سؤال للناس اللي سافرت بره

[abou_ruqi]

يمكن علشان وجودهم باعداد كبيره فى مصر للدراسه فى الازهر
مخليهم محترمين المصريين شويه
الا بحق مينفعشى تخدنى ماليزيا معاك نفسى اسافر اى بلد بره دمنهور

اتفضل

http://www.nilemotors.net/Nile/234718-a.html

[shaddadfalcon1]

حاجه تانيه هي الالتزام بالمواعيد
انا كنت هناك باستلم شغل من واحد وهو بيتكلم الساعه جت 5 قام موقف كلام وقالي نكمل بكره وبصراحه معجبنيش الموقف خالص لان بحس الناس متبرمجه علي الوقت وبيدلعو قوي مش عارف ده عامة ولا في الشركه اللي انا كنت فيها بس لان الناس كانت بتيجي 8 او 9 وعلي الساعه 12 الظهر يتطلعو ساعه بريك وياكلو ويتمشو شويه في الجنينيه اللي حولين الشركه وبعدين ييجو وكنت بحس ان مفيش انتاجيه خالص زي عندنا
كنت عايز اقوله يابن التييت ده انا ساعات مش بروح البيت خالص لمدة اسبوع

حاجه حلوه ان مفيش حاجه اسمها البلد صاحيه لحد الصبح ومفيش حاجه اسمها خروجات وفسح طول الأسبوع زي الهبل اللي عندنا
الناس الساعه تيجي 9 بالليل كله يقفل وكله يبقي في بيته عشان ينام بدري ويصحي بدري يروح شغله مش زينا الموظف معاده الساعه 8 الصبح تلاقيه نايم بعد الفجر عشان سهران في القهوه ولا في المول ولا في البيت ويروح شغله الساعه 11 نايم مش شايف قدامه

هناك طول الأسبوع شغل وبس وفي الأجازه يعمل اللي هو عايزه وعشان كده تلاقي البلد فايقه ورايقه علي طول مش زي عندنا طول الأسبوع زحمه وبالليل ازحم عشان كله بينزل بالليل في اي يوم

[abou_ruqi]

لا مواعيد العملوالراحة مقدسة في كل حتة في العالم ، لو حيكسب منك مليون دولار وجت 12 حيسيبك ويقوم

[tutankhamoun]

طبعا الأخوة الكرام ما سابوش حاجة لي أضيفها

هاقول حاجة و هي الفروق ما بين الناس هنا و الناس هناك :
التدين هنا أغلبه ظاهري .... و باطنه زفت (بيبان في المعاملة )
التدين هناك مفيش و لكن هو مش بيدعي التدين و بيحاول يتعامل مع الناس بالمبدأ الأنساني اللي أصلا الدين بيحث عليه (الحرية و عم التدخل و أحترام الآخرين - أحنا هنا واخدين كل حاجة منظر و مظهر فقط بدون تطبيق )
النظافة العامة في الشوارع ............. و دي من أهم مميزات هناك .......
و عدم النظافة و العفانة من أهم مميزات الناس هنا (اللي يرمي من شباك عربيته زبالته علشان هو زباله و اللي يرمي من بلكونته سيجارته على جيرانه اللي تحته علشان هو معفن )
الحاجات دي صعب تلاقيها هناك .
الألتزام ..... دي سمة من مميزات هناك
و عدم الألتزام و عدم التحضر من أهم سمات الناس هنا .
الناس هنا بتكره النظام بطريقة غريبة و تحسسك أن النظام ده شئ خطر على الصحة العامة .
الناس هنا بتقاطع بعض في الكلام كتير على العكس من هناك .... كل واحد بيأخد فرصته في الكلام .

من الآخر

هنا أحنا عايشين كالبهائم ................ و هما عايشين كالبني آدمين
سلوكيات زبالة و زفت هنا .......... سلوكيات رائعة هناك .

طبعا من أهم عيوب هناك
الحرية المفرطة في موضوع الملابس و الجنس .... هما في الحتة دي زي البهائم.
و لكن مع ذلك هناك أمانة شديدة في التعامل مع أغلب الناس و المحال التجارية و هناك أيضا أحترام شديد للعمل و العاملين.

