%- ومن يجيدون الفصحى منهم لا يتعدون 40 مليون انسان على افضل تقدير ممكن، يعنى 4% فقط من المسلمين يمكنهم التفاهم باللغة العربية الفصحى دون مشاكل ، اما يستعملون الفصحى فى حديثهم اليومى فهم نسبة لا تذكر ولن تتعدى بضعة آلاف من المتفاصحين، ، بالإضافة الى ان اكبر المجتمعات الإسلامية لا تتكلم العربية(ماليزيا واندونسيا ونيجيريا ومسلمى الهند) ، بل ان اكبر مجتمع يتحدث بلهجة منحدرة من اللغة العربية (مصر) عدد من يجيدون الفصحى فيه لا يتجاوز 20% بأى حال من الأحوال ،

فيما معناه ان العربية الفحصى -بالإضافة الى انها لم تعد لغة حديث-فانها ليس لغة الغالبية الساحقة من المسلمين وحتى الأقلية من المسلمين الذين يجيدونها، لا يتحدثونها

وهذا يؤكد مرة اخرى انها تسير فى نفس منحنى اللاتينية بإصرار يستحق الإشادة

بالمناسبة انا لست ضد الفصحى حتى لا يساء فهم كلامى، بل واجد راحة فى الكتابة بها، لكن انا فقط احاول ان انظر للأمر نظرة موضوعية بعيدة عن عاطفتى الشخصية ايا كانت

[جمال]

استاذ سبعاوى
نسيت ان ما سيحفظ اللغة العربية هو القرآن اولا
وثانيا انها تستخدم فى الكتابة واكبر دليل هو مقالك المكتوب باللغة العربية و ليس العامية( عدا بعض الكلمات القليلة )

[sab3aawy]

استاذ سبعاوى
نسيت ان ما سيحفظ اللغة العربية هو القرآن اولا
وثانيا انها تستخدم فى الكتابة واكبر دليل هو مقالك المكتوب باللغة العربية و ليس العامية( عدا بعض الكلمات القليلة )

بالنسبة لموضوع ان القرآن سيحفظ اللغة العربية فهذا هو السبب اننى قلت انها لن تندثر ولكن ستلحق باللاتينية

ثانيا انها فى المرحلة الحالية تستخدم للكتابة فقط ولكن فى مراحل سابقة كانت هى لغة التحدث والكتابة فى عاصمة دولة الخلافة الإسلامية ولكنها بالفعل كفت عن ان تكون لغة للحديث فى اى مكان فى العالم سوى فى نشرات الأخبار والخطابات الرسمية، وحتى كلغة كتابة فأنها اصبحت تعتبر اسلوب راقى جدا للكتابة يستطيع البعض فهمه ولا يستطيع الكثيرون فهمه ، ومن يستطيعون استخدامه للكتابة اقل ممن يستطيعون فهمه، وهو بالضبط ما مرت به اللاتينية منذ خمسة قرون مضت ، وان لم تحدث معجزة تغير مجرى حياه الكون فالعربية ماضية باصرار فى نفس الطريق ، وقد تعمدت الاشارة الى ان الغالبية الساحقة من المسلمين لا تعرف العربية للأشارة الى ان كون اللغة العربية باقية للأبد باعتبارها الوعاء اللغوى للقرآن الكريم لا يعنى بقاءها للأبد كلغة للتفاهم بين البشر فبقاء الإسلام لا يستلزم بالضرورة بقاء العرب كفكرة قومية ، وحتى الفكر القومى العربى الذى كان سائدا فى الستينات اندثر الآن لصالح فكرتين متنازعتين احدهما تقوم على الهوية الأيديولوجية او الهوية الوطنيه، يعنى لو سألت واحد من عامة المصريين النهاردة انت انتماءك ايه، ام هيقول لك انا مصرى او هيقول لك انا مسلم، لكن مفيش واحد هيقول انا عربى، وبالتالى من الجائز جدا تحت اى ظروف ان تندثر نهائيا فكرة الإنتماء العربى-الهشة جدا حاليا- ومعها فكرة التمسك بالحديث باللغة العربية ولا علاقة للإنتماء الإسلامى بذلك، فكما ذكرنا ان الغالبية الساحقة من مسلمى العالم اليوم لا تعرف العربية ولا يرون فى عدم معرفتها نقصانا لدينهم، وبالتالى لو انهدم الحجر الأخير فى فكرة الأنتماء العربى المتهاوية فستلحق العربية باللاتينية كوعاء فكرى لحفظ العلوم والنصوص السماوية غير مستخدم فى الحياه اليومية

