انشاء مكتب مقاولات

[love7amada]

يا جماعه الواحد مش عايز يشتغل و يطلع عينه 12 ساعه في اليوم و ف الاخر ياخد 1000 جنيه ده حتي يبقي حرام و 1000 جنيه هيطلع منهم مواصلات و اكل ف نص اليوم
فالواحد قرر ان انا وواحد صحبي نفتح مكتب مقاولات بس لسه بندرس الموضوع
يعني احنا هنبدأ ع قدنا اوي هناخد شقه دور ارضي و نعملها مكتب
و يكون عندنا تصميم و تنفيذ اعمال البناء بالاضافه لشغل مقاولات التشطيبات و غيره من التسويق العقاري و السمسره
احنا مختارين المكان يكون قريب في فيصل مثلا لتوفير تكلفه الانتقال اليومي
محدش عمل كده قبل كده يقولنا ندوس ف الموضوع و لا كل واحد يخليه ف شغلانه يفضل مربوط فيها اضمن
اه احنا الاتنين مهندسين و ع علاقات بالعمال المطلوبين علاقه طيبه
هااااااااااااااا
مين هيساعدنا برأيه او تجربته
يعني نفتح جنب البيت ف فيصل ولا ننزل ع مدينه من المدن الجديده
الفكره اصلا ننفذها و لا لا
مستني تفاعلكم و شكرا مقدما ليكم

[MOUSTAFA_SAAD]

انا اشتغلت مع خالى فى مكتب المقاولات بتاعه لمدة 6 سنين

هو كان لواء مهندس بالجيش والمكتب كان بياخد شغل بحوالى 12 مليون فى السنه يعنى مكتب محترم مش شويه وكان شغله كله مع الجيش فقط لاغير

طبعا علشان هو كان خالى وانا ابن اخته كانوا راميين عليا حمل كبير فى كل حاجه بداءا من متابعة تصليح العربيات النقل والمعدات والاتفاقات مع الموردين والعمال والصنايعيه ومقاولين الباطن حتى كنت باتدخل فى الاشراف الفنى على الشغل رغم انى بكالوريوس تجاره واتمرمط لما طلع عينى

انا اعرف تقريبا ان انت خريج حديث

نصيحتى اللى اقدر اديهالك من تجربتى فى الشغله المتعبه دية

خد خبره الاول بره فى اى مكتب ولما تحس انك بقيت واقف على ارض صلبه وفاهم الفوله اتخد خطوات انشاء المكتب
اكبر مشكله حاتقابلك فيه هو التعامل مع العماله والصنايعيه عاوزين واحد بيعرف يلاعب قرود وسيبك من الكلام الحلو اللى بتسمعه منهم وانت عالبر اهم حاجه ساعة التنفيذ
وطبعا اهم حاجه انك تلاقى شغل للمكتب علشان تعمله
والاهم من ده التمويل

الموضوع مش سهل انت جيت فى وقت فيه مكاتب كتير شغاله بالفعل وبتقفل

اهم حاجه خد خبره كويسه مع حد وبعدين ابداء اشتغل لوحدك
ومتكنشى منتظر من المكتب فلوس من اولها لازم يكون عندك صبر والفلوس اللى حاتحطها تنساها لغاية لما تقف على رجلك
يعنى بمعنى اصح المكتب مش هو اللى حياكلك ويشربك
لا ده حاجه زياده ليك بتجهزه للمستقبل

[SYD]

انا متفق مع مصطفي في كل كلامه الي قاله

انت فعلا محتاج شوية خبرة علي ارض الواقع
انا كما ن اشتغلت سنتين ونص في المقاولات في حدائق الأهرام
مباني وتشطيبات
مرهقة ومتعبة اووووووووي
وخصوصا الصنايعية من نجارين مسلح لكهربائية لنجارين باب وشباك ومقاولين زلط ورمل وطوب وبنايين ومبيضين المحارة والنقاشين والسباكين ومبلطين السيراميك واعمال الرخام والحدادة والكريتال والحدادين المسلح

