سؤال للناس اللي سافرت بره

[khaloooda]

عندي سؤال يا جماعة
للناس اللي جربت السفر للخارج
سواء شغل او دراسة او غيره
وعاشت هناك فترة من الزمن
طويلة او قصيرة
مش مهم

مع ملاحظة باني اقصد بالخارج الدول الغير عربية
لان اخوانا العرب يشبهونا كتير كمصريين حتي وان اختلفنا في بعض الامور

المهم ،،
السؤال : ايه اكتر حاجة عجبتك في المجتمع الغربي وكنت تتمني انك تلاقيها في بلدك
واقصد بالحاجة دي
الناس نفسها او الجانب الانساني مش الحضاري

لان طبعا لو علي البلد : يبقي النظام وعدم الفوضي هييجوا اول حاجة - ده رأئي

انا شايف ان احسن حاجة علي الصعيد الانساني
هو " عدم التدخل في شئون الاخرين "
واحترام الحدود الفاصلة بين حريتك وحياتك الشخصية وحرية وحياة الاخرين
وعدم تخطي الحدود دي الا بعد اشارة منك بالسماح بتخطيها

ااااااااااه .... ده الواحد ليه مع الحشريين مواقف تنقط بلد
كنت الاول بتكسف احرج حد حشري
لكن بعد كده لقيت ان ما باليد حيلة
وكلمة "وانت مالك" بقت علي لساني علي طول

انتو ايه رأيكو
ايه احسن حاجة في نظركم

[أحمد كمال]

الأمانة المفرطة ...... يعني ممكن تروح تشتري من محل يقول لك بلاش و تعالى بالليل عشان هتعمل ديسكاونت .......


بلاش ...... تحب انقطك ؟؟؟؟؟ سنة 1997 كنت في المانيا باشتري شوز اديداس من محل ..... سعر الشوز كان كام؟ 129 مارك و 95 بفينيش (المارك 100 بفينيش و المارك هناك وقتها ما يجيبلكش كان بيبسي !) ........ اديته 150 مارك ...... رجع لي 20 باتدور و امشي لقيته بيقول لي ثانية انتظر و راح فتح درج الفكة طلع لي 5 بفينيش (ما يجيبوش حتة عيش حاف اساسا) .....

[egyptawy2010]

الأمانة المفرطة ...... يعني ممكن تروح تشتري من محل يقول لك بلاش و تعالى بالليل عشان هتعمل ديسكاونت .......


بلاش ...... تحب انقطك ؟؟؟؟؟ سنة 1997 كنت في المانيا باشتري شوز اديداس من محل ..... سعر الشوز كان كام؟ 129 مارك و 95 بفينيش (المارك 100 بفينيش و المارك هناك وقتها ما يجيبلكش كان بيبسي !) ........ اديته 150 مارك ...... رجع لي 20 باتدور و امشي لقيته بيقول لي ثانية انتظر و راح فتح درج الفكة طلع لي 5 بفينيش (ما يجيبوش حتة عيش حاف اساسا) .....

معلش طلب لرة الموضوع ياستاذ احمد انا بعت لحضرتك كذا رسالة خاصة للاستفسار عن شى مهم لى ياريت حضرتك تشوفها

شكرا جدا

[mmtronic]

انا زرت كتير فرنسا و سويسرا و اطول مدة قعدتها كان فى فرنسا ( شهر و نص ) بحكم شغلى

مبدائيا كدة لمل تعيش هناك و تشوف الناس و التزامها و النظام و قد اية النظام و الالتزام جزء من حياة الناس هناك تحس لما ترجع مصر انك عايش فى ...................

