::: الريف المصرى .......... إنطباعات عابرة !!!! + ( صور ) :::

[BRAZILI]

بسم الله الرحمن الرحيم

قضيت أجازة العيد ( أسبوع ) فى احدى قرى مصر المحروسة

فى المجمل كانت رحلة جميلة خلت الواحد يفك شوية من ضغوط القاهرة

و خلال هذه الرحلة كونت شوية افكار و انطباعات عن التطور اللى حصل فى الريف المصرى

و هى ::::

.... 1 .....

قلة عدد الحمير ( لامؤاخذة ) و الدراجات ..... فالكل هناك اتجه للموتوسيكلات و التريسكلات
لانها ارخص من الحمير ....... و اوفر كمان .... غير انها سريعة و بتنجز خاصة فى طرق القرى
الغير ممهدة .... الكل راكبها .... عيال صغيرة و شباب و شيوخ كبار لدرجة ان فى محيط 3 قرى
شفت معرضين للموتوسيكلات ....... ده غير محلات القطع غيار ....... و غير اللى ما شفتوش أساسا ...!!!

.... 2 ....

مبقاش فى حد بيربى فراخ ..... لارتفاع اسعار العلف .... فالناس بقت بتريح بالها و تشترى
من محلات بيع الفراخ .... لما سألت واحد قالى ( بلا هم يا عم ....... تقعد تشترى علف و تربى
و تتعب و فى الاخر يا يموت يا يعيش ..... الناس بتريح بالها و تشترى ع الجاهز احسن ) !!!

.... 3 ....

بعد الارتفاع الصاروخى فى اسعار الذهب ....... اهل العروسة بقوا بيشاركو فى مبلغ الشبكة !!!


دول اهم 3 حاجات خدت بالى منهم

و دلوقتى نروح للصور مع شرح بسيط

التصوير بكاميرا كانون باور شوت A490 ميجا بيكسل 10
و طبعا شوية فوتوشوب لزوم تصحيح الالوان
.
.
.
الطرمبة ..... فى طريقها للاندثار ..... دى صورة طرمبة مش شغالة
ابنى ( 6 سنوات ) لما شافها قالى ( بابا .... ده اختراع جديد بدل الحنفية !!!!! )



.
.
.
جامع مهجور .... مبنى من زمان ... وسط الحقول فى مكان بعيد عن العمران





.
.
.
اراضى مزروعة كرنب + ذرة



.
.
.
عم ابراهيم ..... راجل طيب قوى ....... غيطه على نهر النيل عدل
حياته كلها فى الغيط .... بيحب الهوا و بيقول ان البيوت كلها دوشة و كتمة
لقيته بيشرب سجاير لف .... قلتله لفلى سجارة
كانت سجارة حامية قوى ..... مقدرتش اكمل نصها



.
.
.
طريق الجسر ....... ده بقى عبارة عن جسر ترابى كان معمول زمان عشان يمنع فيضان النيل
حاليا هو لسه مرتفع و الناس عاملاه طريق ... فى منه جزء متسفلت
جماله ... انه مرتفع عن سطح الارض .... و بتشوف منه كل الغيطان
و الشجر الكبير على جنبيه بيديه جمال و هدوء اكتر


.
.
.
صحبة ع الطريق ..... ابنى ( 6 سنوات ) و خاله يسرى ( 10 سنوات )


.
.
.
حديقة البرتقال .... طبعا لسه البرتقال صغير و اخضر


.
.
.
ده بقى فارس ....... لقيته هو و اخوه بيعوموا فى النيل ..... انبسطوا قوى انى صورتهم








.
.
.
طريق ضيق كله شجر ..... كنت بحب امشى فيه كل يوم


.
.
.
البرنس عفيفى ..... اتعرفت عليه و هو شغال على الجرار
و بعدين ركبنا انا و ابنى معاه على الجرار و روحنا معاه الغيط بتاعه
و عزمنا على كوباية شاى على الفحم .... بس ايه اخر مزاج
هى الكوبايات كانت صغيرة شوية بس برضه كان ليها طعم تانى
و عرفت منه ان طيور ابو قردان لما بتسمع صوت الجرار
بتعرف انه حيكون فيه حفر فى الارض و بتنزل تجرى و را الجرار تنقى الدود من الارض







