وبعدين في ازمة المعتمرين دي

[shaddadfalcon1]

النهارده والدتي كانت المفروض تركب من جده الساعه 8 بتوقيت السعوديه يعني كان المفروض تبقي قاعده في وسطينا دلوقتي
كلمتها الفجر قالت بنشحن الشنط قلت الحمد لله
كلمتها الساعه 7 الا عشره بتوقيت مصر يعني المفروض تبقي خلاص في الطياره قالتلي لسه بنشحن الشنط والدنيا زحمه موت وبيقولو الطياره هتتاخر
بعدها بساعتين كلمتها تاني قالتلي الطياره مش عارف فيها ايه والمصريين هناك عملو مظاهره وبيكسرو في المطار وضربو العساكر السعودين وادينا واقفين طبور ومش عارفين هنعمل ايه وحتي الان لسه مفيش اي حاجه

مش عارف احنا ليه مش بنتعامل باحترام هناك وليه اصلا نكسر ونشوه صورة نفسنا بنفسنا ونرجع نقول مش بيحترمونا وبرده مش عارف ليه الطيران السعودي كل شويه عنده مشاكل في الطيارات بتاعته

ده انا ياناس واخد اجازه من شغلي عشان اروح اجيبها من المطار ويارب بس ميعملوش زي اللي فاتو ويقعدو يومين تلاته في المطار

[AmatoALLAH]

ربنا يرجعها بالسلامه

هي المشكله في خطوط الطيران السعودية و لا كمان مصر للطيران؟

انا اخويا ووالدتي رجعوا الحمد لله في مصر للطيران و ماكنش فيه مشكله الا في الشنط بس

[احمد المصرى]

الموضوع موضوع سياسه يا باشا يعنى ايه بعض المصريين يتحبسوا هناك لمده كام سنه بدون اى تهمه اساسا يعنى ايه عدم معامله المعتمرين باسلوب محترم وليه لحد الان موضوع الكفيل شغال مش برضوا لازم اى واحد عربى يكون فى مصر يكون ليه كفيل برضوا ما لا التعامل يكون على كله كويس لا اما يكون وحش على كله وانا شخصيا اتمنى الغاء موضوع الكفيل دا فى العمل او ان اى واحد من دوله عربيه لازم يكون ليه كفيل فى مصر المعامله بالمثل


وربنا يرجع مامتك بالسلامه ان شاء الله

[shaddadfalcon1]

انا مش عارف ليه كل ده يحصل
وليه الناس هناك تكسر وتضرب وترجع تقول بيعاملونا وحش

[shaddadfalcon1]

الحمد لله ركبت الطياره وجايه في الطريق ان شاء الله

[shaddadfalcon1]

حسبي الله ونعم الوكيل
بقالهم اكتر من ساعه قاعدين في الطياره ومش فاهم حتي الان مطلعش ليه

[شريف]

ان شاالله الحاجه تكون وصلت بالسلامه

[shaddadfalcon1]

الحمد لله وصلنا بالسلامه ووالدتي بتقولي ان معظم الناس برده كانو بيخلصو الا المصريين مش عارف ليه والمصريين اللي هناك عملو مشاكل بس الحمد لله عدي اليوم

نييجي بقي للمصريين اللي هنا اللي رايحين يستقبلو االمعتمرين في مطار برج العرب
حاجه اخر زباله وتخلف وهمجيه وعدم نظام وعدم احترام من هنا للسنه الجايه
الطبييعي ان المعتمر بيطلع معاه شنطته او كذا شنطه علي عربيه
الاهالي بقي واقفين قدام الباب خناقات وزعيق وفي اللي عايز يدخل جوه والمعتمر بيبقي مش عارف يطلع من الناس والشرطه عماله تهاتي ودوول لاحياة لمن تنادي لدرجة ان والدتي طلعت مشفتهاش
حتي كام معانا واحد قريبنا تاجر دخل الزحمه دي يبص طلع موبايله مسروق وهو تاجر وعليه ارقام الناس اللي شغال معاهم وبقي محروق دمه
والله حسيت ان البشر اللي كانت بتعمل كده دي محتاجه اباده لان مستحيل الناس دي تتعدل

[world_of_kill]

