تصميم شعار شركة؟؟؟ مساعدة

[A7MED_PHARMA]

السلام عليكم



قرفت بقا من الصيدلية(زي مانتوا عرفين طبعا)

كنت فتحت موضوع من فترة علشان كنت فكرت في ترخيص شركة تعبئة مواد صيدلانية زي
الكحول
الجليسرين
برمنجانات البوتاسيوم
بيروكسيد
وخلافه ..........


البداية إن شاء الله هتكون بالكحول
أنا صممت أكتر من شعار

دول أجمل 4 من وجهة نظري

الشركة بإذن الله هيكون إسمها fair
fair pharma ,for pharmaceutical products


قولولي مين فيهم أحلى
ولو حد عنده أفكار+فوتوشوب
يوريني تصميمات تانية لو أمكن لنفس الإسم
ولكم جزيل الشكر


ولون الخلفية الي هتبقا على الــ label إلي هي اللزقة ال هتكون على العبوة
الأفضل يكون درجة لون إيه؟

[Ignition-Kid]

ياريت تروح لمصمم محترف..الموضوع مش فوتوشوب وبس !

[A7MED_PHARMA]

مش مستاهلة مصمم محترف ولا حاجة

الموضوع وجهة نظري جمالية مش أكتر
المصمم عبارة عن شخص مبدع .. وأخوه فارما شايف نفسه(نوعا ما) مبدع

يعني التصاميم بتاعتي دي وحشة؟؟؟

[al_manara]

انا فاكر ان كان ليك مشاركات وقولت هاتفتح محل قبل كدة (الحاجة الي ب 2.5 ) صح ولا انا غلطان ؟

[Ignition-Kid]

مش مستاهلة مصمم محترف ولا حاجة

الموضوع وجهة نظري جمالية مش أكتر
المصمم عبارة عن شخص مبدع .. وأخوه فارما شايف نفسه(نوعا ما) مبدع

يعني التصاميم بتاعتي دي وحشة؟؟؟

مش وحشه...بس مافيهاش جديد..المصمم المحترف هايديك افكار وهايطلع لوجو تحفه : )

[A7MED_PHARMA]

انا فاكر ان كان ليك مشاركات وقولت هاتفتح محل قبل كدة (الحاجة الي ب 2.5 ) صح ولا انا غلطان ؟

المحل إتفتح يوم 28/5/2011
وإنتقل إلي الرفيق الأعلى يوم 14 /10/2011
عن عمر يناهز الــ 5 شهور من الخسارة
هو مش خسر
بس ماكسبش أساسا .. 5 شهور شغل من غير مايدخل أكتر من مصاريفه بس
وأدي البضاعة في الكراتين قدامي أهه في الصيدلية .. كل ماخش أشوفها وأتحسر على الفلوس إلي خسرتها فيه

[yoko]

مش مستاهلة مصمم محترف ولا حاجة

الموضوع وجهة نظري جمالية مش أكتر
المصمم عبارة عن شخص مبدع .. وأخوه فارما شايف نفسه(نوعا ما) مبدع

يعني التصاميم بتاعتي دي وحشة؟؟؟

هو بس ههههههههههههه
حبيبي يا فارما ربنا يوفقك الأول
ثانيا اللوجوهات دي للأسف متنفعش
هو التاني تمام للأختام وكده عشان بسيط وأبيض وإسود
الشعار لازم تلعب فيه في الفونت شويه والخلفيه دي صعبه قوي لو لون واحد ديجراتيه هيبقى أشيك بكتير وممكن من غير إطار خارجي

[A7MED_PHARMA]

وإنت كمان ياهندذة مبدع
الشعار ده مش للاختام
ده علشان يكون على الـــ label الي هيتلزق ع القزازة

[yoko]

وإنت كمان ياهندذة مبدع
الشعار ده مش للاختام
ده علشان يكون على الـــ label الي هيتلزق ع القزازة

انا فاهم لو عاوز توفر وأبيض وإسود يبقى ده تمام
لكن شعار شركة ملون ولا واحد ينفع للأسف

[A7MED_PHARMA]

هي الفكرة إن عاوز شعار ملفت

لو تشوف الشركات الي بتعبي الكحول .. تلاقي الشعارات بتاعتها تضحك وكمان فيها أخطاء في الكتابة
وعاوز أوضح حاجة

مش معنى إني قلت شركة
إن الناس تتخيل إنها (شـــــــــــركة) زي الأفلام , رئيس مجلس إدارة , وسكرتيرة موزة أخون مراتي(أنا مش متجوز) معاها .. وموظفين وكده............
هههههههههههههههه
إوعى حد يفهم كده

