أيهم تفضل ؟؟

[SYD]

السلام عليكم ورحمة الله وبركاته

ربنا خلق الأرض واستعمرنا فيها وفي غريزة عند الأنسان بجانب غريزة البقاء هي غريزة التطور والحياة بشكل أفضل وكلنا بنحلم ببكرة وبنحلم نخليه احسن من النهاردة
موضوعي النهاردة علي عكس ما سبق

انا بحلم بامبارح بس مش امبارح امبارح لا بحلم بسنين عدت
بحلم كذا مرة اني عايش الخمسينيات او الستينيات او السبعينيات او الثمانينيات او التسعينيات او الألفية الثانية

أيهم تفضل

انا عارف لأني سألت اكتر من حد السؤال دة
والنهاردة بسألكم هنا كمان تحب كنت تبقي عايش في انهي فترة في دوول مع ذكر السبب وحلمك

ان هقول ملامح لكل عقد من دوول وهسيب لخيالك واحلامك العنان بعد كدة هي الي تحكي وتقول بتحلم بأيه
بس طبعا بأعتبارنا في منتدي اساسا للسيارات فلن يخلو كل عصر انشاء الله من ذكر دور السيارات فيه

الخمسينيات : ناس محترمة اوي ستات ورجالة في فالعصر دة بشوات وناس اغنياء عايشة في قصور في الزمالك زجاردن سيتي وناس تانية بسطاء عايشة في الأحياء الشعبية زي بولاق والسيدة زينب والحسين
البهوات راكبة اوتوموبيلات شيفرولية وعربيات شكلها غريب شبه بتاعة بريطانيا العظمي ولو شاب يبقي راكب عربية كشف زي بتاعة عماد حمدي وكمال الشناوي ولو انت شاب بسيط عيش بقي مع الحرب وكلام القهاوي عن الملك والثورة واخيرا الحرب

الستينيات: بردو ناس مازالت محتفظة بالأحترام بتاعها وناس خارجة من الثورة مستفيدة وناس تانية اتقلبت عندها الموازين بعد قانون الأصلاح الزراعي وبدأت شوية الموازين تتعدل في البلد والفارق الأجتماعي يقل حبتين وظهرت مناهج جديدة في الحياة وطبقة جديدة متوسطة بين البشوات والبسطاء سكنوا مصر الجديدة بشوارعها الجميلة الهادية الواسعة التي يتوسطها اختراع جديد مذهل اسمه مترو مصر الجديدة والميرغني وكانت البنات كلها رقيقة جدا في العصر وحسها مرهف بتسمع العندليب علي قد الشوق وقولوه
ركبوا عربيات اكثر حداثة زي الفيات والبيجو

السبعينيات: الناس حالها اتغير كتير قوي وبدأو عصر الأنفتاح انفتاح في كل حاجة في الموضة وقصة الشعر واللبس الميني جيب والشارلستون والسوالف اهم حاجة السوالف اوعوا تنسوها من احلامكم، مازالت شوارع مصر الجديدة جديدة لسة بخيرها والناس مش كلها اشترت العربية والمواصلات العامة اهي للعامة سواء رايح جامعة القاهرة بسوالفك او رايح النادي زي كل شباب جيلك تقابل صحابك هناك وبردو الأنفتاح نفع ناس كتير بدأت التجارة جديد في ظل الحكومة الجديدة وتشجيعها للأستثمار وبردو كان في شباب كتير ليها في السياسة ودخلوا الحرب وفي الي رجع لبيته وفي الي رجع علي حتة تانية في مقعد صدق عند مليك مقتدر
الشوارع دخلت الوان جديدة من العربيات بردو سواء البيجو او الفيات بفوانيسها المدببة والي معاه قرشين ركب المرسيدس واستمتع برفاهيتها