[abou_ruqi]

احنا مش زبالة قوي كده وهما مش ملايكة قوي ما احنا شوفنا بعض شواذ القاعدة عندهم يعني في ناس بتركن في الممنوع وناس بتكسر اشارات
بس دول قلة مندسة اما الاغلبية فملتزمة بعكس عندنا

[wael3m]

بص يا سيدى بالاضافة لكل ما سبق من الاعضاء من دقة مواعيد والتزام فى الشغل
والتزام فى المعاملة الا ان فى موقفين مأثرين فيا شوية

الموقف الاول

راجع من شغلى فى الفندق تقريبا 12 باليلل وتقريبا مفيش حد ماشى فى الشارع
على رجليه غيرى وألاقى 2 ستات واقفين شبه بيتخانقوا ومعاهم كلاب فى ايديهم
( معلين صوتهم بس مفيش ضرب)
طبعا انا ماشى جنبهم وغامل بمبدء وانا مالى لقيت واحدة بتنادى عليا منهم وبتسألنى تليفونى
علشان تطلب الاسعاف ّ!!!! طبعا وقفت وطلبت الاسعاف وبسالها حد حصله حاجة ؟
ردت عليا وقالتلى ان كلب الست التانية عض كلبها اللولو وعمال ينزف وطبعا اخوكم كان
مستغرب من الموقف انهم بتكلموا من تليفونى علشان كلب والأغرب ان الاسعاف كانت
موجودة فى أقل من 5 دقايق

وقلت ياه دا الناس فى مصر عندنا بتفضل تنزف على الاسفلت بالساعات لحد الموت
ومفيش حد بيجيلهم

ملحوظة . هناك لما بيمشوا كلابهم غالبا مش بياخد معاه لا تليفون ولا محفظة حتى بس مفتاح الشقة


الموقف التانى


يموت برد جدا فى روما ودرجة حرارة تقريبا -2 ودى مش بتحصل ألا نادرا اشوف فى الاخبار
انهم هيفتحوا محطات المترو باليلل للمشردين علشان يناموا فيها لان فيها دفايات طبعا
ياه على الرحمه وصلت بيهم انهم يفكروا فى المشردين

ملحوظة . المترو بيقفل الساعة 12 بالليل

[tutankhamoun]

حاجة كمان عايز أضيفها
الناس هناك مش بتتكسف من الشغل
هنا بنتكسف من شغلنا لو مش على مستوى
و بنستقلل شغل المطاعم مثلا أو الأمن أو النظافة .... هناك الناس تسألها تجاوبك بكل فخر هي بتشتغل أيه .
و زي ما أبو روقي ما قال ...... الشواذ في كل مكان من كل قاعدة
يعني أحنا عندنا شواذ قاعدة التخلف و لكنهم قليلين و تعبانيين في حياتهم مع الأغلبية الهمجية .
و العكس هناك .

[abou_ruqi]

بمناسبة ان الشغل مش عيب
هنا في ماليزيا في بلد اسمها بوتراجايا هي العاصمة السياسية وذات اغلبية مسلمة
كل يوم في رمضان في مكان كبير قد ملعب كرة القدم من العصر للمغرب بيتعمل فيه شدات ، وكل شد جواه واحدة ست او اكتر عاملين نوع معين من الاكل المطبوخ وجاهز بيبيعوه للناس اللي طالعة من الشغل ومروحة ومش حتلاقي وقت تعمل فطار ، حاجة بتاعة متين شد بمتين نوع اكل وسعره معقول واهي الناس بتسترزق والاكل بيتي وطعمه حلو
وممنوع حد بروفيشنال او مطعم يقف يبيع معاهم ، ربات البيوت بس
المهم الناس شكلها غلبان واهي بتسترزق
جبت منهم اكل بتمن بسيط قوي وفطرت انا واسرتي الاكل ده في جنينة على بحيرة وبعد العشا عديت بالصدفة على المكان ده لقيت الستات دي واقفة وبتلم حاجاتها وذهلت من المنظر
كل شد قدامه عربية بتاعة البياعة بتحط حاجاتها واقل واحدة فيهم معاها جين تو ، ناهيك عن البي ام والاند كروزير ونيسان مورانو

وحدة عندها مورانو واقفة تطبخ في الشارع !

[MASERATI]

السلام عليكم و رحمة الله و بركاته

و عليكم السلام و رحمة الله و بركاته.................عايز تفهمنا انك نجحت من اول مره ...............

أنا للأمانة, نجحت فى اختبار النظرى من أول مرة, بس نجحت فى اختبار القيادة على الطريق من تانى مرة.

حضرتك شايف انك طلعت رخصة سواقة بسرعة............. !

ما هى الساعة دى يا باشا, شاملة كل حاجة, المشوار لحد البنك و كان بنك HSBC فى الأول و لقيت أنى مش هأقدر أفتح فيه حساب الا تانى يوم و سيبته و روحت بنك RBC و فتحت حساب و أخدت الافادة و طلعت أنا و جوز أختى على شركة Sasktel بتاع التليفونات و الموظفة طبعتلنا فاتورة و أضفت اسمى عليها و ختمت الفاتورة و أخدت كووووووووووووول الورق ده و رجعت ادارة التراخيص (المرور بتاعهم) و وقفت فى الطابور و قدمت الورق و دفعت المصاريف و اتصورت و أخدت الرخصة !!!!!!!!!!, كووووووووووول ده فى 60 دقيقة فقط لا غير.

