إعـــــــلان

Collapse

.

,
See more
See less

تجربتى فى رحلة الحج العام الماضى ..حسبى الله ونعم الوكيل.

Collapse
X
 
  • Filter
  • الوقت
  • Show
Clear All
new posts

  • تجربتى فى رحلة الحج العام الماضى ..حسبى الله ونعم الوكيل.

    السلام عليكم ورحمه الله كل سنة وانتوا طيبين بمناسبة موسم الحج ويارب يكتبها ويقبلها من كل مسلم مشتاق ان يتم الركن الخامس من الاسلام ..

    وبالمناسبة دى هحكلم بالتفصيل على رحلة الحج اللى اتمتها السنة اللى فاتت علشان ماحدش يقع فى اللى وقعت فية.

    فى شهر يناير اللى فات كنت ناوى اشترى عربية مستعملة وباقى الفلوس اكمل بيها واحج فى نفس السنة.

    (ملحوظة كنت سمعت فتوى فى اذاعة القرآن الكريم عن واحد بيسأل يشترى عربية الاول ولا يحج وكانت الاجابة ان اداء الحج اولى من شراء العربية طالما ان العربية مش هتكون مصدر رزق زى التاكسى او النقل مثلا)

    وبما ان شركتى بتدى دعم مالى لرحلة الحج هيساعدنى كويس لكن اللى معايا واللى هاخدة من الشركة يادوب مش هيكمل 25 الف جنية بعد ما اشتريت العربية فقلت مش مهم اطلع برى وخصوصا انى لوحدى ياعنى مستعد لاى جهد .

    توكلت على الله ودفعت مقدمة انا وواحد صاحبى فى جمعية خيرية تبع مسجد والمسؤل عنها واحد ساكن جنب بيتى وولدتى واخويا كانوا مقدمين عندة على رحلة عمرة رمضان المهم فى شهر رمضان الراجل ماعرفش يجيب تأشيرات عمرة لولدتى واخويا فولدتى سحبت الفلوس من عندة وقالت لى الراجل دة طيب اوى ومش زى اللى كنت بطلع معاة عمرة قبل كدة وشكلة كدة مش هيسد فى موضوع التأشيرة بتاعتك زى ماحصل معايا انا واخوك فاسحب فلوسك احسن وخليها السنة الجاية وخصوصا كمان انة رفع السعر مرتين من 21 الف ونص الى 23 الى 25 الف من غير حتى مايقلى ياعنى كل ماجى اسألة اية الاخبار يقولى على فكرة الرحلة هتبقى بكذا.

    المهم فعلا سحبت فلوسى انا وصاحبى وبعدها بيومين جاب الباسبور الخاص بصاحبى لكن باسبورى مش عارف يجيبة وقالى هياخد وقت

    وبعد اكتر من شهر وكل شوية اسألة على الباسبور يقولى لسة مش عارف اجيبة وانا اصلا مش فارقة معايا على اساس انى اتأخرت انى اقدم فى مكان تانى .

    وفجأة وفى اول يوم من ذو الحجة اتصل بيا و قالى مبروك بابشمهندس بسبورك خد تأشيرة حج طيران والسفر بعد يومن (اخر فوج طيران للحج) وهناخد منك 28000 جنية بس شامل الفنادق والانتقالات وخلافة فقلتة انا مش معايا غير عشرين بس دلوقتى قالى مش مهم هاخدهم وابقى اكتب لى ورقة بالباقى وسدد بعد ما ترجع ان شاء الله

    انا بصراحة فرحت وقلت خلاص بقى ربنا كتبهالى فوافقت(مع انى لو ما وفقتش كانت هتضيع على شركة السياحة اللى الجمعية بتتعامل معاها تمن التأشيرة وكانوا وافقوا على العشرين الف بس قلت انا مش هستغل الظروف )

    جهزت متطلبات الرحلة بسرعة واخدت اجازة حج من الشركة على صورة التأشيرة وكلة تمام وفى يوم السفر قالى روح المطار هيقابلك واحد هناك هيديك تذكرة الطيران والباسبور فوصلت المطار وقابلنى واحد وادانى الحاجة فى شنطة صغيرة وقالى خد دة شيك المطوف بقيمة 1050 ريال هتسلمة فى المطار هناك وعطالى رقم واحد هناك وقالى هتتصل بية وهيجيلك علشان يوصلك للسكن فاقلتلة طب فين المجموعة اللى معايا قالى كلهم سافروا انت تاشرتك ماكنتش فى الحساب فابالعافية قدرنا نحجزلك على اخر طيارة

