موقف محرج ..!!!!!

[أشرف العدوي]

صدفة غريبة جداً جداًحصلت شهر 9/2005 ( مضحك و ليس محرج )
المهم انا كنت في عزاء لوالد زميل لي في العمل في مصر الجديد و اول ما دخلت لقيت واحد صاحبي بيتصل بيا المهم كنسلت عليه كذا مرة لقيته مصر رحت رادد عليه
لقيته بيعيط و بيقولي الحقني يا اشرف انا امي ماتت و مش عارف اتصرف روحت واخد بعضي و تاكسي على حسن محمد في الهرم و طول ما انا في السكة عمال اتصل بالناس و ابعتهم على صاحبي ده المهم روحت و عملنا الازم و طلعت في دماغ بباه ان الدفنة تبقى النهاردة ( الساعة 10.5 باليل و الله )المهم معرفناش نقنعه يستنى لحد الصبح
روحنا فتحنا المسجد و صلينا و طالعين على مقابر أكتوبر ( صاحبي ده اسمه طارق و ركب معاه واحد صاحبنا اسمه سعد الموضوع ده مهم )
المهم فضلنا ماشيين و دخلنا نحط بنزين و هما سبقونا و ما شوفناهومش بعد كدة المهم نتصل بطارق تليفونة مقفول نتصل بسعد تليفونه مقفول روحنا مقابر الفيوم نسأل مافيش جنازة جت ( احنا مكناش نعرف ان مقابر اكتوبر غير مقابر الفيوم كنا فاكرينها واحد )
المهم حوالي ساعتين نتصل بسعد و طارق و التليفونين مقفولين فين و فين لما تليفون طارق رن بس ماردش روحت متصل بسعد و الحمد لله تليفونه هو كمان رن ( كانت الساعة 1.30 باليل و الي حصل صعب يحصل او مستحيل )
أنا: ايوة يا سعد
سعد : ايوة
أنا : خلصتوا و لا لسة يا سعد
سعد : خلصنا ايه
أنا : مش انت سعد صاحب طارق
سعد : ايوة انا هو فيه ايه
انا : متبقاش غبي انا قصدي انتوا دفنتوا و لا لسة يا سعد ( انا كنت بتكلم زي أفلام زمان و الساعة تقريباً 1.45 باليل و الله)
سعد : انهيــــــــــــــــــــــــــــــــــــــــــــــ ــــــار ( انتو مين و عايزين مني ايه و يصرخ في التليفون انتوا قتلتوا مين و مبقتش عارف هو فيه ايه ربع ساعة بحاول اقنعه و هو صويت و عياط و هو مش عارف مين الي مات اصلاً )
فين و فين لما عرفت اهديه و عرفت بعد كدة ان النمرة غلط
بس صدفة غريبة ان الموبايلين مقفولين مع بعض و يتفتحوا مع بعض و الي يرد اسمه سعد و ليه صاحبه اسمه طارق
اما مقتدرش امسك نفس من الضحك و الله ما كنت قادر اخد نفس اصل بجد صوتوا و هو مخضوض يفطس من الضحك
تصدقوا لما حكيت الموقف ده لطارق قعد يضحك

[bee]

ههههههههههههههههههههههه
بجد مسخره
وموقف جميل وعلى فكره هو محرج نوعا ما عشان عشان يا عيني هوالي اتخض مش شايفه محرج

[bee]

مفيش تانى مواقف !!!!!!!!

[Terrible_DaRsH]

