حكموكي ما حكموكي

[Karim_Monir]

لو ربطو ايدينا بكرة بكرة نحرروكي

مش عارف ليه جه في باللي دلوقتي اغنية مسلسل على الزيبق فاكرينها
الاغنية دي كانت بتخليني ادمع وبرضه دلوقتي قفشت عينيا بتدمع
الاغنية كلمات الشاعر الرائع عبد الرحمن الابنودي اللي بتهز كلماتة اوتار قلبي
ولحنها رضا رجب
دول لينكات الاغنيتين المقدمة والنهاية وكمان كلماتها ويا ريت تقروا الكلمات وانتو بتسعمعو الاغنية

برضه بحبك يا مصر رغم اللي بيعملوة فيكي

المقدمة :

http://elaghani.com/drama/elzeba2-1.mp3

قصر السلطان عالي البنيان
حَجَرة بفضة و حَجَرة بمرجان
و أراضي بتاع ألفين فدان
اسمها بستان
مليان أجراس .. مليان حراس
بقلوب ملهاش شبابيك و بيبان
جدران تولد في الليل جدران
و ده كله واقف على عمدان
أمال ازاي يبقى السلطان

قصر الوالي طبعا عالي
مليان حتى لو الكون خالي
بدهب و فاروز .. و كنوز في كنوز
و ان شبعت بطنه اليد تعوز
و ان عازت يده السرقة تجوز
يضحك نبكي إحنا طوالي
أمال ازاي يبقى الوالي

و بيوت الناس .. لا حيطان ولا ساس
ولا ليها لون و لا ليها مقاس
و حيطانها طين .. أصواتها أنين
و غناها حزين

وفي وسط الضلمة تهل انت
ولا نعرف من فين أو إمتى
ترفع بنيان الغلبان
وتطاتي بنيان الوالي
و ترَقص قصر السلطان

النهاية :

http://elaghani.com/drama/elzeiba2-2.mp3

حكموكي ما حكموكي
برضه المصري مصري .. و المملوك مملوكي
إوعي تباتي حزينة .. يا حرة يا زينة
لو ربطوا إيدينا .. بكرة نحرروكي
من السلطان و الوالي .. و العهد المملوكي

[MTAK]

اااااه يا كيمو
انا مش عايز اقولك عن كم الكابه و الاحباط اللى انا فيه من امبارح
و انت بصراحة مش جييت على الجرح بالاغنيه دى
دا انت يا راجل حفرت فى الجرح
و اللى تأسفت عليه اكتر
ان حتى المقطع اللى بيقول

برضه المصري مصري .. و المملوك مملوكي

اصبح غير صحيح
انا حاسس اننا لم نبقى حتى مصريين
----------------------------
و انا فى احباطى ده تناهى الى مسامعى ايه من القران الكريم" بصوت الشيخ المنشاوى الذى يقطر خشوعا و حزن فى قراءته "

تقول فى ما معناه
و لنبلونكم بشئ من الجوع و الخوف و نقص من الاموال و الثمرات
الى قوله تعالى
"و بشر الصابرين"
صدق الله العظيم
-------------------
بس كده

[محمد المشد]

بارك الله فيك يا كريم 00 اصبت الهدف ! فعلاً جيت على المواجع وضغط
ولسسسسسسسسسسسسسسسسسسسسسسسسسسسسسسسسسسسسسسسة

[Goodle]

[QUOTE=karim_monir;253583]لو ربطو ايدينا بكرة بكرة نحرروكي

مش عارف ليه جه في باللي دلوقتي اغنية مسلسل على الزيبق فاكرينها
[B]

برضه بحبك يا مصر رغم اللي بيعملوة فيكي

[B


لأ يا كريم بجد مش معقولة... أنا كنت النهاردة الصبح بافكر أغير اسمي وأخليه على الزيبق :)
ده توارد أفكار؟؟ ولا سنقر الكلبي مزهق الناس كلها ؟؟ :) ;)

[eng_mkhalaf]

فينك يا على - فينك فينك

[m_aash]

كل عصر وفيه سنقر الكلبى , بس للأسف سنقر زودها كتير فى العصر ده
حسبنا الله و نعم الوكيل

[hazem_khidr]

مش لاقي كلام اقوله
بقالي كتير اوي ما حيسيتش بالخنقه اللي حاسس بيها اليومين دول
تسلم يا كريم

[analyzer]

يعنى مش انا لوحد الى مش طايق نفسى ومهموم وحاسس بكابة وان الدنيا اسودة ووصلت الروح للحلقوم