    (وانا فى المطار كان فى واحد معاة تاشيرة وجاى من المنصورة يحجز تذكرة بعد 3 ايام فلما عرف ان اخر طيارة طالعة دلوقتى وفىها مكان فاضى ولو ماسفرش دلوقتى مش هيسافر فى اى وقت تانى فحجز وراح السوق الحرة واشترى ملابس احرام وحط هدومة فى كيس بلاستك وطلع على نفس الطيارة)

    ركبت الطيارة وصلت الساعة 2 بعد منتصف الليل واتصلت برقم الاخ اللى هيوصلنى للفندق طبعا ماردش ، عادى هو هيصحالى مخصوص مش مشكلة استنى شوية للصبح اتصلت تانى الساعة 7 الصبح فرد على وعرفتة بنفسى فا قالى طب تعرف تاخد تاكسى وتجيلى على العزيزية !! قولتلة طب خلاص مش مهم انا هتصرف .
    وانا بخلص اجراءات الخروج اخدوا منى (شيك المطوف) وحطوا استيكرات على الباسبور كل استيكر بقيمة خدمة معينة ياعنى (قيمة الاتنقال من جدة لمكة ومن مكة للمدينة ومن المدينة لجدة و رسم السكن بالخيام) واللى مش معاة الشيك دة بيدفع قيمتة فى المطار ...

    فسألت واحد هو انا اروح مكة ازاى قالى مانت معاك استيكر مدفوع بقية الانتقال لمكة والاتوبيسات راكنة برة عند استراحة المصريين روح اركبها عادى.... قولت كويس.
    خرجت برة لقيت شباب سعودى صغير هو اللى يخلص اجراءات ركوب الاتوبيسات فقلت لواحد منهم عاوز اروح مكة بص على الباسبور وقالى انت حج (فرادى) انتظر شوية قولت طيب ولو انى مش فاهم ياعنى اية (فرادى) لكن الكلمة دة فضلت معايا فى كل تعامل لحد مارجعت.

    المهم قعدت مستنى ادام الاتوبيسات اكتر من 3 ساعات وناس عمالة تركب وتمشى الا انا وكام واحد زى برضة (فرادى) واخيرا وبعد عناء ركبت الاتوبيس وسلمت للمشرف بتاع الاتوبيسات واللى سلمة للسواق اللى اخد كشف بأسامي كل الركاب اللى معاة وانا من ضمنهم علشان يسلمنا ويسلم الباسبورتات بتاعتنا (يسلمنا هو احنا مطلوبين وانا مش واخ بالى)
    المهم السواق وصلنا حوالى الساعة 12 ظهرا لمكتب اسمة (مكتب فرادى 131 مصر) فى حى الهجرة ولما وصلت قلت كويس اخد بقى باسبورى واروح للاخ اللى هيسكنى ولما سألت عن باسبورى مسؤل المكتب قالى انت هتاخد كارنية علية بياناتك واسورة هتحطها فى ايدك طول فترة الحج وباسبورك هتخدة فى المطار فى رحلة العودة قلت اكيد دةعادى بما اتخلفت عن فوج الحج بتاعى وان الاجراءات دى كانت هتتعمل من خلال شركة السياحة اللى تابع ليها.

    اتصلت بالاخ تانى قالى خدى اى تاكسى او وقف ملاكى(فى السعودية عادى جدا انك توقف اى عربية ملاكى ان شالله GMC او حتى لكزس وتركب معاة وتديلة اجرة ) ورح العزيزية عند سنتر الجارحى ومش عارف تدخل فين جنب مطعم اية هتلاقى مدرسة بنات اسمها مش عارف اية ادخل فيها فاقلتلة اعمل اية قالى بس روح هناك ريح من السفر ومن هنا الفار اللى كان بيلعب فى عبى اصبح كتيبة فيران.