موضوع جامد اوى ومواقف تحفة ...
انا بقى حصل لى موقف كانه مشهد سينيمائي بالظبط ومش ممكن انساه ...
كنت لسه فى اولى اعدادى ولسه اول ايام ولاقيت العيال بتهرب وانا كنت مؤدب اووووووى فاستغربت !!
لاقيت واحد بيقولى تعالى اهربك قلت له لالالا مستحيل اعمل كده ... قالى تعالى يا عم علشان تروح بدرى واقنعنى انى اهرب ...
قلت يلا ياض هى جت عليك انت ... راح الواد ودانى للسور اللى فى اخر المدرسة فقلت له العيال بتهرب من هناك لسه احنا هنهرب من هنا ؟! قالى هنا احسن واسرع ....
هوب طلعت فوق الكشك بتاع الشاي والواد قالى تحتك قهوة اوعى تنزل عليها امشي على السور على طول وانزل فى اخره ....
قلت له ماشي .. من كتر ما انا مرعوب من الموقف اول ما وقفت على السور رحت واقع على (التاندة) بتاعت القهوة (اللى بتحجب الشمس)
وخدتنى ووقعت واتفاجئ بالناظر و 2 مدرسين قاعدين فى وشي على طول وانا واقع على الارض ......
من كتر ما انا ملخوم ومش عارف اعمل ايه رحت قايل لهم انا اسف اصل الواد بيهزر معايا ووقعنى من على السور عن اذنكم بقي ادخل تانى .
هههههههههههههههههههههههههههههه ... القهوة كلها ضحكت والناظر مقدرش يتكلم من الضحك ... واخدت جواب رفد هدية تانى يوم ...

[A.Saad]

طيب اسمع بئه

مره كنت نازله متاخره على الكليه

واقفه فى الشارع بدعى ربنا يعدى تاكسى بعد وقفه طويله لقيت تاكســى ((او تخيلت ))

وفيه واحد راكب جمب السواق قلت مش مشكله مضطره لانى متاخره
شاورت له وقف هــــــــــــــــــب رحت فاتحه الباب اللى وراء وركبــــــت قلت له الجامعـــــه لو سمحت الراجل بص للى جمبه ومشى لما قرب من الجامعه قلت له لو سمحت الباب الرئيسى لمـــــا وصلــت بدفع له الفلوس مرضيش ياخدها قالى لا مش عاوز فلــــــوس انا اترعبت ليه مش راضى ياخد فلوس قلت له طيب عاوز فلوس زياده لازم تاخد الاجره حضرتك عاوز كم بالظبط

قالى يا انسسسسسسسه انا مش عاوز فلوس لانى مش سواق تاكســـــــــى
ولا ن عربيتى مـــــــــــــلاكى مش تاكسى والراجل ده صاحبى وانتى شاورتى لنا وقفت افتكرتك هتسالى على مكان انتى هـــــــــــب فتحتى وركبتى


اى حد ممكن يتخيل الموقف ده الا انا مش قادره افتكره ساعتها اتمنيت العربيه تبلعنى او او ونش يجى ينزلنى من العربيه مقدرتش اتسمرت مكانى وهاتك يا اعتذرات وتاسف وششششى كان ف الارض من الراجل وصاحبه ومن تصرفى من الخضه لما نزلت قلت له انت ليه داهن عربيتك اسود ذى التاكسى

من بكرة كله يدهن اسود
او اقول الاصفر احسن

[A.Saad]

مرة كنت رايح تفتيش على فرع للشركة برة القاهرة ، واقف مع موظف بس انا كنت واقف ورا الباب فاللى جاى من برة ما يشفنيش
لقيت واحد جه قل للناس خدوا بالكوا استاذ احمد وصل
قمت فاتح الباب وقلت له انا هنا
بص هوة اللى اكسف مش انا

[نور القمر]

موقف محرج من اسيوعين تقريبا
متعودة اخلي صبو فلات في العربية علشان مش بعرف اسوق بكعب طبعا
وبعد ما نزلت من العربية وكنت مستعجلة عايزة الحق مصلحة حكومية قبل ما تقفل
بعد شوية حسيت اني مش مرتاحة وانا ماشيةوكانت الناس بتبص لي بصات غريبة
ببص لقيتني ماشية بفردة صبو فلات بيضا وفردة بكعب سودة
اساسا معرفش ازاي محستش بالفرق في الكعب
ههههههههههههههههههههه
حسيت اني هموت من الكسوف رجعت جري على العربية ظبطت المواضيع ههههههههههههه

قبل كدة كنت بخلي شبشب بيتي اسوق بيه
مرة لقيت عربية مولعه وعايزين طفاية نزلت جري بالشبشب ومشيت مسافه كبيرة لورا علشان ركنت بعيد عنهم
وانا راجعه اكتشفت اني ماشية بالشبشب البيتي في الشارع

