مسافر الحج و محتاج نصايحكم

[hussein]

انا ناوى ان شاء الله اسافر الحج يوم الاربعاء ومحتاج نصايحكم
يعنى اخلى بالى من ايه
مااكترش من الاكل يوم ايه و ما اكترش من الشرب يوم ايه واخد معايا ايه و...................
واللى هيقولى نصيحة هدعيله :))

[cameeron]

بص حضرتك ماتكترش من الاكل يوم منى و عرفة و بالعكس اشرب سوايل كتير علشان هتفقد كتير و ابعد عن الزحام فى طواف القدوم و الافاضة بالذات يعنى الطواف يكون من اوسع دايرة فى صحن الكعبة او من تانى دور و لو انه مرة و تلت اطول من تحت و لما تروح المدينة باذن الله زور الروضة من 2 الى 3 باليل ده هيبقى افضى وقت و ده طبعا نسبيا و دعواتك

[zyadahmed]

حج مبرور وذنب مغفور ان شاء الله

اولا تجنب التدافع والازدحام فى طواف القدوم اول ما توصل وحاول تطوف بعيد شوية عن الكعبة حتى لو المسافة اطول لكن الخشوع هايكون افضل من التزاحم الرهيب خصوصا يوم وصولك ولو حتى اضطريت تطوف من الدور الاول او السطح

ثانيا السعى بين الصفا والمروة اصبح ميسور عن زمان انا الحمد لله حجيت 2003 وكان المسعى دور واحد وحجيت 2009 وكان المسعى 6 ادوار فرق كبير يسر على نفسك واسعى فى اى دور مش لازم الارضى

ثالثا عند الصعود لمنى خد معاك اغراض قليلة علشان تتفرغ للعبادة وكمان كل شئ بيتباع هناك فى منى

رابعا يوم عرفة ابعد عن الشمس المباشرة وحاول تقترب من الجبال اللى على الاطراف بعيد عن الزحام هاتحس بخشوع اكتر ...
خد مصحف جيب معاك ومصلية للجلوس واحفظ رقم خيمتك ومكانها لان المكان كله شبه بعضه فى اسماء شوارع رئيسية وارقام
وقلل من تناول الطعام قدر الامكان والمياه لان الحمامات هى المشكلة الازلية بعرفة مهما زودوا عددها بتلاقى طوابير رهيبة انا كنت باخد معايا تفاح وموز ولبن او عصائر فقط وبلاش اى طعام مطهو واحرص على عدم كسر اى غصن شجرة لان صعيد عرفة بقى مليان شجر

خامسا النفرة الى مزدلفة عايزة صبر ايوب من التزاحم خلى بالك طويل علشان تتم حجك ان شاء الله و حاول تحتاط من البرد الشديد فى الليل خصوصا مع لبس الاحرام الخفيف غالبا بناخد نزلة برد ..فهات ادوية مضادة للرشح والكحة

سادسا :نيجى ليوم العيد الصبح هاترمى الجمار بسهولة ويسر ان شاء الله بعد مشروع جسر الجمرات 6 ادوار ما شاء الله كل ما تعلى لفوق بيكون افضى فى 2003 مات ناس قدامى بسبب ضيق الجسر ايامها وكان دورين
هاتمشى لمكة مشوار طويل تحمل او اركب اى مواصلة واعمل حسابك بيكون السعر خيالى عكس الايام العادية

هاتوصل مكة ان شاء الله تطوف الافاضة وتسعى بين الصفا والمروة وبعدين تحلق حاول فى مكان بعيد هايكون ارخص وافضى وبعدين الذبح وطبعا هاتكون دافع فى بنك او مفوض حد ومعاك الصك وترجع الفندق ترتاح بعد عناء وتتحلل التحلل الاصغر

سابعا : فى يوم العيد بالليل ترجع تانى منى بلبسك العادى جلباب او ترنج سوت مريح ويدفيك فى الليل وخصوصا الفجر برد شديد وفى منى كل شئ متوفر وهاترمى ان شاء الله بسهولة يومان او ثلاثة حسب التعجل
وترجع مكة طواف الوداع وده بيكون ازحم يوم لو تعجلت فى يومين لكن لو اتميت ثلاثة ايام التشريق بيكون الحرم فاضى وربنا يتقبل منك