    المهم وقفت عربية هيونداى فخمة كدة مش عارف نوعها اية ووصلت للمكان واتصلت بالاخ تانى وفضل يوصفلى امشى ازاى وكدة لحد مارحت المدرسة دى وكانت عبارة عن مبنى حولية سور خارجى مكون من دورين وكل دور فية زى صالة والصالة فيها اربع اوض وحمامين مش شكل المدرسة اللى نعرفها ياعنى وكان العصر قرب يأذن ياعنى بقالى اكتر من يوم مانمتش

    دخلت المدرسة وانا بجر شنطتى ولابس طبعا لبس الاحرام لقيت واحد نايم فى اوضة على الباب شكلة كدة بواب هندى لا قالى رايح فين ولا جاى منين دخلت و طلعت الدور التانى لانى سمعت صوات حد فوق ودخلت اوضة منهم لقيت فيها سراير كتير بمراتب اسفنج ومخدات كلها بأكياسها واتنين بس اللى موجدين فيها وكانت المفاجأة…..


    السلام عليكم لو سمحت هو الاستاذ فلان فين هو قالى اجى هنا عشان هيودينى الفندق اللى فية فوج الحج بتاعى.. الراجل ابتسم كدة وقالى حمد الله على السلامة انت طالع تبع الحاج فلان بنتاع الجمعية الفلانية وشركة السياحة الفلانية قلتلة اة قالى طب حط شنطتك هنا واستريح وانا هفهمك

    انا واحد من ضمن الفوج اللى طالع تبع نفس الشركة وللاسف احنا اتنصب علينا ومن غير اى انفعال كدة اهدأ وروح اعمل عمرتك الاول علشان تلاقيق لابس الاحرام من امبارح ومانمتش وكل اللى حصلك دة حصل معانا بالظبط وان احنا اتصلنا بالشرطة وجات عاينة المكان وراجعت شركة السياحة دى ملقتهاش مسجله عندها وحتى الاخ اللى انت بتتصل بية دة جبناة والعسكرى السعودى واجهة فقال انا ماليش دعوة بأى حاجة وانا كل اللى اعرفة ان فية واحد فى مصر معرفة اتفق معايا انى اوفر اى مكان مش جنب الحرم بسعر قليل علشان هيطلع ناس تحج ( حج فرادى) ولما حس الراجل انة تورط فخاف وحاول يجرى لكن العسكرى والناس مسكوة وقعد يعط ويحلف انة مالوش اى دخل بالموضوع دة (وبصراحة كدة كان واضح ان هو كمان كان ضحية) وجابوا صاحب المدرسة وهو كمان انكر وقال لو في مشاكل بناقص وكل واحد يروح لحالة لكن العسكرى قالة ماعليك شيىء لكن لازم تزود الحجرات بالمثلجات ومعدات الطهى وطفايات الحريق طبقا لتعليمات السلامة المدنية وفعلا الراجل جاب كولدريرين وتلاجتين وبتجازين مسطح وانبوبتين ...

    طبعا اتصدمت وكلمت الراجل اللى طلعنى الرحلة علشان استفسر منة اكتر لقيتة هو كمان اتنصب علية من شركة السياحة ومش كدة وبس دة فية ناس كمان ماطلعتش اصلا ومش عارف يجيب فلوسهم واقسم لى انة مايعرفش باللى حصل دة وان شاء الله هيحاول يحلها.
    وطبعا انا دلوقتى المفروض هتعمد على نفسى فى الاكل وجميع التنقلات الداخلية وانا اصلا مش عامل حسابى فى اى فلوس زيادة يادوب على اد الهدايا اللى هجبها لاولادى واولاد اخواتى فاحتسبتها عند ربنا وجاهدت نفسى انى ما فكرش الا فى تأدية الفريضة بنفس صافية وبعد مارجع يحلها حلال .

    بداية الرحلة:

    صليت العصر واتجهت للحرم علشان اعمل العمرة وفى الايام دى المواصلات على حسب الزحمة من 10 ريال الى 75 ريال مع ان المسافة لاتزيد عن 7 كم عملت عمرتى وخلصت تقريبا بعد العشاء بساعتين.
    رجعت السكن وتحللت من الاحرام وقابلت المزيد من الضحايا وكلهم نفس السيناريو مع ان فيهم اللى دفع 25 الف وفيهم اللى دفع 35 الف وفى الاخر كلنا فى نفس المكان ومش كلهم طلعوا من عند نفس الراجل اللى طلعت معاة لكن شركة السياحة نصبت على جمعيات كتير وبالنسبة لىة فأنا احسن حال من اى حد لانى اصغرهم ولوحدى لكن كل اللى شايلين همة انهم ناس كبيرة ومعاهم زوجاتهم