الشكله تتلخص في سببين المصرين اللي بيهربو هناك بيبقو طالعين عمره و بيقعدو لغايه الحج
و المصرين اللي بيبقو مش رايحين يحجو ولا كن رايحين عشان يجيبو العفش من هناك و اللي رايحين يشحتو
لو المشكلتين دول اتحلو حتعرفو ليه الناس دي اتأخرت كل دا

مش كل حاجه بيبقي السبب سياسي

[shaddadfalcon1]

الشكله تتلخص في سببين المصرين اللي بيهربو هناك بيبقو طالعين عمره و بيقعدو لغايه الحج
و المصرين اللي بيبقو مش رايحين يحجو ولا كن رايحين عشان يجيبو العفش من هناك و اللي رايحين يشحتو
لو المشكلتين دول اتحلو حتعرفو ليه الناس دي اتأخرت كل دا

مش كل حاجه بيبقي السبب سياسي

اكتر حاجه ضايقتني في الموضوع ده هي الناس اللي كل ماحاجه تحصل يشتمو في السعوديه من غير مايتحرو الدقه في اللي بيصحل

ياراجل ده انا حطيت ستاتس علي فيسبوك وبقول حاجه تقرف اللي بيحصل هناك سواء من المطار او المصريين لقيتلك سيل شتيمه نازل عليا وللي يقول انت اللي تقرف واللي يقولك روح لحبيتك السعوديه عشان مصر تنضف وحسبي الله ونعم والوكيل

نفسي نفكر يعقلنا ونحلل اي موقف ونقول اللي لينا واللي علينا مش كل حاجه احنا المصرييين اللي عملنا وسوينا وخلاص

[azmeralda]

الحمد لله عالسلامة

[shaddadfalcon1]

الحمد لله عالسلامة

الله يسلمك يادكتوره

[Sallo]

انا والدتى برضو لسه راجعه من العمره و بتحكيلى على قمة الجهل
اولا الاغلبيه العظمى من المسافرين أرياف
بتحكيلى بقى ان اول ما الطياره اتحركت الناس اللى راكبين بقوا يزغرطوا و يسقفوا "عجبى"
و لما نزلت على الأرض نفس الحكايه برضو زغاريط و سقف

دى بقى تصرفات مجتمع حضارى؟

ده بقى غير اللى بيشحتوا هناك "مصريين و هنود"
ده غير الصوت العالى عند قبر الرسول "صلى الله عليه و سلم"

اما بالنسبه للمطار ففى غلطتين اولا غلطة الخطوط السعوديه فعلا اخرت الناس
ثانيا قلة ادبنا بدل ما يروحوا يعملوا محاضر او يدوروا على تعويضات او شئ من هذا القبيل مسحوا بكرامة الموظفين السعوديين الأرض مع ان الناس دى مالهاش ذنب

[ghazy12]

لو مستغرب و مش فاهم سر استفزاز و عصبية المصريين.... اسأل هو ليه كل الجنسيات التانية
بيخلصوهم بسرعة و بسهولة و بدون مشاكل في الطيران او الشنط او الجوازات و الاختام... و انت تعرف

يا استاذي ده موضوع متعمد للأسف, و مقصود بيه المصريين تحديداً... بس السبب ايه انا مش قادر افهم !!!

اي مصري في الموقف ده هينفعل, و لو تمادوا في الاستفزاز ده هيزعق, و لو حد تطاول عليه بالكلام
هيضرب و هيكسر و هيمسك في اي حد لان المفروض الاحترام يقابل بالاحترام مش بقلة الأدب !!

و انا مش طالع اعمل عمرة او احج علشان اتذل و اتهان و اتبهدل و المفروض اسكت كمان !!!!

لما تبقى بلدي تعملي كرامة و تعرف ازاي تجيبلي حقي و تحل مشكلة زي دي بشكل يصون كرامة
المصريين و احترام الناس ليهم, ابقى اتعامل معاهم بهدوء و انا عارف ان حقي هيرجع هيرجع...

ده رأي, و حمد الله على سلامة والدتك, و عمرة مقبولة ان شاء الله...

[shaddadfalcon1]

بخصوص موضوع الزراغيط في الطياره والدتي بتقولي الطيار (غالبا المضيف) كان بيغني والناس بترد وتسقف وتزرغط
بقيت مش عارف اقول ايه والناس مبسوطه قوي وفرحانين وشغالين معاه