ولا تنسى اخوك احمد السيد ( ابو زياد ) بالدعاء فى عرفة

[aif]

بسم الله ماشاء الله
ربنا يتقبل منك ويردك الى ديارك سالما غانما خارجا من ذنوبك كيوم ولدتك امك
الف مبروك
بص يا سيدي
في يوم التروية ويوم عرفة بيكون الزحام شديد ودورات المياة مهما كثرت بتكون زحمة
افضل لك انك تقلل اكلك في ايام الحج عموما وهذين اليومين خصوصا لكي لا تحتاج الى دورة المياه
خلي معاك مثلا بقسماط وزيتون ممكن يكفوك عن تناول اطعمة كثيرة تضطرك لأسخدام دورة المياه
خلي معاك كريم للتسلخات .... وكمان فازلين
الفازلين ده للوقاية من التسلخات ممكن تدهن منه بين رجليك قبل الاحرام
اما كريم التسلخات ( مثل بيتنوفيت أو ما شابهه ) ده علشان لو حصل تسلخات تدهن منه كعلاج
......
لو انت شاب وتقدر تمشي يبقى انصحك بالذهاب من عرفة الى مزدلفة ومن مزدلفة الى منى سيرا على الاقدام
اولا ده ثواب عظيم ودي فرصة قلما تتكرر في العمر
ثانيا السيبر على الاقدام اسرع من السيارات نظرا للتكدس الرهيب للباصات والسيارات
ثالثا الجو بيكون رائع في هذا الوقت وخصوصا بالليل يعني مش ح يبقى الموضوع مرهق
....
النصيحة الكبري لحضرتك ولكل حاج
الصبر
الصبر
الصبر
اثناء الحج ح تمر بإختبارات عديدة وكلها تعتمد على الصبر
ح تلاقي زحام رهيب وتدافع يصل الى الضرب وخاصة من بعض الأخوة الافارقة .... لا تفقد اعصابك وتنفعل
ح تلاقي مواقف تحرق الدم من البعض وخاصة بعض المصريين ..... امسك عليك لسانك
ح تلاقي مواقف انسانية تحتم عليك مساعدة الغير وخاصة الكبار في السن ..... كن في عون أخيك لكي يكون الله في عونك
حاول قدر الامكان الا تختلط بأحد ولا تتصاحب مع أحد تجنبا لكثرة الكلام ..... اجعل صمتك فكرا ونطقك ذكرا
الزحام اشد ما يكون في الطواف ....... لازم تحتفظ بهدوء اعصابك ولا تنزلق للملاسنات والمشاجرات ...... تذكر انك تحج بيت الله ....... لا جدال في الحج
وانت في عرفات انتبه الى ان مسجد نمرة لا يقع كله داخل عرفة ..... جزء منه خارج حدود عرفه انتبه لحدود عرفه لكي لا تكون خارجها
اخيرا ... حاول قدر امكانك الدعاء لأهلك واقاربك وجيرانك واصدقاءك وزملائك في المنتدى .... والفقير كاتب هذه السطور
وفي انتظار موضوع مفصل عن رحلة الحج ومناسكه بإذن الله
حج مبرور وذنب مغفور ان شاء الله

[alrabeh]

رحلة موفقة وحج مبرور
خد بالك الشبشب ما يكونش ليه نعل علشان يكون مريح خليك فى الشبشب الأبيض اللى هو حتة واحدة ارجو تكون فهمت اقصد ايه
من كتر المشى النعل بيعلم فى الرجل جامد وبيتعب الرجل
اى ادوية ليك خدها من هنا ، الأدوية هناك غالية جدا
خد معاك نواشف من الفرن حتساعدك كتير وعلب فيتا وتونة
لما تروح منى حتلاقي البعثة المصرية بعد رمى الجمرات مباشرة بيندهوا علشان الناس تمشى ، نصيحتى ليك خليك لليوم الثالث حتلاقي الدنيا رايقة عندك وكمان لما حتمشى اليوم الثالث وتوصا الفندق بتاعك ممكن تلاقى اللى مشيوا قبلك بيوم لسه واصلين من كتر الزحمة