    كنت ساعات بروح الحرم مشى علشان اوفر من اللى معايا ولما كانوا اهلى بيتصلوا بيا كنت بطمنهم انى الوضع تمام ومافيش اى مشكلة علشان ماتحصلش مشاكل مع الراجل اللى طلعنى وما يقلقوش على

    فضلت كدة كام يوم وبعد كدة وعلى حسب التعليمات اللى فى الكارنية تبع المكتب المطوف انى اكون متواجد فى المكتب قبل يوم التروية (التروية اليوم اللى قبل عرفة) بيوم علشان يوصلونا ويسكنونا فى خيام (منى) على اساس ان الاتوبيس هيجى يوم 9 ذو الحجة يوصلنا لعرفات والخيمة اللى نزلت فيها عبارة عن (كومبوند) خيام مخصص لحجاج (فرادى 131 مصر) وفى منى الاف الخيم مقسمة (لكومبوندات) فيها من 10 الى 20 خيمة لكل حجاج شركة سياحة معينة او لحجاج القرعة اوالحجاج اللى ذى حالتى بتكون فى خيام لوحدها.

    دخلت الخيمة وكان معايا مجموعة صغيرة من التونسيين ضموهم معانا لان عددهم قليل اوى(حوالى 15 واحد) فكان واحد جنبى مباشرة اتعرفت علىة واكلت معاة وقعدنا نتكلم فى السياسة وقالى لازم نتوحد من تانى و ان شاء الله ربنا هينصر الاسلام و هينصرنا على حكامنا الطواغيت وعلى اللى بيعونوهم من الغرب وبالاخص امريكا وفرنسا (انا بصراحة استغربت من فرنسا دى)

    رحت عرفات يوم 9 بالاتوبيس عادى لكن واحنا راجعين كانت غلطة عمرى ان ركبت الاتوبيس اللى اخد مسافة حوالى 9 كم فى 5 ساعات ونزلت فى مذدلفة ورحت فارش على الارض ونمت لحد الصبح (يوم العيد).

    يوم العيد اكتر يوم تعبت فية جدا واللى ابتدت رحلتى فية من 6 الصبح الى الساعة 3.5 فجرا
    صحيت الصبح من مذدلفة واتجهت الى الجمرات (مسافة 8 كم)
    من مكان الجمرات الى السكن (مسافة 3 كم)
    من السكن الى الحرم لطواف الافاضة (مسافة 7 كم)
    من الحرم الى السكن (مسافة 7 كم)
    من السكن الى الخيمة ...... لفيت من الساعة11 بالليل لحد 3.5 الفجر وسط الخيم اكتر من 15 كم علشان اوصل لخيمتى

    ودى الاماكن من جوجل



    واول ماوصلت لقيت ناس كتير اوى نايمين فى كل حتة ومافيش مكان خالص وانا كنت همووووت من التعب ورجلى طلع فيها زى مية تحت الجلد وبقف عليها بالعافية فربنا هدانى انى لاقت خيمة المطبخ واللى طبعا ملغية وناس نايمة فيها لكن (الموقد) الكبير فاضى ففرشت علية كراتين ونمت ان شالله حتى اصبح القى نفسى مسلوق مش مهم المهم انااااااام
    تانى يوم صحيت على ريحة سجاير (بكرها موت) ناس كانت بتدخن فى الخيمة (قصدى المطبخ) فلما صحيت لقتهم بيقلولى حمدالله على السلامة وعزموا على بالفطار فانكسفت اتكلم وكانت درجة حرارتى ارتفعت و برد واحتقان شديد (ربنا مايوريك الاحتقان مع ريحة السجاير) وحاولت ادخل الحمام لاقيت نفسى مش قادر امشى على رجلى طب هروح ارمى الجمرات ازاى .....
    اتحاملت على نفسى ورحت ارمى الجمرات 2.5 كم رايح و 2.5 كم جاى ورجلى خلااااااص مش قادر
    تانى يوم حالتى كانت اصعب فقررت اتعجل واروح السكن(المدرسة) لكن قبل ما اروح واحد من اللى معانا قالى ماتيجى بصك الاضحية دة نجيب الضانى من المجزر (نصيب الواحد نص ماعز بالكامل) فجبنا الضانى من المجزر الالى الخاص بالاضاحى ومن الى السكن (طبعا مشى) وشايل شنطتى (ونص معزة مسلوخة) وهوووب السما تغيم فجأة وتنزل مطرة شديدة جدا عمرى ماشفت زيها لدرجة انها بلت هدومى بالكامل وبقيت امشى انقط مية دة عير انى غطسان فى اكتر من نص متر مية فى الشارع (البلعات مش ملاحقة ) وبعد عناء شديد وصلت السكن على اذان المغرب

