للمتفائلين فقط : عن السعادة الزوجية ما بعد الزواج

[أبو صلاح]

السلام عليكم
طبعا مفيش اكتر من المواضيع اللي بتتكلم عن الواقع المرير (من وجهة نظر بعض الناس) بعد الزواج

لكن هنا عايز الناس تقولي ايه الحاجة الحلوة اللي لقيتها بعد الجواز وايه فكرتها عنها قبل كده

في احد الزملاء لي بيقولي يعني لما تصحى من النوم وتبقى منكوش وتلاقي جنبك المنكوشة وكله يبقى على المكشوف مش بتتضايق ؟

قلتله انا بقيت يوميا اغسل سناني قبل ما انام وبحط برفان كمان
اتحدى اي شاب عازب يعمل كده

عايز الناس تقولنا

لو في تجارب ممكن الناس تعملها علشان ترفع من مستوى السعادة الزوجية علشان نقدر نواجه الحياة ونعيش
مهو ما يبقاش هم بره البيت وهم جوه البيت


الفكرة من الموضوع اننا نساعد الشباب الغير متزوج انه يدخل القفص بقى ونفرح بيه

يارب اشوفكم ياللي في بالي قاعدين في الكوشة
اول حرف من اسمهم
ش
أ

اتمنى اسمع تجاربكم


امضاء
متزوج حديثا من سبتمبر 2011

[CryptonX]

في حياتي انا بحاول اكثر من الهدايا الصغيرة ولكن رمزية ... يعني ورود .. كروت ... وخلافه .. كنت فاكر الموضوع تافه او حاسس انه تافه يعني لكن بيفرق كتير في "عدل المزاج".

تذكر اعياد الميلاد و اعياد الزواج برده شيء جيد .

ساعات بحاول اساعد في توضيب البيت بس على استحياء طبعا :p
و حسيت باد ايه امي كانت بتعاني معانا ... ربنا يديها الصحة !

اي مشاوير (عربية واحدة) بوافق مهما كان الوقت اوالتعب ... بس كل ده طبعا في رصيدي d:

[أبو صلاح]

ف.

ساعات بحاول اساعد في توضيب البيت بس على استحياء طبعا :p
d:

على فكرة تقريبا ده افضل موضوع بيبسطهم جدا

بس انا بكره الموضوع ده كره العمى
بس ساعات بعمله على خفيف علشان الطف بيه الجو او اصالحها بيه او اغير بيه مود

ساعات بقى بعمل خطة شيطانية لكن بتفشل
اقولها خلي عنك الاكل انهاردة وانا هجهزه
ادخل المطبخ واعك عك ملوش حل
افتكس



وابقى متخيل ان الاكل مش هيعجبها اورتاح وتيجي منها وتقولي بلاش تدخل المطبخ تاني

لكن بعد لما تاكل ممكن تقعد ساعة تمدح في اكلي


والاظرف انها ممكن تطلبه بعد كده

[minicooper20]

انا شاب عازب و بغسل سنانى قبل منام خسرت التحدى ههههههههههههههه

[pro_samir]

نفسي ارد خصوصا علي موضوع الرصيد ..

ارد يابوصلاح ولا أستني لما الموضوع يتشقلب ؟ :)))

[أبو صلاح]

نفسي ارد خصوصا علي موضوع الرصيد ..

ارد يابوصلاح ولا أستني لما الموضوع يتشقلب ؟ :)))

هات ما لديك يا باشا

انا برضه عندي احساس ان الموضوع ممكن يتشقلب

[sheko_2000eg]