الثمانينيات: حلم كل مصري في الثمانينيات انه يتجوز ويسافر العراق او ليبيا يعمل قرشين حلوين او يعيش في الزيطة وعدم الأستقرار والحالة الناشفة هنا صحيح الحرب انتهت بس البلد مش واقفة علي حيلها الحكومة الجديدة لسة جديدة ومالحقتش تعمل حاجة بدأنا استصلاح الأراضي بس عندنا مشكلتين في غاية الأهمية : السكن ومشاكله والخلو والأستغلال من اصحاب البيوت والمشكلة التانية عدم وجود فرص عمل مناسبة في ظل غلاء المعيشة وكل يوم بعد يوم الأعداد بتزيد والشوارع بتتزحم اكتر
بقي هو دة ميدان رمسيس بنافورته الجميلة تحت تمثال رمسيس امام السكة الحديد هو دة الميدان الي كان فاضي من كام سنة وهي دي العتبة الخضرا الي صاحبنا الغلبان اشتراها في الستينيات
مصنع النصر اشتغل وبدأ في تصنيع المعجزة والأسطورة والحلم المصري 128 صحيح هو شغال من قبل كدة بكتير بس مفيش عربية ملت البلد قد ال128 وقليل من البيجو 504

التسعينيات: الحالة اتغيرت كتير والبلد اتزحمت اكتر واكتر والمواصلات العامة فقدت جمالها ومترو مصر الجديدة بقي حاله يرثي له ويد الدمار وصلت لكل جميل في البلد حتي تمثال رمسيس نافورته نشفت ومصر الجديدة بقت قديمة وميادينها شكلها اتغير كتير عن فيلم الوسادة الخالية
وميدان العتبة بقي مولد وصاحبه غايب ورمسيس بس ميدان التحرير بدأ ياخد شكل جديد جميل بعد ماشالوا الموقف من امام مجمع التحرير ونقلوه عبدالمنعم رياض وظهر مترو جديد يضاهي مترو مصر الجديدة وتفوق عليه مترو بيمشي تحت الأرض ماهي البلد مش ناقصة زحمة بعربياتها الكتير اشي مرسيدس 200 واشي 128 والبيجو 504 الي غليت عن الأول واللادا

العقد الأول من الألفية الثانية: مش هتكلم عنها كتير انتوا ادري بيها مني واعتقد مفيش داعي للحلم لأننا عشناها كلنا علي ما اعتقد ولا في هنا حد مواليد 2011 ؟؟؟

هسيبكوا مع احلامكوا وعايز كلنا نسمعها مع بعض

انا هبدأ بنفسي

انا كان نفسي اعاصر الستينيات يعني كنت ابقي مواليد مثلا سنة 52 او 54 يعني اكون في ريعان الشباب في الستينيات واوائل السبعينيات
لأسباب كتيرة جدا زي الأدب العالي والشوارع المريحة للنفس والأعصاب والدخل المتوسط الي يعيشك كويس والأنفتاح الأقتصادي

اعتقد مش هعيشها حاليا في الدار الدنيا بس بتمني اشوفها واعيشها في الدار الأخرة لأني هموت واعرف شوية حقائق كدة بردو مش هتبان دلوقتي خالص وبتمني اعرفها هناك ....


والله المستعان
،
،

[Ghosts]

موضوع حلو يا SYD ....
أنا شايف أن بداية تدهور حال البلد كان مع بداية التمانينات ....
والتدهور دة شمل حاجات كتيييير أوى يعنى عندك تدهور فى التعليم ....
والصناعة والزراعة والثقافة وأنتشرت العشوائيات والأمراض وزادت جدآ ....
حوادث الطرق لدرجة أن مصر أخدت المركز الأول فى نسبة الوفيات الناتجة عن حوادث السيارات ....
طبعآ دة شىء طبيعى جدآ لما يكون رئيس الدولة أنسان فاسد ومهمل ومغيب زى مبارك ....
وأنا زيك بالظبط نفسى أعيش فى فترة الخمسينات ....
ومش مشكلة لو رجعت لورا كمان وعشت فى ....
التلاتينات و الأربيعينات ....
لكن من أول ....
التمانينات ....
وطالع

[SYD]

شكرا Ghosts علي مرورك

نورت الموضوع

[AkramArafa]

عصر الفراعنه او القرون السبعتاشر لحد القرن التسعتاشر
لكن لو في اللي انت كاتبه يبقي التمانينات

[Donzi]

خمسينات و ستينات

اي ماقبل عصر الانفتاح و لو اني افضل ما قبل الخمسينات و الستينات كمان

[pro_samir]

لما والدي بيحكيلي عن طفولته كنت بتمني اعيشها .. اصل العائله عندنا كانو اقطاعيين ههههه

