تتجوزي واحد متجوز ؟

[yousef1978]

عندي سؤالين للستات اللي في المنتدى الكريم

ويا ريت كل واحدة تقرأ الموضوع تقولنا إيه ردها عليهم


1- لو انتي مش متجوزه لأي سبب، واتقدملك واحد متجوز وسألتي عليه لقيتيه فيه كل المواصفات اللي تتمنيها غير إنه بيعامل مراته الأولى كويس وناجح جدا في حياته الأسرية

هل هتوافقي ولا هترفضي وبشدة ؟؟


2- لو انتي متجوزة وجوزك اتجوز عليكي واحدة في مستواكي الإجتماعي والعمري والاقتصادي ومتكافئة معاكي لا أقل ولا أكثر

وجوزك ده كان بيعاملك بكل حب واحترام ورعاية ومش مقصر معاكي ولا مع البيت ومن الآخر وكل الستات يحسدوكي عليه

هل هتطلبي منه الطلاق والعياذ بالله أو تشترطي إنه يطلق التانية علشان تستمري معاه

ولا هتقولي ده شرع ربنا وحقه والمهم عندي يعدل بيننا وما يقصرش معايا وما يحسسنيش بوجودها أو يحاول يغيظني ويقلل مني ؟؟




؟

[shaddadfalcon1]

من خلال اللي بشوفه اي ست ختقول الأتي:
ياما هتقول جنازته ولا جوازته
او هتقول انا عارفه انه حقه الشرعي ومش معترضه بس انا مش هقدر اعيش بالطريقه دي وعشان مظلموش هطلق وده حقي

الست اللي في اليومين دوول اللي ممكن توافق انها تتجوز واحد متجوز لازم هتكون مضطره يعني مطلقه او ارمله ودي ااكتر واحده بتقدر قمية الزواج التاني لانها بتبقي نفسها في ضل راجل حتي يصرف عليها بس لان فعلا في حالات من دي بتبقي الدنيا ضنك معاهم واهلهم مش بيقدرو يعملولهم حاجه ده ان مكنش بيذهقوهم في عيشتهم

[yousef1978]

من خلال اللي بشوفه اي ست ختقول الأتي:

جزاك الله خير على تلبية دعوة النقاش

[أحمد كمال]

المشكلة انه فيه حديثين شريفين في الموصوع ده

الاول يحرم استفراغ الصحفة يعني يحرم على زوجة طلب طلاق الاخرى


و الاخر يحرم على الزوجة طلب الطلاق بغير ذي بأس و قبل ما واحدة من العضوات تقول لي و هو فيه بأس زي كده اقول لها العلماء افتوا ان الزواج باخرى مع العدل في النفقة و المعاملة و المبيت لا يعتبر بأساً

[nonetta]

عندي سؤالين للستات اللي في المنتدى الكريم

ويا ريت كل واحدة تقرأ الموضوع تقولنا إيه ردها عليهم


1- لو انتي مش متجوزه لأي سبب، واتقدملك واحد متجوز وسألتي عليه لقيتيه فيه كل المواصفات اللي تتمنيها غير إنه بيعامل مراته الأولى كويس وناجح جدا في حياته الأسرية

هل هتوافقي ولا هترفضي وبشدة ؟؟

اولا في الحالة دي لو انا صغيرة في السن وسوق الزواج مفتوح لي عري ما هاقبل طبعا لان العمر ادامي ولسة ياما هيجيلي عرسان ومفيش داعي ابني سعادتي على سعادة حد تاني ولو الراجل بيا او من غيري هيعملها تبقى واحد تانية تقبلها لاني مش هاقبلها على نفسي
اما لو كان سني كبير فلازم يكون عاوزني لشخصي مش طمعان في اي حاجة تانية وكمان الزوجة الاولى تكون عندها مانع طبعا


2- لو انتي متجوزة وجوزك اتجوز عليكي واحدة في مستواكي الإجتماعي والعمري والاقتصادي ومتكافئة معاكي لا أقل ولا أكثر

وجوزك ده كان بيعاملك بكل حب واحترام ورعاية ومش مقصر معاكي ولا مع البيت ومن الآخر وكل الستات يحسدوكي عليه