انا ححكيلك عن مجموهة مواقف صغيرة و بسيطة لكن تبين اد اية احنا قدمنا كتييييير قوى علشان نتقدم بالبلد دى

1- المرور : انا فى شهر و نص لم اشاهد حادثة واحدة على الرغم من انى كل يوم كنت بسلك الـ high way من مركز المدينة و العكس

انا فى خلال اسبوعيين ( و دول غير الشهر و نص ) لم اسمع غير 2 كلاكس و الله ما ببالغ

اول مرة نزلت فرنسا و كنت يشوف التزام الناس باشارات المرور كنت بفكر ان فية كاميرات على كل اشارة لكن بعد ما دققت فى كل اشارة اتضح انها مجرد اشارات اتوماتيك بدون اى رقابة

حدث معى - كنت راكب تاكسى الى المطار صباح يوم احد و دة معناة ان لا يوجد بنى ادم فى الشارع الساعة كانت حوالى 7:30 و عدينا على اشارة مش فى تقاطع - اشارة عند عبور مشاة لمدرسة و طبعا مفيش مدرسة لان كان اليوم الاحد - اصلا مفيش حد فى الشارع غيرنا و مش تقاطع و السواق وقف فيها لغاية ما قلبت اخضر

مواعيد المواصلات العامة هناك و المترو و الترماى بالثانية و الله لا ابالغ - بالثانية

كنا راكبيين مع احد زمايلنا الفرنسيين و عدينا على اشارة - الاشارة علقت و فضلت حمراء - و الله صف العربيات فضل واقف ازيد من ربع ساعة لغاية ما اتاكدو انها معلقة و ابتدو يتحركو عربية عربية تعدى التقاطع بحزر

هناك مفيش كمسارية فى المترو ( و اعنى المترو الى فوق الارض مش supway ) اى انك لازم اول ما تركب تختم التذكرة من ماكينة صغيرة بداخل المترو و انت و ضميرك ( اى نعم فى مفتش ممكن يطلع فى اى لحظة بس دة مشفتوش و لا مرة - شفتة مرة فى الاوتوبيس )
على فكرة اتوبيسات النقل شكل تانى غير الى انت متخيلة - حاجة تحسسك انك بنى ادم

فى المناطق التجارية متلقيش ابدا صف تانى و لا تالت و لا واحد يركن بالعرض علشان يخطف حاجة بسرعة من المحل الفلانى و لا اصل مفيش اماكن فنركن فى اى حتة انشالة الناس تولع و لا التهريج دة زى ما بنشوف بجانب سيتى ستارز او المول الجديد الى فى مدخل التجمع الخامس

على مستوى المرور - انا ليسة عندى قصص و قصص بلاش اطول عليك



2- الشراء و الاماكن التجارية :اول ما تخش محل تتفرج قبل ما تشترى تلاقى البنت او الولد الى فى المحل يجيلك و يقولك صباح الخير او مساء الخير و يسيبك براحتك تتفرج و لو حتى ما اشترتش يودعك بابتسامة صافية زى ما استقبلك تمام مش زى عندنا يلزقلك و يقرفك و يضيع تركيزك لغاية ما تزهق و لو سالت على حاجة و تطلع مش عندة يقلب وشة و ممكن ميردش عليك او يفرض عليك حاجة تانية انت مش عايزها او يقولك اة موجود الى انت عايزة و تكتشف و انت بتحاسب انة حاجة تانية خالص

قانون الارتجاع مطبق هناك حتى لو فتحت العبوة الى متبرشمة و اكتشفت ان المنتج مش عاجبك بتروح بايصال البيع ترجعة ببساطة شديدة و تاخد فلوسك و حبابيب كمان

يوم الاحد يعنى عطلة - مفيش محل تجارى فاتح ما عدا المطاعم و السينيمات و الله حاولت الاقى يوم الاحد محل اشترى منة اى حاجة ملقيت ابدا

3- القمامة : مشفتش اى زبالة فى الشارع او اكوام زبالة الا للاسف فى الحى العربى هناك
طول ما انت ماشى فى الشوارع هناك متشفش حاجة تاذى عينك او تدايق عينك

الزجاجات الفارغة هناك ليها مكان مخصص بتترمى فية موجود فى كل مكان و شارع


4- الخصوصية : و دى الاهم - كل واحد هناك فى حالة - عارف لو واحد قلع ملط و مشي فى الشارع محدش حيبص عليه لان كل واحد مع نفسة و لا يهتم بتتبع عورات و خصوصيات غيرة

و الله عندى كلام كتيير و مواقف كتيير بس مش عايز اطول عليكم و اتمنى اشوف بلدى زى ما شفت البلاد دى بس المشكلة فى ( الناس و الثقافة العامة ) - كل عام و انتم بخير

[abou_ruqi]

متابع

[heshamzaky]