كتير كنت بقعد اتخيل كلامك بس مش متخيل ان الواحد كان هيبقي مرتاح في اي عصر من العصور لأن دي طبيعة الدنيا .. هو كل ما الزمن بيعدي بتزداد سوء بس ده مش معناه انها كانت حلوه قوي يعني زمان أكيد كل فتره وليها همومها

وفي حاجات من اللي شايفنها زمان كانت ممتعه لو عيشناها وقتها مكانتش هتبقي ممتعه .. زي الشوارع الفاضيه معتقدش انهم كانو بيمشو يتمزكو بإن الشارع فاضي لأنهم مشافوش الزحمه اصلا .. بالعكس ده الناس كانت بتخاف تمشي في اماكن كتير علشان مفيهاش صريخ ابن يومين

اللي بيصعب عليا اطفال اليومين دول .. يمكن الجيل بتاعنا لحق ايام طفوله حلوه بقت ذكريات جميله لكن كل حاجه بتفقد طعمها مع الوقت

[SYD]

عصر الفراعنه او القرون السبعتاشر لحد القرن التسعتاشر
لكن لو في اللي انت كاتبه يبقي التمانينات

شكرا ميخو علي مرورك
بس انت رجعت ورااااا اوي رجعت لحد الفراعنة والقرن السابع عشر
الأنتقال عندك علي مراحل واسعة اوي
ترجع 7000 سنة وتنط 1600 سنة بعد الميلاد وبعد كدة تنط لحد ال80

وكل دة من غير حتي سبب

عموما شكرا علي مرورك

الله المستعان
،
،

[SYD]

خمسينات و ستينات

اي ماقبل عصر الانفتاح و لو اني افضل ما قبل الخمسينات و الستينات كمان

شكرا استاذة دونزي علي مرورك

بس بدون اسباب ؟؟؟

الله المستعان
،
،

[AkramArafa]

شكرا ميخو علي مرورك
بس انت رجعت ورااااا اوي رجعت لحد الفراعنة والقرن السابع عشر
الأنتقال عندك علي مراحل واسعة اوي
ترجع 7000 سنة وتنط 1600 سنة بعد الميلاد وبعد كدة تنط لحد ال80

وكل دة من غير حتي سبب

عموما شكرا علي مرورك

الله المستعان
،
،

لا طبعا فيه اسباب
الفراعنه عشان بحب الزمن ده جدا و بحس ان ربنا كان مديهم علوم رهيبه مش عند حد دلوقتي و تكنولوجيا خارقه
اما ال الف و سبعميات بحب الزمن ده عشان عصر الابحار و استكشاف القارات و كده و انا بحب البحر جدا
اما التمانينات عشان البلد كانت نضيفه و برضوا كان فيه تكنولوجيا و عربيات حلوه

[SYD]

لما والدي بيحكيلي عن طفولته كنت بتمني اعيشها .. اصل العائله عندنا كانو اقطاعيين ههههه

كتير كنت بقعد اتخيل كلامك بس مش متخيل ان الواحد كان هيبقي مرتاح في اي عصر من العصور لأن دي طبيعة الدنيا .. هو كل ما الزمن بيعدي بتزداد سوء بس ده مش معناه انها كانت حلوه قوي يعني زمان أكيد كل فتره وليها همومها

وفي حاجات من اللي شايفنها زمان كانت ممتعه لو عيشناها وقتها مكانتش هتبقي ممتعه .. زي الشوارع الفاضيه معتقدش انهم كانو بيمشو يتمزكو بإن الشارع فاضي لأنهم مشافوش الزحمه اصلا .. بالعكس ده الناس كانت بتخاف تمشي في اماكن كتير علشان مفيهاش صريخ ابن يومين

اللي بيصعب عليا اطفال اليومين دول .. يمكن الجيل بتاعنا لحق ايام طفوله حلوه بقت ذكريات جميله لكن كل حاجه بتفقد طعمها مع الوقت

استاذ سمير
انت كلامك كله جميل جدا
فعلا كل زمن وفيه حلوه وفيه وحشه
اعتقد زمان كان ممكن يبقي بأيدك تخلي ايامك حلوة او وحشة لكن دلوقتي كلها مش حلوة (مش عايز اقول وحشة)
انا معاك ان زمان في الخمسينيات والستينيات كانت الدنيا فاضية ودة كان عيب بس كان ممكن اقصي حاجة تخاف من العفريت او العو او امنا الغولة لكن انك تخاف ان ابن منطقتك او ابن بلدك حتي يرفع عليك مطواة ويقلبك في الموبايل والساعة والفلوس وحتي لو لابس نظارة نظر يمكن ياخدها منك

