لو انت اللى هتختار ... تزود سعر السجائر ولا البنزين ..؟؟؟

[Terrible_DaRsH]

لازم السيجارة السوبر تغلى يا جماعة ...
السيجارة دى ليها مدمنيها فى كل مكان ...
السيجارة دى قصة حب وكفاح ونجاح فى مصر ملوش حل ..
سيجارة لها مذاق خاص ...
لازم تغلى شوية .. ربنا يكون فى عون المسئولين .. مش عارفين يغلوا ايه ولا ايه يعنى الناس بتقطع نفسها علشاننا ربنا يكرمهم ..

[د./اليشع ثابت]

معلش اصلى مفقوع اوى وحبيت اعرف رأيى الناس من موضوع السجائر . وخصوصا انى مش من المدخنين ولله الحمد وفى نفس الوقت باكره السجائر جدا
انا هاقول عن نفسى لو الخيار بايدى انى اجيب موارد للدوله
هازود سعر السجائر من ضعفين الى 3 اضعاف او حتى اكتر على السجائر المستورده على اساس انها سلعه مش اساسيه وسلعه مستفزه (السجائر المستورده) ولو قدرت هامنع دخولها البلد اساسا
انا وجهه نظرى ان اللى بيشرب فى اليوم علبه ممكن يشرب خمس سيجارات وكفايه اوى ... ونتمنى انه يبطلها وهو المستفاد.. اللى عايز يدفع بقى
انما اللى بيمشى بعربيه 30 كيلو فى اليوم بعد مالبنزين يغللى مش هيمشى 20 كيلو وينزل فى نص السكه !!
او يركن عربيته ويتجه للمواصلات
ياريت اعرف رأى الناس لانى رأيى لوحده مش محايد باعتبارى غير مدخن ولله الحمد

والله برافووووووووو عليك
جميل قووووى الموضوع الشائك دة
مع انى مدخن هفى سموكرز كمان
ياااااااااااااارب يلغوها من اساسة خلينا نرتاح من الهم دة

[kh_talaat]

انا مدخن ,, باختيارى ,, بكامل حريتى !!


انا مدخن ,, باختيارى


بكامل حريتى ,, مش هقولك بقا اصدقاء السوء والكلام الفاضى بتاع الناس اللى غيرها بيقررلها


انا صحيت الصبح فى يوم , وقررت انى ابقى مدخن


رحت كشك ساير واشتريت علبة سجاير ووولاعه , وشرب علبة السجاير دى كلها فى يوم واحد ,


ومن ساعتها وانا رسميا بقيت مدخن


اكتر عدو ليا هوا غير المدخن , مش كلهم الحقيقه , الجهله من غير المدخنين , الجهله اللى لسا ميعرفوش انى من حقى ادخن


انا لما ادخن بحرق فلوس , ( فلوسى ) وبحرق صحتى , وصحتى دى ثروت المجتمع اللى انا عايش فيها , مظبوط


فلوسى وانا اللى بكسبها بشغلى , ومن حقى احرق جزء منها فى متعه انا بحبها , حقى
ثروت المجتمع اللى هى صحتى بدفع فى مقابل حرقها , ده يعنى على اعتبار ان المجتمع صعبان عليه صحتى او فارقه معاه ,


بس المهم انى بدفع فى كل علبة سجاير بحرقها , 5 اضعاف ثمنها ضرائب .
يعنى انا بشرب ساير ميريت , ميريت اصفر , تمنها 7,50 جنيه لكل علبة سجاير .
تمن السجاير + 500 فى الميه ضرايب ,


اولا شركة الشرقيه للدخان اللى بتصنع سجاير ميريت بتاخد من فيليب موريست صاحب العلامه التجارية لميريت


41 جنيه فى الـ 1000 سيجارة , يعنى السيجارة بتتكلف كام ؟؟ متتعبش نفسك السيجارة بتتكلف 4 ساغ تقريبا


والعلبه بحالها تتكلف 80 قرش سجاير وقول بقيت الجنيه تغليف , تبقى العلبة بتتكلف على فيليب موريست 1 وبيكسب 150 فى الميه تبقى العلبه بــ 2 جنيه ونصف
والدوله بتحصل ال 5 جنيه الباقيه ضرايب !!


يبقى كدا المجتمع بيحصل من سيادتى 7جنيه ونصف ضرايب لانى بحرق علبه ونص فى اليوم !


