تقرير شامل عن عملية الليزك وتقييمى بعد 5 ايام من العمليه

[MOUSTAFA_SAAD]

السلام عليكم ورحمة الله وبركاته

انا الحمد لله عملت عملية الليزك زى ماانتم عارفين يوم الاربع اللى فات 17-8-2011 وكنت مواعيدكم بتقرير عنها بعد لما افوق شويه واى استفسارات تحت امركم

اولا : المركز اسمه مركز زهران للعيون وعنوانه دمياط ش التحرير ميدان سرور بمول زهران
التليفون 0572244452 0129722846

صاحب المركز دكتور عاصم زهران

ثانيا : تكلفة العمليه

32 كشف
150 فحوصات
1800 تكلفة العمليه
1982 الاجمالى

ومعمول تخفيض علشان رمضان وبعد رمضان تقريبا حتزيد 300 جنيه على ماعتقد

كتبلى 3 انواع قطره ب53 جنيه
مضاد حيوى علشان كان عندى التهاب فى الجفون ب30 جنيه لمره واحده

ثالثا :اجراءات العمليه

قبل العمليه بيعمل اشعه على العين بجهازين وبيعرف منه اذا كان العمليه تصلح لحالتك ولا لا وبعد لما يتاكد انها تصلح بتعدى على 3 اجهزه كمان تقريبا لتجهيزك للعمليه غير الكشف والفحص اليدوى

بعد التاكد من كل شىء بتدخل غرفة العمليات ومدة العمليه لاتتخطى ربع ساعه وهنا كانت المشكله عندى
رغم سهولة العمليه وعدم وجود اى الم بس مجرد مايقرب ايده ناحية عينى كنت باعمل البدع معاه واتهز و احرك عينى وقرفته اخر قرف وخليته يكره العمليات واللى بيعملها لمدة العشر دقايق لغاية لما قدر يرفع غشاءالقرنيه وكل ده من غير الم بس حاعمل ايه فى الخوف
عاوز اقولكم انى اول مره لبست عدسات فى حياتى الدكتور لبسهالى وقالى لما تروح خلى اختك تخلعهالك لغاية لما تتعود عليها وبعد لما روحت عملت معاها نفس اللى عملته مع الدكتور علشان تخلعلى العدسه واخر مازهقت قالتلى حاخذق عينيك واخلص من الهم ده ياما تثبت عينك علشان اشيلها وفعلا التهديد جاب نتيجه وقدرت تشيلها

بعد لما بيخلص وبيضرب شعاع الليزر اللى بيستمر ثوانى وتقوم من العمليه بتحس بزغلله كانك قالع النضاره طبعا بتستمر تقريبا لبقية اليوم وحرقان فى العين تقدر تستحمله وبيكتب 3 انواع قطره تحطهم كل ربع ساعه

المفروض بتخرج بعد نص ساعه وبيكون ساعتها اطمن عليك وتيجى تانى يوم لكن اكمنى من مشوار بعيد طلب منى الانتظاربعد حوالى 6 ساعات الساعه 9 بلليل بعد الفطار فحصنى تانى مره وقالى الحمد لله الاتنين زيرو ومفيش مشاكل وطبعا الراجل كان عامل واجب معانا بصراحه وعزمنا على الفطاراحنا التلاته وانا مستغرب من الحركه دية جدا لانه كان مصمم عليها وحوالنا نخلع منه وده ابدا

كانت الرؤيه اتحسنت كتير الحمد لله بقية اليوم على الساعه 12 بلليل
تانى يوم بعد لما صحيت الحرقان اختفى تماما والرؤيه رجعت بنسبة 90% زى كلامه تمام

وقالى باقى النسبه حتيجى بالتدريج بالايام وانا مدى لنفسى شهر مهله واشوف ايه الاوضاع لكن الحمد لله افضل كتير

قالى اهم حاجه تخلى باك من الجفاف لانه دى اكبر مشكله مع الليزك وحتسبب زغلله ليك
ومارس حياتك بشكل طبيعى
بس ابعد الميه عن العين لانها ملوثه وممنوع الدعك فى العين وممنوع شيل الاطفال علشان بيحطوا صباعهم فى عين الواحد والكلام ده لمدة اسبوعين

بلليل بسح ان فيه ضباب خفيف كده حوالين الاضواء او الاجسام البعيده وده ناتج لسه عن الزغلله اللى موجوده

الدكتور سنه صغير فى حدود 45 سنه على تقييمى وكنت معتقد انه راجل كبير بسبب الشهره اللى واخدها
المركز مليان ناس كتير وعمل عمليات كتير جدا فى نفس اليوم ماشاء الله وواضح انه مشهور وشوفت ناس من مختلف المحافظات هناك

قالى على حاجه غريبه جدا حسيت انه فعلا دكتور فاهم
ان انا برمش بسرعه تقريبا زى هيفاء وهبى كده وان ده حيسبب جفاف فى العين وقالى مرن نفسك انك ترمش براحه وطبعا انا عارف ان دية صعبه لانه تعود