.
.
.
طفل اسمه عبد القادر ( سنة واحدة ) بيمص قصب على نهر النيل



كل عام و انتم بخير
أحمد برازيلى

[Dewo]

متشكرين ياباشا على لتقرير الجامد ده مشاهد الواحد ماشفهاش من زمااااااااان

[BRAZILI]

متشكرين ياباشا على لتقرير الجامد ده مشاهد الواحد ماشفهاش من زمااااااااان

العفو يا باشا

[alfath8]

يا راجل كنت بتتتفسح فى العيد بجد الواحد نفسه فى اجازة شهر يغير جو المدينة والقرف والشغل ويروح الريف بجد حسستنى انى كنت هناك دى امنية بتمناها من وانا صغير ارض صغيرة وازرعها وابعد عن الدنيا كلها فكرتنى بحلمى ليه بس

[naser_56]

هههههههه واضح ان برازيلي الصغير متكيف خالص من الشاي علي الفحم .... ربنا يحفظهولك ويبارك لك فيه

[ganash]

الحمد لله انى عايش فى ارياف كل الى حضرتك قولت عليه مظبوط بس الطرمبه لسه شغاله d:

[Mohamed_Rashad]

موضوع جميل و صور أجمل, شكراً لك
بس لي عتاب على الريف المصري, آخر زيارة لي شفت جبال من القمامة في كل شارع و أمام كل بيت بدون مبالغة! و لسه البنات و الستات بيغسلوا الأطباق و الحلل في مياه الترع الملوثة بالرغم من وجود المياه في المنازل بس هي شكلها عادة و مش هتندثر للأسف!

[HOSSAM99]

كل سنة و حضرتك طيب
و موضوع جميل و صور جميلة جدا

[BRAZILI]

يا راجل كنت بتتتفسح فى العيد بجد الواحد نفسه فى اجازة شهر يغير جو المدينة والقرف والشغل ويروح الريف بجد حسستنى انى كنت هناك دى امنية بتمناها من وانا صغير ارض صغيرة وازرعها وابعد عن الدنيا كلها فكرتنى بحلمى ليه بس

ده مش حلمك بس يا محمد ....... ده حلمى انا كمان و الله و اعتقد انه حلم كل الناس

هههههههه واضح ان برازيلي الصغير متكيف خالص من الشاي علي الفحم .... ربنا يحفظهولك ويبارك لك فيه

شكرا يا ناصر باشا و ربنا يبارك فيك

الحمد لله انى عايش فى ارياف كل الى حضرتك قولت عليه مظبوط بس الطرمبه لسه شغاله d:

شكرا يا باشا على مرورك ..... لكن انا قلت عن الطرمبة ( فى طريقها للإندثار )
خالص تحياتى و كل سنة وانت طيب

كل سنة و حضرتك طيب
و موضوع جميل و صور جميلة جدا

و حضرتك طيب .... شكرا لمرورك الكريم

[BRAZILI]

موضوع جميل و صور أجمل, شكراً لك
بس لي عتاب على الريف المصري, آخر زيارة لي شفت جبال من القمامة في كل شارع و أمام كل بيت بدون مبالغة! و لسه البنات و الستات بيغسلوا الأطباق و الحلل في مياه الترع الملوثة بالرغم من وجود المياه في المنازل بس هي شكلها عادة و مش هتندثر للأسف!