والزباين طبعا

انت الأول انزلك نزلة علي حدائق الأهرام وحاول تشوف شغل هناك مع مقاول كملاحظ او بنسميها مشرف
لو انت ليك في التشطيبات هتتعب اوي
بس انت ممكن تشتغل مشرف علي اعمال المباني
احنا كان عندنا اتنين مشرفين
واحد مشرف خرسانات ومباني
وواحد مشرف تشطيبات

الأتنين طبعا بيتعبوا جدا

وانت لازم تعرف شغل الأتنين

بس انت المصلحة الي هتعملها انك هتعرف الشغل ماشي ازاي وهتتعرف علي دولاب العمل (طقم العمل)
هتعرف ازاي تستلم (تطلع الأخطاء)
وازاي تباشر الشغل من قبل الأخطاء
وازاي تعرف الحلو من الوحش

لازم بردو تعرف هتمشيها في الحسابات يومية ولا مقاولة ولا بالطريحة
وهتعرف كل شغلانة (سباكة كانت او مباني طوب او بلاط او نقاشة) الصنايعي بتاعها الشاطر طريحته قد ايه والكسلان طريحته قد ايه

الشغلانة فيها خبايا كتير اوي
ولازم تشتغل الأول عشان تقرر هتفتح فين وهتشتغل مباني ولا تشطيبات

بس انا انصحك خليك في التشطيبات انظف
ولازم تعمل علاقات كويسة اوي مع التجار عشان تعرف تاخد خصم محترم والمكسب كله ليك
ولازم تتعلم تحاسب الزبون ازاي (عموما هي بتتحاسب بالمتر) بس انا الصراحة مش عارف دلوقتي المتر بقي بكام
يعني مثلا لو قلنا المتر ب750جنيه كله في قلب بعضه والشقة 125م يعني انت المفروض تاخد من الزبون 93750 جنيه وتسلمهاله علي المفتاح طبعا بتاخدهم دفعات وبتكتب عقد وتحدد تاريخ الأستلام وبتكتب شرط جزائي

لو محتاج اي اسئلة تاني انا تحت امرك

والله المستعان
،
،

[love7amada]

اولا طبعا شكرا يا استاذ مصطفي ع سرعه الرد
انا فعلا كنت ناوي اشتغل سنتين تلاته الاول عشان اخد خبره السوق و كده بس انا شطبت كتير شقق و كمان صاحبي مسك بيت بناه فاحتكينا شويه بالعماله
احنا لسه صابرين لحد اخر السنه بندور ع مكان كويس نكسب منه خبره تخلينا نقدر ننقل النقله ديه
يعني بكره عندي انترفيو ف شركه و ربنا يسهل و جايلي شغل ف المقاولين ع اخر الشهر ربنا يتممه ع خير
طيب عندي سؤال كمان
خلاص ربنا وفقنا ف شركه و لا مكتب و اشتغلنا هل ينفع الواحد بجانب الشغل افتح المكتب و لا هيكون مستحيل متابعته بحكم طبيعه الانشغال
ولا هيحتاج وقتها تفرغ كامل و ان الواحد يتنازل عن اللي بناه ف المكان اللي بيشتغل فيه
بحيث ان حضرتك قلت ان مش هيأكلنا عيش ف البدايه و الواحد هيصرف عليه
فدلوقتي انه ميجبش همه مكنتش هتفرق لكن كمان تلت سنين ممكن يكون في اسره
يعني حضرتك لو مكاني مثلا هتعمل ايه
يعني انا كان نفسي اسافر عشان مش عاجبني الحال هنا و بطمح اني اعيش ف مكان نضيف شويه
فبدور برده ع سفر
يعني ماشي ف كزا اجاه
بفكر ف المكتب و جايلي شغل ف شركه و نفسي اسافر
طيب اسستم حياتي ازاي
يعني مثلا اشتغل 3 سنين هنا اخد خبره و بعدها اطلع بره كام سنه اكون رأس مال و انزل افتح المكتب
ولا اشتغل ف شركه زي المقاولين و اكبر فيها
و لا ادور ع سفر و اخلع من دلوقتي و مرجعش اصلا و لا مكتب و لا حاجه
هاااااااااااا

[love7amada]