من حقنا بالطبع ان تميل عواطفنا ناحية لغتنا الأم وان انتصور انها قادرة بذاتها على تحقيق المعجزات، لكن الله تعالى خلق الكون وخلق له نظامه الذى يسير به، ومن ضمن نواميس الكون التى تعلمناها من حركة التاريخ ان اللغة وعاء فكرى لا يتوقف عن التطور ، يقوى ويفرض نفسه بقوه اصحابه ويندثر باندثارهم او تبعيتهم لغيرهم ، ستبقى العربية ما بقى القرآن الكريم ، لكن بمسارها الحالى فبالفعل ستخرج من اطار التعاملات اليومية نهائيا فيما لا يزيد عن قرنين من الزمان

[elham]

انا اسفه بس انا لا اعرف الkey board العربى (لوحه المفاتيح)كل ما اجى اكتب الحرف اللى فى منتصف هدا الدال تكتب \ فاطر لكتابه اما ز او د ولا اعرف لما\ا بعض الناس اللى بتكتب كلمات انجليزى بلغه عربى مضطره لان فى لام كتيير انجليزى متداول حتى بين الاميين زى key board محدش بيقول لوحه المفاتيح او labtop محدش بيقول الكمبيوترcomputer الحاسب المحمول
كمان احنا جمعنا cd جمع مونث سالم اضافه الف و تاء فاصبحت سيديهات
صديقه ليا بتودى اولادها الحضانه كل واحد 900 جنيه فى الشهرلتعلمهم اللغات (مرتبى مرتين -اعمل بالحكومه)
خرجت معاها مره كل ما اكلم ولادها بالعربى تترجم لهم بالانجليزى (اجيد الانجليزيه اكتر من صديقتى)مع ان الاولاد بيفهموا العربى جيدا perfect -جيدا لاتستخدم فى العاميه المصريه -
مع احترامى لكل المشاركات معظم الناس تستخدم المصطلحات الانجليزيه لتوصيل افكارهم هولا الناس ايضا يستخدمون لغه المزز و حلقت له وكبروروش و طحن وكلام كتير زى كده جنب الانجليزى والفرنسى

[wisedriver]

أشعر بدوار من كثرة ماأشاهد من لا مبالاة باللغة العربية
بل اني رأيت مسؤلا بوزارة التربية والتعليم يتكلم عربية مشوهة غريبة على الأسماع
وأتذكر جيشا من مذيعات التلفاز حينما تستعرض الواحدة منهن ثقافتها العربية مشوهة المعالم فتنصب المرفوع وترفع المجرور او تنطق القاف كافا حتى في البرامج الدينية
مثلا :نحن الان في كرية الخيول العربية ....التي هي كمة في التميز
كيف نجحت ياأستاذة في اختبارات المذيعين ...أم أن من اختبروك أكثر ضعفا وتشوها منك ؟
ليتكم تعرفون جميعا أنكم مطالبون باجادتها ....واجادة قراءة القران الكريم
وعندي رأي أشعر بأن من يعبر بطلاقة عن أفكاره باللغة العربية أكثر ثقافة وتأثيرا من اي لغة أخرى
اجادتها سهلة منذ الصغر يكفي أن يشاهد الأطفال برامجهم باللغة الفصحى الراقية الصحيحة لتذهل من كم فهم لها ورأيت ذلك بعيني
ادعت سيدة من احدى جمعيات حقوق الطفل ذات مرة انه يجب تحويل كل رسوم الكارتون للغة العامية فالفصحى في رايها معقدة وصعبة (بالنسبة لها بالطبع) فهي تفضل الدبلجة بالعامية بصوت محمد هنيدي وغيره ...يا سادة الطفل ذكي وهو كالاسفنجة يتشرب كل ما تزوده به كفانا تراهات لا معنى لها

ولمن لا يفهم كلامي الصعب جدا المضمون هو
We should all do our best to keep the Arabic language alive
try hard to express your emotions & thoughts in Arabic
buy some good cartoon movies 100/100 perfect Arabic ...you'll be astonished how your children keep up with the language that they would talk to each other easily using it
Learning Arabi is a national duty ..