يا محمد باشا ..... القمامة مش فى الارياف بس ....... دى بقت فى كل حتة
بالنسبة للغسيل فى الترع انا لاحظت السنة دى ان الموضوع ده بقى اقل من السنة اللى فاتت
يمكن عشان العيد ......... الله أعلم

خالص تحياتى ليك

[م.احمد زكريا]

موضوع جميل وصور أحلى بالذات البينط في النيل ملهوش دعوة بالدنيا نازل زي ما هو طبيعي

بس أحلى رحلة .... هدوء وهواء نظيف

الف شكر يا باشا

[mazagngi2010]

صوره اللى بينط فى الترعه جاااااااااااااااااااااااااااااامده جدا

[amazingahmed]

بجد بجد بجد انت بتعرف تصور حلو أوي و ده باين جدا في توازن مكونات الصورة و انك مبتحطش اللي علية الفوكس في نص الصورة و حاجات تانية... صور جميلة جدا ٌ

[mailo]

بسم الله الرحمن الرحيم

.... 1 .....

قلة عدد الحمير ( لامؤاخذة ) و الدراجات ..... فالكل هناك اتجه للموتوسيكلات و التريسكلات
لانها ارخص من الحمير ....... و اوفر كمان .... غير انها سريعة و بتنجز خاصة فى طرق القرى
الغير ممهدة .... الكل راكبها .... عيال صغيرة و شباب و شيوخ كبار لدرجة ان فى محيط 3 قرى
شفت معرضين للموتوسيكلات ....... ده غير محلات القطع غيار ....... و غير اللى ما شفتوش أساسا ...!!!

هو أصلا معدش فيه ريف زي زمان
مفيش دلوقتي بيوت بالني
ومفيش بيت مفيهووش دش
دي الوصلات شغالة هناك زي الفل
والنت بقى حاجة قديمة عندهم

معدش فيه فعلا حمار وحصان وعجل اللي بيمشي بالجرس القديم ده

.... 2 ....

مبقاش فى حد بيربى فراخ ..... لارتفاع اسعار العلف .... فالناس بقت بتريح بالها و تشترى
من محلات بيع الفراخ .... لما سألت واحد قالى ( بلا هم يا عم ....... تقعد تشترى علف و تربى
و تتعب و فى الاخر يا يموت يا يعيش ..... الناس بتريح بالها و تشترى ع الجاهز احسن ) !!!

عشان الناس دي بقت تستسهل وتشتري علف
أنا أفتكر زمان العلف ده ماكانش بيخش بيت فيه جاموس حتى مش فراخ
الفراخ البلدي اللي طعمها بلدي بجد هي اللي بتقول أكل البيت البواقي
أنا أفتكر زمان إن جدتي كانت بتحطلهم الأكل على النار مش عارف ليه بس عمري ماشفتها بتحطلهم علف وكمان الفراخ وال بت اللي بيقول علف مابيكبرش زي اللي بياكل بيتي
وكمان طعمه بيبقى زي الفراخ بتاعتنا إنما البلدي هو اللي ليه طعم كده مختلف وكمان الجلد بتاعه بيبقى رقيق قوي مش اتخن من جلد الخروف
عايز تعرف الفرق بجد تلاقيه فالحمام الحمام بتاعنا أنا ممكن اخش في2 - 3 منه
البلدي واللهِ بكامل واحدة بالعافية وبكون جبت جاز 92

.... 3 ....

بعد الارتفاع الصاروخى فى اسعار الذهب ....... اهل العروسة بقوا بيشاركو فى مبلغ الشبكة !!!

دول اهم 3 حاجات خدت بالى منهم

و دلوقتى نروح للصور مع شرح بسيط

أنا هاقولك كلمة واحدة بس والله فيه ناس مابيتجوزش من غير ال ميكروويف ويبقى شرط فالجهاز

الريف ده كان زماااان
لما الناس كانت بتفطر الساعة 7 وال غداء كان بيبقى من الساعة 12 - 1 بالكتير والنوم بعد صلاة العشاء رسمي
الناس كانت بتستناها عشان تنام

[Gelgel2004]

تسلم الانامل على الصور
فكرتنا باجمل ايام
دمت بود