    نزلت اشتريت مطوة قرن عزال وقطعت الدبيحة على اد ماقدر وفضلت اكل منها حوالى اسبوع فى مكة والمدينة

    بعد ما خلصت المناسك اتصلت بالاخ اللى طلعنى فى مصر وقلتلة اية الاخبار انا دلوقتى رايح المدينة فالراجل كتر خير حجز لنا فى فندق متواضع كدة على حسابة فى المدينة جنب الحرم تقريبا ورحت المدينة وقعد فيها لحد ما رجعت مصر فى اخر فوج طيران عائد .

    بعد مارجعت الراجل سابلى 3 الاف جنية من اللى عليا (والله المبلغ كلة ماكنش هيكفينى فى اللى حصلى) وانا قدرت ظروفة وفعلا شركة السياحة النصابة كانت شارية تأشيرات حج (مجاملة) من اعضاء مجلس الشعب وقطعت عليها تذاكر وقالت الناس تعيش حياتها هناك (فرحتهم بالحج هتنسيهم)

    طبعا اولا واخيرا انا بحمد ربنا انه من على واتميت فريضة الحج والله لو كان فهمونى ان دة هيحصلى كنت وفقت بردة ...فعلشان كدة لو واحد كرمة لازم ياخد بالة من الاتى

    تاشيرة الحج بيكون مكتوب عليها (الحملة : سياحة او قرعة) لكن لو كانت فاضية بتبقى تأشيرة حج بيسموها (مجاملة) ودى كانك معاك تأشيرة دخول للحج وبس ومش ملزم من اى مطوف تابع لشركة سياحة او حج القرعة وفى الحالة دى بتدفع حوالى 1050 ريال مقابل توفير الخيام والانتقالات بين الحرمين وتكون ملزم من مكتب المطوف اللى تبع وزارة الحج

    استخراج الكارنية الاتنقالات الداخلية والسكن فى منى بجانب الجمرات وتنظيم مناسك الحج مع توفير مطوف (زى مرشد) والسكن فى الفندق و الخيام شامل الوجبات من واجبات شركة السياحة

    تأكد من فاكس الحجز اللى جاى من الفندق قبل ما تسافر واعرف الفندق دة بيبعد اد اية من الحرم وأوعى تتحرك الا لما تاخد صورة من كشف الحجز فى الفندق .

    معلش طولت عليكم وكل سنة وانتم طيبين .....
    [CENTER][aldl]http://img861.imageshack.us/img861/9730/hussein2.jpg[/aldl][/CENTER]

  • #2
    131 فرادى !!!! انا اتنصب عليا و بيتوني في خيمكم اصلا و انا حاجز مع حجاج الداخل في مكان تاني خالص ... يا نهار اسود الدنيا صغيرة جدا !!!!!!
    [SIZE="4"][CENTER][COLOR="DarkRed"][URL="https://goo.gl/30fu9U"]وكيل هجرة مسجل برقم 1575106 لدى سلطة تسجيل وكلاء الهجرة باستراليا[/URL]

    [URL="https://goo.gl/30fu9U"]Registered Migration Agent - MARN 1575106[/URL]
    [/COLOR][/CENTER][/SIZE]

    Comment


    • #3
      المشاركة الأصلية كتبت بواسطة husseinsalah مشاهدة المشاركة
      السلام عليكم ورحمه الله كل سنة وانتوا طيبين بمناسبة موسم الحج ويارب يكتبها ويقبلها من كل مسلم مشتاق ان يتم الركن الخامس من الاسلام ..

      وبالمناسبة دى هحكلم بالتفصيل على رحلة الحج اللى اتمتها السنة اللى فاتت علشان ماحدش يقع فى اللى وقعت فية.

      .....

