## صباح الخير ##

[ابو سيف]

كان لسه واحد صاحبي بيكلمني من السعوديه امبارح قولتله طبعا متجيش
تيجي تعمل ايه بالله عليك ؟؟
خليك عندك يا اسلام و مش بعيد قريب جدا المقابلات الشهريه تبقا عندك هناك
او نبقا نعمل مكان في كل دوله عشان الاعضاء مش هيفضل فيهم حد في مصر
و اللى هيفضل مش هيقدر يروح المقابله عشان يادوب حاطط بنزين يوديه الشغل

[محمد المشد]

كل الله فى عون الناس جميعاً فى مصر 000 والله اولادى بيكلمونى كل يوم زود المصروف يا بابا 000 وللاسف كل يوم بزود لدرجة انى هطق من الزيادة كل يوم 00 دا غير الزيادة هنا ايضا لكن بصراحة بيضبطوا الاسعار احسن من مصر وصارمين فى الرقابة وبيعملوا كل خير لاولادهم يا حسرتنا على اللى احنا فيه من مسئولى مصر

[مصراوي جدا]

اسلام باشا صباح الفل

وبمناسبة زيادة اسعار السجاير .. كلنا هنسمع كلامك ونبطل سجاير خالص

بس مش عارف ازاي نقول للعربيات تبطل تشرب بنزين

[إسلام شاهين]

إيه ده هي السجائر كمان زادت ؟ لا والله ؟ بقت أسعارها إيه بقه ؟

[ZALABANY]

صباح الفل يا اسلام باشا
أوعي ترجع مصر نصيحة من أخ
أنا قعدت سنه ونص فى الدوحة ورجعت بمزاجي قصدي بغبائي ظنا مني ان الحال أحسن في مصر لكن دلوقتى اكتشفت غلطي بس بعد فوات الأوان قدر الله وماشاء فعل بس نصيحة من اخوك الصغير خليك عندك بلد جميله ونضيفة وبتتعامل باحترام ومافيش زحمة جامده وشوارع نضيفة ربنا يوفقك

[Karim_Monir]

حبيب قلبي صباح الفل
ربنا يوفقك عندك وفعلا ما ترجعش
يلعن ابوها بلد باللي عاملينوة فيها

[nader makram]

اسلام باشا وحشنا يا راجل و بجد اوعى ترجع دلوقتى لحسن الدنيا مقلوبة و ان شاء الله نعمل اضراب جامد على كل حاجة فى البلد التيييييت دى

إيه ده هي السجائر كمان زادت ؟ لا والله ؟ بقت أسعارها إيه بقه ؟

انا سمعت من واحد صحبى ان الماربولو بقت ب9 جنيه حاجة كدة

[ASD peugeot]

صباح الفل يا اسلام باشا
انت عندك اسعار البنزين ايه
و بعدين هناك العربيات الحلوه اللي مش موجود في مصر عندك عامله زي الدايو صور اي حاجه تفرحنا و نقول امتي هتمشي العربيات دي في شوارع المحروسه و تتحك و تتبهدل في المطبات

[إسلام شاهين]

البنزين هنا رخيص جدا أنا بصراحه ما سألتش عليه لسه بس سمعت الكلام ده لأني لسه ما عملتش الإقامة وبالتالي ما ينفعش أطلع رخصه وبالتالي ما ينفعش أسوق عربية ، إجراءات الرخصة هنا صعبه مووووووووت امتحانات وردوس تعليم وبلاوي متلتله ربنا يكرم

بالنسبة للعربيات اللي هنا أنا بس خايف أنزلكوا صور يحصل انقلاب أنا هنا شفت حاجات ولا الأحلام بس للأسف معيش موبايل بكاميرا لسه وديه غلطه بشعه أنا عملتها بس إن شاء الله عن قريب هرفع الصور

العربيات اللي هنا من كل جنس ولون وأشكال خرافه وحاجات تعقد بجد تعقد الكامري هنا مثلا تاكسي عادي جدا الاند كروزر ولا ال 128 عندنا برضه عاديه جدا بالنسبة لهم المرسيدس والبي إم حدث ولا حرج وهنا ما فيش حد بيبص لحد يعني مثلا عربية تعدي من جنبي والله ما عرفلها مله بس خرافة والناس عادي جدا بالنسبة ليهم ما فيش حاجه متعودين على كده ، خد مثلا الكامري ال 2008 هنا زيرو بكاااااام تخيلوا ب 75 ألف ريال فقط لا غير .

[sherif_84]

صباح الفل يا إســـلام والله وحشتنا ياباشــا
ربنا يوفقك يارب فى الغربة وأنصحك زي ماقالك كل الزملاء اوعى ترجع عشان هتتنرفذ من الزيادات العجيبة اللى زودوها
ربنا يحفظنا ويحفظ أموالنا من الغلاء ده

[Akram]

صباخ الخير يا إسلام ,
والا أقولك مساء الخير ,
البلد اليومين دول على كف عفريت و انا متوقع انه خلال الفترة الجاية هيحصل حاجة ,
المهم خليك عندك و تبت في شغلك و ربنا يوفقك .

[hazem_khidr]

صباح الفل عليك يا باشا
انت مسافر بقالك اسبوع صح.؟؟
من 24 ساعه بس
السجاير غليت
الكليوبترا زادت ربع جنيه و المارلبورو جنيه و نص.
البنزين زاد
السولار زاد
التراخيص زادت.
و طبعا كل حاجه حتزيد بزياده البنزين و السولار
لا تعليـــــــــــــــــق
خليك عندك
عارف ان مصر ليها سحر خاص
بس انا بقولها و لاول مره
كنت غبي لما سيبت الامارات و جيت :(

[MMamdouh]

ليه بس كده ؟ طيب تصدق مع كل ده أنا برضه هموت على ترابها صدقني صدقني ولا كنوز الدنيا تساوي ترابها

صباحك فل يا اسلام

مش حقدر اعلق على عودتك لمصر عشان عيب اوى فى المنتدى... لو عايز تعرف رائى خش على الMSN وشوف انا كاتب ايه فى الpersonal message بتاعتى

MMamdouh

[ecybrarian]

والله يا اسلام انا كمان بحب البلد جدا...بس هانعمل ايه ما باليد حيلة..شكلهم حالفين يطفشونا

[aif]

واحشنا اوي يا اسلام
انا رأيي مختلف شويه عن الزملاء
نصيحتي انك دايما تخلي في ذهنك ان وجودك خارج مصر مؤقت مش دائم ....
مصر صمدت 7000 سنة من الاحتلال والظلم والسرقة والحروب والمجاعات ... فرعنة وهكسوس و حيثيين وفرنساويين وانجليز ومماليك .. وبلاوي كتيييير وصمدت والناس عايشة ومتأقلمة وبتضحك وتقول نكت ....
شوية الغلاء دول هم اللي مش ح يعدوا .... كله بيعدي
انت في الآخر مصري .... مش اي حلجة تانية
انا مش باقولك ارجع مصر .... لكن لازم ح ترجع يوم ما .... امتي بقي ده حسب ظروفك .... كل حاجة لها تمن .... الغربة برضه لها تمن ... مش بيحس بيه الا اللي جرب الغربه ....اسألوني انا
انا اعرف ناس كتييير السكينه سرقتهم ... وعاوزين يرجعو مصر مش قادرين ...بقو خايفين يرجعو بلدهم ... خايفين ما يقدروش يعيشو هنا ...
ربنا يوفقك يا اسلام في غربتك