تانى حاجه قالى انت بيجيلك صداع مستمر من اول عينيك لغاية ضهر دماغك مش بيروح غير بالنوم وفعلا كلامه صح وساعتها استغربت جدا وقولت الراجل ده مكشوف عنه الحجاب وقالى ده سببه انك شادد عينيك وحواجب دايما وحله انك تغمض عينك كل ساعتين 5 دقايق
طبعا انا كنت من زمان بحس بالصداع ده بس بخاف اكلم اى دكتور عليه احسن يقولى فتحه ونصبه واشعه على المخ ومش عارف ايه وقولت خلى الطابق مستور احسن واللى متدارى متدارى

فاضل على الحلو دقه وادعولى ان ربنا يتمم شفايا على خير واى استفسار انا موجود وده رقم تليفونى
0183449294 ويفضل الاتصال بيا فى حالة الاستفسارات الطويله لانى بحاول اقلل جلوسى على الكومبيوتر لاطول فتره ممكنه
غاليا من الساعه 8 بعد الفطار الى الساعه 1 بلليل التليفون بيكون غير متاح لانى ببقى فى مكان الشبكه فيه بتسقط

وسلام مؤقت

[Ahmed A Rahman]

سلامة عينيك يا باشا والف الف مبروك


سؤال بس على الماشي


لما انت بقالك 5 ايام مش شايف حاجه قاعد ازاي على المنتدى

دانا كل ما بدخل الاقيك منور في اللوجان والاجتماعي

[tameraast]

الف مبروك و حمد لله على السلامه

[MOUSTAFA_SAAD]

الله يسلمك يادكتور ويخليك ليا
المنتدى منور بوجودك والله
انا شايف الحمد لله بس فيه زغلله خفيفه كده لسه موجوده
يعن تقدر تقول شايف بنسبة 90 % ولله الحمد

[MOUSTAFA_SAAD]

الله يبارك فيك ياتامر

[ahmedhilmy]

ربنا يتم عليك الشفا ان شاء الله وتبقى زي الفل

[kisho55555]

حمد لله على السلامة .... وان شاء الله عينك ترجع زيرو زى ما الدكتور قال ...

[osama.m]

مبروك و الحمد لله على سلامتك
والله الموضوع دا شغال في دماغي بقالي فترة بس خلاص اتعودت على النضارة

[wallace]

الحمد لله علي سلامتك يا درش وحاول تبعد شوية عن التليفزيون والكمبيوتر وخصوصاً لو بتقرب عينك منهم ,يعني لو مضطر حاول تبعد قدر المستطاع وربنا يعافيك

[Ashraf_Ibrahim]

ألف سلامة عليك يا صديقي
شفاكم الله وعافاكم وأتم لكم الشفاء العاجل
اهم شيء احتياطات ما بعد العملية علشان تحصل على افضل نتيجة للعملية

[abdalah_hashem]

الف سلامة عليك يا باشا وتشوف 100 فى المية ان شاء الله

انا عاوز اعملها بس خايف لان النظارة اللى انا لابسها بقالها سنتين ونص نفس المقاس بس انا مش شايف بيها حلو
جربلى المقاس اللى بعدة مشوفتش بية واللى قبلة مشوفتش بية
وكمان خايف اعملها تقلب غلط ودية عين يعنى مفيهاش بخاف من اللعب فيها

وتصدق كمان انا لابس نظارة -2.75 العينين وعلى طول دماغى بتصدع كدة برضة لان النظارة بتتزحلق ولازم ادنى شادد
عينى عشان ارفع النظارة

وعموما ان شاء الله تقوم بالف سلامة وتشوف 100 % وترجع فابريكة تانى :))

[MOUSTAFA_SAAD]

الله يسلمكم ياجماعه والف شكر على السؤال

[Amr Axel]

الف سلامة و بالشفاء ان شاء الله يا ريس

بس ليا استفسار هل فيه ألم لأني سمعت انها مؤلمة بشدة
و سمعت ان بعد فترة الحالة بترجع تاني و لا كأن فيه عملية اتعملت

[Amr Axel]

و استفسار تالت بخصوص اجراء العملية هل بيسلط شعاع الليزر ثواني بس و لا بيقطع شريحة عند النيني و بعدين يسلط الشعاع لأني قريت عن العملية ان فيه شريحة رفيعة بتتقطع و بعدين بترجع تلتئم تاني

[MOUSTAFA_SAAD]

هو فعلا بيقطع شريحه عند الننى وبتتلحم تنى
فيه حرقان بيستمر كام ساعه وكبيره تانى يوم بيختفى

اختى عملتها من 4 سنين والحمد لله كويسه
واعرف واحد عملها من 16 سنه ايام ماكانت لسه مفيش حد يعرف عنها حاجه وشايفه من غير نضاره