[hussein]

جزاكم الله خير و نصايحكم بجد نصايح ذهبية
واخونا احمد ابراهيم واحمد السيد ان شاء الله هدعيلكم بالاسم والباقى بقى بالشبه علشان مقلوش اسمائهم
ربنا يكرمكم ان شاء الله

[for_ever]

حاول تسأل علي تذاكر قطار المشاعر اللي بتركبه للتنقل من مني لعرفات و مزدلفة
ده هيوفر عليك مجهود كبييييييييييرررررررررررر جدا و اسرع في الوقت
يا ريت يكون معاك خيمة (سعة فردين) للمبيت في مزدلفة لانك هتنام في العراء و ممكن يكون الجو بارد
الخيمة حجمها صغير و سهل حملها
طواف الافاضة هو اصعب طواف, حاول تطوف في الدور الثاني او الثالث, اطول لكن اسهل و اسرع
اجمل ايام يستمتع بها الحاج هيا ايام التشريق, فتذكر نعمة الله عليك و احمد كثيرا في هذه الايام
لا تنسي اخوانك المسلمين من صالح دعائك بان يفك كربهم و يشفي مريضهم و يفك اسراهم و يقضي الدين عن المدينين
لا تنسي مصر من دعائك فانها البلد الامين "ارجو ان ينصلح حالها فلا ينقصنا شئ لكي نتقدم و نتفوق"
تقبل الله منا و منك صالح الاعمال

[ahmed crash]

انا الصراحه محجتش قبل كده فمش هقدر افتيلك بحاجه بس عملت عمره كتيييررررررررر الحمدلله

الطواف .. حاول وانت بتطوف تكون وسط شلة رجاله وابعد عن انك تتحط غصب عنك وسط نسا لعدة اسباب .. تتجنب انك تخبط فيهم وساعتها هتتحرج وهتتلهي انك عايز تبعد من وسطهم والواحد بيبقى محتاج كل ثانية وهو بيططوف غير كده انهم بيبقو بطاء جدااا يعتبر هما الي بياخرو ال
واف وبيبطؤو او النسبه الاكبر يعني

السعي اتجدد واتكبر في 2010 بقى اعرض بكتيييييييييييير من زماان وزودو الادوار يعني متقلقش في السعي بس اكيد في الحجي هيكون زحمة فحاول برضه تبقى في وسط رجاله لنفس الاسباب

وربنا يتقبل انشالله

[yousef1978]

حج مبرور وذنب مغفور بأمر الله تعالى



بإختصار


1- لو قدرت تمتنع عن الأكل والشرب تمااااااااااااااااااااما فافعل وخصوصا قبل يوم عرفة وحتى نهاية رمي العقبة الكبرى

اكتفي فقط بشربة ماء قليييييييلة حتى لو ماء زمزم

واعتمد على أكل الزبادي والفاكهة لأن الجسم بيهضمهم بالكامل تقريبا وهتلاقي نفسك ناسي حاجة إسمها حمام ومش مشتاق للأكل نهائي


2- في منى هتلاقي موقعين لمطعم إسمه البايك عليه زحام رهيييييييييب أنصحك تبتعد تماما عن هذه المطاعم لأنها هتضيع عليك نصف يوم كامل علشان تحصل على وجبة دجاج بسعر مخفض

3- لو لك سكن في منى يبقى تقدر تبات الليل في منى

لكن لو لم يتيسر لك سكن في منى لأي سبب

أولا البيات في منى ليلة عرفة - الليلة قبل نهار عرفة - هي سنة وأنصحك تتركها لأن الأمن لا يسمح لأحد حاليا حتى بالوقوف في منى وكده هتلاقي نفسك صاحي وبتتحرك طول الليل ويضيع عليك حلاوة يوم عرفة