انا متفق مع مصطفي في كل كلامه الي قاله

انت فعلا محتاج شوية خبرة علي ارض الواقع
انا كما ن اشتغلت سنتين ونص في المقاولات في حدائق الأهرام
مباني وتشطيبات
مرهقة ومتعبة اووووووووي
وخصوصا الصنايعية من نجارين مسلح لكهربائية لنجارين باب وشباك ومقاولين زلط ورمل وطوب وبنايين ومبيضين المحارة والنقاشين والسباكين ومبلطين السيراميك واعمال الرخام والحدادة والكريتال والحدادين المسلح

والزباين طبعا

انت الأول انزلك نزلة علي حدائق الأهرام وحاول تشوف شغل هناك مع مقاول كملاحظ او بنسميها مشرف
لو انت ليك في التشطيبات هتتعب اوي
بس انت ممكن تشتغل مشرف علي اعمال المباني
احنا كان عندنا اتنين مشرفين
واحد مشرف خرسانات ومباني
وواحد مشرف تشطيبات

الأتنين طبعا بيتعبوا جدا

وانت لازم تعرف شغل الأتنين

بس انت المصلحة الي هتعملها انك هتعرف الشغل ماشي ازاي وهتتعرف علي دولاب العمل (طقم العمل)
هتعرف ازاي تستلم (تطلع الأخطاء)
وازاي تباشر الشغل من قبل الأخطاء
وازاي تعرف الحلو من الوحش

لازم بردو تعرف هتمشيها في الحسابات يومية ولا مقاولة ولا بالطريحة
وهتعرف كل شغلانة (سباكة كانت او مباني طوب او بلاط او نقاشة) الصنايعي بتاعها الشاطر طريحته قد ايه والكسلان طريحته قد ايه

الشغلانة فيها خبايا كتير اوي
ولازم تشتغل الأول عشان تقرر هتفتح فين وهتشتغل مباني ولا تشطيبات

بس انا انصحك خليك في التشطيبات انظف
ولازم تعمل علاقات كويسة اوي مع التجار عشان تعرف تاخد خصم محترم والمكسب كله ليك
ولازم تتعلم تحاسب الزبون ازاي (عموما هي بتتحاسب بالمتر) بس انا الصراحة مش عارف دلوقتي المتر بقي بكام
يعني مثلا لو قلنا المتر ب750جنيه كله في قلب بعضه والشقة 125م يعني انت المفروض تاخد من الزبون 93750 جنيه وتسلمهاله علي المفتاح طبعا بتاخدهم دفعات وبتكتب عقد وتحدد تاريخ الأستلام وبتكتب شرط جزائي

لو محتاج اي اسئلة تاني انا تحت امرك

والله المستعان
،
،

شكرا جدا لكلامك و بجد كلام عن خبره ربنا يجازيه عنك خير
يبقي هوا فعلا الواحد هيشتغل ياخد خبره الاول
و بالنسبه للتشطيبات ف انا احتكيت بيها ع مدار كزا سنه و انا ف الكليه و اعرف صنايعيه زي الاصدقاء كده للواحد
فده انا فاهمه هوا و كتابه العقود و ازاي احاسب و خلافه
اللي معندين خبره فيه اعمال البناء لاني محتكتش بيها
صاحبي التاني هوا اللي احتك بمجال المباني
بس كده ان شاء الله نحاول ناخد الخبره قبل اي خطوه و نشوف السوق ع قرب ماشي ازاي قبل ما ندوس ف الموضوع

[MOUSTAFA_SAAD]

شغلك فى شركة المقاولات حياخد وقتك وحياتك كلها زى ماحصل معايا

انا رائى تشوف شركه محترمه او مكتب تتعلم منه الشغل صح وبعدين تتدور على سفر بعد لما تكون خدت خبره معقوله

وبلاش تبص للمرتب دلوقتى اهم حاجه تشتغل فى مكان تتعلم منه صح

على فكره انت حتلاقى حاجات مختلفه جدا فى الواقع العملى عن دراستك
انا كان بيجيلى مهندسين جداد وفرق السن بينى وبينهم سنتين تقريبا بس هما لسه متخرجين وكنت باعلمهم الشغل