      طبعا اولا واخيرا انا بحمد ربنا انه من على واتميت فريضة الحج والله لو كان فهمونى ان دة هيحصلى كنت وفقت بردة ...فعلشان كدة لو واحد كرمة لازم ياخد بالة من الاتى

      تاشيرة الحج بيكون مكتوب عليها (الحملة : سياحة او قرعة) لكن لو كانت فاضية بتبقى تأشيرة حج بيسموها (مجاملة) ودى كانك معاك تأشيرة دخول للحج وبس ومش ملزم من اى مطوف تابع لشركة سياحة او حج القرعة وفى الحالة دى بتدفع حوالى 1050 ريال مقابل توفير الخيام والانتقالات بين الحرمين وتكون ملزم من مكتب المطوف اللى تبع وزارة الحج

      استخراج الكارنية الاتنقالات الداخلية والسكن فى منى بجانب الجمرات وتنظيم مناسك الحج مع توفير مطوف (زى مرشد) والسكن فى الفندق و الخيام شامل الوجبات من واجبات شركة السياحة

      تأكد من فاكس الحجز اللى جاى من الفندق قبل ما تسافر واعرف الفندق دة بيبعد اد اية من الحرم وأوعى تتحرك الا لما تاخد صورة من كشف الحجز فى الفندق .

      معلش طولت عليكم وكل سنة وانتم طيبين .....
      السلام عليكم
      انت راجل محترم وربنا يتقبل منك الفريضة

      وألف شكر على الإفادة
      لا إله إلا أنت. سبحانك. إني كنت من الظالمين

      Comment


      • #4
        ربنا يصبرك ويتقبل منك
        بس عايز أعرف يعنى إيه 131 فرادى
        أصل كان مكتوب 131 فرادى على الكارنيه بتاع والدى ووالدتى
        [CENTER]أرجو من جميع الأعضاء قراءة هذا الموضوع[/CENTER]
        [CENTER]مفاجأة عبدالله أوبل ........ هام (أرجو الدخول من الجميع)[/CENTER]
        [CENTER]http://www.nilemotors.net/Nile/249572-a.html[/CENTER]

        Comment


        • #5
          المشاركة الأصلية كتبت بواسطة أحمد كمال مشاهدة المشاركة
          131 فرادى !!!! انا اتنصب عليا و بيتوني في خيمكم اصلا و انا حاجز مع حجاج الداخل في مكان تاني خالص ... يا نهار اسود الدنيا صغيرة جدا !!!!!!
          طب كويس انها جت معاك على نصبة المبيت فى منى لكن النصب بتاعى ابتدى من اول لاخر يوم .. ربنا يتقبل منك

          المشاركة الأصلية كتبت بواسطة honda4ever مشاهدة المشاركة
          السلام عليكم
          انت راجل محترم وربنا يتقبل منك الفريضة

          وألف شكر على الإفادة
          ربنا يكرمك ويرزقك حج مقبول ان شاء الله

          المشاركة الأصلية كتبت بواسطة ahmed_lol2007 مشاهدة المشاركة
          ربنا يصبرك ويتقبل منك
          بس عايز أعرف يعنى إيه 131 فرادى
          أصل كان مكتوب 131 فرادى على الكارنيه بتاع والدى ووالدتى
          131 دة مجرد رقم وكلمة فرادى ياعنى التأشيرة مش موجة لشركة سياحة او قرعة زى اللى بتتوزع مجاملة وكتير من شركات السياحة بتشترى التأشيرة دى من 6 الى 12 الف وتقطع تذكرة ب 6 الاف (مش عارف لية تذكرة الطيران فى الحج ب 6 الاف منهم 4 الاف ضريبة) وتقولك فى حج طيران ب 28 و 30 الف وعيش مع نفسك بقى سكن اكل انتقالات داخلية ولو محترمة شوية تدفعلك قيمة شيك المطوف
          [CENTER][aldl]http://img861.imageshack.us/img861/9730/hussein2.jpg[/aldl][/CENTER]

          Comment


          • #6
            السنه الي فاتت كان في مهازل في الحج من مصر

            والدي سافر تبع القرعه بيقولي اللي طالعين معاهم كدليل ليهم ومرافقتهم

            قضو حياتهم وسابوهم يعملو الي عايزينو
            ممتنع عن المشاركه

            Comment


            • #7
              تصدق انت ربنا بيحبك قوي لان الثواب بقدر المجهود
              [CENTER][SIGPIC][/SIGPIC][/CENTER]

              Comment

              Working...
              X