اشطا كدا ؟ اشطا


يبقى فى الشهر المجتمع بحصل منى 225 جنيه , بيعمل ايه بقا المجتمع بالـ 225 جنيه ؟


اقولك .. بيدفعها لحضرتك عشان تتعلم ببلاش , وعشان تتعالج ببلاش , وعشان تركيب مواصلات مدعمه , وعشان تاكل عيش مدعم
وتركب عربيه وتحط فيها بنزين مدعم ,
وبتدفع منها مرتب للموظفين فى الدوله ,


جنيه 225 هى بالظبط مرتب طبيب معين فى الدوله اول تعيين بالحوافز والزيادات والبدلات ,



شوفت بقا ؟!! شوفت ؟!!


المجتمع واخد حقه منى تالت ومتلت


بس انا زعلان من المجتمع شوية , واخد على خاطرى منه ,


لان المجتمع بصيرف من الفلوس اللى انا بدفعها على علامات سخيفه مكتوب عليها ممنوع التدخين ,


وبيعلق العلامات دى فى الاماكن العامه , اللى انا برضه مساهم فيها بصدرى اللى بحرقه ,


المجتمع بيطردنى من الامكان العامه ومن المواصلات العامه , وبيجبرنى انى ادخن فى الشارع او اى مكان تانى بعيد عن الناس عشان ؟؟!!


اذا كان من حقك ان تدخن فا من حقى ان استنشق هواءا نقيا .



بجد عبارة تحرق الدم , تمام


مدمن المخدرات شخص صرف من فلوس المجتمع مبلغ محترم على متعه بيحبها ,
وحرق صحته اللى هى ثروة المجتمع برضه بنسبه محترمه ,


بس الفرق بينى وبينه حاجتين ,,,,


اولا : ان مدمن المخدرات مبيدفعش ضرايب لا هوا ولا تاجر المخدرات


ثانيا : ان المجتمع عمره ما بيعتبرنى مريض زى ما بيعتبر المدمن مريض ,


المجتمع بيعاملنى على ان انا كلب جربان , لازم ينعزل حفاظا على صحة الاخرين ,
الاخرين اللى انا وغيرى تقريبا من المدخنين بنصرف عليهم ,


انما المدمن المجتمع بيعامله على انه مريض


وبيدخله مستشفيات عامه , بيقولو يا حبيبى ياللى بقيت مدمن وخربتها , تعالى انتا مسكين ومريض ,


تعالى لما نعالجلك بالفلوس اللى دفعها المدخنين ,


لما بركب اى طريق سريع , بيدفعونى ضريبة مرور ( كارته )
والكارته دى فلوسها بتتصرف على اعادة اصلاحح وانشاء طرق ومواصلات ( فير ) عدل وتمام .


انما الضريبه اللى بيدفعها المدخن , مافيش فيها مليم بيتصرف على برامج علاج واعادة تاهيل وتوعية المدخن ,


يا جماعه المدخن ده مواطن مثالى , من حقه انه يدخن , فى مكان مخصص للمدخنين , فى كراسى نضيفه واماكن محترمه , ومزيكا شغاله


اه مزيكا شغاله , المدخن ده مبيشحتش من حد , المدخن ده قاعد بفلوسو


ولو بطل تدخين تادكو انه غير المدخنين هما اللى هيبقو خسرانين




المدخن شمعه تحترق من اجل المجتمع , بس خسارة


المجتمع مبيطمرش فيه ,

منقول

[احمد عز]

الســــــجــــائــــــــــــــر

[EZABY]

انا شايف ان مفيش علاقه تربط الحاجتين بحيث اني اختار مابينهم
بس على سبيل الأي حاجه يعني
نغلي البنزين عشان الحكومه تاخد حقها اللي عماله تذلنا بيه كل شويه وتقولك اصل البنزين مدعم اصل البنزين بتاع
انما السجاير والمعسل الحكومه واخده عليهم ضرايب بمختلف انواعها ده غير الجمارك بالنسبه للمستورد

انا بشرب شيشه ومبشربش سجاير
وعلى فكره التدخين مش حرق فلوس عالهوا دي متعه ميقدرهاش الا المدخنين

[Terrible_DaRsH]

وعلى فكره التدخين مش حرق فلوس عالهوا دي متعه ميقدرهاش الا المدخنين

يا راجل حرام عليك ...
التدخين متعة للمدخن فقط ولكن فى الاساس هى ضرر ...
ولو انت بتشرب خمرة هتقول ان الخمرة متعة ميقدرهاش غير السكران ولو بتشرب حشيش هتقول نفس الكلام ...
بس انا احب اضيف معلومة بيسطة ...
لو عودت حياتك على التدخين فارجوك متبطلش ...
ولو مبتشربش فارجوك بدل المرة 1000 متشربش ..