الواقع العملى بيعتمد على الممارسه والاحتكاك المباشر بسوق العمل وساعتها حاتعرف ان اللى بندرسه كلنا فى الجامعه بمختلف التخصصات كلام فاضى

وبالنسبه لموضوع ان المكتب مش حياكلك عيش فى البدايه ده مش شرط
ده رزق بتاع ربنا وممكن تشتغل كويس جدا فى الاول
بس انا اصدى ان شغل المكتب ده مايبقاش هو اللى متوقف عليه بيتك وحياتك
يعنى حاجه زياده لغاية لما يقف على حيله

[love7amada]

اه و بعد اذنك يا بشمهندس سيد
ازاي الواحد يشتغل مع مقاول
يعني انت قلت انزل نزله
يعني هيكون البحث ازاي
اعمل ايه عشان اشتغل من الاخر عشان اخد الخبره؟؟

[love7amada]

شغلك فى شركة المقاولات حياخد وقتك وحياتك كلها زى ماحصل معايا

انا رائى تشوف شركه محترمه او مكتب تتعلم منه الشغل صح وبعدين تتدور على سفر بعد لما تكون خدت خبره معقوله

وبلاش تبص للمرتب دلوقتى اهم حاجه تشتغل فى مكان تتعلم منه صح

على فكره انت حتلاقى حاجات مختلفه جدا فى الواقع العملى عن دراستك
انا كان بيجيلى مهندسين جداد وفرق السن بينى وبينهم سنتين تقريبا بس هما لسه متخرجين وكنت باعلمهم الشغل

الواقع العملى بيعتمد على الممارسه والاحتكاك المباشر بسوق العمل وساعتها حاتعرف ان اللى بندرسه كلنا فى الجامعه بمختلف التخصصات كلام فاضى

وبالنسبه لموضوع ان المكتب مش حياكلك عيش فى البدايه ده مش شرط
ده رزق بتاع ربنا وممكن تشتغل كويس جدا فى الاول
بس انا اصدى ان شغل المكتب ده مايبقاش هو اللى متوقف عليه بيتك وحياتك
يعنى حاجه زياده لغاية لما يقف على حيله

تمام
شكرا جدا يا استاذ مصطفي ع نقل خبرتك
عموما يبقي كده انا هاخد بكلامكم و هحاول كام سنه اني اتقن الموضوع عملي عشان وقت ما احب انقل لشغل خاص ميكونشي في مشاكل تواجه الواحد جامده و شكرا جدا جدا لتفاعلك بجد

[yahyanaabil]

حضرتك انا كنت شغال فى شركه مقاولات سنه ونص بس كانت تركيبات كهروميكانيك (محطات مياه شرب ورفع صرف صحى ) طبعا الموضوع مش سهل زى ما حضرتك متخيل انا معرفش المدنى نظامه ايه بس هوه اكيد مقرف اكتر من الكهرباء والميكانيكا بس الموضوع محتاج شويه خبره عشان متلبسش فى الموضوع ولو درسته صح حيطلعلك فلوس حلوه
اصعب حاجه فى موضوع مكتب المقاولات ده انك تعرف تجيب شغل غير كده كله مقدور عليه لو عندك خبره مناسبه لان بيبقى الموضع فى تفاصيل صغيره انته مش واخد بالك منها بسبب قله الخبره فتلبس فى الحيطه

[love7amada]

خير
ربنا يكرمنا جميها
و ان شاء الله هحاول اخ خبره كويسه قبل اي خطوه

[islamaboelnaga]

سؤال جانبى معلش :)) هو فى تعينات فى المقاولين الايام دى ؟ :)

[love7amada]

بص يا سيدي في كلام طلع انبارح من فرع اللي عند نادي السكه اللي ف شارع محمود المليجي بيقول عايزين 5 او 6 جيد جدا او امتياز و كمان لو ف حد من ابناء العاملين فروح شوف لو فيك حاجه من الاتنين بس الخبر مش اكيد و مع ذلك ف واحده قدمت السي في النهرده لكن لا في اعلان نزل و لا حتي عموقع الشركه

[mikho83]

كل اللي اقدر أنصحك بيه: احذر من النصابين، لأنهم كتير جدا بصورة لا تتخيلها في هذا المجال