بصراحة دي اكتر حاجات عجبتني بعد الزواج :
1- اصحي من نومي الاقي فطار .
2- هدومي دايما ً مكوية و مغسولة و متعلقة .
3- لما اتاخر بلاقي حد بيقلق عليا و دايماً بلاقي حاجة بتشدني اني اروح البيت بدري عشان في وحدة مستنياني في البيت .
4- لما جبت اولاد باه دي متعة الحياة ادخل القي شوية لعب صغيرة بتجري عليا و بتقول بابا جيه و سعات بيقولولي يا شريف منغير بابا بس بردو مبسوط بيهم اوي .
5- باكل اكل نضيف مش اكل من الشارع و دي كانت حاجة تعباني جداً ايام العزوبية .
6- الفلوس بتكتر اه و الله بجد ربنا بيرزقني اكتر من الاول و ده بسبب الجواز و العيال .
7- وقت محمب اخرج مع مراتي بخرج منغير مواعيد و منعير شروط و منغير اي مشاكل (مراتي و انا حر فيها)
8- اكلت اكل عمري مدوقتو قبل كده و ده لان مراتي مشاء الله طباخة ممتازة و امي كانت فاشلة للاسف في الطبيخ فدا عمل فرق كبير معايا .

صدقوني الجواز ده نعمة من عاند الله و لازم ننعم كلنا بيها.
بالمناسبة انا متزوج من 5 سنوات و عاندي ولدين تؤام سنتين و نص .

[A7MED_PHARMA]

إلحق ياشنوري
أبو صلاح بيلقح عليك بالكلام .. وبيقول (ش)
المنتدى مافيهوش (ش) غير القرصان شنوري
...

قلبي كان حاسس إنك هتسيح يابوصلاح

[A7MED_PHARMA]

1- اصحي من نومي الاقي فطار .

مانت ممكن تصحى من النوم تلاقي باقي العشاء بتاع إمبارح .. ثم إيه لازمة الفطار أساسا

2- هدومي دايما ً مكوية و مغسولة و متعلقة .

لو بتلبس جينز وتي شيرتات زي أخوك فارما .. وعندك غسالة أوتوماتيك .. مش هتفرق معاك الحتة دي

- لما اتاخر بلاقي حد بيقلق عليا و دايماً بلاقي حاجة بتشدني اني اروح البيت بدري عشان في وحدة مستنياني في البيت .

يعني ماينفعش تسهر مع أصحابك حتى مطلع الفجر ..ولو خرجت تكون قلقان على الي في البيت ..وماينفعش تتسرمح زي الرجالة اللوز الي زي الفل زي أخوك فارما وشنوري كده

- لما جبت اولاد باه دي متعة الحياة ادخل القي شوية لعب صغيرة بتجري عليا و بتقول بابا جيه و سعات بيقولولي يا شريف منغير بابا بس بردو مبسوط بيهم اوي .

ولما يعمل بيبي عليك .. ولما تدخل البيت تعبان وعاوز تنام .. تلاقيهم فوق رأسك واااااء وااااااااااء
ولما تحب تتكلم كلمتين على إنفراد .. ماتعرفش علاشن العيال بتعيط
ولما تلاقيهم موسخين البيت
ولما ييجي جارك الأستاذ مرسي .. يقولك إبنك كسرلي إزاز عربيتي
ولما تيجي جارتك الست صفية .. تقولك " لو مالمتش المحروس إبنك , وخليته يبطل يعاكس البت .. هعمل وأسوي"
ولما تظبط علبة السجاير بتاعته تحت المرتبة .. وتقلب في الموبايل بتاعه تلاقي بلاوي زرقا
شوف هتبقا مطمن وبالك مرتاح إزاي؟؟؟

5- باكل اكل نضيف مش اكل من الشارع و دي كانت حاجة تعباني جداً ايام العزوبية .