[yahyanaabil]

مره وانا بمتحن امتحان التيرم وانا مكنتش بحضر محاضرات ومش عارف شكل الدكتور المهم وأنا بحل الامتحان جه واحد جنبى من منظره افتكرته الفراش فبيقولى عاوز حاجه فقولتله اتكل على الله امشى سيبنى اركز فقالى انه دكتور الماده فوقفت مش عارف اقوله ايه الصراحه

[EslaM_NagY]

ايام ثانوى كان معانا فى الفصل ابن احد الممثلين القدماء الى توفوا من زمااان
فا واحنا فى الفصل واحد صاحبنا تالت اول لما عرف ان ابوه ( الله يرحمه ) ممثل وهاتك اسئلة :-
هو بطل يشتغل ليه ؟؟
هو مش حيعمل افلام جديدة ؟؟
دا انا بحبه والله وافلامه كلها حافظها

وهو عمال يسأل زى المسدس مش عايز يسكت وانا عمال اقوله بس يبنى بس يا حبيبى وعمال اغمزله وبضربه بغباء عشان يسكت ولا حياة لمن تنادى.

شوية لما ابن الممثل دا قام بقولو يا غبى عمال اشاورلك تسكت من الصبح فبيقولى ليه مسألش ليه ؟
قولته اصل ابوه دا مات من سنة 1990 لقيت صاحبى دا وشه احمر فى ازرق فى بنفسجى
واول ما شاف ابن الممثل تانى قعد على مدار 3 حصص يتأسفله وانه مكنش يعرف والتانى يقوله خلاص وبرضو الاول مصمم انه يتأسف

كان يوووووووووم عجيب

[sendrella]

انا كنت في الكليه وعندي سكشن الساعه 2
المهم قلت ادخل اصلي
و للاسف الجزمه اتسرقت
طبعا ادور عليها مش لاقيها خالص
و السكشن معاده جه المصيبه اني كنت لازم احضر عشان رئيس القسم نازل

تخيلو منظري داخل السكشن متاخر و لابس قبقاب في رجليا
و المصيبه ان السكش سيراميك فماشي و القبقاب عمال يطرقع :) تك تك تك تك
و قاعد الدرس طويله وهما في اخرها
و ده بيزعئلي اتاخرت ليه ياولد
مردتش شاورتله علي القبقاب
و انفجرت ماسوره الضحك حواليا :) :)
بجد مش هنسي الموقف ده ابدا

ههههههههههههههههههههههههههههههههههههههههههههههه

ههههههههههههههههههههههههههههه

هههههههههههههههههه

ههههههههه


احلى موقف ممكن اسمعه في حياتي

بجد انت عبقرىىىىىىىىىىىىى يا نايل ستورم

تعيش و تاخد غيرها يا جميل
:k10:

[Nile_Storm]

ياه انتي لسه فاكره الموقف ده
دي كانت فضييييييييييييييييييييييييحه

مش ععارف ايه داء الالتزام بالحضور الي كنت فيه ده بقي بالذمه حد يحضر سكشن بالمنظر ده

[abouelmaggd]

كنا مرة طالعين اسكندرية ايام الجامعة انا و اتنين صحابى فى عز الشتا الجميل ومطر اسكندرية الفظيع و مكنش معانا عربية ، شقة صاحبنا كانت فى مدينة فيصل فى العصافرة و جايين مشى من الكورنيش لحد السكة الحديد على رجلينا و احنا فى شارع جانبى جنب الاكاديمية كده لقيت صاحبى بيقولنا ايه ده و بيشاور على يافطة فى الدور التانى ف عمارة لقينا مكتوب عليها ( الاستاذ عماد ملوخية المحامى ) و متعرفوش طلبت هبل و لآ تهييس و فضلنا طول الشارع ننادى يا ملوخية يا ملوخية بعد الساعة 2 بالليل و هوب لقينا بلكونات بتتفتح من كذا عمارة و رص يا معلم ( يا عيال يا بنت و يا بنت ..... و لو ما مشتوش الملوخية دى هنعمل بيها تيت و تيت .......... ) ، طبعا الجرى كل الجدعنة فى المواقف دى ، بس موقف فاكرينه لحد دلوقتى من اكتر من 6 سنين .

