ما الدنيا إلا سلسلة مقالب كتير

[Ghosts]

معتقدش أن فى حد مأخدش فى حياتة كام مقلب محترم ....
ممكن الواحد ياخد مقلب فى شغلانة ....
ياخد مقلب فى أصدقاء أو أقارب أو جيران ....
ممكن أوى راجل ياخد مقلب فى مراتة أو خطيبتة أو العكس ....
ممكن تاخد مقلب فى دكتور تسمع أنة ممتاز وبعدين يطلع حمار ....
ممكن تاخد مقلب فى عربية ....
جامعة أو كلية أو مدرسة ....
مصيف , مطعم , الخ ....

المقالب كتيييييييييييييييييييييييييييير أوى و ملهاش أول من أخر ....
ياريت بقى اللى يشارك يحكى لنا عن مقلب حصل لة ....
وأزاى أتصرف عشان نستفيد من خبرات بعض ....

[azmeralda]

ما الدنيا الا مقلب كبير : )

الحاجة اللى تستفيدها انك تعامل ربنا عشان لما تاخد المقلب متبقاش الصدمة مؤلمة واديك خدت ثواب فى الناس وخلاص وحرص ولا تخونش

معظم الأمثلة اللى انت كاتبها فوق دى تقريبا اخدت فيها مقالب ايه دنيا
وزى التوقيع بتاعك ما بيقول


افتكرت دلوقتى مثلا اول واحد اتقدم لى ده بقى يا سيدى شال من سنه 7 سنين ! وكنت مازلت شايفة ان كده فرق السن كتير !!!
قال يعنى مش هعرف واكتشفت ان شقته باسم اخته ولسه عليها اقساط 20 سنة هو اللى هيدفعها !!! وعربيته مش عربيته هى برضه بتاعة اخته !! ولما عرفت معدش بيجى بيها خلاص معدش فى داعى
واصلا ميهمنيش عنده عربية ولا لأ بس الكذب ده كله من اولها !!!ناس بتحب تفرش نفسها طب ما تقول حقيقتك وانا حرة اقبل او ارفض؟التدليس فى الأسلام مرفوض مرفوض

يلا مثال بسيط اهو : )

اتصرفت ازاى الحمد لله كانت قراية فاتحة بس وموصلناش حتى لمرحلة الخطوبة ونهيت الموضوع
بس قابلت بعد كده كذابين كتيييير برضه

[WalidAdel]

تصدق قلبت عليا المواجع بالموضوع ده
هاحكيلك مقلب لووووووووووووووووووز من صاحبي اللي كنت فاكر انه صحبي و للاسف ماطلعش صاحب

كنت في ثانويه عامه اولي ثانوي و بعدين ليا اصدقاء كتير في المدرسه بس كان في واحد هو اللي صديقي اوي و اصحاب جدا دروس مع بعض نفس الفصل قاعدين جنب بعض بنذاكر مع بعض خروجات مع بعض كله كله مع بعض الكلام ده كان اولي و تانيه و تالته ثانوي مكنتش اعرف غيرهه تقريبا و حتي اصدقائي البقين مكنتش قريب منهم خالص
خلصت الامتحانات علي خير الحمد لله اتصل بيه مش موجود في البيت موبيل مابيردش فانا مابقيتش اخرج منا هاخرج مع مين انا اكاد اكون ماعرفش غيره كان بيتكلم كل اسبوع مره بعد ماكان كل يوم بنتكلم خمس 6 مرات علشان المذاكره
جينا ساعة التنسيق ها هانكتب ايه قولنا سياحه و فنادق و فعلا جتلنا سياحه و فنادق مع بعض روحنا عملنا مقابله سوا كده في الكليه و تمام بعدها بيومين تلاته بكلمه بقوله ها قالي انا روحت امتحان اكادمية السادات امبارح و ده كان اخر يوم امتحانات
ماشي مش مشكله ففيوم بكلمه بقوله مش هاننزل ولا ايه عايز اشوفك و بتاع بقالنا فتره مانزلناش فعايز انزل معاك قالي و هو بيضحك هو انت الكلب بتاعي علشان اخرجك
طبعا اخت الكلمه و سكت و قفلت معاه استغربت من الرد جدا و ابتديت افكر ليه و بتاع اكتئبت طبعا فتره كبييييييييره مش بنزل خالص لكن الحمد لله اصحابي اللي مكنتش بنزل معاهم دول نزلت معاهم و اتعرفت علي ناس و الناس عرفتني علي اصحابهم
بس دي كانت اول و اكبر صدمه في حياتي الكلام ده تقريبا بقاله 8 سنين حاجه كده ..... يلا الحمد لله علي كل حال

[Ghosts]

تصدق قلبت عليا المواجع بالموضوع ده
هاحكيلك مقلب لووووووووووووووووووز من صاحبي اللي كنت فاكر انه صحبي و للاسف ماطلعش صاحب

عارف يا أخ وليد ....
الواحد من كتر ماشرب مقالب من أصحابة ....
مبقاش عندى أمل خاااااااااااالص أنى فى يوم من الأيام هلاقى صديق كويس ....
أنا عندى زملاء كتير أوى لكن مفيش حد فيهم ممكن يكون صديق بجد ممكن أنى أثق فية ....
أكتشفت أن الزمالة أحسن ومفيش داعى أنى أتعشم فى حد أوى و أعتبرة صديق ....
من كتر الغدر اللى شفتة بقيت مؤمن بالحكمة اللى بتقول :
صديقك أما أن يحسدك أو يفسدك ....
محدش بيحب الخير لحد ....