الى انا بنفسى شوفة و تحديدا فى سويسرا سواء زيورخ أو جنيف
زى ما الزملاء قالو بالظبط الامانة فى المعاملة يعنى لما كنت بشترى حاجة بصراحة تقريبا ما كنتش بأعد الباقى و بحطة فى جيبى على طول لانى متأكد أنة مظبوط حتى بالفروق الى هى ما تسواش حاجة و اسمها ((( ربة )))
و أنت ماشى على رجليك بتعدى الشارع الاولية للى ماشى على رجلية مش العربيات و الاشارة عمود صغير أرتفاعة قصير نسبيا و فية زرار أنت ممكن تدوس على الزرار تقفل الاشارة و تعدى أنت و فى نفس الوقت لو عديت من غير أماكن عبور المشاة ممكن جدا تتخبط لان الى سايق مش متوقع نهائيا ان حد ينزل فى نص الشارع و يعدى زى عندنا كدة
المرور عندهم غريب شوية العلامات الى عندهم على الارض مختلفة يعنى تلاقى رسمة زى المثلثات كدة فى الصينية و اليو ترن عندهم يمين مش شمال زى عندنا و بتكون فى نفق يلف من تحت الطريق علشان تروح للأتجاة المعاكس
حاجات كتير جدا جدا جدا حلوة الميزة أنك بيبقى متأمن عليك تأمين صحى مفيش أى مشكلة العلاج و الادوية و كشف الطبيب عندهم غالى شويتين بس كلة لة تأمين صحى عندهم حد أدنى للأجور و حتى باقل حد للاجور تقدر تعيش كويس و تقدر تجيب عربية مفيش مشكلة
العربيات فية من أول 1000 فرنك و 1500 فرنك مستعمل بس حالات زيرو
بالنسبة لصيانة العربيات بتتم داخل ورش متخصصة يعنى مفيش حاجة اسمها أنك تشترى زيت و تغيرة انت بمعرفتك
فية كاوتش صيفى و كاوتش شتوى
الشارع مفتوح و تقدر تجرى براحتك بس فية كاميرات بتصور و لو عملت مخالفة بتدفع لا محالة
الغريب أن بالرغم من كل دة المرتب الى انت بتاخدة تقريبا بتصرفة يعنى بتاخد باليمين و تصرف بالشمال و صعب تركن العربية فى الشارع كدة مجانا حتى تحت البيت عندك فية مستطيل أخضر و مستطيل بلون أخر واحد مسموح بالركن ببلاش و الاخر بفلوس
مساحات الشقق عندهم نسبيا صغيرة مش زى عندنا نهائيا مفيش المساحات دى الا لو زى الفيلا بجنينة لكن العمارات مبدئيا مش عالية و الايجار غالى على فكرة
أسعار تذاكر الاوتوبيس و القطار بالنسبة لنا غالية شوية و ممكن تشترى مثلا تذكرة مدتها 24 ساعة تركب بيها أى عدد مرات و دى افضل طبعا
.........................
أما بقى بالنسبة لموضوع الناس فصدقنى و الله برضو عندهم حب استطلاع و برضو بيتكلمو على بعض خصوصا الناس الكبيرة فى السن هو محدش بيبص على الاخر بس بيرغو كتير
الناس العجوزة بينتشرو فى البلد صباحا و تلاقيهم فى كل مكان و فى المواصلات و بيروحو قبل ميعاد خروج الناس من شغلهم علشان الزحمة بتاعت المواصلات و صعب شوية تلاقى اوتوبيس الناس فية واقفة و محدش قاعد على كرسى
يوم السبت بيبقى نصف يوم عمل و الاحد أجازة كلة قافل و مفيش سهر البلد بعد 8 مساء بتبقى مدينة الاشباح الا أماكن معينة

[No Comment]

موضوع جميل ... ومنتظر الكثير من التفاصيل .
يمكن الواحد يخرج بيه شوية من اللى بيشوفه بشكل يومى ... ويمكن الواحد يتحسر بيه على حاله فى بلدنا ويحصله حاجة .
ولـــــــــلأسف ... متـــــــــابع .