هل هتطلبي منه الطلاق والعياذ بالله أو تشترطي إنه يطلق التانية علشان تستمري معاه

ولا هتقولي ده شرع ربنا وحقه والمهم عندي يعدل بيننا وما يقصرش معايا وما يحسسنيش بوجودها أو يحاول يغيظني ويقلل مني ؟؟

مستحيل طبعا اقبل انه يتجوز عليا ليه فيها ايه مش عندي واللي محتاجه عندها انا اديهوله الست ممكن تعمل اي حاجة بس محدش يسرق سنين عمرها ولا تعبها ولا شقاها
ماشي طب بيعاملني بحب واحترام يتجوز واحد تانية ليه مدام انا مش مقصرة الكلام دة الا في حالة ربنا ما رزقناش بأولاد
بنا ما يحكم على اي واحد حرقة القلب لما بتبني حياتها من القاع وتشيله وتستحمله وتربط الحزام عشان توفر له وتيجي واحد عالجاهز لا تعبت ولا شالت الهم ولا وقفت جنبه تاخد الشيلة كلها وتتعامل نفس معاملتي انا
طبعا ساعتها اللي يبيعني ابيعه طالما ما بقاش عليا انا مش هابقى عليه والحنية ما بتتشحتش ولا هاستجدي عطفه عليا وطبعا هيكون في شرخ حصل يستحيل الثقة ترجع بعدها تاني
وما نتمسحش في الشرع لان الشرع شرطها وعم الانسان ما هيحقق الشروط

وربنا ما يحكم على حد


؟

[hobby10]

بشكل عام اعتقد صعب جدا يبقى فيه عدل فى حالة زى دى لان اصلا بيبقى صعب الواحد يوفى بيته فى الوضع الطبيعى مع تسارع الحياة الرهيب اللى بنعيشه ومع عدم البركة فى الوقت اللى بنعيشه بالذات فى مصرنا الحبييبة .... ده راى

بس عموما ردا على التساؤل انى اتجوز واحد متجوز فده مرفوض اما طلب الطلاق اذا تم زواج اخر فاكيد حاجة صعبة لكن توصل لطلب الطلاق او لا معرفش ....... تقبلوا مرورى

[shaddadfalcon1]

رد الست المصريه النموذجيه

مش معني ان انتي مش حارمه جوزك من حاجه انه مش محتاج حاجه لان مش كل الستات زي بعضها وجايز جوزك عايز يتجوز عشان حاله انسانيه او عشان نفسه في واحده تانيه او حتي طفاسه

الراجل بطبيعته بيميل للتعدد علي عكس الست

[yousef1978]

فيها ايه مش عندي واللي محتاجه عندها انا اديهوله

المشكلة إن الستات عندنا مش قادرين يفهموا إن طبيعة الرجل أنه لا يستكفي بإمرأة واحدة
يعني الموضوع مش إن التانية فيها إيه مش عند الأولى الموضوع إن دي طبيعة الراجل ببساطة شديدة
مستحيييييييييييييييييل تلاقي واحد ما نفسوش يتجوز على مراته إلا لو كان نفسه اتسدت من صنف الستات كله وجاله يأس منهم



الست ممكن تعمل اي حاجة بس محدش يسرق سنين عمرها ولا تعبها ولا شقاها
أي سنين عمر وأي سرقة
ما فيش حد بيعاني في موضوع الجواز غير الزوج اللي بيعيشله عشرة خمستاشر سنة يشتغل ويتبهدل ويتغرب علشان يقدر يجيب دهب للمحروسة ويعلقلها الستاير
وبعد الجواز بتشيله هم ما يتلم
بعدين زي ما الأولى اتجوزته ووفرلها حياة كريمة
فمن حق التانية إنها توافق على زواجه منه طالما في مصلحتها
هي مش بتسرقه ولا بتخطفه هي عاوزه تعيش حياة كريمة أحلهالها ربنا زي ما الأولى ربنا أحللها وأكرمها بالزواج منه



ماشي طب بيعاملني بحب واحترام يتجوز واحد تانية ليه مدام انا مش مقصرة الكلام دة الا في حالة ربنا ما رزقناش بأولاد

مين اللي فرض الشرط ده - ربنا لم يشترط على الرجالة كده - بالعكس يمكن أنا لو زوجتى لا قدر الله مش بتخلف فهيصعب علي أتوز عليها وأجيب عيال وهي محرومة منهم إلا لو هيأت الاتنين إن لما ربنا يكتبلنا عيال يبقى عندهم إتنين أمهات وده هيكون في مصلحة الأولى وتعويض نسبي ليها