[EZABY]

لو عودت حياتك على التدخين فارجوك متبطلش ...
ولو مبتشربش فارجوك بدل المرة 1000 متشربش ..

انا معاك في الحته دي بالذات يااستاذ درش

جديد وجامد التعليق بتاعك

[elassar2010]

وعلى فكره التدخين مش حرق فلوس عالهوا دي متعه ميقدرهاش الا المدخنين

بصراحة كلمة حكمة فعلا انا فى الامتحانات لو مكنتش طاحن نص علبة سجاير ادخل الامتحان نايم ومهيس
وطبعا مع السجاير قهوة

[ringoo84]

اكيد لما السجاير تغلى مهما غليت موش هتكون زي البنزين .............

[eslamrace]

اجلا ام عاجلا الاتنين هيغلوا
ولكن الاقرب هو غلو السجاير تدريجيا لزياده المخصصات الضريبيه والبنزين لتقليل مخصصات الدعم الحكومى
امتى الكلام ده حيحصل وفى انهى مرحله قادمه "الله اعلم"
ربنا يستر ويعدى المراحل القادمه على خير ويعمل الصالح للبلد .
تحياتى .

[mahmoudysf]

سبحان الله ربنا ابتلانا بعقليات عفنة يملؤها الفشل
لا تفكر في زيادات عائدات الدولة الا من خلال الشحاتة من كل من هب ودب
او من خلال رفع الضرائب او رفع الاسعار
وكله بيصب في زيادة معاناة الناس
لكن اي تنمية او ابتكار حلول غير تقليدية لتنمية الدخل مفيش

[Adel.Nasr]

زيادة البنزين +توفير مواصلات ادميه = تقليل الازدحام . اختفاء نسبه كبيره من السيارات المتهالكه و اللي عمرها الافتراضي انتهى من زمااان . تقليل نسبة الحوادث خصوصا بين الشباب اللي مش هامه تمن البنزين الرخيص و مقضيها سرعه و شد وحرق عالفاضي اختفاء نسبه كبيره من الموتوسيكلات الصيني و التكاتك(مش محتاجه شرح) . توفير نفقات كبيره على الدوله . انا عارف ان فيه ناس كتير هتنقد كلامي بس بتكلم على حلم نفسي اعيشه بدل ما اسمع عنه

[شادى عبدالمنعم]

سجائر طبعاااااا

[lena jo]

انا بجد ذهلت من الاجابات. توقعت ان معظم الاعضاء مدخنين و حسيت ان انا الوحيده اللي هقول السجائر لكن الحمد لله لسه فيه ناس بتحب صحتها و بتكره السجائر. المشكله ان لو البنزين غلي هيغلي كل السلع معاه نتيجه الشحن و النقل. و طبعا وسائل المواصلات العامه و الخاصة من تاكسي و ميكروباص و نقل عام و باص مدارس.... و كل واحد بيبيع اي حاجة يغليها و يتحجج بالبنزين يعني فتحت غلا تانيه خالص.
اما السجائر التي اكرهها من كل قلبي و اكره رائحتها الكريهه و شكلها و مصانعها و بائعها فتأثير سعرها عليها فقط مش هتسمع في سلع تانيه و مش عارفه ليه جملة من حقي ان اتنفس هواءا نظيفا بتزعل. ده حقي فعلا و مستغنيين خالص عن الضرائب علي السجائر و يا رب كل مصانعها تقفل و يبطلوها خالص. و طبعا اضرار السجائر من امراض بشعة تؤثر علي الصحة و تكلف صاحبها مبالغ كبيرة لعلاجها او تكلف الدوله لو له تأمين صحي و كمان بعد المرض يقل طبعا نشاطه كعضو منتج في المجتمع. ده غير التدخين السلبي لغير المدخن المتواجد معه في مكان واحد للاسف.يعني لو بطلوها هيوفروا بشكل غير مباشر و طبعا ككارهه لها لا اتصور اي متعة في شئ كريه الرائحه و مضر. ربنا يتوب علي كل مدخن.

[J A G U A R]

الغريب انى عمرى ما شوفت حد بيدخن وحصله حاجه او تعب منها ...
ربنا يتوب على المدخنين ..