لما تحب تاكل أكل نظيف .. أطلب ديليفري من مسمط .
أو تروح تاكل عند أبوصلاح .. الراعي الرسمي للحياة الزوجية السعيدة

6- الفلوس بتكتر اه و الله بجد ربنا بيرزقني اكتر من الاول و ده بسبب الجواز و العيال

الفلوس بتكتر
لكن المصاريف بتكتر أكتر .. وتلاقي كل وقتك علشان توفر فلوس للناس إلي بقوا في رقبتك
ولو إضطريت تستلف علشان تصرف عليهم .. هتعملها

7- وقت محمب اخرج مع مراتي بخرج منغير مواعيد و منعير شروط و منغير اي مشاكل (مراتي و انا حر فيها)

وتخرج ليه أساسا
كيس فشار .. وتشغل ام بي سي اكشن .
وبعدين حاول تتأمل في الكون .. وإنت تنسى المتع الدنيوية البسيطة (نيااههاااااااا)

- اكلت اكل عمري مدوقتو قبل كده و ده لان مراتي مشاء الله طباخة ممتازة و امي كانت فاشلة للاسف في الطبيخ فدا عمل فرق كبير معايا

شوفتوا
أول الجواز .. إنك تبيع الست الوالدة وتقول عليها ماكنتش بتعرف تطبخ
طيب كنت بتاكل من أكلها ليه طالما ماكنتش بتعرف تطبخ(أنا بهزررررر بجد)
ولو ع الأكل
قلنا إطلب ديليفري من أي مسمط .. أو تسلق بيض وتاكل وخلاص زي مالناس كلها بتعمل

[WalidAdel]

موضوع رائع يابوصلاح
انا قولت اخش امسي عليك طالما انت ناسيني كده قعدة معاك مرتين بس ياتري فاكرني ولا ......

[FunnyMickey]

والله انا اعتقد ان سر السعاده الزوجيه يكمن في رضا الله عز وجل عن هذا البيت
يعني لو بيت ربنا موجود فيه بقرءان وطاعات وذكر وصدقات
يخرج منه الشيطان وتبقي فيه السعاده الزوجيه
اما لو البيت فيه روتانا سينما ومزيكا وميلودي والزوجه والزوج عايشين كده وخلاص
وتتولد الاطفال بردو عايشين كده وخلاص
يبقي منين حتيجي السعاده الزوجيه وفي بيتنا شيطان؟

[A7MED_PHARMA]

ايون
ايون
حلو أوي الكلام بتاع الرجالة المتجوزين جداد
عارف انا الفترة الحلوة دي .. الحياة حلوة بمبي بمبي

صبرك بالله ياصبحي إنت ومحمد صلاح
أديكم شربتم نص الكباية .. شوفوا بقا النص الفاضي

[A7MED_PHARMA]

صبحي
ماتعتقدش تاني

[FunnyMickey]

ياابني مانا ليا اصحابي وتعساء في حياتهم
حد قال اننا بنقول كلام في الهوا
الجواز مشروع زيه زي اي مشروع
فيه ناس بتفتح وتفشل
وفيه ناس بتكافح وتتعب وبتنجح في الاخر
وفيه ناس عامله المشروع واهو ماشي وخلاص

العزوبيه ليها جمالها وحلاوتها
والجواز كمان فيه حاجات حلوه كتير
يكفيني انا متعه الاستقلال وان العيل بتاع امبارح اللي كان بياخد مصروفه من ابوه متحمل مسئوليه بيت بمشاكله وهمومه واحتياجاته
احساس المسؤليه ده وان حد معتمد عليك في حياته
بيحسسك ان ليك قيمه في الحياه ليك دور
بتعمل حاجه
مانا ممكن انجح لوحدي
واشتري شقه وافرشها
وعربيه وادلع نفسي وبلاها جواز ياعم
وبعدين
.......
فين الهدف بقي اللي انا عايش عشانه
فين احياء سنه وهدي نبينا سيدنا محمد
فين تزوجوا الودود الولود فإني مكاثر بكم الأمم يوم القيامة

فرحه قلبك وانتا ابنك عنده سنه ولا سنتين وحفظ الفاتحه
وييجي يسمعها وانتا تبقي طاير من الفرحه

الابن اللي انتا بتقول عليه وخايف منه انه ترفع مخدته تلاقي سجاير ولا حشيش
ده مش حتبقي مربيه في المسجد ومعلمه الصلاه والصوم والقرءان
واما يكبر حيحشش
مستحيل
وحتي لو ضاع في فتره من عمره ووقع زي ما كلنا مرينا بالفتره دي
بيكون فيه اساس
قواعد
خط احمر عمره ما بيعديه