ربنا ما يحكم على اي واحد حرقة القلب لما بتبني حياتها من القاع وتشيله وتستحمله وتربط الحزام عشان توفر له وتيجي واحد عالجاهز لا تعبت ولا شالت الهم ولا وقفت جنبه تاخد الشيلة كلها وتتعامل نفس معاملتي انا
الستات في مصر زماااااااان كانت الواحدة تغسل الهدوم في التشط ولا مؤاخذة وتغسل للأولاد الصغيرين الكوافيل وتمسح وتصحى الصبح تعمل فطار لجوزها وللعيال وتفك فرش البيت كله يوميا وتنفضه وتعمل الأكل وتربي العيال وتدرسلهم وتفضل اسبوع تنسج بلوفر للولد الصغير علشان تحميه من البرد وتطلع تفسحهم عند أمها وتعلمهم الأداب العامة والذوق والإحترام طبعا غبر إهتمامها الشديد بأنوثتها وحياتها الخاصة
وتبقى مخلفة عشر عيال وشايله همهم

دلوقتي الست عندها كل حاجة اتوماتيك وتلاقيها تصحى الظهر والراجل يفطر في الشارع على عربية فول ويرجع هلكان من الشغل والبهدلة يلاقيها يدوبك بتخلص المسلسل التركي وسايبه الدنيا زريبة والعيال لا بتسقيهم خبراتها ولا بتعلمهم حاجة في دنيتها ولو خلفتلها عيل ولا اتنين تلاقيها اتفشكلت وملامحها راحت وتقولك مش كفاية إني خلفت وبأرضع وألبس وأعمل غدا وزفت وعاملاله زي الشغالة في البيت - هو عايز إيه تاني مني !!!!!!!!!!!!!

المرأة في أوروبا والدول المتقدمه تلاقيها بتشتغل وتعمل كل حاجة ورغم كده على الستين من عمرها مهتمة برشاقتها وبعد ده كله تلاقي الزوج بيخونها والعياذ بالله مع طوب الأرض
أي والله ورجالة أجانب يحكولنا ويفتخروا بكده


طبعا ساعتها اللي يبيعني ابيعه طالما ما بقاش عليا انا مش هابقى عليه والحنية ما بتتشحتش ولا هاستجدي عطفه عليا وطبعا هيكون في شرخ حصل يستحيل الثقة ترجع بعدها تاني
وما نتمسحش في الشرع لان الشرع شرطها وعم الانسان ما هيحقق الشروط

شرع ربنا بيسمح وبعدين هو لما بيتجوز عليكي مش بيبيعك وممكن يكون متمسك بيكي وبيحبك اكتر من الأول وهيفني عمره الباقي من أجل سعادتك إنتي والثانية

وربنا سبحانه وتعالى نزل الآية الثانية تخفيفا على المسلمين لأنهم لما اشترط عليهم العدل تخوفوا وامتنعوا عن التعدد فأنزل الله سبحانه وتعالى قوله : بسم الله الرحمن الرحيم {وَلَن تَسْتَطِيعُواْ أَن تَعْدِلُواْ بَيْنَ النِّسَاء وَلَوْ حَرَصْتُمْ فَلاَ تَمِيلُواْ كُلَّ الْمَيْلِ فَتَذَرُوهَا كَالْمُعَلَّقَةِ وَإِن تُصْلِحُواْ وَتَتَّقُواْ فَإِنَّ اللّهَ كَانَ غَفُورًا رَّحِيمًا} صدق الله العظيم

فالله سبحانه وتعالى يسر بهذه الآية على من امتنع عن التعدد مخافة عدم قدرته على العدل القلبي فأجاز له بعض الميل الداخلي وأن يحاول ما استطاع


على فكره أنا بكل أمانة شايف إن التعدد حق للمرأة الغير متزوجة قبل أن يكون حق للرجل المتزوج

[The_Last_Rebel]

بالرغم من إنه لم يرد أو يعلق أحد على مشاركتي في الموضوع الأصلي...ولا ادري هل كانت فعلا بهذا القدر من التواضع بحيث لم يراها أحد أو يعيرها اهتماما...ولكني سأشارك في هذا الموضوع بتجربة شخصية وأن كانت غير مباشرة.

