موقف غريب جدا

[Dr.Mostafa Anwar]

السلام عليكم ورحمة الله

النهاردة الصبح حصل معايا موقف غريب جدا

في طريق الخليفة المأمون كنت عاوز أطلع كوبري أكتوبر عشان رايح المهندسين فأخدت شمالي عشان أدخل من الإشارة اللي بتودي على شارع فيه مستشفى عسكري وكذا حاجة عسكرية مش عارف إسمه الصراحة بس الإشارة مشهورة وهيا قبل مترو بشوية كده

المهم أنا ماشي في شمالي من بدري ومدي إشارة وقدامي عربيات وورايا عربيات...

وبعدين فجأة ألاقي راجل كبير في السن راكب لانسر بومة بيكسر عليا قبل الإشارة وعاوز يدخل قدامي فأنا كلكست راح جاي راجع حارته تاني وأنا معدي جنبه لقيته عمال يشوح وبقه بيتحرك بس طبعا ما سمعتش بيقول إيه عشان كنت قافل الزجاج وهوا كمان...المهم ما أخدتش في بالي ونفضت ...

الموقف بقى....

دخلت الإشارة عادي وعديت دخلت الشارع وهوا كمان لقيته دخل معايا نفس الشارع بس كان سابقني..

المهم لقيته مهدي والشارع فاضي تماما قدامه فقلت أعدي من على يمينه ومش في دماغي.... لقيته راح كاسر عليا وكان في عربيات راكنة في اليمين كنت هألبس فيها...

رحت قلت ما بدهاش لأني كنت مستعجل وساعة الصبح قبل الزحمة ما تتعوضش...رحت جاي شمال يمين ورحت عامل كيك داون ومعدي من علي يمينه.... اللي حصل إيه بقى....لقيته بيشد وطالع يجري ورايا هههههههههههههههههههه .... مش عارف لما عمل كده اللي جه في بالي إنه راجل مش طبيعي خالص

بعدين دخلت صلاح سالم في الحارة اليمين اللي بتودي على كوبري أكتوبر وهوا عمال بيجري ورايا برده...رحت مهدى خالص عشان يعديني..... راح جاي معديني وماشي قدامي بطئ فأنا كبرت دماغي وقلت هأخليني ماشي وراه وخلاص لحد الكوبري لأن أكيد يعني مش هيطلع الكوبري وإلا يبقى فعلا راجل مجنون وأنا حظي اللي وقعني فيه...

المهم لقيته ماشي لحد ما جت الطلعة بتاعت أكتوبر وعلي يمينها طريق بيودي لميدان العباسية فلقيته راح جاي مهدي قوي قوي وخلاه ماشي في النص ناحية السور بتاع الكوبري اللي بين الطلعة والطريق اللى على اليمين... فاللي جه في بالي إنه فعلا عاوز يكمل السكة معايا ومش عارف أنا هأطلع وللا هآخد يمين...فلما لقيت الوضع كده وإن فعلا الموضوع ممكن ما يعديش على خير لو استمر في الجنون بتاعه ده رحت عامل نفسي داخل يمين فراح جاي معايا وفي آخر لحظة قبل الطلعة بعد ما كان هوا دخل الطريق اليمين رحت كاسر وطالع الكوبري .... وبصيت عليه لقيته مشي شوية كده وبعدين لقيته بيفرمل جامد ودي كانت آخر حاجة أشوفها لأني طرت على الكوبري بقى لحد ما وصلت مشواري


السؤال بقى..... إيه ده؟؟

[aboalm]

ده اللى اسمه تخاريف أخر العمر

[maryano]

دة اسمه عالم فاضيه نزله ترخم علي خلق الله
ربنا يحفظنا

[mr_vampire]

هههههههههههههههههههههه ده اسمها الاصطباحة. عشان كدة بسكلتة الانتاج جنزيرها واقع ومش بتلف لان الناس بتروح شغلها متعفرتة ومش طايقة نفسها.

[alaasaid]

دة اسمه مرض نفسى و نقص للاسف , المفروض راجل كبير فى السن يكون أعقل من كدة لكن للاسف الموازيين مقلوبة فى البلد و قلة الادب و الرزالة بقت هى لغة الحوار

[Dr.Mostafa Anwar]

ده اللى اسمه تخاريف أخر العمر

ربنا يحفظنا ويعافينا...

البلد دي فيها كتير

[Dr.Mostafa Anwar]

دة اسمه عالم فاضيه نزله ترخم علي خلق الله
ربنا يحفظنا

طب يارب يغلوا البنزين عشان يبطلوا العادة دي :)

بأهزر طبعا...إحنا مش ناقصين غلا

[Dr.Mostafa Anwar]

هههههههههههههههههههههه ده اسمها الاصطباحة. عشان كدة بسكلتة الانتاج جنزيرها واقع ومش بتلف لان الناس بتروح شغلها متعفرتة ومش طايقة نفسها.

هههههههههههههه ..... ناقص تقولي إن الراجل ده فلول هههه

[Dr.Mostafa Anwar]

دة اسمه مرض نفسى و نقص للاسف , المفروض راجل كبير فى السن يكون أعقل من كدة لكن للاسف الموازيين مقلوبة فى البلد و قلة الادب و الرزالة بقت هى لغة الحوار

أنا لحد دلوقتي مش فاهم فعلا الراجل ده عمل كده ليه ... بالفعل كل اللي عملته إني كلكست فقط عشان ما يدخلش عليا...يكونش العيب في الكلاكس؟

[kar!m]

ده تقريبا كان عاوز حد يونسه فى الطريق.

[Dr.Mostafa Anwar]

ده تقريبا كان عاوز حد يونسه فى الطريق.

ربنا يشفي ويهدي....

تخيل لو اللي حصل معاه الموقف ده واحد زيه.ززكان زمانهم موتوا بعض هههههههههه