[pro_samir]

اية المواضيع الجامدة دى :d

ضحكت جدااا

مرة ايام الجامعة انا اصلا مكنتش بحضر خالص بسبب الشغل
المهم فى مرة روحت مش فاكر كان فى اية واضطريت اروح ودخلت المدرجات وكنت مسقط خالص وناسى كل حاجة
المدرج كان فاضى روحت قاعد فى تانى او تالت صف فى النصف بالظبط .. مفيش دقايق ولاقيت ماسورة بنات ضربت والمدرج اتملى بنات قدامى و ورايا وجنبى من الناحيتين

انا كنت ناسى خالص ان اول كام صف دول كلهم بيكونو البنات محتلينهم

المهم عملت فيها مش من هنا وفضلت قاعد شوية والدكتورة جت ومسكت المايك وقالت "الأخ هارون الرشيد اتفضل ورا لو سمحت " ههههههه


أيام الأمتحانات بقى دى تقريبا الأيام اللى كنت بروح فيها فقط
كنت بدخل من الباب الخاص بأعضاء هيئة التدريس وزى الباشا اركب الأسانسير واطلع على الدور الخامس اللى فية اللجنة
مرة من المرات عامل الأسانسير طبعا كان ملاحظ انى مش موجود كل يوم
فسألنى حضرتك شغال فين هنا
قلتلة لا الحقيقة انا مش شغال
قالى امال اية ؟ قلتلة بمتحن .. راح موقف الأسانسير ومنزلنى وقالى بعد اذنك بس علشان محدش يكلمنى دة لأعضاء هيئة التدريس ههههههه

مرة تانية من حوالى 6 سنين كنا فى رمضان ونازلين من الشغل جرى علشان لسة على سفر انا وكام واحد من اللى معانا فى الشغل ورايحين نركب المترو من كوبرى القبة

المهم داخلين جرررى والمترو واقف وكان هيتحرك دخلنا جرى هوب هوب روحنا ناطين فى العربية يدوب دخلنا الباب قفل
على ما الواحد خد نفسة وبعدين ببص حواليا لاقيت كل اللى فى العربية ستات هههههههه

طبعا وشى جاب ألوان والمحطة التانية جت ونزلنا جرررى ركبنا عربية تانية


وانا بكتب الرد دة دلوقتى اخويا لسة صاحى ولاقى عندة ميسد و جة قالى شوف كدة 023 دة مفتاح محافظة اية
انا اتهبلت وقعدت ادور اية 023 دة
اخر ما زهقت بقولة ورينى الرقم ... طلع رقم 02 وبعدين النمرة 3 وبعدين باقى الأرقام هههه

[bee]

موقف محرج من اسيوعين تقريبا
متعودة اخلي صبو فلات في العربية علشان مش بعرف اسوق بكعب طبعا
وبعد ما نزلت من العربية وكنت مستعجلة عايزة الحق مصلحة حكومية قبل ما تقفل
بعد شوية حسيت اني مش مرتاحة وانا ماشيةوكانت الناس بتبص لي بصات غريبة
ببص لقيتني ماشية بفردة صبو فلات بيضا وفردة بكعب سودة
اساسا معرفش ازاي محستش بالفرق في الكعب
ههههههههههههههههههههه
حسيت اني هموت من الكسوف رجعت جري على العربية ظبطت المواضيع ههههههههههههه

قبل كدة كنت بخلي شبشب بيتي اسوق بيه
مرة لقيت عربية مولعه وعايزين طفاية نزلت جري بالشبشب ومشيت مسافه كبيرة لورا علشان ركنت بعيد عنهم
وانا راجعه اكتشفت اني ماشية بالشبشب البيتي في الشارع

والله حرام عليكي يا نور
فردة وفردة ايه الشياكة دي

[Lion_Heart]

مواقف بجد محرجة جدا مقدرتش امسك نفسى عن القراءة من الأول للآخر .