حسبى الله ونعم الوكيل

[alaa_dash]

يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
يا مصرى قوم هش الوطاويط...كفاياك تبليط
صعبه الحياه والحل بسيط...حبة تخطيط
........................
فتحت باب إستيرادك
وصرفت فوق ضعف إيرادك
حلى للخواجه إستكرادك
سابك بتقرا فى أورادك
وده أشطك ونزل تشفيط

...................
ومهولاتى تحب تزيط
ساعة الفرح زغاريط تنطيط
وفى المياتم هات يا صويت
وفى المظاهرات سخن تشيط
وفى الانتخاب تنسى التصويت
...................

وليه بترشى وتتساهل
وتبيع حقوقك بالساهل
تستاهل النار تستاهل
ياغويط ويحسبك الجاهل
ساهل وساهى وغبى وعبيط

.....................

يا مصرى يا اللى الغلا عصرك
والنهب فى عصرك حاصدك
قوم للحياه وأسبق عصرك
ولا حاجه هاترجع مصرك
إلا أن تكون شغال ونشيط
......................
يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
يا مصرى قوم...هش الوطاويط...كفاياك تبليط
صعبه الحياه والحل بسيط...حبة تخطيط
..........
......

[Karim_Monir]

انا بدخل المنتدي مش لاقي كلام اقولوة واكتبة
كنت محضر كذا حاجة اكتبها وكلها دلوقتي ماليش نفس اعملها
امبارح بعد الشغل روحت مخنوق ابص للعيال واقول لنفس يا تري ايامهم شكلها ايه ومستخبيلهم ايه
ارجع اوحد الله خدت العربية ونزلت روحت لواحد صاحبي اقضي مصلحة معاه
مش طايق نفسي ولا البلد
ناس كتيرة حلوة سافرت وهجت ومش راجعة
وناس تانية بتظبط وتدور ومش عايزة تقعد
المرتب نقص
مصروفات البنت في kg1 زادت النص
الغلاء بقي فاحش
كل حاجة بقت بالدين
بقى فمي متكمم حتى مع اصحابي خايف اتكلم وحاسس اني هاطق من جنابي
عشان العصافير في كل مكان

رحمتك يا رب
اللهم إني ظلمت نفسي ظلما كثيرا ولا يغفر الذنوب إلا أنت فاغفر لي من عندك مغفرة إنك أنت الغفور الرحيم

انا لله وانا اليه راجعون

[hamedo0]

معلش ياكريم طب حنعمل ايه في عم سنقر ده حته لو مشي حيجي ابنه حبزلم والله يكو في عون المصريين

[Ayman_Abdullah]

و على رأى ممثل مش فاكر أسمه فى مسرحية مش فاكر اسمها
"مفيش فايدة مفيش فايدة مفيش فايدة مفيش فايدة"

[سمير يونس]

وانا ويا شمس المغيب بغيب و انتي بتشرقي

بتكدب الحقايق في العالم الغريب و انتي بتصدقي

بحبك وحبك شهادة ميلاد

عيونك شواطي الأمل و الميعاد

و لما تهز الرياح ف نخيلك

و تدمي الجراح .. الجراااح مواويلك

ما يدبلش ضيك و ما يخلصش زيت قنديلك

و يغيب ياما قمرك و تشرقي تاني في ليلك


و انا ويا شمس المغيب بغيب و انتي بتشرقي

بتكدب الحقايق ف العالم الغريب و انتي بتصدقي

و انا حرف تايه ف اسمك

صغير ف رسمك

وانا خيط ف شمسك

ف أمسك

ف بكرا اللي جاي قريب


و انا ويا شمس المغيب بغيب و انتي بتشرقي

بتكدب الحقايق في العالم الغريب و انتي بتصدقي

يا بلاااااااااااادي

[amr mokhtar]

يااااااه يا أستاذ سمير
الأغنية دى بتأثر فيا كل ما بسمعها بحس انها صادقة اوى من واحد صادق اوى
منير ده قصة تانية فعلآ انا لما بسمعه بيغنى للبلد بحس ان كل كلمة بيقولها فيها واقعية شديدة و من بعيدة عن النفاق

[OlaOsman]

بقالنا يومين انا و زميلاتي في الشغل جاية لنا بتتنيحة.. مش عارفين نفكر و لا نعمل حاجة.. احساس فظيع احساس اللي ملطوخ على قفاه و مش قادر يقول آه :(

ليس لها من دون الله كاشفة.