تجارة ولا نصب ؟

[A7MED_PHARMA]

السلام عليكم


سؤال مباشر

لو واحد جاي يشتري منك سلعة
هل إنت ملزم إنك تقوله عيوبها المستخبية
ولا تسكت عنها .. وتحليها في عينه
ولو هو ماعرفش ان فيها عيب .. يبقا دي غلطته مش غلطتك؟

يعني حرام إنك تخبي عيوب سلعتك وتجملها
ولا لازم تكون صريح وتقول عيوبها وتسيب المشتري يختار؟

[ABDULLAH AHMED]

التجارة امانة ... وتستلزم على البائع ان يبين كل حاجة بالنسبة للسلعة كعيوب ومزايا
عشان لو فيها عيب وبتبيعها على عيبها دون ما تبين للمشتري حيبقى حرام وفلوس حرام
والله اعلم

[sayed911]

ده واجب يا دكتور في اصول الفقه انك توعي الشاري بيعيوب السلعة مهما كانت ..

[A7MED_PHARMA]

الفكرة

أنا إشتريت عربيتي الانسر من سنتين .. والبايع سكني سكة محترمة
خباى عني كل العيوب
ولما إشتريتها .. ولقيت فيها العيوب الي كلفت عليا علشان أظبطها مبلغ وقدره
فانا قررق وحسبت إن أنا ليا عند البايع انصاب مبلغ كبير
والأيام والوقفة عند الصنايعية قرفتني وربت جوايا غضب لازم أخرجه
-خدوا بالكم الكلام ده كان من سنتين-
قررت إني أحرقله عربية ف المعرض بتاعه بما يساوي قيمة فلوسي عنده إلي مش هعرف أخدها طبيعي

سالت واحد شيخ على فكرة إنه نصب عليا
الشيخ قالي دي غلطتك .. إنك ماعاينتش الحاجة قبل ماتشتريها
أقوله ياشيخ .. الراجل خبى عني كل العيوب الي مستحيل تظهر في ساعتها .. العيوب الي بتظهر مع الوقت
قالي برضوو غلطتك


سيبوكم من موضوع إني كنت عاوز أنتقم منه وأفش غلي
هل نصبه عليا .. غلطتي ولا غلطته؟؟؟

[Egyzizo]

لو عيب جوهرى ، من الأمانة انك تقول عليه ..
لك لو عيب نسبى فمش مشكلة ، لان الآراء متغيرة من واحد للتانى.

[Egyzizo]

غلطته طبعاً ..

وتبقى غلطتك برضه لو كنت اشتريت عميانى ..
لكن لو عاينت على قد ما تقدر ومالقيتش عيوب تبقى مش غلطان.

[SS]

سؤالين:
- هل تفرق اذا كانت العيوب ظاهرة ام خفية؟؟؟
- هل ترضى لنفسك الطريقة ديه فى التعامل؟

رأيى الشخصى هو غلطان طبعاً لو باع لك و هو ع علم و متأكد من العيوب اللى فيها - و لو بحساباتنا فى الدنيا مش غلطان

ع اعتبار ان العربية عجبتك و انك قبلت و اشتريت -فاكيد عند ربنا الوضع مختلف

و انت غلطان بحكم ان مخدتش حذرك و الاحتياطات اللازمة فى ظل وجود ظروف و اخلاقيات و ذمم ...انت عارفها اكتر منى

بس هل العربية كان فيها عيوب جسيمة و لا حاجات عادية؟؟ اصل موضوع العيوب ده فى بعض الامور للأسف عندنا بيبقى نسبى

يعنى فيه حاجات الناس بتعتبرها عادية و ما فيش داعى لذكرها..مع انها عيوب بس السوق الغريب بتاعنا خلانا نعتبرها من المسلمات خاصة لو راكب مستعمل

[A7MED_PHARMA]

القصة إني لما روحت أخلص فيها
جبت ميكانيكي تبع واحد صاحبي .. علشان يعاينها على إعتبار إنه(أيامها) بيفهم أحسن مني
إلي عرفته وإتأكدت منه بعدها بكام يوم
إن صاحب المعرض ظبط الميكانيكي .. والميكانيكي باعني ليه
والاتنين لبسوني العربية الي كان فيها مشاكل كتيرة ساعتها
زي حتت الكاوتش كان بايظ .. المكنة كانت متصلبة .. الكهربا كان فيها عيوب(وكل ماأسأله دي مش شغالة ليه .. يقولي الفيوز عاوز يتغير بسسسسس)..
وكان فيها رش على قايم من جوه
ولبست لبسة محترمة
هي دي القصة
وأقول الشيخ..يقولي غلطتك إنك ماعاينتهاش كويس مش غلطة البياع

[SS]

لو الموضوع زى ما انت بتقول....فاعتقد ان المفروض كده انك عملت اللى عليك قدر الامكان

بس للأسف حظك كده....و لبست

(و اللبس فى البلد ديه يا دوك مكتوب علينا....بغض النظر عن مدى الاضرار و عدد المرات ....سواء كنت عارف انك دخلت فى الحيط و لا ما تعرفش)

ربنا ياخده هو و امثاله عشان نستريح...