ثانيا تقدر تسكن قريبا من منى في العزيزية وفي بعض الآراء الفقهية المحترمة - مجمعات فقهية - أباجوا الإقامة في مكة لمن ليس له سكن وأن يقضي جزء من الليل في منى



3- فيه شنط بتتحط على الظهر يا ريت تشتري واحدة من الحجم المتوسط مش الكبير ودي هتوفر عليك كتير وتقدر تحط فيها أوراقك وكمان لو معاك موبايل او غيارات

لكن وانت نازل من المزدلفة لمنى لرمي الجمرات ما تشيلش أكياس أو شنط ظاهرة معاك لأن الشرطة هتاخدها منك في الطريق وهتضطر تركنها وتربطها في أي سور والزحام الشديد هيخلي رجوعك للمكان تاني يمثل مأساة وممكن يضيع عليك نصف يوم كامل علشان تقدر تلاقيها - ده لاو لقيتها أصلا


4- الشبشب الخفيف الماسك كويس في الرجلين قد يكون تمنه عشرة ريال لكن قيمته بالنسبة لك مليون ريال

المهم يكون نوع قوي علشان يتحمل



5- يوم عرفة ابتعد عن الزحام وعن الأماكن اللي بعض الجهلة جايبين فيها أكل وموسخين بيه المكان سواء بياعين أو مشترين
وما تاحولش ترتبط بحد أثناء وجودك على جبل عرفات لأن الوصول له صعب

ولو حبيت تتقابل مع حد قابلع على جبل النور اللي هو تبة صغيره فيه ناس بيروحوا يقفوا عليها


6- طبعا فيه الحج المفرد والمقرن والمتمتع وده حسب رغبتك


7- لو حبيت تشتري هدايا فأعتقد مكة الفصال فيها كبير قوي والمدينة الفصال فيها موجود لكن بدرجة أقل


8- اشتري ماكينة حلاقة بلاستيك أو كهرباء حسب رغبتك هتخفف ولا هتحلق كاملا - وأنصحك ما تحلقكش في محلات الحلاقة لأنها غير صحية بالكامل


هذا ما تذكرته وربنا يوديك ويجيبك بالسلامة

تحياتي

[aif]

5- يوم عرفة ابتعد عن الزحام وعن الأماكن اللي بعض الجهلة جايبين فيها أكل وموسخين بيه المكان سواء بياعين أو مشترين
وما تاحولش ترتبط بحد أثناء وجودك على جبل عرفات لأن الوصول له صعب

ولو حبيت تتقابل مع حد قابلع على جبل النور اللي هو تبة صغيره فيه ناس بيروحوا يقفوا عليها

اعتقد ان حضرتك تقصد جبل الرحمة


8- اشتري ماكينة حلاقة بلاستيك أو كهرباء حسب رغبتك هتخفف ولا هتحلق كاملا - وأنصحك ما تحلقكش في محلات الحلاقة لأنها غير صحية بالكامل
.....
حاليا بيستعملو امواس بلاستك في الصالونات وبتكون معقمة ومغلفة زي السرينجات كدة لو ح تحلق في صالون قول للهندي اللي ح يحلقلك موس طبي وتأكد انه مغلف ويتفتح امامك... في غير الموسم الحلاقة بموس طبي ب 10 ريال اعتقد في الحج ح تلاقيه ب 20 ريال .... وثواب الحلق اكبر بكتير من ثواب التقصير

هذا ما تذكرته وربنا يوديك ويجيبك بالسلامة

تحياتي

ربنا يبارك فيك يا حاج يوسف ويجمعنا هناك الموسم القادم بإذن الله

[yousef1978]

ربنا يبارك فيك يا حاج يوسف ويجمعنا هناك الموسم القادم بإذن الله

آمين ، ربنا يبارك فيك وفي أسرتك

أكيد حضرتك تعرف اكتر مني وكما قيل لا يفتى والأستاذ محمد في السعودية هههههههههه