مانا كان ليا اصحابي في المدرسه والجامعه
وشرب وبنات وشقق وكل اللي انتا عاوزه
بلاش دي
انا قعدت سنه اشرب سجاير وشيشه
وعلبه السجاير اللي انتا بتقول عليها كانت في الجاكت
وبعدين قلت ايه التخلف اللي انا فيه ده
حسيت اني بعمل حاجه غلط
حسيت اني بزق نفسي لحاجه غلط
اللي خلاني اعمل كده اصحابي
واللي رجعني عن اللي كنت فيه تربيه ابويا وامي ليا
يبقي الجواز والخلفه مش هم
مشكله الناس انها فاكره ان الجواز ده شئ مكمل للحياه
لو اخدوا الجواز وسيله لتحقيق هدف وهو النجاح في تكوين اسره مسلمه ملتزمه
مكنش حد قال الكلام اللي انتا بتقوله ده
مكنش اصلا حد بقي فاضي للخناق والهم والغم
عندنا هدف عاوزين نحققه
المشروع لازم ينجح

واوعي تفتكرني يامعلم لسه عايش في شهر العسل
بنتخانق وبنزعل وشفت النكد وعشته وشفت الست لما بتتحول وعقلها يبقي صغير وتزعل علي اتفه الامور
وشفت الزن والرغي وكل اللي قلبك يحبه
يعني شايف الكبايه فاضيه ومليانه
بس بردو
ارجع واقول كل حاجه في الدنيا وليها مشاكلها
مانتا ياعم كل يومين تتحفنا بقصه من قصص الليل بتاعتك مع زباين غبيه بيطلعوا روحك وعينك
ايه بقي اللي مصبرك عليهم
بتستحملهم ليه ؟
انا شخصيا لو مكانك اخلي معايا رشاش
:)
اهو انتا مستحمل عشان ده مستقبلك وحياتك
اهو يوم بقي ما تعتبر الجواز ده مستقبل وحياه
ساعتها حتبقي بتفكر زينا
وتعيش حياتك كلها عسل
وتلاقي الزباين اللي في الصيدليه دول بقوا ناس عاديه جدا جدا بالنسبه للي عندك في البيت :) :)

[bmw3m007]

السلام عليكم
طبعا مفيش اكتر من المواضيع اللي بتتكلم عن الواقع المرير (من وجهة نظر بعض الناس) بعد الزواج

لكن هنا عايز الناس تقولي ايه الحاجة الحلوة اللي لقيتها بعد الجواز وايه فكرتها عنها قبل كده

في احد الزملاء لي بيقولي يعني لما تصحى من النوم وتبقى منكوش وتلاقي جنبك المنكوشة وكله يبقى على المكشوف مش بتتضايق ؟

قلتله انا بقيت يوميا اغسل سناني قبل ما انام وبحط برفان كمان
اتحدى اي شاب عازب يعمل كده

عايز الناس تقولنا

لو في تجارب ممكن الناس تعملها علشان ترفع من مستوى السعادة الزوجية علشان نقدر نواجه الحياة ونعيش
مهو ما يبقاش هم بره البيت وهم جوه البيت


الفكرة من الموضوع اننا نساعد الشباب الغير متزوج انه يدخل القفص بقى ونفرح بيه

يارب اشوفكم ياللي في بالي قاعدين في الكوشة
اول حرف من اسمهم
ش
أ

اتمنى اسمع تجاربكم


امضاء
متزوج حديثا من سبتمبر 2011

انا مش متجوز بس اعتقد الموضوع سهل يعني
شوف الطرف التاني بيحب ايه و اعمله

اكيد مش كل البنات زي بعض
انت جرب اكتر من حاجه لحد ما توصل

و ربنا معاك
هههههههههههههههههههههههههههههههه


عازب