بس يعنى ايه المكنة متصلبة؟؟...و الميكانيكى الطاهر الامين اللى كنت واخده معاك ...وضعه ايه؟؟

[A7MED_PHARMA]

المكنة متصلبة .. يعني ماكملتش 6 شهور وكانت معمرة
والحرامي الوسخ
لماباعلي العربية ..كان الشدادين الي ورا مكسورين وملحومين لحام عبيط
ومع أول مرة سافرت فيها ومعايا الحج والحجة وإخواتي..دوران عادي جدااا حاسيت إن العربية من ورا بتيجي يمين وشمال زي ديل السمكة ...وكنا هنموت لو حد كان ماشي جمبنا ساعتها
وربنا ستر وولحقت أوقفها قبل مانروح في داهية

الميكانيكي الوسخ
قولتله العربية فيها إيه .. قالي دي عربية (فورة)..وإوعى تسيبها
وللأسف
الواحد بيدي ثقة للناس بغباء
والحرامي (سواء الميكانيكي أو البياع) مش عارفين إن الــ100 أو الــ1000 جنيه مكسب حرام
أنا هاخد بيهم حسنات (ده لو عندهم) منهم يوم المشهد العظيم .. وهرمي بيهم سيئات من عندي على أكتافهم
ربح البيع

أنا مش زعلان على فلوس
أنا إلي كسبان فعلا في الموضوع ده .. بس بكره الخيانة والغدر
وخصوصا من واحد أنا جايبه ومستأمنه إنه يشتريلي عربية (أيامها)
الواحد دلوقتي بيعرف العربية المشمومة من على بعد 10 كيلو ..وكلها خبرات كلفتنا فلووووس

[blazer]

خير
دا قضاء ربنا
انا لسه شارع عربيتى برده
لاقيت فيها كنترول بايظ
محدش عنده امانه فى البيع ولا الشرا

[amr_lamor]

انا حصلي نفس الموقف بتاعك ده من سنه ونصف تقريبا وعملت موضوع بيه في المنتدى و خسرت 8000 جنيه في 6 ايام ومرضتش ابيعها غير لواحد عارف اللي فيها وحصلي بعديها بسته في عربيه تاني و برضه خسرت كتير....بص يا باشا ده قدر وانت مش غلطان طبعا..انت انسان محترم اخدت واحد بتثق فيه عشان يشوفلك العربيه...ايه الغلط في كده؟؟؟؟ اي حد بيشتري عربيه بيعمل كده!!!! والشيخ اللي قالك انت غلطان ده مش عارف بيتكلم بأي منطق...ده منطق الدنيا مش منطق ديني...انت اكيد اضايقت لما عرفت اللي في العربيه...انت لو ترضى ان حد يتضايق ويدعي عليك زي ما انت عملت في اللي باعلك العربيه بيعها و متقولش لحد على اللي فيها بس خلي بالك ان كده حرام.....عارف اللي يغيظك ان الاتنين اللي اشتريت منهم العربيات مش تجار وبيصلو ومرتاحين ...يعتي سبحان الله الالفين ولا التلاته اللي هيخسرهم مش هيفرقو معاه خالص ...حسبي الله ونعم الوكيل فيهم..يارب الفلوس اللي خدوها تحرقهم.
اللي يغيظك كل واحد يقول قال الله وقال الرسول و عند الفلوس محدش قال حاجه..اصله فاكر ان ده رزق ربنا باعتهولو من السما وان هو عشان كويس ربنا بيكرمو .....عموما من ترك شيئا لله بدله الله خير منه... ومين عارف ممكن يكون ده فدا ليك او ربنا بيخلص ذنب انت عملتو....فمتزعلش خالص الحمدلله على كل حاجه ولازم تعرف ان ده قدرك :)

[محمد عز]

الكذب والكتمان في البيع يؤديان إلى محق البركة - إسلام ويب - مركز الفتوى

السؤال
قمت ببيع دراجة نارية لشخص في السوق، لكني كنت قبل عامين ونصف قد تعرضت بها لحادث وقد أصلحتها في حينه واستعملتها كامل تلك المدة السنتين والنصف بدون أي شكوى من موضع الحادث، سؤالي هل قد أثمت بعدم إخبار المشتري بذلك؟ وماذا علي أن أفعل الآن؟ علما بأن كلا منا في بلد مختلف، وأنا لا أعرفه مباشرة، لكن ممكن أن اصل إليه بالسؤال إن شاء الله إن توجب علي ذلك.


الإجابــة


الحمد لله والصلاة والسلام على رسول الله وعلى آله وصحبه أما بعد:

فإن كان بقي بعد إصلاح الدراجة عيب مؤثر، بحيث لو علم المشتري امتنع من شراء السلعة، فإن الواجب عليك بيان هذا العيب للمشتري، لما في ستره عنه من الغش، وفي الحديث: البيعان بالخيار ما لم يفترقا، فإن صدقا وبينا بورك في بيعهما، وإن كذبا وكتما محقت بركة بيعهما، رواه البخاري .
وعليه، فإنك تبحث عن هذا الشخص وتخبره بهذا العيب، فإن سامحك ورضي بالقيمة السابقة، وإلا قدرت قيمتها معيبة ورددت له الباقي، وكل هذا إذا لم يعلم المشتري بوجود العيب عند البيع، فإن علم ورضي فلا يلزمك شيء.
قال شيخ الإسلام في الفتاوى الكبرى: ومن باع مغشوشا لم يحرم عليه من الثمن إلا بقدر ثمن الغش فعليه أن يعطيه لصاحبه أو يتصدق به عنه إن تعذر رده، مثل أن يبيع معيبا مغشوشا بعشرة وقيمته لو كان سالما عشرة وبالعيب قيمته ثمانية، فعليه إن عرف المشتري أن يدفع إليه الدرهمين إن اختار، وإلا رد إليه المبيع، وإن لم يعرفه تصدق عنه بالدرهمين. اهـ.
والله أعلم.