[khaloooda]

سبحان الله !!!!!!!!!!!!!!
موضوع زي الامانة
غالبا مش بتبقي العملية عندهم امانة بالمعني الديني عندنا
لأ
بتبقي بمنطق تجاري سليم جداااااااااا
ماهو انا لما احسسك كمشتري اني تاجر امين ومصلحتك تهمني زي فلوسك بالظبط
اكيد اكييييييييييييييييد هترجع لي تاني
وواحد ورا التاني ابقي ربيت زبون

لكن عندنا
حدث ولا حرج
اهم حاجة ازاي تكيس الزبون وتعممه وتلبسه الحاجة باعلي سعر
يعني هو هيجبك منين
واذا كان فاضي وجالك مثلا من مصر الجديدة لحد مدينة نصر
مفيش مانع
اتخانق معاه وامسك فيه ان لزم الامر

حسبي الله ونعم الوكيل

[heshamzaky]

بمناسبة الامانة حا اقولك حاجة غريبة شوية
الطبيعى فى مصر لو انت داخل أى مجل أو سوبر ماركت حتى و معاك شنط بياخدها منك على الباب و يدليك رقم علشان تستلمها عند الخروج و الفكرة الخوف ان حد يسرق حاجة و يحطها فى الشنطة الى معاة
فى سويسرا حصل موقف غريب و بعد كدة فهمت الموضوع كنت شارى حاجات و معايا شنط جيت داخل محل ملابس اخر علشان اشترى حاجة تلقائيا حاولت أدى بتاع السيكيورتى او الكاشير الشنطة الى معايا الاول و انا داخل لاحظت فى كذا مكان انهم ما بيبقوس مبسوطين لان دة مش شغلهم و لا هما اساسا مفروض يحتفظو لك بالشنطة و بيعتبرو ان دة على سبيل طلب خدمة و ليس الاساسى المطلوب منهم ههههههههههههههههه يعنى الموضوع عندهم بالعكس تماما غير عندنا
حاجة تانية مفيش حد بيجيب لك المقاس بتاعك و لا بيفضل واقف جنبك ألا لما تطلب منة و غير كدة بيسيبك براحتك نهائيا و لما تنادية يحضر اليك غير كدة ما يبقاش واقف يبحلق و عاوز يلزق لك أى بضاعة و سياسة الارتجاع مفيش اسهل منها مجرد أديلة البون و الحاجة الى عاوز ترجعها و خد فلوسك و امشى فى 5 دقائق

[solyahmed]

شوف حاجات كتير مختلفه للاحسن طبعااا حاجات تتحس وحاجات تتكون داخلك حقول لك نقاط صغيره سريعه

في المانيا مره وانا ماشي في مدينه صغيره اسمها سيندلنج ودي جنب المطار وماسك خريطه بدور فيها علشان كنت عايز اروح محطه القطار وانا ماشي علي رصيف الشارع نزلت ودوست برجلي علي خطوط مشاة وانا مش واخد بالي لاني باصص في الخريطه اللي معايا فجأه لقيت دوشه سير السيارات هدأت برفع راسي وابص كده لفيت الشارع المكون من 5 حارات واقف كله صف واحد قعت حوال 30 ثانيه احاول استوعب هما واقفين لقيه ؟ لغايه لما واحد راكب موتوسيكل لقيته بيشاور لي يعني اتفضل عادي هنا صدمت لما فهمت وخدت بالي اني دايس علي خطوط مشاه وان الناس ده وقفت علشان كده رحت طالع تاني علي الرصيف لاقيت العربيات كلها مشيت تاني

حاجه تانيه في فرنسا اشتريت موبيل وقعد معايا 10 ايام ورحت بدلته بمويبل نوع تاني مع انه ماكنش فيه حاجه والتاني ده قعد معايا اسبوع ورحت رجعته وخدت فلوسي تاني وعرفت ان ده عادي جدااا والقانون يسمح بكده غير كده الضمان علي اي جهاز حقيقي مائه في المائه ولا حتي تحس ان البايع مضايق حصلت معايا في لاب توب وبعد 6 شهور رحت غيروه بواحد تاني ومن نفسهم ولا خناق ولا صوت عالي

الاحترام فوق الوصف بين الناس وبعضها سواء خبط في واحد وانت ماشي يعني عطته كتف او عربيه خبطت عربيه اول حاجه بعد الخبطه ينزولوا يطمنوا علي بعض ولا خناق ولا ضرب

