ايه يا جماعة ... كل حاجة بقت كئيبة كده ليه

[aif]

من ساعت رفع اسعار البنزين انا ملاحظ ان المنتدي بالكامل عنده اكتئاب
المواضيع كئيبة
التوقيعات كئيبة
التعليقات كئيبة
حتي الهزار كئيب
مواضيع السيارات الفنية كئيبة
.....
يا جماعة دي مش نهاية العالم .......
يا ريت اللي يقدر يخفف الكآبة اللي اجتاحت الناس ...
اللي يقدر يرسم اي ابتسامة او بارقة امل ....
اللي يقدر يشجع الناس بدل اليأس اللي احنا فيه .....
اللي يقدر ما يتأخرش
.........
انا كنت في اوقات كتير باهرب من الهموم وآجي افتح المنتدي عشان انسي همومي ولو لمدة قصيرة .... ثم استأنف الحياة ومشاكلها ......دلوقتي بقيت اخرج من المنتدي الاقي همومي بتزيد اكتر وأكتر
والمشكلة ان الواقع لا يتغير بكثرة الإكتآب
ارجو من الزملاء عدم المبالغة في الموضوعات المحزنة والكئيبة خاصة لو متعلقة بتوقعات وأخبار قد لا تكون صحيحة ..... الدنيا مش ناقصة كآبة

[Qamar]

والله عداك العيب ........و قزح
أنا ليا واحد صاحبي لما تجيله مشكلة يقول هيييييييييييييييييه ميزان السيئات هيخف شوية ( بس ده طبعا بالصبر و الاحتساب مش بالشكوى)
وكفاية زي ما قولت في موضوع كئيب سابق يا جماعة احنا في الدنيا مش في الجنة و مافيش حاجة اسمها المدينة الفاضلة!
مانزل بلاء الا بذنب, و ما رفع الا بتوبة

[hazem_khidr]

فعلا يا احمد باشا:(
الواحد مكتأب جدا و مش عارف يضحك
و عاوز اسافر اغير جو في اي مكان
ربنا يستر علينا:(

[hamedo0]

والله يا استاذ احمد انا زيك كنت اخش نايل موتورز عشان افك شويه بس دلواقتي بقي فيه اكتئاب عام مع ان كده كده لازم الحياه تستمر

[Karim_Monir]

نفسي والله يا احمد باشا
بس في غصة كدة في حلقي
اصلها مش مجرد زيادة بنزين
دي بروفة للمسرحية الجديدة

[Hondawy_2008]

يا جماعة دي مش نهاية العالم .......
يا ريت اللي يقدر يخفف الكآبة اللي اجتاحت الناس ...
اللي يقدر يرسم اي ابتسامة او بارقة امل ....
اللي يقدر يشجع الناس بدل اليأس اللي احنا فيه .....
اللي يقدر ما يتأخرش

والله يا باشا عندك حق بس بصراحه كل الناس بتعيش حاله صعبه بسبب الغلا الرهيب وانا منهم طبعا بيني وبينك كده الحاجه اللي هتفرح الناس والأمل الوحيد انهم يخرجوا من البلد ديه أنا كنت بشتغل بره و عرفت أد ايه أنا غلطت لما رجعت من 7 شهور محدش عنده عقد عمل يا رجاله أسافر من دلوقتي و الله :) ويبقى قدر يخرجني من الكآبه :D

أخوكم : أحمد مهندس اتصالات

[محمد المشد]

بارك الله فيك يا ابو حميد 000 بس اوعى تنسى عزومة البغل 00 اصل مبقاش فية عزومات غير الفول والطعمية وان وجدوا
عموما اعذر الناس فى اكتئابها فى هذا الوقت لان الناس فعلا بقت شايلة هموما الدنيا وما فيها 000 واحد شايل هموم مدارس اولادة وزيادة مصروفها واخر كان عايز يتجوز ومش عارف يعمل اية بعد الغلو دة واخر كان بيجهز لابنتة ومش عارف يكمل لها جهازها واخر مش عارف يجيب شقة واخر بيفكر فى تعبئة السيارة بنزين
يعنى كان الله فى عون الناس وبارك الله فيك

[جندى مجند]

أنا ليا واحد صاحبي لما تجيله مشكلة يقول هيييييييييييييييييه ميزان السيئات هيخف شوية ( بس ده طبعا بالصبر و الاحتساب مش بالشكوى)

جزاه الله خيراً ... أصاب كبد الحقيقة

[El Prince]

...فعلاً يا جماعه الواحد جاله حاله اكتئاب و تبلد غريبة
انا ساعات بكون فاتح السايت بتاعنا و عاوز اشارك بالردود .. و بعدين نفسى تتسد
ده حتى الواحد مش لاقى بارقة أمل ... من مقدمات الجشع اللى ابتدت تظهر ...
عموماً ربنا يستر علينا جميعاً من الكأبه و ضغط الدم اللى بأه بسبب كل حاجه فى البلد

[Akram]

يبقى لازم كلنا نروح المقابلة بكرة إن شاء الله,
أهو منه نقابل أحلى صحبة و منه نغير جو ,
بكرة إن شاء الله الساعة 3 في الربوة في مدينة نصر .....

[Islam_galal]

مش حاعلق أحسن لأني مش لاقي حاجة عدلة أقولها

[Mohamed A S]

والله عداك العيب ........و قزح
أنا ليا واحد صاحبي لما تجيله مشكلة يقول هيييييييييييييييييه ميزان السيئات هيخف شوية ( بس ده طبعا بالصبر و الاحتساب مش بالشكوى)
وكفاية زي ما قولت في موضوع كئيب سابق يا جماعة احنا في الدنيا مش في الجنة و مافيش حاجة اسمها المدينة الفاضلة!
مانزل بلاء الا بذنب, و ما رفع الا بتوبة

فعلآ: ما نزل بلاء إلا بذنب وما رفع إلا بتوبة
لا يغير الله ما بقوم حتى يغيروا ما بأنفسهم - أعتقد اننا لازم ندور جوانا الأول أكيد هنلاقي ذنوب مش واخدين بالنا منها ولو لاقناها نتوب عنها وأي واحد حاسس انه عنده ذنوب أو معندوش يبقى يستغفر ربنا كثير له ولنا جميعاً
قال تعالى:
فقلت اسغفروا ربكم أنه كان غفارا، يرسل السماء عليكم مدرارا، ويمددكم بأموال وبنين ويجعل لكم جنات ويجعل لكم أنهارا "نوح 10-12"

[PRO-DRIVE]

المشكله ان الناس تحاول تنسي المشكله مش بتحاول تعالجها و شخصيا بحب المواجهه مبحبش ادفن راسي في الرمل

[mada121977]

والله مش قادر اطلع من المود اللى انا فيه بعد اللى حصل ... الواحد مش عارف يستحمل ايه ولا اييه .. يعنى حتى لما اجى ارد على موضوع ببقى مش هاين عليا ارد

[Dr Ahmed]

المنتدى جزء من واقعنا ، وشعورنا وحالتنا المزاجية بتنعكس على مشاركاتنا وردود أفعالنا ، ولا يمكن هنلاقى نفسنا هنا مبسوطين والواقع حوالينا زى ما انتم عارفين وإلا يبقى هروب من الواقع ومنتدانا مش كده ، وهى طبعا فترة وهتعدى بس نفسى تعدى بموقف أو حاجة نعرف بيها هنعمل إيه بكره ، مش مجرد تعدى بالنسيان كالعادة.