الظريف فى الموضوع أن هناك بتروح أى مصلحة حكومية بتحس أن الموظف عنده فكرة عن الحاجة اللى أنت جاى تعملها كما لو أن حد مكلمه عنك قبل أنت ما تروح, مش بأه هنا فى مصر, تروح للموظف و تحكييييييييييييييله على اللى أنت عاوز تعمله و تلاقى طول ما أنت عمال تتكلم, الموظف عمال يفكر فى حجة عشان يقولك بيها -و هو فى منتهى السعادة- أن الحاجة اللى أنت عاوز تعملها دى متنفعش يا أستاااااااااااااااااااذ, متنفعش.

ماينفعش يا أستاذ, ممنوع, لله فى لله كده, من غير ماتكون أنت قاتل أبوه و لا حاجة.

[Medicalist]

بمناسبة الاحداث الى فى الموضوع و االتعامل مع الزبون
والدى ليلة العيد راح اشترى كشاف حوض الوش ب 80 جنيه المهم جينا نركبه تالت يوم العيد ما كانش شغال
جيت ارجعه من شوى كنت هتشاكل مع بتاع المحل منتهى القذاره وقله الذوق ويقولى وانا مالى ما الكهربائى يصلحه قلتله مش شغال ومش واصله كهربا مالى ومال الكهربائى المفروض اخده منك سليم وكان معايا خالى راجل كبير كلمت الكهربائى بتاعى ييجى يتصرف معاه و هو عارفه لما نشوف هيعمل ايه
منتهى النصب والسخافه ربنا ينتقم منهم ولا يبارك لهم

[dolly13]

المفروض ان الموضوع ده للمتعة ولاضفاء حالة ذهنية جميلة مش كدة ؟
اللى حصل معايا عكس كدة خااالص الله يسامحكو بقى على نقل التجارب دى لاخواتكم المصريين اللى كلهم هايجيلهم انهيار عصبى بعد مايقروا الموضوع

[khaloooda]

المفروض ان الموضوع ده للمتعة ولاضفاء حالة ذهنية جميلة مش كدة ؟
اللى حصل معايا عكس كدة خااالص الله يسامحكو بقى على نقل التجارب دى لاخواتكم المصريين اللى كلهم هايجيلهم انهيار عصبى بعد مايقروا الموضوع

ههههههههه
يا باشا ما هو متعة برضه
كفاية انك تعرف اخواتك الغلابة اللي عايشين بره دول عايشين ازاي
كتر خيرهم .... حياتهم صعبة اوي

لينا الجنة يا مصريين ان شااااااااااااااء الله

[mmtronic]

عارف الى بجننك اية فى موضوع عيشتهم و عيشتنا

ان اهل البلاد دى مش بالذكاء و لا الفطنة الى معظم الناس متخيلها بالعكس دول على قدهم
و ذكاء و ديناميكية المصرى برقبتهم بس و اة من بس دى

1- همة منظميين و دة بيوفر وقت معاهم بنضيعة احنا فى الهرجلة مع شغل المصريين ما انتو عارفيين

2- لما بيجى الواحد منهم يشتغل بيعمل 1 ثم 2 ثم 3 ثم 4 و لو اليوم يكفى 4 مهام يبقى مفيش 5 او 6
و كمان متلقيش 3 خلصت قبل 2 و بالمرة شغال فى 4 على السكة علشان اوفر بقيت اليوم و اريح و انتخ - مفيش الكلام دة

3- زى ما الاخوة قالو - بريك ( راحة ) يعنى بريك لو معاة مناقصة بتاعة ابوة بيسيبها و يروح الراحة بتاعتة

4- الاجازات مقدسة عندهم - اجازاتة السنوية بياخدها كلها قبل نهاية السنة و لا عندهم اصل حاجة العمل لا تسمح او لا مفيش اجازة و لا شيلو بعض و لا الهجايص دى

دى بعض النقط الى مخلياهم متفوقيين فى العمل على الرغم ان احنا اذكى منهم و اكثر ديناميكية

و النقطة الاهم هى تطبيق مبدا كن سعيد فى العمل تكن سعيد فى البيت لتعود سعيد مرة اخرة للعمل

[abou_ruqi]

موضوع ان احنا اذكى منهم ابسط بالعشرين عليها
وانا راجل زرت تسع دول اجنبية

[رزق]

احنا اذكى منهم هم اتعلموا ادنا 50 مرة

فعلا الموضوع إن هنا الفرد صعب قوي يمشي عكس التيار
هناك سهل إنك تكون كويس عشان معظم الناس كده
هنا .. ماظنش الموضوع بهذا القدر من السهولة