حمام التلات

[Moustafa.yonis]

توجد في مصر لمن لا يعرف حمامات قديمة يعود بناؤها ل 300 عام او يزيد

حمامات حجرية ضخمة متوارية في حارات ضيقة في منطقة بولاق ابو العلا، في المنطقة خلف مبني وزارة الخارجية

المهم

الحمام فيه مغطس بارد ومغطس سخن
بيعتمد علي الاتشوك او الصدمة علشان يخرج الرطوبة من الجسم
بخار الماء بيعمل علي تفتيح المسام فيبدأ عملية التكييس وهو ازالة ذرات الغبار والاتربة والخلايا الميته داخل الجلد
بعد كده بيعمل ماساج لتنشيط الدورة الدموية وفك عضلات الجسم

المهم بعدها بتحس انك مدغدغ ومكسر، بس عندك احساس جميل بالانتعاش


انا جربت الحمام ده مرتين

الموضوع جميل ومريح وب 30 جنية فقط

ونفسي اروح تاني بس الواحد بيكسل


انت بتحتاج يكون معاك فوطة و شورت وعصير
ممكن يبقي معاك صابونتك الخاصة او ديتول

في النهاية هي تجربة تستحق انك تجربها

[HeMa_LanCeR]

نفسي اجربها فعلا

[aif]

ياااااااه
فكرتني بالذي مضي
انا روحت مره حمام شعبي في شارع باب البحر ....
باب البحر ده شارع ضيق جدا يمتد من ميدان باب الشعرية حتى ميدان رمسيس
كانت تجربة مثيرة وحاجة عمري ما كنت شوفتها
لكن بعدها بقيت اروح الساونا والبخار والتدليك في النادي ...... النظافة حلوة برضه
تخش ع الساونا 15 -30 دقيقة تطلع منها بني آدم سوتيه ...... تروح داخل تحت الدش الساقع تلاقي نفسك بتعمل تششششششش و بتشهق شهقة رهيبة ح يسمعها اهل مدينة نصر والقاهرة الجديدة....

بس اللي عنده القلب ماينفعش يعملها ..... وتتنشف وتطلع ع الماساج ...... بيعمللك ماساج بمجموعة من الزيوت والكريمات تشعر ان عضلات جسمك عاملة زي الخشب ..... وبعدين تلين شوية شوية لغاية ما تبقى ملبن ... كان اللي بيعمللي مساج بيحضر ماجستير تربية رياضية وفاهم هو بيعمل ايه
وبعدين تدخل على البخار 30-40 دقيقة .... تطلع منه جسمك زي الماكرونة الاسباجيتي اللي بقالها 3 ساعات بتغلي ع النار
تروح داخل ع الدش ومعاك ليفة لوف مش بلاستك سييييس من بتاعت لوكس ... وشاور جيل يستحسن يكون بالبطاس
وتاخد اقوى شاور في حياتك
وتتنشف وتطلع تروح تنام ساعتين وتلبس البلدة والبابيون وتطلع على الفرح علطول
الف مبروك يا عريس
بالرفاء والبنين

[twinsrashed]

نفسى اجرب الموضوع ده مش هو ده اللى بيقولوا عليه دلوقتى spa :)

[medododo]

طب والنظافة عاملة ايه
انا كنت اسمع (يارب أكون غلطان)
إن الاماكن دي بتجيب أمراد جلدية وخصوصا المغطس ؟؟؟؟

[aif]

طب والنظافة عاملة ايه
انا كنت اسمع (يارب أكون غلطان)
إن الاماكن دي بتجيب أمراد جلدية وخصوصا المغطس ؟؟؟؟

المغطس ده المياة فيه ساخنة جدا .... يعني صعب اوي انك تتحمل تنزل فيها .... لكنها بتطلع بخار من كتر الحرارة بيخلي المكان زي حمام البخار
لو عاوز حاجة نظيفة وشيك شوف مشاركتي السابقة عن الجيم في النادي ... دي بقى مافيهاش لا عدوى ولا اي مشاكل

[midoabdeen]

طيب ممكن المكان بالظبط
لان فعلا نفسى اجرب الموضوع دا جدا

[aif]

طيب ممكن المكان بالظبط
لان فعلا نفسى اجرب الموضوع دا جدا

الكلام ده كان في سيتي جيم ده اسفل الصالة المغطاه اللي ف نادي مدينة نصر اللي امام جامعة الازهر
ومسموح لغير اعضاء النادي لكن اعضاء النادي لهم خصم .... الاسعار مش عارفها لأن لما روحت كان من سنتين او 3