المشروع يحمل إسم شركة
لكن مكون من
1. جراكن كحول سعة 20 لتر
2. عبوات بلاستيك أو زجاج سعة 60 مل
3. عبوات بلاستيك أو زجاج سعة 100 مل بخاخ
3. label
4.عربية توزيع ( للأسف هوزع بعربيتي)
5. مكان للتعبئة ( الشقة أو معمل الصيدلية)
6. إيد عاملة للتعبئة والتغليف (بنت+بنت)
بسسسسسسسسسسس


ودي بداية علشان ضعف الإمكانيات مؤقتا
لو مشى تمام
هيوسع وإشتريله عربية نص نقل .. وأعمل مكتب كامل وخطوط توزيع ومندوبين وخلافه
لكن ده هيكون level 2
إحنا لسه في level 1

لكن تقدروا تعتبروا إني صاحب ومدير ورئيس مجلس إدارة شركة .. يعني أدخل المطار من قاعة vip ياأوغاد

[رزق]

عاجبني فيك إنك مش عايز تكتفي بالشغل العادي زي الناس التانيين لكن بتدور إزاي تبقى صاحب شركة ما شاء الله
بص أنا من رأي المصمم المحترف وعايز اضيف إن نضافة العبوة والشكل الخارجي عامل مهم جدا جدا
يعني انزل كده بص على منتج منظف الزجاج في وطنية بتاعت الجيش وقارنه ب العلبة اللي جمبه ويندكس أو غيرها
حيصعب عليك حاله (أظنصناعة إدارة الحرب الكيماوية)
علبة زبالة وملزوق عليه ورقة ازبل وبتتباع بنفس التمن تقريبا
عمري ماشفتها بتتباع
حتى لو المنتج رائع


ماتحكيلنا إيه اللي حصل في موضوع ال 2.5 عشان نتابع معاك ..إيه اللي اتأزم

[A7MED_PHARMA]

ربنا يكرمك يارزق

أنا عارف طبعا إن أهم شئ في السلعة ... شكلها
وخصوصا إن المنتج واحد ..يعني الكحول هو هو
بس شكل المنتج بيفرق طبعا في البيع .. بيفرق جدااااااااااااااااا
وبعدين حكاية إني عاوز أكون صاحب شركة
بص
أنا عندي صيدلية .. وبقالي 4 سنين قاعد فيها بنفس الروتين .. بدون زيادة في الدخل (ده إن مكنش بيقل أساسا)
جربت التوسع على صغير..ودي كانت فكرة محل الاكسسوار
وفشل لأكتر من سبب .. أنا إشتريت حاجة جميلة زيادة عن اللزوم والتالي سعرها مكنشمناسب للمنطقة الي انا فتحت فيها
غير كده
الشهر الي أنا فتحت فيه المحل . 4 محلات تانيين فتحوا (في نفس الشهر والله)
ودي مشكلة الأرياف
فلان عمل مشروع .. يلا كلنا نعمل زيه
ودي مشكلة حقيقية بواجهها دلوفتي في الصيدلية ..
البلد إلي أنا فاتح فيها كان فيها 3 صيدليات .. وكنت أنا الرابع
خلال الشهرين الي فاتوا ( 3 صيدليات جداد إتفتحوا )
والشهر الجاي هيتفتح كمان إتنين

ودي مشكلة المصريين
شعب ( زيــه) .. فلان عمل .. نعمل زيه
يعني بأي حال شغل الصيدلية هيقل
فأنا محتاج شغل آخر .. حاجة ماتكونش واضحة للعيون
يعني
شقة مقفولة عليا .. في مدينة
عملية التعبئة تتم فيها .. المنتج ينزل في كراتين للعربية .. العربية تلف توزع .. بسسسسسسسسس

ماحدش بقا يشوف أنا بعمل إيه ولا بكسب كام .. علشان ماحدش ييجي يعمي ( زيــي ) ويقرفني

[رزق]

والله فكرة وربنا يوفقك فيها عشان فعلا إنت بتتكلم صح
فاكر أيام القهاوي؟ وأيام السيبر و أيام الكافيهات
عروض التيمشير
ده حتى في موضوع التصييف الناس اللي كانت بتصيف في الإسكندرية و العين السخنة و فايد بقت كلها على مرة واحدة (صدفة) بتصيف في مارينا

[BassamHafez]

ايه رايك في حاجه كده مثلا

طبعا مكان الصورة دي تكط لوجو يرمز لنوع الشغل بتاعك انا طبعا مش عارف ممكن يكون ايه بس قصدي حاجه زي علامه الصيدليه كده (انت اكيد فاهم قصدي)

طبعا ممكن تغير الالوان زي ما انت عايز انا بس بحاول اساعد في التصميم

[A7MED_PHARMA]

ربنا يكرمك على تعبك يابسام
تعبت نفسك وصممت ورفعت .. شكرا ليك جداااا
حلوة الفكرة
طيب أفكار تانية