[WalidAdel]

والله بص ياباشا انا بعد الموضوع ده كنت زيك و كده كده مش بثق في حد بسهوله بس اكيد هتلاقي لا تقلق يعني موجودين والله لاني لاقيت اصدقاء كتيييييييييييير الحمد لله و كويسين و ثقه و كل حاجه بس اهم حاجه تتبقي مركز في تفاصيل التفاصيل و ماتسيبش حاجه للظروف لان هنا بيتدي الغلط و دايما بيني و بينك الغلط من عندنا لاننا بندي ثقتنا لناس ماتستاهلش او غير جديرة بالثقه دي
في مقوله حلوه اوي اعرفها بتقول

لا تخلط بين شخصيتي و أسلوبي !!
فـَ شخصيتي : هيَ ما أنا عليه و تحتَ تصرُّفي

و أسلوبي : يعتمد عليك أنت و على تصرُّفآتك

اخر جمله دي بقي هيا المفتاح لاي حد قدامك ماتقدمش لحد الا لما هو يقدملك و دايما الحظر مع اي حد في معاملاتك حتي لو قاعدين علي القهوه بترغوا في اي كلام لازم تبقي انت مركز علشان تختار الصديق الصح و بردوا بيقولوا "الصديق وقت الضييق"

[Ghosts]

عايز أقول لكم يا جماعة على مقلب طازة ....
لسة شاربة أنا وأسرتى الصغيرة أمبارح بليل ....
أصل أمبارح كان عيد ميلاد ماما فكان لازم طبعآ نجيب تورتة لست الحبايب ....
رحت العبد اللى فى شارع مصدق بس لقيتة شطب بدرى لأنى ملاقيتش لا تورت ولا جاتوة ....
قلت أروح محل حلوانى تانى فى ميدان الجيزة أسمة الدمياطى كنت سمعت عنة من واحد زميلى ....
كان دايمآ زميلى دة يقولى أن المحل دة حاجتة ممتازة ودايمآ طازة قلت لما أجرب ....
رحت ميدان الجيزة وما أدراكوا ما هو ميدان الجيزة حتة مايعلم بيها إلا ربنا ....
المهم لقيت عندة تورت شكلها تحفة قمت شارى تورتة ب 75 جنية ....
وجريت على البيت عشان أنقض على التورتة ....
قطعت التورتة وجينا ناكل لقينا طعمها يقرف ....
تورتة بايتة على الأقل يومين ....

قمت حطيت التورتة فى العلبة وطلعت تانى على الدمياطى ....
قبلت المدير بتاع المحل وكان شاب ملتحى وسئلتة على صاحب المحل عشان أدوقة التورتة الطازة دى ....
أكيد لما لقانى بزعق أخدنى على المكتب بعيد عن الناس ....
وفهمنى أنهم بيبيعوا التورتة البايتة ب75 جنية بدل 100 ....
تخيلوا يا جماعة أدفع 75 جنية فى تورتة بايتة يومين ؟؟؟!!!
طبعآ كلامة نرفزنى أكتر فقال لى تحب نجيب لك تورتة تانية ولا تاخد الفلوس ؟
قلت لا طبعآ مش ممكن أشترى من عندكم أى حاجة تانى ....
أخدت الفلوس و روحت ....
وبكرة الصبح هجيب تورتة غيرها ....
وربنا يستر ....

[MohammedTaha]

عن نفسى انا خدت مقلب كبير جواه عدة مقالب
للاسف المقلب الكبير خلانى ادخل مدرسة مش كويسة وبالتالى جامعة مش كويسة واختارت كلية غلط
كل الوقت اللى كنت بدرس فيه من الثانوية للجامعة ماكنتش طايقه
ونفس المقلب الكبير خلانى اغير شغلانتى الى شغلانة مدمرة للاعصاب ياسلام لم تكلم عامة الشعب
ودايما بقول ربما غدا افضل
لكن الظاهر ان ايامى الجاية اصعب من اللى فاتت

[Ghosts]

عن نفسى انا خدت مقلب كبير جواه عدة مقالب
للاسف المقلب الكبير خلانى ادخل مدرسة مش كويسة وبالتالى جامعة مش كويسة واختارت كلية غلط
كل الوقت اللى كنت بدرس فيه من الثانوية للجامعة ماكنتش طايقه
ونفس المقلب الكبير خلانى اغير شغلانتى الى شغلانة مدمرة للاعصاب ياسلام لم تكلم عامة الشعب
ودايما بقول ربما غدا افضل
لكن الظاهر ان ايامى الجاية اصعب من اللى فاتت

فى ناس كتير أوى بيتعلموا فى أحسن مدارس اللغات فى مصر بس مع ذلك بيضيعوا ....
لأنهم معندهمش أصرار وهدف ....
مش كل واحد دخل مدرسة مش كويسة أو كلية أى كلام تبقى نهاية العالم ....
ممكن جدآ تبدأ من جديد مهما كان سنك ....
فى واحدة جارتنا قربت على 60 سنة بتدرس فى الجامعة المفتوحة أداب فرنساوى عشان تشتغل مدرسة ....
روح الجامعة المفتوحة و أختار الكلية اللى أنت شايف أنها هتساعدك فى الحصول على وظيفة كويسة ....
أبدأ من أول وجديد و أوعى تقول الوقت خلاص فات ....