الاسعاف الي بتوصل قبل معادها وعربيلت النجده الي ماشيه ليل نهار في الشوارع

النضافه الرهبيه وغسيل الشوارع الصبح وبليل

حجات كتيره واغلبها يتعلق بسلوك الناس ولو قعدت احكيلك مش حنخلص كتابه

[Hany A Fattah]

الالتزام والامانه ودقة المواعيد
كنت فى مانشيستر من حوالى سنه لحضور اجتماعات خاصه بالشغل
المهم كان فيه فتره بين الاجتماعات حوالى ساعه ونص فقولنا نروح استاد مانشيستر نتفرج عليه ونرجع
بنسأل البنت اللى فى الفندق على المكان وهانلحق نروح ونرجع ولا لأ راحت مطلعه خريطه للبلد وقالت لنا احنا هنا علشان تروحوا الاستاد هاتمشى لاخر الشارع ده حوالى 5 دقائق وهاتركب الترام 3 محطات ب6 دقائق وتنزل تمشى 5 دقائق وتكون عند الاستاد يعنى هاتتفرج حوالى 30 دقيقه وترجع فى 16 دقيقه يبقى هاترجعوا قبل الاجتماع ب 28 دقيقه
(دى دقة المواعيد عندهم )
المهم اخدنا قرار وقلنا هانروح كنا 4 اتنين مصريين واحد تركى من بولندا اخدنا الشارع فى اتجاة الترام وطبعا بطبيعة المصريين بنمشى نمد وصلنا للترام بعد 4 دقائق محطة الترام زى محطات ترماى مصر الجديده عندنا بس القطارات مختلف طبعا
المهم نقطع التذاكر ندور لقينا الماكينه على اول الرصيف طبعا تاتش اسكرين عليها رحله القطار بالكامل وبتحدد اذا كنت هاترجع فى نفس اليوم ولا لأ وتحط الفلوس يطلعلك التذكرة والباقى
الاحلى من كده القطار جه وركبنا وكل واحد فينا ماسك التذكره فى ايده مستنى الكومسرى علشان يشوف التذاكر لان مافيش ماكينه تعدى منها التذكره على الرصيف حتى طبعا ماحدش سأل فينا وجت المحطه بتاعتنا
نزلنا وقلنا جايز يكون فيه ماكينه خروج هنا لكن للاسف تخرج على الشارع علطول قولنا ماعلينا
روحنا واتفرجنا وانبسطنا فى ال30 دقيقه وكنا مستئليين الوقف بس طلع فعلا كفايه جدا
فى العوده للرجوع اتكرر نفس الموقف ومافيش كمسرى برضه طب ازاى طب احنا قطعنا تذاكر ليه وبعدين التذكره مش رخيصه دى ب3.5 استرلينى يعنى حوالى 35 جنيه طب بلاش احنا هل البلد اللى عارفين ان مافيش كمسرى بيقطعوا تذاكر ليه !؟
رجعنا على الفندق قبل الاجتماع ب30 دقيقة سبحان الله (ده بيوضح دقة المواعيد والالتزام عندهم)
الموقف الاحلى طبعا احنا كمصريين صعبان علينا تمن التذاكر يعنى لو واحد كان طلع وشغبط على التذكرة كنا هانستريح نفسيا
طب لازم نعرف الكمسرى الاهبل ده راح فين وساب الركاب كده ؟
بنسأل واحد من اهل البلد معانا فى الاجتماع وبنحكيله على اللى حصل ورحنا واتفسحنا وكده قلنا هايل واكيد انبسطوا
قولناله اه بس التذاكر دى ماحدش شافها تخيلوا كان الرد ايه البه قلنا ده الطبيعى !
احنا طبعا اتجننا طب ليه الناس بتقطع التذاكر ؟ قال علشان هما استخدموا الخدمه دى ولازم يدفع تمنها وبرضه بيبقى فيه مراجع كل فتره يعنى مره او اتنين فى الشهر بيراجع على التذكر ! واللى بيكون مش معاه تذكرة بيدفع غرامه كبيره
طبعا احنا دار فى مخنا منظرنا واحنا بنتهرب من الكومسرى فى بلدنا علشان تذكره بجنيه
سألناة طب ليه الناس بتدفع تمن التذكره مع انها ممكن تركب ببلاش ؟
رد وقال طب ماعندهم الفرى باص ببلاش معمول للطلبه واللى مش معاهم فلوس وبيلف البلد كلها ليه يتهرب من تمن التذكره
طبعا فتحنا بقنا على كلمه الفرى باص دى وقولنا اكيد بيكون علبة سردين
تانى يوم واقفين قدام الفندق نلاقى اتوبيس مكتوب عليه فرى باص وفاضى خالص زى باقى الاتوبيسات العاديه الفرق بس هو اللون والكتابه اللى عليه وبعدها ب3 دقائق واحد تانى وبعد 3 دقائق كمان واحد
ايه البلد الملتزمه زياده عن اللزوم دى والناس بتسيبه وتركب ابو فلوس اما عجايب
( وده طبع بيثبت التزام الناس دى )