زمان كانت الدنيا بخير
المناطق الشعبية زي بولاق ابوالعلا والسيدة زينب وشبرا كانت منطقة الناس البسيطة مش اوكار للمخدرات والحرامية انا معاك ان فيها احسن ناس في الدنيا وخارج منها ناس زي الفل هنا معانا في المنتدي بس هما بنفسهم يقولولك (انت طبعا راجل اقطاعي ماتعرفش غير الفرنساوي ودروس البيانو والمايونيز) ههههههه

انا كنت ساكن في عين شمس والمطرية وما ادراك المطرية وعين شمس النهاردة
تعالي شوف نفس عين شمس والمطرية سنة 1969
الشوارع مكنوسة ونظيفة
الناس بتحب بعض وعارفة بعض
عين شمس نفس البروجرام
انا مرة شوفت فيلم لاسماعيل يس هو واحمد رمزي وعبدالسلام النابلسي، المفروض انهم سرقوا عربية جيب من الوحدة العسكرية بتاعتهم وطلع وراهم كذا عربية جيب
الوحدة العسكرية الي هربوا منها دي كانت عبارة عن وحدة عسكرية في منطقة شبه غير مأهولة بالسكان شوارع متسفلتة ونظيفة وفاضية علي الأخر انا بتفرج علي الفيلم وعمال اقول المنطقة دي فين المنطقة دي فين طلعت منطقتنا عند بيتنا عرفتها والله من الشوارع لما فضل يدخل يمين في شمال وطلع علي شوارع انا عارفها
عارف المنطقة دي دلوقتي
المنطقة دي بنسميها غرب المساكن - نهاية شارع العمران - متفرع من شارع منشية التحرير - دلوقتي المعسكر دة تحول الي حاجة كدة ملاعب كورة و اي كلام يعني زي ساحة شعبية
والبيوت بقت زحمة والقهاوي والشوارع مليانة ورق ومخلفات وناس كتير رايحة وناس جاية

لا يمكن انسي منطقتي بتاعة زمان لما كانت فاضية نوعا ما ومدرستي (الصراحة كنت بكره كل الشوارع المحيطة والمؤدية الي المدرسة) ههههههههههه

زكريات

والله المستعان
،
،

[SYD]

لا طبعا فيه اسباب
الفراعنه عشان بحب الزمن ده جدا و بحس ان ربنا كان مديهم علوم رهيبه مش عند حد دلوقتي و تكنولوجيا خارقه
اما ال الف و سبعميات بحب الزمن ده عشان عصر الابحار و استكشاف القارات و كده و انا بحب البحر جدا
اما التمانينات عشان البلد كانت نضيفه و برضوا كان فيه تكنولوجيا و عربيات حلوه

انت دماااااااااااااغ عالية اوي

فعلا الفراعنة يستحقوا ان الواحد يرجع ليهم بالزمن
ايام سيدنا يوسف وسيدنا موسي

وفعلا بردو ال1700 كانت فترة جميلة اوي
تربي شعرك وتلفه وتلبس طاقية عاملة زي برج الحمام فوق دماغك
وتركب سفينة شراعية وتكتب علي ورق بردي

لا كدة انا معاك
بس ربنا يستر طريقنا من القراصنة والكنز المفقود

الله المستعان
،
،

[pro_samir]

عندك حق اكتر حاجه مش هتتعوض هي الأخلاق

في الستينات مستحيل كان حد يثبتك ويسرق الموبايل .. جايز علشان مكانش في موبايلات ههههه

عارف المطريه كويس ليا عمتي قاعده فيها من زمان جدا وأماكن كتير في القاهره ليا قرايب منتشرين فيها من زمن ما بين احياء شعبيه واماكن راقيه .. شبرا مثلا دلوقتي عامله ازاي ومن عشرين سنه كانت ازاي .. الناس اتغيرت وغيرت كل حاجه

والبركه برضو بتقل مع مرور الزمن