ابطال هذه القصة هم جدي وجدتي وبالمناسبة تاريخ الوفاة لهما في الثمانينات وهو
تاريخ أجده ليس بالبعيد أي انهما ليسا شخصيات خرافية أو من عصور وسطى أو من ابطال القصص الأسطوري بل كانا بالعهد القريب ملء السمع والبصر.


جدي كان متزوج من ثلاث سيدات

كان زواجه الاول شبه فرض عليه من جدي الأكبر ومصلحه بين شركاء العمل

أما زواجه الحقيقي كان من جدتي وكانت الزوجة الثانية وفي نفس الوقت كانت هي الزوجة الاولى الحقيقية.

ومر الزمن ولأسباب خاصة به تزوج مرة أخرى ...ولكن ليست هذه هي القضية...

القضية فيما فعلته جدتي عندما علمت بما حدث...

بالطبع هي حزنت حزنا شديدا وشعرت بالألم وهذا لا يستطيع أحد ان ينكره عليها ولا على أي امرأة وليس مطلوب منها ان تتقبله بانشراح صدر وطبل ومزامير...ولكنها قالت "الحمدلله الذي اعانه على ان يعف نفسه بالحلال هو اهون عندي ان يقع فيما يغضب الله واطلب من الله ان يغفر لي تقصيري في حقه"

بل اكثر من ذلك عندما كان يزورها احدى معارفها وكعادة النساء في الندب بدأت في سب جدي ظنا منها ان هذا يخفف عنها وانها تتعاطف معها فما كان من جدتي إلا ان خطفت منها كوب الشاي وقالت لها " امشي اطلعي بره متبقيش في بيت الرجل وتشتمي فيه كفاية حسه فالدنيا وإنه مش حوجني لحد"

ولما كان جدي على فراش الموت طلب من الموجودين ان يطلبوا جدتي ففزعت لما عرفت وهرعت اليه وهو يقول لها "سامحيني يا حاجة" فقالت له "يا خبر!! مسامحاك من قبل ان تطلبها"

وأذكركم مرة أخرى هذه ليست قصة خيالية أو من قرون وسطى أو من زمن الصحابة بل هم اشخاص من هذا العصر الذي نعيش فيه غير انهم...ربما كانوا من بقية من زمن جميل...نفتقده في كل يوم.

اسال الله لهم الرحمة والمغفرة ولكل المسلمين

[aboalm]

نظرة الاعلام الحلو بتاعنا(( الفاشل طبعا)) ان الراجل اللى متجوز أتنين يا اما منافق يا اما رجل مش كويس دينيا مافيش حاجه اسمها يتجوز عليا ليه طالما انا مش مقصره معاه لو هو عنده المقدره على العدل فى النفقه و المعيشه بمنتهى البساطه لو حضرتك بقى عندك 35 سنه عندك استعداد تكونى زوجه ثانيه و لا تفضلى كده؟؟ على فكره اللى شرع الكلام ده ربنا اللى أعلم مننا كلنا بطبائع البشر
ربنا يستر و مش اضرب دلوقتى

[nevozaky]

عندي سؤالين للستات اللي في المنتدى الكريم

ويا ريت كل واحدة تقرأ الموضوع تقولنا إيه ردها عليهم


1- لو انتي مش متجوزه لأي سبب، واتقدملك واحد متجوز وسألتي عليه لقيتيه فيه كل المواصفات اللي تتمنيها غير إنه بيعامل مراته الأولى كويس وناجح جدا في حياته الأسرية

هل هتوافقي ولا هترفضي وبشدة ؟؟


2- لو انتي متجوزة وجوزك اتجوز عليكي واحدة في مستواكي الإجتماعي والعمري والاقتصادي ومتكافئة معاكي لا أقل ولا أكثر

وجوزك ده كان بيعاملك بكل حب واحترام ورعاية ومش مقصر معاكي ولا مع البيت ومن الآخر وكل الستات يحسدوكي عليه

هل هتطلبي منه الطلاق والعياذ بالله أو تشترطي إنه يطلق التانية علشان تستمري معاه

ولا هتقولي ده شرع ربنا وحقه والمهم عندي يعدل بيننا وما يقصرش معايا وما يحسسنيش بوجودها أو يحاول يغيظني ويقلل مني ؟؟




؟

استحالة هاوافق على حد متجوز الا اذا كانت ليه حالات خاصة .
اما ارملة او مطلقة او سن الزواج فاتنى بكتير .

