انا اعترض !! ...

[Xpert]

انا اعترض !!! اعترض علي ايه ؟ علي كل حاجه !! ...
كنت باتفرج علي دريم النهارده الصبح .. و اتفرجت علي برنامج مش فاكر اسمه .. المهم .. كانو جايبين واحد من مجلس الشعب (محمد العمده - راجل 100 100 والله ) ..المهم .. قال ايه ... هايعملوا مخالفه للي يشغل النور العالي بدون لزمه ... ايه هوه الغباء ده ...طب دي بقي علامه انترناشيونال بستخدمها للتحذير ...
طب بلاش ... ده جاب سيره ال TUV و قال ايه .. بتفحص كل 3 شهور ! انا اول مره اسمع الكلام ده ! .. ده عاوز يخلينا نفحص كل 3 شهور ! ... فين الكلام ده ؟
طب بره ال tuv مسؤول عن قطع الغيار كمان ... فين قطع الغيار الاصلي اللي عندنا ؟ كل حاجه صيني .. ده حتي البني ادم بقي صيني ؟!؟!
سجن ايه و هباب ايه ... و الصحفي اللي معانا برضه مش ضدنا طالع يقول ايه ؟ ... القانون هايتطبق غصب عن الشعب ! ... و شكله كده فعلاً ! ...
انا اعترض ! ... اعترض علي ايه كمان ؟ .. الحديد اللي بيغلي ... الاكل اللي بيغلي ...الرسوم الضريبيه اللي زادت ... البنزين اللي غلي ...الضريبه بتاعه البيوت اللي رفعت ... حركه الغلاء العامه ... قال ايه ؟ المساواه باوروبا ..
اعترض علي ايه كمان ؟ البهدله اللي الواحد شايفها ... البلد زي ما تكون في حاله حرب ... قال اوروبا ... اوروبا تمشي في الشارع ماتلاقيش ورقه زباله .. ماتلاقيش بلاعه مفتوحه .. هناك بيعملوا ميزانيه و دراسات جدوي و تخطيط قبل ما الحاجه تحصل .. هناك بيعمل حساب كل حاجه ... فتلاقي لو عمل شارع يخططله الكهرباء و الغاز و الصرف الصحي و المياه و مش عارف ايه قبل الشارع ما يطلع اصلاً .. فين الكلام ده ؟ ده لازم حفر و تنقيب مليون مره ... لازم يعملوا نمر جديده كل 6 اشهر .. و اختراعات و افتكاسات ... خلاص انا قررت ...انا هاعترض .. انا هاسيب البلد و امشي !

==============

يرجى من العضو الكريم اختيار الساحة المناسبة لمحتوي الموضوع
ويرجى مراجعة قوانين المنتدى
وشكرا

الادارة 3

[Chicco]

كلنا هذا الرجل يا بيشو ....لو تقدر تسافر و لو لفترة محددة سافر ....على الأقل ما تلومش نفسك بعد كده انك ما حاولتش

[Powert]

بيشو خدني معاك

[islambana]

وانا كمان خدوني معاكم

[Mzeid]

بص أنا أكلت من الغلب دة كتير هنا في مصر فلو انت سافرت هتلاقيني في إستقبالك من كتر الغلب ..
:(:)

[Ghamrawy]

و انا كمان عايز اروح معاكو حتى لو بمركب من اللى بتغرق عند ايطاليا دى و نبقى ناخد معانا كمر عربية نقل و ننفخه و نعوم

[Powert]

ياجماعة اللي عايز يسافر يكلمني ويدفع 40 الف جنية واحنا هنسفره على ليبيا بالعربيات

علشان لو غرقت في البحر هتموت كافر مش شهيد والسفر باولوية الحجز

...... والله ولي التوفيق.....

يلا لموا الفلوس مع بعض

[Dr.A.Nabil]

ما تيجو نسافر البلد اللي فيها البتاع بتاع البتاع اللي لو كسرت الزجاج تاخد مليون دولار دي

ونقسم علينا
انا 900 الف دولار وانتم الباقي

[Mzeid]

يا باورت خد سجل اسمي ..
الإسم : محمد هاني
السن : مش عارف بس مولود بقالي زمان
الوظيفة : بشتغل فرد من أفراد الشعب اللي الحكومة بتعذب فيهم كل شوية
التليفون : مش محتاج تكلمني أكيد هتلاقيني جنبك على طول يا إما في شكل شحات أو موظف بيجري على رزقه أو أي فئة من الفئات دي
السكن : نظراَ لغلو حديد التسليح و الأسمنت فأنا قررت أجيب علبة سردين أهو منها أكل و أنام في نفس الوقت
.
.
.
.
و إن شاء الله الفلوس هتوصلك أول ما نغرق أمام سواحل بلاد الواكواك
:):)

[ASD peugeot]

رد مسخره يا كامرو انا مت من الضحك
ولا تعليق علي الموضوع

[bemocarlo]

انا مت خلاص من الضحك يا :party:camaro

[HISHAM80]

I already lift

[FLYINGPEUGEOT]

على فكره ياجماعه بيشو اصلا كان عايش بره !!!
وايه اللى جابك يابنى اصلا !!!!

على العموم انا هعمل زى بتوع مجلش الشعب
معترضون يارايس...وموافقون يارايس...(تصفيق حاد)


انا كده كده ناوى اطلع على فرنسا قريبا .
...مشروع صغيركده ماشى فيه..
ربنا يسهل وتعجبنى القاعده هناك
وافضل هناك على طول
وابعت اخدكم واحد واحد

[analyzer]

خدونى معاكم
بس هسيب الواد محمد لمين هنا ؟ للغلب والحكومه ولا لمين ؟ حد يقولى وانا مش قاعد فيها خالص
ندمت اكبر ندم انى رجعت من بلجيكا
ولكن الحمد لله على كل حال

[محمد المشد]

لما كلكم تروحوا وتتركوا البلد للفاسدين والمفسدين وحرامية البنوك واإكِلى مال الشعب 000 يبقى مين اللى هيفضل 000 ارجوكم اعترضوا كما تشاءون وتكلموا كما تشاءون ولكن لاتتركوا بلادكم من اجل حفة حرامية ، سوف يخلصنا منهم الله وامثالكم هم الباقية 00 الباقية من محبى مصر ومن الشرفاء ، وبأذن الله يأتى الاصلاح على يد كل فرد منكم