يارب نكون ربعهم بس

[رزق]

برضه عالأمانة
بس المرادي اليابان
اشتريت كاميرا semi
طالع من المحل لقيت نفس الكاميرا بالضبط في الفاترينة أغلى شوية حلوين
سألته
قال لي ماهو أصل ده لوت جديد جبناه بسعر أغلى
وهي نفس الكاميرا ونفس المنشأ
...
فكرني باللي بيشم إن السجاير شاحة أو حتغلى ويكنز عشان يبيع البضاعة اللي جابها بالسعر القديم بالسعر الجديد ويبقى الواد الفتك
وياريت جت عالسجاير ده الدوا نفس الكلام

[Medicalist]

عقدتونى

[shaddadfalcon1]

بتفكروني ليه بس

كنت في كندا سنه 2007

طبعا بغض النظر عن التكنولوجيا والنظافه والعربيات والتخطيط الصح ومفيش مكان ممكن يستقبل زباين او شغال فيه ناس لازم تلاقي اماكن كافيه للركنه لدرجة ان كل مكان كنت تلاقي جنبه مساحه قد المكان 5 مرات للركنه

اما عن الناس فلما كنت بدخل اكل مثلا في مطعم الاقي وانا بطلب الناس ترجع ورا عشان متشوفش انا عايز ايه ومضاقنيش ولما رحت المطعم كذا مره وطلبت نفس الحاجه كانت البنت تشوفني داخل من الباب تنادي عليا وتقول اسم الحاجه اللي انا عايزها وكنت اهز راسي تقوم طلباها من نفسها

وموضوع الطريق اللي لما تبقي عند اشاره تضغط علي زرار يقصر الفتره اللي العربيات بتعدي فيها ويعديك انت
ومره كنت ماشي بين شارعين ووقفت عشان اعدي لقيت واحد جاي من بعييييييييييييييييييييييد قام موقف فانا فضلت واقف مستنيه لقيته قرب وبيقولي عدي بصراحه كنت في نص هدومي ولو في مصر كان مخدش باله اني واقف اصلا

والموقف اللي كل مافتكره يحرق دمي هو كالاتي
اتوبيس انضف من الملاكي عندنا ووقف في المحطه بتاعته ومش هقول المحطه دي عامله ازاي وكان في راكب معاه عربيه صغيره فيها خضار شبه بتاعة الأطفال كده وبعدين جي بسلامته يدخل بالعربيه زاققها قدامه فالعجله بتاعة العربيه كانت اوطي جوالي 5 سم عن عتبة الاتوبيس
اي عاقل مننا هيشيل العربيه لكن ده بص لسواق الاتوبيس واسمع احلي تييت تيييت تيييت والاقيليك االاتوبيس بنزل كله لتحت لحد مابقي في مستوي الرصيف والزبون ركب وتييت تتتي تييت طلع الاتويس تاني وانا واقف بقي مدلل عل الأرض من الصاعقه

ده غير تحضر الناس في الشارع والأحترام في الامكان السياحيه والمترو وكل حاجه

بالرغم من انها كانت 3 اسابيع الا اني صدمت لما رجعت مصر

[khaloooda]

كده كتير يا جماعة بصراحة
انا عاوز اتعقد اه
لكن مش كده
امال احنا هنا ايه
معيز ؟؟؟؟؟؟؟؟؟؟؟؟؟