فى الحالات دى هاضطر اوافق اذا كانت مساْلة الجواز فارقة معايا اْوى .




اما السؤال التانى .
لا اقبل ان جوزى يتجوز عليا .
ولا اكابر او اعاند فى كلام وشرع الله .انا عارفة انه شرعى وربنا جعل له شرط محدد وهو العدل .

انا مش هاتناقش فى ظروفه ايه او عايز يتجوز ليه .
حتى اذا لم توجد اسباب فهذا حقه اذا اراد .

بس وقتها هاْطلب الانفصال بس علشان محدش يقول انا متعسفة فى استخدام حقى .
وبعيد تماما عن قوانين سوزان مبارك .

ربنا بيقول ايه على الجواز والمتزوجين
امساك بمعروف او تسريح باْحسان .

حتى الامساك على الزوجة الله امر ان يكون بمعروف .
فى هذه الحالة اللى هيتزوج جوزى عليا

افضل التسريح باحسان .وشرعى بردو .

[waelfarid]

صاحب الموضوع لعب في الدمل او هيج عش الدبابير اللي مبيعرفوش غير انهم يقرصو وبس

[icehearted girl]

1- لو انتي مش متجوزه لأي سبب، واتقدملك واحد متجوز وسألتي عليه لقيتيه فيه كل المواصفات اللي تتمنيها غير إنه بيعامل مراته الأولى كويس وناجح جدا في حياته الأسرية

هل هتوافقي ولا هترفضي وبشدة ؟؟

الاقتراح الأولاني...ممممممممممم

لأ...بالرغم ن ان الزيجة التانية هتكون ناجحة لان الزوج هيحاول يتجنب المشاكل اللي تسببت فلمرة الأولي

لكن برده لأ...لان جزء منه مش هيكون لي...هيكون لزوجته السابقة واولاده...يعني محتاجة تضحية كبيرة ان واحدة يبقي ليها جزء من كل

دا غير ان عمري متوقع ان اكتر الايام المفروض تكون سعادة بالنسبة لي..ممكن يكون أسوأ الايام وأكثرهم جرحا لإنسانة تانية...

------------------------------

لو انتي متجوزة وجوزك اتجوز عليكي واحدة في مستواكي الإجتماعي والعمري والاقتصادي ومتكافئة معاكي لا أقل ولا أكثر

وجوزك ده كان بيعاملك بكل حب واحترام ورعاية ومش مقصر معاكي ولا مع البيت ومن الآخر وكل الستات يحسدوكي عليه

هل هتطلبي منه الطلاق والعياذ بالله أو تشترطي إنه يطلق التانية علشان تستمري معاه

ولا هتقولي ده شرع ربنا وحقه والمهم عندي يعدل بيننا وما يقصرش معايا وما يحسسنيش بوجودها أو يحاول يغيظني ويقلل مني ؟؟[/color]



]

أما بقي السؤال التاني..فنا هطلب الطلاق فعلا وعمري مهشترط عليه يطلق الاخري..لان مش هيكون عندي اي استعداد اعيش معاه تاني

ليس انتقاصا من حقه..ولاتشكيك ف شريعة الله

وانما هحس بيني وبين نفسي انه _خاين_ دا غير ان مستحيل حد يكون بيحب زوجته وهيتجوز عليها مهما كان السبب...وطالما مفيش حب..تستحيل العشرة

[human]

احمد كمال
النساء مش زى الرجال
يعنى بأس ليها ده ممكن يكون هى مش هتعرف تكون كويسه معاك
و بعدين عشان كده فىه طلاق لاستحاله العشره
مش هتقولها بالعافيه الرسول بيقولك تعيشى و تبقى مبسوطه

هى حرة فى انها تكمل معاه او تطلب الطلاق
زى اى واحده متجوزه مش قادره تعيش مع جوزها حتى لو مش متجوز عليها

[ahmedsamir5edr]

الجواز من واحده بس عامل زي ما تكون قررت طول عمرك تاكل ايس كريم بطعم الشيكولاته بس .. انا شخصيا بحب الفراوله و الفسدق و حاجات تاني كتير .. ( أعزب .. لكني لن اكتفي بزوجه واحده مهما كلفني الأمر )